Jehová Diosqa uyarinmi llakisqakunapa mañakusqanta

YACHAYNIYOQ rey Salomonpa nisqanman hinam ‘sapakamata’ qonqaymanta imapas pasawanchik (Ecl. 9:11). Ichapas hatun sasachakuypi tarikuchwan otaq llaki qatiruwachwan hinaptin imayna tarikusqanchik cambiarunman. Ejemplopaq, qonqaymanta pi ayllunchikpa wañukusqanqa llumpa-llumpay llakisqatam tarichiwanchik. Wakinkuqa semanantinmi otaq killantinmi sinchi llakisqa hinaspa mana suyakuyniyoq hina tarikunku. Wakinpiqa llumpay hukmanyasqa tarikuspankum orakuytapas mana atinkuchu.

Chayna tarikuqkunaqa necesitankum kallpanchanata, yanapanata hinaspa kuyanata. Salmos qellqaq Davidmi hawkayachikuq takipi nirqa: “Diosmi takyachin llapallan wichiqkunata. Paytaqmi hoqarin wichisqakunata”, nispa (Sal. 145:14). Bibliapa huknin libronta qellqaqpas kaynatam nirqa: “Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq”, nispa (2 Cro. 16:9). Diosmi niwanchik ‘ñakarichisqakunapiwan’ ‘humillachisqakunawan’ kasqanta hinaspa ‘humillachisqakunata valorchananmanta’ chaynataq ‘ñakarichisqakunata kallpanchananmanta’ (Isa. 57:15). Ichaqa, ¿imaynatam yanapan hinaspa consuelan llakisqa kaqkunata?

‘Tiempollanpi rimarisqa palabra’

Diosqa serviqninkunatam kallpanchan congregacionta servichikuspa. Bibliaqa niwanchikmi ‘hukmanyasqakunata kallpanchanapaq’ (1 Tes. 5:14). Kuyakuq kasqankuta qawachispankum, cristianokunaqa llakikuypi hinaspa nanaypi tarikuqkunata hawkayachinmanku. Pisi rimasqallankupas allintam kallpanchanman, astawanraq ñawpaqpi chayna sasachakuypi tarikuq cristiano otaq yachayniyoq hinaspa experienciayoq amistadnin rimapayaptinqa. Chaynatam Jehová Diosqa kallpanchan llumpay llakisqa tarikuqkunata.

Rimarisunchik Alex sutiyoq ancianomanta. Manaraq unay tiempo casarasqa kachkaptinmi, señoran qonqaymanta wañukurqa mana hampiy atina onqoywan. Consuelaqmi rirqa congregacionkunata watukuq kuyapayakuq anciano, paypa señoranpas wañukurqam ichaqa kaqmantam casarakururqa. Rimasqankupim willarqa achka kutipi mana kallpayoq hinaspa hukmanyasqa tarikusqanmanta. Huñunakuypi otaq predicacionpi iñiqmasinkunawan kaspanqa kallpanchasqam tarikuq, ichaqa wasinman chayaruspan punkuta wichqaykuspanmi sapallan kasqanta piensaq. Alexmi nin:  “¡Hawkayachiwarqam hukkunatapas chayna pasasqanmanta yachayqa!”, nispa. Qawasqanchikman hinaqa, ‘tiempollanpi rimayqa’ allintam yanapan hinaspa consuelan llakisqa tarikuqkunata (Pro. 15:23).

Viudo otaq viuda iñiqmasinchikkunata reqsiq ancianopas Alextam maskarqa paywan rimaspa kallpanchananpaq. Paypa lugarninpi churakuspanmi, qawachirqa imayna tarikusqanchiktawan necesitasqanchikta Jehová Dios yachasqanmanta. Nirqam: “Killakuna otaq watakuna pasaptinqa ichapas necesitanki vidapasaqmasikita. Chayna kaptinqa, Diosqa manam harkasunkichu kaqmanta casarakunaykitaqa”, nispa. Manamá lliw viudokunachu munaspankupas kaqmantaqa casarakunku. Ancianopa nisqanpi yuyaymanaspanmi Alexqa kaynata nirqa: “Wakinpiqa piensanim kaqmanta casarakuspayqa señoraytawan Jehová Diosta traicionasqayta. Chaymi hawkayachiwan chayna rurayta Dios mana harkakusqanmanta pipas yuyarichiwasqanqa”, nispa (1 Cor. 7:8, 9, 39).

Davidmi tukuy imawan hinaspa desgraciakunawan anchata ñakarirqa. Huknin qellqasqanpim nirqa: “Diosqa cuidaykuchkanmi allin ruraq runata. Tayta Diosqa uyarintaqmi mañakusqankunata”, nispa (Sal. 34:15). Jehová Diosqa tiempollanpim uyarin sinchi llakisqakunapa qayakusqankutaqa. Chaytam ruran experienciayoq hinaspa llakipayakuq iñiqmasinchikpa allin rimasqankuwan. ¡Mayna allin yanapakuymi chayqa!

Huñunakuykunaqa anchatam yanapawanchik

Llumpay llakisqa tarikuq iñiqmasinchikkunaqa mana allinta piensaspankum wakinkumanta karunchakuyta qallaykunmanku. Proverbios 18:1 nin: “Runamasinmanta rakikuq runaqa kikillanpaqmi imatapas maskachkan. Allin tanteaqkunapa consejasqantam payqa harkakuchkan”, nispa. Alexmi nirqa: “Señorayki wañukuptinqa mana allin piensaykunam hamusunki. Ñoqaqa sapa kutim tapukurqani: ‘¿Yaqachu allinta rurarqani, icha imatawanmi rurayman karqa? ¿Aswan entiendeq hinaspa llakipayakuqchu kayman karqa?’. Manataqmi munarqanichu sapallay nitaq chaynalla kaytapas. Sasam chayna piensayta  saqeyqa, sapa punchawmi yuyarinki ladoykipi mana pipas kasqanta”.

Sinchi hukmanyasqa tarikuspaqa ima tiempomantapas astawanmi allin amistadkunata necesitanchik, chaytam tarichwan huñunakuykunaman rispa. Chaypim yuyayninchikta kicharinchik yanapakuq hinaspa kallpanchakuq Diospa yachachikuyninkunata uyarinapaq.

Huñunakuyqa yanapawanchikmi sasachakuyninchikta imam kaqta qawanapaq. Chaypi nimusqanku textokunapi yuyaymanaspam, ñakariyninchikkunata qonqarunchik hinaspa puntataqa piensanchik Diospa kamachinanpaq derechonta defiendenamanta hinaspa sutin chuyanchasqa kananmantapas. Chaymantapas, wakinkuna imayna tarikusqanchikmanta mana cuentata qokuptinkupas otaq mana sumaqta entiendewaptinchikpas, kallpanchawanchikmi sasachakuyninchikta Dios yachasqanmanta yuyarisqanchik. Payqa yanapaytam munawanchik, yachanmi ‘sonqonchik llakisqa kaptin [. . .] hukmanyasqa kasqanchikta’ (Pro. 15:13). Chaymanta yachasqanchikmi yanapawanchik ñawpaqman rinapaq hinaspa kallpanchawanchik (Sal. 27:14).

Enemigonkunapa qatikachasqan kaspanmi David qayakurqa: “Sonqollaymi pasaypaqta hukmanyarun. Pensamientollaymi pasaypaqta musparun”, nispa (Sal. 143:4). Payta hinam sasachakuykunaqa pisipasqata hinaspa hukmanyasqata tarichiwachwan. Ima onqoyña qonqaymanta hapiruwaptinchikpas otaq huk onqoywan tukuy tiempo kawsananchik kaptinpas hinaspa ima sasachakuywanña kaspapas segurom kachwan aguantanapaq Dios yanapawananchikmanta (Sal. 41:1-3). Kunan tiempopi milagrota ruraspa mana sanoyachiwaspanchikpas, aguantanapaqmi yachaytawan kallpata qowanchik. Llumpay sasachakuypi kaspanmi Davidqa Jehová Diospi hapipakurqa. Kaynatam qellqarqa: ‘Pasaq tiempokunamantam yuyarillani. Llapa rurasqaykikunapim yuyaymanani. Atiynikiwan rurasqaykikunapim piensani’, nispa (Sal. 143:5).

Kayna nisqanmanta Palabranpi kananpaq Diospa qellqachisqanmi qawachin, imayna tarikusqanchikmanta entiendesqanta hinaspa mañakusqanchikta uyarisqantapas. Yanapayninta chaskiptinchikqa “payñam cuentallikunqa” ñoqanchikmanta (Sal. 55:22).

“Tukuy tiempoyá Diosta mañakuychik”

Santiago 4:8 nin: “Diosman asuykuptikichikqa paypas asuykusunkichikmi”, nispa. Paymanqa asuykusun mañakuspam. Pablom consejarqa ‘tukuy tiempo [. . .] mañakunamanta’ (1 Tes. 5:17). Sientesqanchikmanta mana rimayta atiptinchikpas, ‘chuya espiritum Diosta mañapuwanchik runapa mana atinan rimaykunawan’ (Rom. 8:26, 27). Jehová Diosqa entiendenmi imayna sientekusqanchikta.

Dioswan chayna sumaq amistad ruraq Monikam nin: “Dioswanmi allin amistadta ruraruni mañakuspay, Bibliata leespay hinaspa sapay estudiaspay. Cuentatam qokuni hichpallaypi kasqanta hinaspa tukuypi yanapawasqanta. Imayna tarikusqaymanta mana explicayta atiptiypas hawkayachiwanmi paypa entiendewasqanmanta yachasqay. Yachanim kuyakuyninwan sumaq sonqo kasqan wiñaypaq kasqanta”.

Hinaptinqa, saqekusunyá iñiqmasinchikkuna consuelawananchikta hinaspa kuyakuyninta qawachiwananchiktapas. Huñunakuykunapi kuyakuywan hinaspa kallpanchaq consejokunatawan kamachikuykunata kasukusun. Chaynataq tukuy sonqonchikmanta orakusun. Ama qonqasunchu, chaynata Dios kuyakuyninta qawachiwasqanchikmanta. Kikinpa pasasqanwanmi Alex nin: “Diosmi servisqanchikpi allin kanapaq achka yanapakuyta qowanchik. Kallpanchakuspanchik hinaspa paypa yanapawasqanchikta allinta servichikuspaqa, ‘hatu-hatun atiyta’ chaskispam ima sasachakuytapas aguantasun” (2 Cor. 4:7).

[18 kaq paginapi dibujo hinaspa recuadro]

Llakisqa tarikuqkunapaq consuelo

Salmos libropim achka kutita qawachin, sasachakuykunapi kaspanku Diosta serviqkuna llumpay llakisqa kasqankumanta. Achka kutitataqmi qawachin mañakusqankuta Dios uyarisqanmantapas. Chaytam qawachin qatiqninpi textokuna:

‘Sasachakuyllapi kaspam Tayta Diosta qayakullani. Yanapaykuwananpaqmi Diosnillayman qaparillani. Payllamriki templonmanta uyarirqa qayakusqaytawan [. . .] ñoqallaypa qaparisqayta.’ (Sal. 18:6.)

‘[Diosqa] llakisqa runapa hichpallanpim sayaykun. [. . .] Tayta Diosqa salvaykunmi.’ (Sal. 34:18.)

“[Diosqa] llakisqa sonqoyoqkunatapas consuelaykunmi. Payqa heridankunatapas hampiykunmi.” (Sal. 147:3.)

[17 kaq paginapi dibujo]

¡Llakisqa tarikuqtam anchata consuelan ‘tiempollanpi rimasqa palabraqa’!