“Runakunapa sonqonman chayanaypaqmi yanapawan”

QAYNA watakunallam, Brasilpa sur lawninpi Porto Alegre llaqtapi achka nacionniyoq runakuna huñunakurqaku sasachakuyninkumanta rimanankupaq. Waranqantin runakunam 135 nacionkunamanta rirqaku. Porto Alegre llaqtapi huknin congregacionmanta wakin Testigokunam rirqaku chay huñunakuypa kasqanman, samasqanku ratopi achka runakunaman predicanankupaq. ¿Imaynatam atirqaku paykunawan rimaytaqa?

Chay congregacionmanta Elizabete sutiyoq precursoram nin: “Buenas nuevas para gente de todas las naciones folletotam servichikurqaniku”. Nintaqmi: “Achkam haykapipas mana uyarisqakuchu Diospa Gobiernonmanta allin noticiataqa, ichaqa allintam uyariwarqaku. Bolivia, China, Francia, India, Israel hinaspa Nigeria nacionniyoq runakunawanmi rimarqaniku. Bibliamanta qellqanchikkunatam aparqaniku wakin huñunakuqkunapa idiomankupi, paykunaqa kusisqam chaskiwarqaku”.

Mexicomanta Raultapas chay folletoqa allintam yanaparqa. Huk kutipim chayllaraq viudo qeparuq Arabiamanta 80 watayoq huk señorta rimapayarqa. Diospa Gobiernonmanta árabe idiomapi chay folletopi leeruspanmi waqayta qallaykurqa. ¿Imanasqa? Llumpaytam admirakurqa wañuy manaña kananmanta Apocalipsis 21:3, 4 versiculopi Diospa prometesqanta rimasqan idiomanpi leespan. Huk kutipipas congregacionwan mana predicachkaspanmi Raulqa portugués idioma rimaq runata reqsirurqa. Paypapas churinmi wañukusqa. Raulmi chay runapa rimasqan idiomapi kichaykuspan folletota qoykurqa, leeyta tukuruspanmi chay runaqa Raulta nirqa Bibliamanta astawan yachay munasqantawan estudio chaskiy munasqantapas.

Buenas nuevas para gente de todas las naciones folletowanmi, Raul predicarqa alemán, armenio, chino, coreano, francés, hindi, inglés, mixe, persa, ruso hinaspa zapoteco idioma rimaqkunata. Paymi nin: “Cuentatam qokuruni predicacionpi kay folleto servichikuyqa ancha allin kasqanta. Runakunapa sonqonman chayanaypaqmi yanapawan paykunapa idiomankuta mana rimaptiypas”, nispa.

Aswan achka runakunam huk law nacionman rinku otaq astakunkupas, chaymi paykunawanqa achkawan tupanchik. Buenas nuevas para gente de todas las naciones folletota servichikuspaqa, atisunmi Diospa Gobiernonmanta willayta. ¿Servichikuchkankichu?

[32 kaq paginapi dibujokuna]

Runakunapa sonqonman chayananpaq yanapaqnin folletotam Raul servichikuchkan