Espiritunwan Diospa yanapasqan Reypa qowananchik bendicionkuna
Espiritunwan Diospa yanapasqan Reypa qowananchik bendicionkuna
‘Paymi Tayta Diospa espiritunwan huntasqa kanqa.’ (ISA. 11:2.)
1. ¿Imatam wakin runakuna ninku runakuna imayna kasqanmanta preocupakuspanku?
YACHAYSAPA Stephen Hawking runam 2006 watapi nirqa: “Gobiernokuna, runakuna hinaspa muyuriqninchikpi tukuy imapas chaqllawapiña kaptinqa, ¿imaynaraq hinalla kawsasun qatiqnin 100 watakunapiqa?”, nispa. Huk periodicopas nirqam: “Manam wakchayayta chinkachinchikraqchu nitaq enteron pachapi hawkayaytapas tarinchikraqchu. Chinkachinamantaqa astawanchusmi rikurirachinchik. Manam imatapas mana rurasqanchikraykuchu, lliwtam rikurichirqanchikqa: lliw runapaq imapas chaynalla kananpaq gobiernota, nacionkunaman gobiernopa mana controlasqallan yaykumuq negociota, Sociedad de Naciones nisqata hinaspa guerra mana kananpaq manchakuypaq armakunatapas. Achka kutitam pelearqanchik ‘lliw guerrakuna tukuchiq guerrapi’, chaymi manaña pipas creenchu guerrakuna chinkananmantaqa” (New Statesman).
2. ¿Imaynatam Diosqa chayllaña qawachinqa Llapallan Kamachiq kasqanta?
2 Dios serviqkunataqa kayna nisqankuqa manam admirachiwanchikchu. Bibliam sutillata kayta qawachin: runaqa manam unanchasqachu karqa kikillanku kamachikunankupaqqa (Jer. 10:23). Diosllam derechoyoq Llapallan Kamachiq kananpaq, imayna hinaspa imapaq kawsanamanta yachachiwananchikpaq chaynataq chaykunata tarinapaq pusawananchikpaqpas. Llapallan Kamachiq kasqantam chayllaña qawachinqa, runamasinta kamachinanpaq runapa rikurichisqan lliw gobiernokunata puchukachispan. Chinkachinqataqmi paypa autoridadninta mana reqsikuqkunatawan mana allin kuyaqkunatapas, paykunaqa kawsanku huchallapim hinaspa ‘mana allin kaqkunata’ munaychakuq Diablopa kamachisqanmi kanku (Juan 5:19).
3. ¿Imatam Isaias nirqaña Mesiasmanta?
3 Paraisopim Diosqa Llapallan Kamachiq kasqanta qawachinqa Mesias Gobiernaptin (Dan. 7:13, 14). Paymantam Isaias willarqa ‘sachapa kullunmantawan [. . .] sapinmanta wiñamuchkaq hina Isai castamanta nacemunanta’ hinaspa ‘Diospa espiritunwan huntasqa kaspa’ yuyayniyoq, “entiendeq”, ‘yuyaywan consejaq’, “atiyniyoq”, chaynataq ‘yachaysapa kananmantawan’ ‘Diosta respetananmantapas’ (Isa. 11:1, 2). ‘Sachapa sapinmanta wiñamuchkaq hina Isai castamanta’ runaqa karqa Cristom. Ichaqa, ¿imaynatam chuya espiritu yanapan runakunata kamachinanpaq? ¿Ima bendicionkunam gobiernaptin kanqa, hinaspa imatam chaskinapaq rurananchik?
Diosmi yanapan rey kananpaq
4-6. ¿Ima yachasqanmi Jesusta yanapanqa Rey, Sacerdotekunapa Jefen chaynataq yuyayniyoq hinaspa llakipayakuq Juez kananpaq?
4 Diosqa munanmi kasukuq kay pachapi kawsaq runakuna mana pantaq kanankuta. Chaypaqmi necesitanku huk Reypa, Sacerdotekunapa Jefenpa chaynataq yuyayniyoq hinaspa llakipayakuq Juezpa yanapayninta. Chaymi Diosqa Jesusta akllarun hinaspa chuya espiritunta servichikuspa yanapan ruranankunawan cumplinanpaq. Qawasun imanasqam Cristoqa Taytanpa nisqanwan mana pantaspam cumpliy atisqanmanta.
5 Manam pipas Jesus hinaqa Diosta reqsinchu. Pimantapas aswan unayñam Taytanwan kuska karqa. Chay tiempopim Diospa sapallan Churinqa Taytanta ancha allinta reqsirqa, chaymi sutichasqa ‘mana rikuy atina Diospa rikchayninwan’ (Col. 1:15). Chaymi pay nirqa: “Ñoqata rikuqniyqa Taytatapas rikuykunñam”, nispa (Juan 14:9).
6 Diosmi tukuy ima unanchasqanta hinaspa runakunatapas allinta reqsin, chaymantañataq Jesus. Cristomantam Colosenses 1:16, 17 nin: “Paynintakamam Dios unancharqa cielopi tukuy ima kaqkunatapas, kay pachapi kaqkunatapas, tukuy ima rikusqanchiktapas chaynataq mana rikuy atisqanchiktapas [. . .]. Cristoqa karqañam tukuy imapas manaraq unanchasqa kachkaptinqa, kunanpas paypa atiyninwanmi tukuy imapas takyachkan”, nispa. ¡Diospa servichikusqan “ruraysiq maestro” kaspanmi tukuy unanchaypi yanaparqa! Chaymi payqa allinta yachan hanaq pachapiwan kay pachapi kaqkunamanta, ñawipa mana rikuy atisqanmanta hinaspa mana entiendey atina cerebronchikmantapas. Payqa yaqa yachaypas runayarunman hinam (Pro. 8:12, 22, 30, 31).
7, 8. ¿Imaynatam Jesusta chuya espiritu yanaparqa Diosta servisqanpi?
7 Jesusqa Diospa chuya espiritunwan akllasqanmi. Kikinmi nirqa: ‘Diospa espiritunmi ñoqapi kachkan. Paymi [. . .] wakchakunaman allin noticiata willanaypaq sapaqchawarqa. Presochasqa kaqkunaman willaspay libranaypaqwan [. . .] ñawsakunata qawarichinaypaqmi mandamuwarqa. Ñakarichisqakunata libranaypaqmi mandamuwarqa chaynapi Señor Diospa agradonpaq watamanta willakunaypaq’, nispa (Luc. 4:18, 19). Yaqachá Jesus bautizakuruptin, chuya espiritu yuyarichirqa hanaq pachapi yachasqankunamanta hinaspa Mesias kaspam Diospa munasqanta kay Pachapi tukuy ima rurananmantapas (leey Isaias 42:1, Lucas 3:21, 22 hinaspa Juan 12:50).
8 Cuerponpiwan yuyayninpi mana pantaq kaspanpas Jesusqa chuya espiritumantam atiyta chaskirqa. Manam wakin runamanta aswan yachayniyoqllachu karqa, aswanqa kay Pachapi aswan allin yachachiqmi karqa. Bibliam nin yachachisqanwan ‘runakuna admirasqallaña kasqankumanta’ (Mat. 7:28). Payqa yacharqam runakuna hucharayku, pantaq kasqankurayku hinaspa Diosmanta mana yachasqankurayku sasachakusqankuta. Yacharqataqmi runakunapa sonqonku imayna kasqantapas, chaymi imayna kasqankuman hina yanaparqa (Mat. 9:4; Juan 1:47).
9. Cristopa vidanmanta yuyaymanaspa, ¿imanasqam aswan seguro kanchik allin rey kananmanta?
9 Jesusqa runa hinam kawsarqa. Allin Rey kananpaqqa yanapantaqmi runa hina chaynataq pantaq runakunawan kawsasqanpas. Pablom nirqa: ‘Wawqenkunamanmi tukuy imapi rikchakurqa chaynapi llakipayakuq hinaspa confiakunapaq kasqanrayku Diospa qayllanpi sacerdotekunapa jefen kananpaq hinaspa runakunapa huchanmanta wañuspan Diospa piñakuyninta amachananpaq. Payqa tentasqa kaspanmi ñakarirqa, chayraykum tentasqakunatapas atin yanapayta’, nispa (Heb. 2:17, 18). ‘Tentasqa’ otaq pruebakuna pasaq kaspanmi llakipayanman ñakariqkunata. Kay Pachapi kachkaspanraqmi qawachirqaña hukkunapa necesitasqanmanta interesakusqanta. Mana manchakuspankum payman asuykurqaku onqoqkuna, suchukuna, ñakarichisqakuna hinaspa warmachakunapas (Mar. 5:22-24, 38-42; 10:14-16). Diosmanta yachay munaq allin sonqoyoq runakunapas asuykuqmi. Ichaqa, cheqniq hinaspa contranpi churakuq ‘Dios mana kuyaq’ hatunchakuqkunallam mana asuykuqkuchu (Juan 5:40-42; 11:47-53).
10. ¿Admirakuypaq imata ruraspanmi Jesusqa qawachirqa kuyawasqanchikta?
10 Jesusqa ñoqanchikraykum wañurqa. Chaywanmi astawan qawachiwanchik mana tupachiy atina Rey kasqanta (leey Salmo 40:6-10). Kikinmi nirqa: “Hatu-hatun kuyakuyniyoqqa amistadninkunapa rantinpi wañuqmi”, nispa (Juan 15:13). Kay pachapi gobiernaqkunaqa tukuy imayoqmi kanku runamasinku serviptinku, Jesusmi ichaqa runakunarayku wañurqa (Mat. 20:28).
Diosmi yanapan wañusqanpa valorninta servichikunanpaq
11. ¿Imanasqataq Jesuspi confiachwan Salvaqninchik kasqanpi?
11 Allinpunim wañusqanpa valorninta yanapawananchikpaq Sacerdotekunapa Jefen Jesuspa servichikusqanqa. Kay pachapi rurasqanmi qawachiwanchik Salvawaqninchik kaspa Waranqa Wata Kamachimuspan ima rurananta, chaypiqa kasun kasukuq kaspallam. Jesusqa wayratawan lamar qochatam hawkayachirqa, onqoqkunata sanoyachirqa, waranqantin runakunata mikuchirqa, wañuqkunatapas kawsarichirqa (Mat. 8:26; 14:14-21; Luc. 7:14, 15). Manam autoridadnintawan atiyninta qawachinanpaqchu rurarqa, aswanqa kuyakuq hinaspa llakipayakuq kaspanmi. Leprawan onqoq runa allinyaykachinanmanta tapuptinmi Jesus nirqa: “Munanim”, nispa (Mar. 1:40, 41). Waranqa Wata Kamachimuspanmi llapallan runakunata llakipayanqa.
12. ¿Imaynatam cumplikunqa Isaias 11:9?
12 Hanaq pachamanta gobiernaqmasinkunawan kuskam Cristoqa, Diosmanta runakunata hinalla yachachinqaku, chaytaqa 2.000 wata puntataraqmi qallarichirqa. Chaynapim cumplikunqa Isaias 11:9 kayna nisqan: ‘Imaynam yaku pasaypaqta tapaykum lamar qochata, chaynam enteron kay pachapi runakunapas [Diosta] reqsinqaku’. Chayna yachachisqanpiqa yaqapaschá kanqa, kay Pachatawan chaypi kaq tukuy rikchaq animalkunata cuidananpaq Adanman Diospa nisqanman hina. Waranqa Wata Kamachisqan tukuytaqa cumplikurunqañam Diospa ima rurananmanta Genesis 1:28 nisqan hinaspa Jesuspa wañusqanpa valorninpas servichikusqañam kanqa.
Diosmi yanapan juez kananpaq
13. ¿Imaynatam Jesusqa qawachirqa allin ruray kuyasqanta?
13 “Jesucristotam Dios churarun wañuqkunatapas hinaspa kawsaqkunatapas juzgananpaq.” (Hech. 10:42.) ¡Kusikunchikmi pay akllasqa kasqanwan! Mana allin rurayqa paypiqa manam kanchu, aswanqa allin ruraq kasqanwan confiana kasqanmi kachkan weqawninpi sumaq watasqa chumpi hina (Isa. 11:5). Chaynataq, imapas munapayayta, iskay uya kayta hinaspa mana allinkuna cheqnisqantam qawachirqa, corregirqataqmi hukkunapa ñakarisqanmanta mana llakipayakuqkunata (Mat. 23:1-8, 25-28; Mar. 3:5). Manataqmi qawasqallanwanqa engañachikuqchu, payqa reqsirqam ‘runapa sonqontaqa’ (Juan 2:25).
14. ¿Imaynatam Jesusqa kunanpas qawachin allin ruray kuyasqanta, hinaspa imatam tapukunanchik?
14 Jesusqa manam haykapipas saqerqachu allin ruraykuna kuyasqantaqa, chaytam qawachin predicacionpi hinaspa runaman yachachiypi ima tiempomantapas aswan kunan yanapasqan. Manam pi runapas, gobiernopas nitaq demoniopas harkanmanchu Diospa munasqanman hina rurakunantaqa. Chaymi mana iskayrayaspa suyachwan Diospa allin ruraq kasqan Armagedonpi vencenanmanta (leey Isaias 11:4 hinaspa Mateo 16:27). Allinmi kanman kayna tapukuyninchikqa: “¿Jesus hinachu rurani runakunata watukuspay? Sano otaq imayna tarikuspaypas, ¿allinnin kaqtachu qoni Jehová Diosta servinaypaq?”, nispa.
15. ¿Imataq yanapawasun tukuy kallpanchikwan Diosta servinapaq?
15 ¿Imam yanapawasun tukuy kallpawan predicanapaq? Chay ruray Diospa kamachisqan kasqanta yuyariymi. Churinwanmi dirigen hinaspa espiritunta qowanchik ruranapaq. ¿Chaninchanchikchu Diospa hinaspa espiritunwan yanapasqan Reypa llamkaqmasin kananchikpaq favorecesqa kasqanchikta? Diosllam kallpanchanman 7 millon masnin runakunata 236 nacionkunapiwan llaqtakunapi Gobiernonmanta willakunankupaq, runakunapa qawasqankuman hinaqa kanku ‘mana ancha educacionniyoqmi’ (Hech. 4:13).
Cristotakama bendicionkuna chaskinapaq kallpanchakusun
16. ¿Ima garantiatam qowanchik Genesis 22:18?
16 Diosmi Abrahanman prometerqa: “Kasuwasqaykiraykum kay pachapi lliw runakuna miraynikirayku bendecisqa kanqa”, nispa (Gen. 22:18). Diosta kuyaqkunapaqqa chay promesam garantia hina kachkan, Mesiaspa apamusqan bendicionkunata chaskinankupaq. Chaymi, chayna promesakunata mana qonqaspanku Diosta kusisqallaña serviypi ocupasqa kanku.
17, 18. ¿Imatam Diosqa prometerqa Deuteronomio 28:2, hinaspa ima ninantaq ñoqanchikpaq?
17 Abrahampa miraynin Israel llaqtamanmi Diosqa nirqa: ‘[Leypi prometesqanman hinam] tukuy kaykunawan bendecisqa kankichik yupaychasqaykichik Tayta Diosta kasukuspaykichikqa’, nispa (Deu. 28:2). Chaynatam prometewanchik kay tiempopi llaqtantapas. Chayrayku, Diospa bendicionninta chaskiyta munaspaqa hinallam payta ‘kasukunanchik’. Chaynapim kay promesapa cumplikusqanta qawanki: “Tukuy kaykunawan bendecisqam kankichik”. Ichaqa, ¿imaynatam qawachinchik ‘Dios kasukusqanchikta’?
18 Diostaqa kasukunchik otaq uyarinchik Palabranta estudiaspa hinaspa iñiyninchikpi allin kanapaq qowasqanchikkunata allinta servichikuspam (Mat. 24:45). Uyarinchiktaqmi payta hinaspa Churinta kasukuspapas. Kikim Jesusmi nirqa: “Manam: ‘¡Señorlláy, Señorlláy!’ nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam”, nispa (Mat. 7:21). Diostaqa uyarinchiktaqmi akllasqan llaqtanta kasukuspapas, chaypim tarinchik ‘regalokunata runakunapi qosqanta’, paykunaqa nombrasqan ancianokunam (Efe. 4:8, NM).
19. ¿Imatam rurananchik Diospa bendicionninta chaskinapaq?
19 ‘Regalokunata runakunapi qosqanpiqa’ kachkan Diospa Llaqtanpi Punta Apaqkunam, paykunaqa Diospa llaqtanpa rantinpim imatapas ruranku (Hech. 15:2, 6, NM). Manam kayta qonqananchikchu: Cristopa wawqenkunata imayna qawasqanchiktam servichikunqa hatu-hatun ñakariy tiempopi juzgawaspanchikqa (Mat. 25:34-40). Chaymi Dios bendeciwananchikpaqqa haykapipas kasukunanchik paypa akllasqan cristianokunata.
20. a) ¿Imatam puntata ruranku ‘regalokunata runakunapi qosqan’ ancianokuna? b) ¿Imaynatam qawachichwan ancianokunata respetasqanchikta?
20 ‘Regalokunata runakunapi qosqanpiqa’ kachkantaqmi Betel Wasimanta Encargakuqkuna, congregacionkunata watukuq ancianokuna hinaspa sapa congregacionpi ancianokunapas, llapankum chuya espirituwan nombrasqa kanku (Hech. 20:28). Chay cristianokunapa punta rurayninkuqa Diospa llaqtanpi kaqkunata iñiyninkupi allin kanankupaq yanapaymi, ‘chaynapi iñisqanchikpipas chaynataq Diospa Churin reqsisqanchikpipas llapanchik wiñaspanchik hukllaña kaspa [. . .] Cristo hina cabal kanapaq’ (Efe. 4:13). Chay ancianokunaqa ñoqanchik hinam pantaq kanku. Ichaqa kuyakuywan niwasqanchikta kasukuspaqa bendicionkunatam chaskisun (Heb. 13:7, 17).
21. ¿Imanasqam kasukunanchikpuni Diospa Churinta?
21 Pisi tiempollamantañam Jesusqa puchukachinqa Satanaspa munaychakusqan kaqkunata. Chaynata ruraspanmi vidanchikmanta cuentallikunqa hinaspa “achkallaña runakunata” ‘kawsachikuq yakukunaman pusanqa’ (Apo. 7:9, 16, 17). Chaynaqa, sonqomanta anchata agradecekuspayá kusisqa kasukusun espiritunwan Diospa yanapasqan Rey Cristota.
¿Imatam yacharunchik kay textokunamanta?
[Kay yachachikuypa tapukuyninkuna]
[17 kaq paginapi dibujo]
Jesusqa ancha llakipayakuq kasqantam qawachirqa Jairopa churinta kawsarichispan
[18 kaq paginapi dibujokuna]
Ima tiempomantapas aswan rurakusqan predicaciontam Jesucristoqa dirigichkan
