Allinta servichikuy soltero kasqaykita

‘Pipas chaynata kawsay atiqqa nisqanman hinayá rurachun.’ (MAT. 19:12.)

1, 2. a) ¿Imaynatam soltero kayta qawarqaku Pablowan Jesuspas? b) ¿Imanasqam soltero kayta Diospa regalonta hina wakinkuqa mana qawankuchu?

CASADO vidaqa Diospa suma-sumaq regalo qowasqanchikmi (Pro. 19:14). Chaywanpas achka soltero cristianokunam kusisqa kawsakunku. 95 watayoqña Harold sutiyoq cristianoqa manam casarakurqachu, ninmi: “Achka amistadniyoq kaptiypas hinaspa wasiyman hamunankuta munaptiypas, gustawanmi sapallay kaytaqa. Ichapas chayna kayta munasqayrayku”, nispa.

² Jesucristowan apostol Pablopas nirqakum casado kaypas hinaspa soltero kaypas Diospa regalon kasqanta (leey Mateo 19:11, 12 hinaspa 1 Corintios 7:7). Ichaqa manamá lliwchu munaspanku solteroqa kanku. Wakinkuqa chaynam qeparurqaku paykunapaq hina kaqta imanasqapas mana tarisqankurayku. Hukkunañataqmi unayña casado kaspankupas, divorciakururqaku otaq huk kaqninku wañukurqa. Hinaptinqa, ¿imanasqataq ninchik soltero kayqa Diospa regalon kasqanta? ¿Imaynatam allintapuni servichikuchwan?

Diospa sumaq regalonmi

3. ¿Imakunatam astawan rurayta atinmanku solterokunaqa?

³ Yaqa llapanpim soltero kaqkunaqa achka tiempoyoq hinaspa libre kanku, chayraykum  astawan atinmanku predicayta, achka amistadniyoq kayta hinaspa Jehová Diosman astawan asuykuytapas (1 Cor. 7:32-35). Kaykunaraykum achka cristianokuna tanteanku huk tiempollapas soltero kanankupaq. Wakinkunañataq soltero kaytaqa mana piensarqakuchu. Ichaqa imayna tarikusqanku cambiaruptinmi, Diosta mañakuspanku hinaspa allinta yuyaymanaspanku cuentata qokurqaku Jehová Diospa yanapakuyninwanqa chayna kawsakuy atisqankuta. Chaymi tantearurqaku solterolla kanankupaq (1 Cor. 7:37, 38).

4. ¿Imanasqam solterokunaqa atinmanku Diosta kusisqa serviyta?

⁴ Solterokunaqa yachankum mana casarakuspankupas Diospaq hinaspa llaqtanpaq ancha valorniyoq kasqankuta. Diosqa sapakama serviqninkunatam kuyan (Mat. 10:29-31). Manam pipas nitaq imapas kuyakuyninmantaqa rakinmanchu (Rom. 8:38, 39). Chaymi casado otaq soltero kaspanchikpas, atichwanmi Diosta kusisqa serviytaqa.

5. ¿Imatam rurananchik soltero kayta allintapuni servichikunapaq?

⁵ Allin pukllaq otaq allin takiq kanapaqqa kallpanchakunam, chaynallataqmi kallpanchakuna soltero kayta allintapuni servichikunapaqpas. Chaynaqa munaspanchik otaq imayna tarikusqanchikrayku solterolla kasqanchiktaqa, atichwanmi allintapuni servichikuyta warmi, qari, mozo-sipas otaq yuyaq kaspapas. Punta pachak watapi wakin cristianokunapa ejemplonmanta yachasun.

Mozo-sipas kasqankupi solterokuna

6, 7. a) ¿Imapaqmi Felipepa tawa doncella churinkuna favorecesqa karqaku? b) ¿Imaynatam soltero kasqanta Timoteo servichikurqa hinaspa ima bendicionkunatam chaskirqa?

⁶ Felipe cristianopam tawa doncella churinkuna karqa, pay hinam Diosmanta tukuy sonqonkuwan willakuqku (Hech. 21:8, 9). Kay sipaskunaqa Diosmanta willakuqmi karqaku, chaytam rurayta atirqaku Joel 2:28, 29 willakusqanman hina Diospa chuya espiritunpa yanapakuyninwan.

⁷ Timoteo mozopas allintapunim soltero kasqanta servichikurqa. Maman Eunice hinaspa abuelan Loida yanapasqanraykum, warmacha kasqanmantapacha ‘Bibliapa yachachikuyninkunata’ reqsirqa (2 Tim. 1:5; 3:14, 15). Tiempopa risqanman hinam kimsanku cristianoña karqaku, yaqachá karqa 47 watapi apostol Pablo Listra llaqtankuman chayllaraq watukuptin. Iskay watamanta apostol Pablo chay llaqtaman watukuptinqa, Timoteoqa yaqa 20 watayoqñam karqa. Mozollaraq hinaspa chayllaraq cristiano kaptinpas, Listra hinaspa Iconio llaqtapi ancianokunam paymanta allinta rimaqku (Hech. 16:1, 2). Chaymi apostol Pablo invitarqa llaqtakunapi  predicanankupaq (1 Tim. 1:18; 4:14). Manamá yachanchikchu Timoteo casarakusqanmantaqa. Ichaqa yachanchikmi predicaqmasin kananpaq Pablo invitaptin kusisqa chaskisqanta hinaspa unay wata soltero kaspan congregacionkunata watukusqantawan huk law llaqtakunapi predicasqanmantapas (Fili. 2:20-22).

8. ¿Imam Juan Marcosta yanaparqa iñiyninpi ñawparinanpaq, hinaspa ima bendicionkunatam chaskirqa?

⁸ Juan Marcos cristianopas allintapunim soltero kasqanta servichikurqa. Paypas hinaspa maman Mariapas chaynataq primon Bernabeypas Jerusalen congregacionpi punta cristianokunam karqaku. Yaqachusmi familianqa kapuqniyoq karqa, chaymi llaqtapi wasinku hinaspa huk sirvientanpas karqa (Hech. 12:12, 13). Chayna kaspanpas Marcosqa manam kikinpa munasqallantachu maskarqa. Manataqmi familiayoq kayta hinaspa tukuy imayoq kaytaqa maskarqachu. Yaqachá apostolkunawan amistad rurasqan kallpancharqa llaqtakunapi predicaq kananpaq, chaymi Pablopa hinaspa Bernabeypa punta viajasqanpi yanapaqnin kananpaq niptinku chaylla munarqa (Hech. 13:5). Tiempo pasasqanman hinataqmi Bernabeywan viajarqa hinaspa Pedrotapas Babiloniapi yanaparqa (Hech. 15:39; 1 Ped. 5:13). Hayka wata soltero kasqanta mana yachaspanchikpas, Bibliaqa qawachiwanchikmi hukkunata yanapay munasqanwan hinaspa astawan predicay munasqanwan reqsisqa kasqanta.

9, 10. ¿Imaynatam soltero mozo-sipaskuna Diosta astawan serviyta atinmanku? Huk ejemplota willamuy.

⁹ Kunan tiempopi achka cristiano mozo-sipaskunapas, soltero kasqankutam servichikunku astawan Diosta servinankupaq. Marcoswan Timoteo hinam paykunaqa yachanku soltero kaspanku “mana hukpi afanakuspa Señorta” aswan serviy atisqankuta (1 Cor. 7:35). Arí, solterokunaqa astawanmi rurayta atinmanku. Ejemplopaq, precursormi kanmanku, mana predicaqkunapa kasqanmanmi rinmanku, huk rimaytapas yachanmankum, Huñunakunapaq Salon otaq Betel wasikuna ruraypipas yanapakunmankum hinaspa Escuela de Entrenamiento Ministerial nisqamanpas rinmankum otaq Betelpipas llamkanmankum. Mozo-sipas, manaraq casarakuspaykiqa, ¿chaykunapi serviyta atiwaqchu?

¹⁰ Chaynatam Mark sutiyoq cristianopas rurarqa, paymi mozollaraq kaspan precursor kayta qallaykurqa, Escuela de Entrenamiento Ministerial nisqamanpas rirqam hinaspapas achka nacionkunapim servirqa. 25 watañam tukuy tiemponwan Diosta servin hinaspam nin: “Kallpanchakunim congregacionpi lliwta yanapanaypaq: paykunawanmi predicani, wasinkumanmi kallpanchaq rini, wasiymanmi mikunankupaq invitani hinaspa kallpanchanapaq kusirikuykunatam rurani. ¡Ancha kusikunapaqmi chaykuna rurasqayqa!”, nispa. Mark cristianopa nisqanman hinaqa, anchatam kusikunchik hukkunata yanapaspa, chaytam astawan rurayta atinku tukuy tiemponkuwan Diosta serviqkunaqa (Hech. 20:35). Mozo-sipas, imakuna gustasuptikipas otaq ima rurayta yachaspaykipas, atiwaqmi Dios serviypi astawan llamkaytaqa (1 Cor. 15:58).

11. ¿Imanasqam utqaymanqa mana casarakunachu?

¹¹ Yaqapaschá wakin wiñaymasiki hina haykapipas casarakuyta munanki. Ichaqa amayá utqayllamanqa chayta ruraychu. Pablom kallpanchasunki ‘mozo-sipas kaspa waytariy’ tiempo otaq warmi-qariwan ancha puñuy munasqayki tiempo pasanantaraq suyanaykita (1 Cor. 7:36, NM). Puntataqa kikikitam reqsikunayki hinaspa yuyayniyoqraqmi kanayki allin warmita otaq qarita akllanaykipaq, chaypaqqa achka tiempom pasanan. Ama qonqaychu, casarakuy punchawpi prometenakuyqa ancha respetanapaqmi wiñaypaq kasqanrayku (Ecl. 5:2-5).

 Soltero qeparuq cristianokuna

12. a) ¿Imatam Anaqa tantearurqa qosan wañukuptin? b) ¿Ima bendiciontam chaskirqa?

¹² Lucas libropim Anamanta willawanchik, paymi 7 watallaraq casarasqa kachkaptin qosan wañukurqa. Bibliaqa manam willawanchikchu wawayoq kasqanmantaqa otaq kaqmanta casarakuy munasqanmantaqa, ichaqa niwanchikmi 84 watanpi hinalla viuda kasqanta. Yaqachusmi sapallan qeparusqanta allinta servichikurqa Dioswan amistadnin aswan allin kananpaq. Arí, payqa manam templomanqa faltakuqchu hinaspapas ‘tuta punchawmi Señorta servispan ayunaq hinaspa mañakuq’ (Luc. 2:36, 37). Qawasqanchikman hinaqa Dios serviynintam puntapi churarqa. Anaqa anchatachá kallpanchakurqa, ichaqa hatun bendiciontam chaskirqa: Jesus wawallaraq kaptinmi payqa reqsiykurqa hinaspapas willakurqam Mesias kaptin runakunata librananmanta (Luc. 2:38).

13. a) ¿Imaynatam yachanchik Dorcas cristiana hukkunata yanapasqanta? b) ¿Ima bendiciontam chaskirqa chayna kasqanmanta?

¹³ Dorcas otaq Tabita sutiyoq cristianam lamar qochapa patanpi Jope sutiyoq llaqtapi yacharqa, chayqa Jerusalenpa wak lawninpim kachkan. Bibliapi paymanta rimaspanqa manam ninchu qosayoq otaq casada kasqantaqa. ‘Payqa achka allinkunatam rurarqa hinaspa wakchakunatapas yanaparqam’. Dorcasqa wakcha viudakunapaqwan hukkunapaqmi pachakunata rurarqa, chaymi anchata kuyarqaku. Ichaqa onqoruspanmi wañukurqa, chaymi llapallan iñiqmasinkuna Pedrota qayachimurqaku kawsarichinanpaq. Kawsarisqanmantam Jope llaqtapi lliw runakuna uyarirqaku hinaspam achka iñirqaku (Hech. 9:36-42). Yaqachá chay cristianokunamanta wakinqa paypa yanapakuyninta chaskirqaku.

14. ¿Imanasqam achka solterokuna Jehová Diosman astawan asuykunku?

¹⁴ Kunan tiempopipas achka cristianokunam, Ana hinaspa Dorcas hina sapallankuña qeparunku. Wakinkuqa manam paykunapaq hina kaqta tarinkuraqchu, hukkunañataq divorciasqa otaq viudo kanku. Achka cristianokuna chayna tarikuspankum, Jehová Diospi astawan confiayta yacharunku (Pro. 16:3). Silviam 38 wata masninña Betelpi llamkachkan, payqa soltera kasqantam bendicionta hina qawan, paymi nin: “Kallpatam horqoni hukkunata kallpanchanaypaq, ichaqa wakinpim tapukuni: ‘¿Ñoqataqa pitaq kallpanchawan?’, nispay. Jehová Dios imakuna necesitasqaymanta allinta yachasqanmi, kallpanchawan payman astawan asuykunaypaq. Chaymantapas mana kallpanchasqaqa manam qepanichu”, nispa. Pay hina, Jehová Diosman asuykuspaqa segurom kachwan kuyakuywan kallpanchawananchikmanta hinaspa yanapawananchikmantapas.

15. ¿Imaynatam sapallan kaq cristianokunaqa aswan amistadniyoq kanmanku?

¹⁵ Chaymantapas sapallan kaqkunaqa astawanmi atinmanku sonqonkuta kicharispa aswan amistadniyoq kayta (leey 2 Corintios 6:11-13). Jolene sutiyoq cristianam 34 wataña tukuy tiemponwan Jehová Diosta servin, paymi nin: “Kallpanchakunim achka amistadniyoq kanaypaq, ichaqa manam wiñaymasillaywanchu. Solterokunaqa astawanmi tiempochakuchwan Jehová Diosta servinapaq, familianchikpaq, iñiqmasinchikkunapaq hinaspa lliw runakunapaqpas. Watakuna pasaptinmi, aswan kusisqa tarikuni soltera kasqaywan”, nispa. Arí, yuyaq iñiqmasinchikkuna, onqoqkuna, warmankuta sapallan uywaqkuna, mozo-sipaskuna hinaspa wakin cristianokunapas anchatam chaninchanku mana imatapas suyaspa solterokunapa yanapakusqankuta. Hukkunaman kuyasqanchikta qawachispaqa, kikinchikmi aswan allin tarikunchik. Chaymi tapukunanchik: “¿Ñoqapas atiymanchu aswan amistadniyoq kayta?”, nispa.

Tukuy tiempo solterokuna

16. a) ¿Imanasqam Jesusqa mana casarakurqachu? b) ¿Imaynatam Pabloqa sapallan kasqanta allinta servichikurqa?

¹⁶ Jesusqa manam haykapipas casarakurqachu. Payqa Diospa munayninta cumplinanpaqmi  preparakunan karqa. Chaymantapas sapa kutim huk lawkunaman rirqa, achikyamusqanmanta tutakamam predicarqa hinaspapas vidantam entregarqa. Anchatamá soltero kasqanqa yanaparqa. Pablopas karu-karutam viajarqa hinaspa hatun sasachakuykunapim tarikurqa predicasqanpi (2 Cor. 11:23-27). Manaraq cristiano kachkaspanqa yaqachusmi casado karqa, ichaqa apostol kananpaq nombraruptinkum sapallan kananpaqña tantearurqa (1 Cor. 7:7; 9:5). Jesus hinaspa Pablopas hukkunatam kallpancharqaku atispankuqa paykuna hina soltero kanankupaq, chaynapi astawan predicanankupaq. Ichaqa manam mayqanninkupas obligarqachu Diosmanta yachachinapaq soltero kaytaqa (1 Tim. 4:1-3).

17. a) ¿Imatam wakin cristianokuna tantearurqaku Jesustawan Pablota qatipakuspanku? b) ¿Imaynatam yachanchik Diosta servinankupaq soltero kaqkunata Dios chaninchasqanta?

¹⁷ Kunanpas wakin cristianokunaqa Diosta astawan servinankupaqmi mana casarakunankupaq tantearunku. Rimamusqanchik Harold cristianom 56 wata masninña Betelpi llamkan, paymi nin: “Betelpi 10 wata kaspaymi, achka casarasqakunata rikurqani onqosqankurayku otaq tayta-mamankuta cuidanankurayku Betelmanta lloqsisqankuta. Ñoqapa tayta-mamayqa wañukurqañam, ichaqa Betelpi kasqaytam anchata kuyarqani chaymi mana casarakunaypaq tantearurqani”, nispa. Chaynallataqmi achka wataña precursora Margaret sutiyoqpas nin: “Casarakuyta munaspayqa casarakuymanmi karqa, ichaqa manam casarakurqanichu. Chaynapim soltera kasqayta allinta servichikurqani Diosta astawan servinaypaq, chayna rurasqaymantaqa kusisqam tarikuni”, nispa. Segurom kachwan, Jehová Diosqa manam haykapipas qonqanqachu payta servinankurayku soltero kanankupaq tantearuqkunataqa (leey Isaias 56:4, 5).

Allinta servichikuy soltero kasqaykita

18. ¿Imaynatam kallpanchachwan hinaspa yanapachwan sapallan kaq cristianokunata?

¹⁸ Tukuy tiemponkuwan Jehová Diosta serviq sapallan kaq cristianokunatam anchata agradecekunchik. Chaninchanchikmi sumaq kayninkunata hinaspa congregacionpi yanapakusqankutapas. Llapallanchikmi qawachinanchik paykunapaq ‘wawqenkuna, paninkuna, turi-ñañankuna, tayta-mamankuna’ hinaspa churi-wawankuna kasqanchikta. Chaynapim haykapipas sapallankuqa tarikunqakuchu (leey Marcos 10:28-30).

19. ¿Imaynatam allintapuni servichikuchwan soltero kayta?

¹⁹ Munasqaykirayku otaq imaraykupas soltero kaspaykiqa, atiwaqmi mana casado kaspapas kusisqa kawsakuyta hinaspa Diosta astawan serviyta, chaytamá kaypi rimasqanchik ejemplokuna qawachiwanchik. Kaqmanta rimasun regalokunamanta. Wakin regalotaqa ganaswanmi suyanchik, wakinñataqmi qonqayllamanta chayamun. Wakintaqa chayllam chaninchanchik, wakintañataqmi tiempo pasasqanman hina. Chayqa imayna kasqanchikmantam kanqa. Chaynam pasan soltero kaywanpas. ¿Imatam rurawaq allintapuni servichikunaykipaq? Jehová Diosman astawan asuykuy, tukuy tiempoykiwan serviy hinaspa sonqoykita kichariy. Casado vidata hina, soltero kaytapas Diospa qawasqanman hina qawaspaqa chaynataq allintapuni servichikuspaqa ancha kusikunapaq Diospa sumaq regalonmi kanqa.

¿Yuyachkankichu?

• ¿Imanasqataq nichwan soltero kayqa Diospa regalon kasqanta?

• ¿Imanasqam mozo-sipas tiempopi soltero kayqa sumaq bendicion kanman?

• ¿Ima ruraytam atinmanku sapallan kaqkuna Diosman asuykunankupaq hinaspa sonqonkuta kicharinankupaq?

[Kay yachachikuypa tapukuyninkuna]

[18 kaq paginapi dibujokuna]

¿Allintachu tiempoykita servichikuchkanki Diosta servinaykipaq?