Warmaykikunata yanapay Diospa llaqtanta astawan reqsinankupaq

WARMAKUNAQA yachaytam munanku. Taytakuna, ¿haykapipas piensarqankichu Egiptopi chayllaraq rurasqanku Pascua tutapi israelita warmakuna imakuna tapusqankumanta? Wakinqa kaynapaschá karqa: “¿Imanasqam wañuchina karqa malta carnerochata?”, “¿Imanasqataq taytayqa punkuta yawarwan chapuchkan?”, “¿Maymantaq risun?”, nispa. Chayna tapuykunawan Jehová Dios mana piñakusqantam qawanchik, hamuq tiempopi Pascua ruranankumanta israelita taytakunaman kamachispan kayna nisqanpi: “‘¿Imataq kay fiestapi rurasqaykichikqa?’ nispa churikichik tapusuptikichikqa kaynatam ninkichik: ‘Tayta Diospaq pascuapi wañuchina animalmi kayqa. Paymi Egipto nacionpi Israelpa mirayninkunapa wasinpa hawallanta pasarurqa, Egipto runakunatam ichaqa wañuchirqa, familiaykutaqa libraykurqamá’”, nispa (Exo. 12:24-27). Tiempo pasaptinmi israelita tayta-mamakunata Dios yuyachirqa kamachisqan ‘decretokunamanta hinaspa  reglamentokunamanta’ warmanku tapuptin kutichiy ancha allin kasqanta (Deu. 6:20-25).

Diosqa munarqam warmachakunapa cheqap yupaychaymanta tapukusqankuta contestanankuta, chaynapim kallpanchasqa tarikunmanku karqa Diosninkuta hinaspa Salvaqninkuta kuyanankupaq. Warmachakunapaqmi kunanpas chaynata munan. Diostawan Llaqtanta warmanku tukuy sonqowan kuyanankupaqqa, yanapanankum Diospa llaqtanta allinta reqsinankupaq, entiendechinankutaqmi allinninkupaq ima rurasqanmantapas. Qawasunyá Diospa llaqtanta warmakuna astawan reqsinankupaq imayna yachachinamanta wakin consejokunata.

Congregacionmanta

Warmakunaqa allintam reqsinanku familianpa kasqan congregacionta. Chaypaqmi tayta-mamakunaqa pusananku lliw huñunakuyman. Chaynatam kasukuchkanku israelitakunaman Diospa kayna kamachisqanta: ‘[Huñunkichikmá] qaritapas-warmitapas, wawakunatapas [. . .] uyarinankupaq chaynapi yupaychasqanchik Tayta Diosta respetanankupaq chaynataq chay yachachikuykunata kasukunankupaq. Chaynapimá chay yachachikuykuna manaraq yachaq churikichikkunapas chaykunata uyarispanku yupaychasqanchik Tayta Dios respetayta yachanqaku’ (Deu. 31:12, 13).

Warmakunaqa Diospa Palabranmantam yachanmanku wawachallaraq kasqanku tiempomanta. Pablom Timoteota nirqa: ‘Warmacha kasqaykimantaraqmi Bibliapi yachachikuykunataqa yacharqanki’, nispa (2 Tim. 3:15). Huñunakunanchik Salonpiqa warmachakunapas yachachikuykunataqa entiendenmankum hinaspa Diospa Gobiernonmanta takikunatapas yachanmanku. Chaypim Bibliatawan  qellqanchikkuna servichikuyta hinaspa cuidayta yachanku, chaymantapas cuentatam qokunku cheqap cristianokuna sonqomanta kuyanakusqankuwan reqsisqa kasqankuta. Jesusmi nirqa: “Mosoq kamachikuytam qoykichik, kuyanakuychikyá. Imaynam ñoqa kuyaykichik chaynayá qamkunapas kuyanakuychik. Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:34, 35). Huñunakuypi kuyanakuytawan hawkayayta qawasqankum warmachakunata gustanqa hinaspa yanapanqa huñunakuyman sapa kuti rinankupaq.

Salonman sapa kuti temprano chayaptikichik hinaspa huñunakuy tukuyta huk tiempo qepaptikichikqa warmaykichikkunam amistad rurayta atinqaku. Wiñaymasillankuwan mana hukllawakunankupaq, ¿imanasqataq mana reqsichinkichikchu huk iñiqmasinchikkunata hayka watayoq kaptinkupas? Mayor iñiqmasinchikkunaqa achka experienciayoq hinaspa yachayniyoqmi kanku, chaymi paykunawan kaspankuqa achkata yachanqaku. Imaynam ñawpaq tiempopipas Judapi mozollaraq rey Uziasta ‘Dios respetayta Zacarias entiendechisqan’ yanaparqa, chaynam kunanpas warmakunata yanapan tukuy sonqonkuwan unayña serviq cristianokunaqa (2 Cro. 26:1, 4, 5). Chaynataq, Salonpi tarikuspaykichikqa warmaykichikmanmi explicawaqchik librokuna waqaychana sitiomanta, willakuykuna laqana tableropi imakuna churanamanta hinaspa hukkunamantapas.

Allpantinpi Jehová Diospa llaqtanmanta

Warmachakunaqa yachanankum huñunakusqanku congregacion allpantinpi pachak waranqa masnin Diospa llaqtanpi congregacionkunapa parten kasqanta. Willaychik Diospa llaqtan imayna kasqanta, imapas imayna rurakusqanta hinaspa imata ruraspanku paykuna yanapanankumantapas. Yachachiychik imanasqam qamkuna ganaswan suyankichik huk punchaw, iskay hinaspa kimsa punchaw asambleata chaynataq congregacionkuna watukuq ancianopa hamusqanta (28 paginapi qawariy  “Familiawan Diosta Yupaychanapaq Tutapi estudianapaq” niq recuadrota).

Wasikichikpi mikunaykichikpaq invitaychik congregacionta watukuq ancianokunata, misionerokunata, betelitakunata hinaspa tukuy tiemponkuwan Diosta serviqkunata. Ama piensaychikchu warmaykichikpaq tiemponku mana kasqantaqa. Paykunaqa Jesustam qatipakunku, payqa kusikuywanmi warmachakunata chaskispa rimarqa (Mar. 10:13-16). Chay iñiqmasinchikkunapa willakusqankuta uyarispanku hinaspa Dios serviy kusichisqanta qawaspankuqa yaqapaschá munanqaku tukuy tiemponkuwan Dios serviyta.

¿Imatawanraqtaq rurawaqchik Diospa llaqtanta warmaykichik astawan reqsinankupaq? Allinmi kanman Los testigos de Jehová, proclamadores del Reino de Dios nisqa librota servichikuspa kaykunamanta familiawan estudiayqa: cristianokuna sonqomanta Dios kuyasqankumanta, humilde kasqankumanta, kasukusqankumanta hinaspa Allpantinpi allin noticia willasqa kananpaq paykunata Dios imayna servichikusqanmantapas. Servichikuwaqchikmi Diospa llaqtanpa rurasqan videokunatapas, ñawpaq hinaspa kunan tiempopi willakuykunamanta yachachinaykichikpaq. Atispaykichikqa nacionnikipi otaq huk nacionpi kaq Beteltapas watukuwaqchikmi. Chaywanmi warmaykichik yachanqa hinaspa mana qonqanqakuchu punta pachak watapi hina kunanpas Diospa kay allpapi llaqtan, confianza sirvientepa yanapayninwan allpantinpi lliw cristianokunata pusawasqanchikta hinaspa allin yachachikuykuna qowasqanchiktapas (Mat. 24:45-47; Hech. 15:22-31).

Paykunapaq hina ruraychik

Warmaykichikta yachachispaqa yuyariychik apostolninkunata Jesus imayna yachachisqanta. Huk kutipim paykunata nirqa: ‘Achkaraqmi ninay kachkan qamkunaman, ichaqa manaraqmi entiendewaqchikchu’,  nispa (Juan 16:12). Jesusqa manam achka yachachikuykunawanchu hukmanyachirqa, aswanqa allinta entiendenankupaqmi pisi-pisimanta cheqapmanta yachachirqa. Hinaptinqa, qamkunapas amayá hukmanyachiychikchu warmaykichiktaqa. Yanapaychik Diospa llaqtanta reqsinankupaq, chaytaqa ruraychik sapa kuti ichaqa pisi-pisillamanta. Chaynatam yanapankichik yachay munasqanku hinalla kananpaq hinaspa Diospa llaqtanmanta kusikuywan astawan yachanankupaqpas. Wiñasqankuman hina yuyariychik yachasqankunamanta hinaspa astawan yachachiychik.

Dioswan amistadninchik allin kananpaqmi congregacionqa anchata yanapawanchik. Chaymi Diosta serviypi rurayninkunata cumplinanpaq kallpanchakuq mozo-sipaskunaqa, aswan allin preparasqa kachkanku Satanaspa munaychakusqanpi mana allinkunata atipanankupaq (Rom. 12:2). Segurom kachkaniku Diospa llaqtanta warmaykichik astawan reqsinankupaq yanapasqaykichik kusichisunaykichikta. Munanikum Jehová Diospa bendicionninwan, warmaykichik payta hinaspa llaqtanta haykapipas kasukunankuta.

[28 kaq paginapi dibujo hinaspa recuadro]

 Familiawan Diosta Yupaychanapaq Tutapi estudianapaq

Qatiqninpim willakuchkan Diospa llaqtanmanta imakuna yachanamanta, chaykunaqa yanapasunkichikmi.

▪ Congregacionnikichikmanta yachachiychik. Willaychik haykapi hinaspa imayna qallarisqanmanta chaynataq kunankama mayqan Salonkuna servichikusqankumanta. Estudiasqaykichikmanmi invitawaqchik congregacionpi unay wataña serviqta warmaykichikpa tapukuyninta contestananpaq.

▪ Willaychik lliw huñunakuykunawan asambleakuna imapaq kasqanta hinaspa imapi warmakunata yanapananmanta.

▪ Willaychik Diospa llaqtanpi achka escuelakuna imapaq kasqanmanta. Experienciakunata willaychik chayna escuelakunamanta lloqsimuq cristianokuna imayna yanapakusqankumanta.

▪ Warmakunata yanapaychik allin noticiata sapa killa willakuyqa ancha allin kasqanmanta yachanankupaq. Yachachiychik Testigokunapa allpantinpi predicasqankumanta Anuario libropi lloqsimuq willakuyta rurasqankuwan imayna yanapanankumanta.

▪ Qawachiychik Diospa llaqtanpi tarikuq mozo-sipaskuna tukuy tiemponkuwan imakunapi serviy atisqankumanta. Chaymantam astawan willachkan Organizados para hacer la voluntad de Jehová libropa 10 kaq yachachikuynin.

▪ Yanapaychik imanasqa congregacionpi imapas chaynata rurakusqanmanta entiendenankupaq. Willaychik imanasqam mana ancha valorniyoqman rikchakuptinpas Jehová Diospa llaqtanpiqa munasqanchikman hina imatapas mana ruranamanta. Qawachiychik congregacionpi imapas ordenninpi rurakunanpaq ancianokunata kasukusqanku yanapasqanmanta.

[Dibujo]

Warmaykichiktaqa yanapanqam experienciayoq cristianokunawan amistad rurasqanku

[26 kaq paginapi dibujokuna]

Ñawpaq Israelpi hinam, warmachakuna Jehová Diospa llaqtanmanta tapuptinkuqa tayta-mamanku kallpanchakunku allinta contestanankupaq