Mozo-sipas, ¿imatam vidaykiwan ruranki?

‘Peleaniqa [manam] yanqalla takachkaq hinachu.’ (1 COR. 9:26.)

1, 2. ¿Imatam necesitanki vidaykipi allin kanaykipaq?

MANA reqsisqayki llaqtaman tutayaypi rinaykipaqqa, necesitankim achkita hinaspa mayninta rinaykipaq yanapasuqniki runatapas. Mayman risqaykita mana yachaptikiqa, manam llumpaytachu yanapasunki achkipas hinaspa yanapasuqniki runapas. Chaymi hina kaqllapi mana muyurinaykipaqqa yachanayki mayman rinaykita.

² Qamqa chayllañam yuyayniyoqña kanki, chaymi tutayaypi mana reqsisqan llaqtaman riq runa hina tarikunki. Ichaqa, chay ejemplopi hinam, makikipi kachkan allin kanchaq achki. Chayqa Bibliam, allintam yanapasunki maynin riyta allinta akllanaykipaq (Pro. 3:5, 6). Chaynataq kapusuchkanki mayninta rinaykipaq yanapasuqniki, chayqa concienciaykim. Allin yachachisqa kaspanqa, yanapasunkim allin ñanpi hinalla purinaykipaq (Rom. 2:15). Ichaqa vidaykipi allin kanaykipaqqa yachanaykitaqmi mayman risqaykita otaq ima haypay munasqaykitapas.

3. Pablopa 1 Corintios 9:26 nisqanman hina, ¿imaynatam yanapawanchik imatapas haypanapaq tanteasqanchik?

³ Ima rurananta allinta yachasqan hinaspa haypananpaq kallpanchakusqan yanapasqanmantam Pablo kaynata nirqa: “Ñoqaqa kallpani manam ñawsa hinachu nitaqmi peleanipas yanqalla takachkaq hinachu”, nispa (1 Cor. 9:26). Ima ruray munasqayki sutilla kaptinqa, yachankim mayman chayayta. Pisi tiempollamantam tanteanaykiña kanqa Dios serviymanta, llamkaymanta, casarakuymanta hinaspa familiamantapas. Wakinpiqa tukuy imata ruray munasqaykiwanchá iskayrayasqa tarikunki. Ima ruray munasqaykita tiempowan akllaspayki hinaspa Bibliapa nisqankunawan yanapachikuspaykiqa manam pantasqa ñanpiqa tarikunkichu (2 Tim. 4:4, 5).

4, 5. a) ¿Imataq pasanman imatapas ruranaykipaq mana tanteaptikiqa? b) Manaraq imatapas tanteachkaspa, ¿imanasqataq tapukunayki Diospa agradonpaq kasqanmanta?

⁴ Imata ruranaykipaq kikiki mana tanteaptikiqa, estudiaqmasikikunawan profesornikikunam qampaq imam allin kasqanta piensaspanku tanteapusunki. Qamqa atiwaqmi ima ruranaykimanta tanteakuyta, ichaqa hukkunapas piensasqankumantaqa nisunkim. Nisusqaykita uyarispa tapukuy: “¿Yanapawanqachu Unanchaqniyta yuyarinaypaq icha sasachawanqachu payta servisqaypi?”, nispa (leey Eclesiastes 12:1).

⁵ Manaraq imatapas tanteaspaykiqa allinmi kanman Diospa agradonpaq hina kasqanmanta tapukuynikiqa. ¿Imanasqa? Tukuy ima kapusuqnikita pay qosusqaykirayku (Sant. 1:17). Runakunaqa Diostam tukuymanta debekunchik (Apo. 4:11). Ancha agradecesqam tarikunanchik, chaytam qawachisun imata ruranapaqpas paypa munasqanman hina tanteaspa. Chaymi qatiqninpi qawasun imakunata ruranapaq tanteakuy allin kasqanmanta hinaspa imaynata haypanamantapas.

¿Imakunata haypanaykipaqmi tanteakuwaq?

6. ¿Imata ruranaykipaqmi kallpanchakunayki, hinaspa imanasqa?

⁶ Ñawpaq estudiopi yachamusqanchikman hinaqa, kallpanchakunaykim Bibliapa yachachisqankuna  cheqap kasqanta kikikipuni yachanaykipaq (Rom. 12:2; 2 Cor. 13:5). Compañeroykikunaqa hukkuna yachachiptinchá creenku runakuna monomanta rikurimusqanpi otaq religionkunapa pantay yachachisqankupipas. Qamqa manam paykuna hinachu kanayki. Jehová Diosqa munanmi yuyaynikita servichikuspa pay servinaykita (leey Mateo 22:36, 37). Munantaqmi kikiki allinta yachaspayki iñiyniyoq kanaykitapas (Heb. 11:1).

7, 8. a) ¿Imakunata kunankunalla ruranaykipaq tanteasqaykim yanapasunki iñiyniki allin kananpaq? b) ¿Imaynam tarikunki chay tanteasqaykikunata hayparuspaqa?

⁷ Iñiyniki allin kananta munaspaykiqa, ¿imanasqataq mana kallpanchakunkichu tanteasqaykita chaylla haypanaykipaq? Punta kaqqa kanman: sapa punchaw mañakuymi. Orakusqayki allin hinaspa imamantapas sutilla kananpaqqa, punchawpi ima pasakusqanmanta qellqaruy otaq umaykipi takyachiy chaykunamanta mañakunaykipaq. Amayá sasachakuyllamantachu willayqa, willaytaqyá imapas kusichisusqaykimanta (Fili. 4:6). Iskay kaq: kallpanchakunaykim Bibliata sapa punchaw leenaykipaq. ¿Yacharqankichu 4 paginata sapa punchaw leespayki huk watallapi tukurunaykita? * Salmo 1:1, 2 nisqanman hinaqa ‘mayna kusisqam [. . .] Diospa tukuy ima yachachisqanta kuyaspa [. . .] tuta-punchaw’ yuyaymanaq runaqa.

⁸ Kimsa kaq: preparakunaykim sapa huñunakuypi hukllatapas rimanaykipaq, chaytaqa kunankunallam rurawaq. Qallariypiqa munankipaschá huk textota otaq parrafomanta leeyta. Tiempopa risqanman hinaqa, kikikipa rimasqaykiman hinañam rimawaq. Ama qonqaychu: sapa kuti rimaspaykiqa Jehová Diosmanmi regalota qochkanki (Heb. 13:15). Diosta servisqaykipi chaykunata hayparuspaqa kikikimantam aswan seguro kanki, payta  astawan agradecekunki hinaspa aswan preparasqa kanki hamuq tiempopi ima ruray munasqaykita haypanaykipaq.

9. Manaraq predicaq kaspaykiqa, ¿hamuq tiempopi imata ruranaykipaqmi tanteawaq?

⁹ ¿Hamuq tiempopi imata haypanaykipaqmi tanteawaq? Manaraq predicaq kaspaykiqa, ancha allinmi kanman lloqsinaykipaq tanteayqa. Predicaqña kaspaykiqa manam saqenaykichu huk killallapas predicaytaqa. Chaymantapas, yachanaykim predicacionpi Bibliata yachaywan servichikuyta, chaymi predicaspayki aswan kusisqa tarikunki. Allintaqmi kanman wasin-wasinta astawan predicanaykipaq tiempochakuyniki hinaspa Bibliamanta estudio qoypas. Predicaqña kaspaykiqa, ¿manachu ancha allin kanman Jehová Diosman qokuyniki hinaspa bautizakunaykipaq imakunawan cumpliynikipas?

10, 11. ¿Hamuq tiempopi ima ruray haypanankupaqmi bautizasqa mozo-sipaskunaqa tanteanmanku?

¹⁰ Bautizasqaña kaspaqa, hamuq tiempopi imapas haypanaykipaqmi tanteawaq. Ejemplopaq, wakin kutipiqa yanapawaqmi mana ancha predicakusqan lawkunapi huk congregacion predicaptin. Otaq kallpaykitawan saludnikipi allin tarikusqaykita servichikuwaq precursor auxiliar otaq regular kanaykipaq. Waranqantin iñiqmasinchikkunam tukuy tiemponkuwan chaynata servinku. Kusikuywanmi willasunki chaynata servispanku achka bendicionkuna chaskisqankumantawan Unanchaqninkuta mozo-sipas kaspanku yuyarisqankumantapas. Chaykunatam haypayta atiwaq tayta-mamaykiwanraq tarikuspayki. Congregacionnikipas yanapasqam kanqa chayna rurasqaykiwanqa.

¹¹ Chaynataq, kallpanchakuwaqmi congregacionnikimanta lloqsispa hamuq tiempopi ima rurayta haypanaykipaqpas. Ichapas tanteawaq nacionnikipi otaq huk nacionkunapi yanapanata necesitaq lawkunaman rinaykipaq. Chaymantapas, Salonkunata otaq huk nacionkunapi Betel wasikuna ruraypi llamkanaykipaqmi piensawaq. Otaq munawaq Betelpi serviyta hinaspa misionero kaytapas. Ichaqa, kaykunamanta manaraq tanteachkaspam puntataqa bautizakunaykiraq. Manaraq bautizasqa kaspaykiqa, yuyaymanay chay ruray ancha valorniyoq kasqanmanta.

Bautizakunaykipaq tanteay

12. ¿Imanasqataq wakin mozo-sipaskunaqa bautizakuyta munanku, hinaspa imanasqataq chayrayku bautizakuyqa mana allinchu?

¹² ¿Imanasqataq pipas bautizakunan? Wakin mozo-sipaskunam bautizakuyta munanku huchaman mana wichiykunankupaq, wakinkunañataqmi amistadninkuta qatipakuspanku otaq tayta-mamankuta kusichinankupaq. Bautismoqa manam allinta portakunaykipaq hinaspa sonqoykipa munasqankunata mana ruranaykipaq obligasuqniki contratochu. Manataqmi hukkuna hikutasuptikichu bautizakunayki. Chaytaqa ruranayki Jehová Diospa testigon kay ima ninan kasqanmanta allinta entiendespayki hinaspa chayman hina kawsanaykipaq preparasqa tarikuspaykim (Ecl. 5:4, 5).

13. ¿Imanasqam bautizakunayki?

¹³ Imanasqa bautizakunamantam Jesusqa qatiqninkunata kaynata nirqa: ‘Qatiqniykunaña kanankupaqyá [. . .] bautizamuychik’, nispa. Kikinmi ejemplota qorqa yakupi bautizakuspa (leey Mateo 28:19, 20 hinaspa Marcos 1:9). Chaymantapas bautizakuyqa ancha allinmi salvakunapaq. Noeypa hatun buque rurasqanmanta hinaspa familianpiwan Sinchi paramanta chaypi salvakusqankumanta rimaruspanmi Pedro nirqa: ‘Chay yakum rikchakun bautizakuna yakuman, chaywanmi ñoqanchikpas salvasqa kanchik [. . .] Jesucristopa kawsarimusqanwan’, nispa (1 Ped. 3:20, 21). Ichaqa manam tukuy peligromanta harkasuqnikita hinatachu bautizakuytaqa qawanayki, chaytaqa ruranayki Jehová Diosta kuyaspayki hinaspa tukuy sonqoykiwan, vidaykiwan, yuyaynikiwan hinaspa kallpaykiwan serviyta munaspam (Mar. 12:29, 30).

14. ¿Imanasqataq wakinkuqa manaraq bautizakunkuchu, ichaqa imamantam seguro kawaq?

 ¹⁴ Wakinkuqa manam bautizakunkuchu tiempo pasaptin congregacionmanta qarqosqa kayta manchakuspanku. ¿Chaynatachu qampas piensanki? Manchakuyqa manam llapanpichu mana allin kanman. Qawachichkanmanmi Diospa testigon kayqa mana yanqalla kasqanmanta entiendesqaykita. Chaymantapas, ¿imanasqapiwanmi mana bautizakunkuchu? Ichapas iskayrayachkanku Diospa kamachikuynin kasukuy allinninkupaq kasqanmanta. Chayna kaptinqa, Bibliapa nisqanta mana kasukuqkunata ima pasasqanmanta yuyaymanaymi yanapasunki. Wakinpiqa ichapas Diospa nisqankunapi confianki, ichaqa manapas segurochu kanki tukuy tiempo cumplinaykimanta. Chayna tarikuypas manam huchachu, qawachichkanmanmi humilde kasqaykita. Bibliam nin sonqoqa pantaqllaña hinaspa engañakuqllaña kasqanta (Jer. 17:9). Ichaqa segurom kawaq Diospa mañasusqaykita ruray atisqaykimanta. ¿Imaynata? ‘Palabranta kasukuspaykim mana huchallikuspa kawsawaq.’ (Leey Salmo 119:9.) Hinaptinqa, bautizakuymanta iskayrayaspaykiqa otaq preocupakuspaykiqa, kallpanchakuy chaymanta allinta entiendenaykipaq. *

15, 16. ¿Imaynatam yachawaq bautizakunaykipaq listoña kasqaykita?

¹⁵ Ichaqa, ¿imaynatam yachawaq bautizakunaykipaqña kasqaykita? Kayna tapukuykunata kutichispa: “¿Atiymanchu Bibliapa sutilla yachachisqankunamanta explicayta? ¿Predicacionman rinichu tayta-mamay mana lloqsiptinpas? ¿Lliw huñunakuymanchu rini? ¿Yaqachu willayman hukkuna hikutawasqanku aguantasqaymanta? ¿Hinallachu Diosta servisaq tayta-mamaykunawan amistadniykuna manaña serviptinkupas? ¿Diosman nirqanichu paywan amistadniyta ancha chaninchasqaymanta? ¿Yaqachu Diosta mañakuspay tukuy sonqoywan payman qokuruniña?”

¹⁶ Allintam tanteana bautizakunapaqqa. Manam qonqayllamantachu chaytaqa rurana. ¿Yaqachu yuyayniyoqña kanki bautizakuypi piensanaykipaq? Yuyayniyoqqa manam allin demostracionta otaq discursota qoqllachu nitaq huñunakuykunapi rimasqanwan iñiqmasinkunata admirachiqllachu. Yuyayniyoq runaqa Bibliapa nisqanman hapipakuspanmi imatapas tantean (leey Hebreos 5:14). Sichu bautizakunaykipaq iñiynikipi ñawparirunkiña, hinaspaqa ancha favorecesqam tarikunki Diosta tukuy sonqoykimanta servinaykipaq hinaspa sapa punchaw imayna kawsasqaykiwan qokusqaykita qawachinaykipaqpas.

17. ¿Imam yanapasunki iñiyniki pruebasqa kaptin aguantanaykipaq?

 ¹⁷ Bautizakuruspaykiqa ancha kusisqallañachá kanki Diosta servisqaykiwan. Ichaqa iñiynikitawan Diosta hinalla serviy munasqayki pruebasqa kananpaqmi sasachakuykuna rikurimunqa (2 Tim. 3:12). Manam sapallaykichu chaykunataqa atipanayki. Tayta-mamaykita consejota mañakuy. Experienciayoq iñiqmasikikunapa yanapayninta maskay. Diosta hinalla servinaykipaq yanapasuqnikikunawan amistadta ruray. Chaynataq, ama haykapipas qonqaychu Jehová Dios kuyasusqaykita hinaspa imataña aguantanaykipaqpas kallpata qosunaykimanta (1 Ped. 5:6, 7).

¿Imaynatam haypawaq ruray munasqaykita?

18, 19. ¿Imanasqataq imakunata puntapi churanaykimanta yachayqa ancha allin?

¹⁸ ¿Piensankichu maynata kallpanchakuptikipas tukuy ruranaykitawan munasqaykikunata ruranaykipaqpas tiempo mana haypasusqaykita? Chayna kaptinqa, imam puntapi ruranayki kananmantam tanteanayki. Kaynata tupachisun: baldeman hatun rumikunata achkata churaruwaq. Chaymantañataq huntanankama aqota churawaq. ¿Imam baldepi kachkan? Huntam kachkan rumi hinaspa aqo. Ichaqa, ¿imataq pasanman baldeta taqtaruspa, puntata aqota chaymantañataq rumikunata kaqmanta churaykuptikiqa? Aqota puntata churaruptikim wakin rumikunaqa manaña yaykunqachu.

¹⁹ Chaynam pasan tiemponchikta imayna servichikusqanchikwanpas. Vidaykipi kusirikuykunata puntapi churaptikiqa, aswan allin ruraykunapaqmi tiempoyki manaña kanqachu. Ichaqa, ¿imataq pasanman Bibliapa nisqanman hina ‘allin kaqkunamanta’ segurakuptikiqa? (Fili. 1:10.) Kanqam tiempoyki Diospa kaqkunata ruranaykipaq hinaspa wakin kutipi kusikunaykipaqpas.

20. ¿Imatam rurawaq imatapas haypanaykipaq preocupasqa hinaspa iskayrayasqa tarikuspaykiqa?

²⁰ Bautizakuyta otaq imapas munasqaykikunata haypanaykipaq kallpanchakuspaykipas, wakinpim preocupasqa hinaspa iskayrayasqa tarikunki. Chayna kaptinqa, ‘Diosmanyá qoykuy preocupasqa kasqaykita. Payñam cuentallikunqa qanmantaqa’ (Sal. 55:22). Kunanmi qamqa atiwaq ima ruraymantapas aswan allin kaq rurayta: yanapakuwaqmi enteron pachapi predicacionpi hinaspa runakunata yachachiypipas (Hech. 1:8). ¿Imatataq ruranki? ¿Qawayllachu-qawanki icha tukuy kallpaykiwanchu yanapakunki? Aswan allinqa Diosta serviypi imapas ruray atisqaykita servichikuymi. Manam haykapipas ñakakunkichu ‘mozollaraq kachkaspayki unanchaqnikita yuyarisqaykimantaqa’ (Ecl. 12:1).

[Willakuykuna]

¿Imaynatam contestawaq?

• ¿Imanasqam imatapas haypanaykipaq tanteakunayki?

• ¿Imakunata haypanaykipaqmi kallpanchakuwaq?

• ¿Imaynatam haypawaq bautizakunaykipaq tanteasqaykita?

• ¿Imanasqataq imakuna puntapi churasqaykita qawakunayki tanteasqaykikunata haypanaykipaq?

[Kay yachachikuypa tapukuyninkuna]

[13 kaq paginapi dibujo]

¿Tantearunkiñachu Bibliata sapa punchaw leenaykipaq?

[15 kaq paginapi dibujo]

¿Imaynatam haypawaq bautizakunaykipaq tanteasqaykita?

[16 kaq paginapi dibujo]

¿Imatam yachachisunki kay rikchanachiy?