Rurasqankunaqa paywanmi kachkan

JEHOVÁ DIOSPA Llaqtanpi Punta Apaq Theodore Jaracz sutiyoq cristianom, kay Pachapi servisqanta tukururqa 2010 watapi 9 punchaw junio killa miercoles madrugawta, 84 watanpi. Familianmantam qepanku panin, huk sobrinon, iskay sobrinankuna hinaspa Melita sutiyoq señoran, paywanmi 53 wataña casarasqa karqa.

Jaracz iñiqmasinchikmi nacerqa 1925 watapi 28 punchaw septiembre killata, Pike County (Kentucky, Estados Unidos) llaqtapi. 1941 watapim 10 punchaw agosto killata bautizakurqa, 15 watanpi. 17 watanpim precursor regular karqa, chaynatam qallarirqa tukuy tiemponwan 67 wata servisqanta.

1946 watapim 20 watallanpiraq kachkaspan 7 kaq grupo Galaad Escuelaman rirqa. Escuela tukuruptinmi congregacionkunata watukunanpaq nombrasqa karqa Cleveland (Ohio, Estados Unidos) llaqtaman rinanpaq. 1951 watapiñataq Australiapi Betel wasimanta encargakunanpaq nombrasqa karqa. 1983 watapi Anuario de los testigos de Jehová librom nin: “Tukuy sonqonmanta Diospa kaqkunata ruraspa hinaspa predicacionpaq ancha allinta yanapaspanmi chay nacionpi iñiqmasinchikkunata kallpancharqa”, nispa.

Estados Unidosman kutispanmi casarakururqa Melita Lasko cristianawan, 10 punchaw diciembre killa 1956 watapi. Casado vidantam qallarirqa chay nacionpi congregacionkunata watukuspa chaynataq superintendente de distrito kaspa. 1974 watapim Diospa Llaqtanpi Punta Apaq kananpaq invitasqa karqa.

Payqa unay tiempochá yuyasqa kanqa tukuy sonqonmanta kasukuspan Dios serviypi ruraykunaman qokusqa kasqanmanta. Señoranta kuyaq qosa hinaspa kikinpa munasqanta saqespa hukkunapaq allin ruraq chaynataq Diosta kasukuqllaña cristianom karqa (1 Cor. 13:4, 5). Hukkunapi interesakusqantam qawachirqa llapankupaq chaynallata munaspan hinaspa llakipayakuq kaspan. Chaynataq, runakunata tukuy tiempo kuyasqanmi kallpancharqa tukuy sonqomanta predicananpaq.

Allin llamkaq hinaspa Betelpiwan enteron pachapi iñiqmasinchikkunapa ancha kuyasqan cristianopa wañukusqanqa llakichiwanchikmi, ichaqa kusikunchikmi Jehová Diosta tukuy sonqonmanta chunkantin watakuna servisqanta yuyarispa. Segurom kachkanchik wañukunankama ‘qaqa hina sayasqanmanta’ hinaspa ‘wiñay kawsay premiota’ chaskisqanmantapas (Apo. 2:10). Segurotaqmi kanchik ‘rurasqankunapas paywan [kuska] kasqanmanta’ (Apo. 14:13).