Diospa atiyninwan ima sasachakuytapas atipasun

“Tukuy imata ruranaypaqmi kallpayoq kani atiy qowaqniy yanapawaptillan.” (FILI. 4:13, NM.)

1. ¿Imanasqam Diospa serviqninkunaqa achka sasachakuykunapi tarikunchik?

JEHOVÁ DIOSPA serviqninkunaqa manam librakunchikchu sasachakuykunamantaqa. Chayqa kanman pantaq kasqanchikrayku, mana allin runakunapa chawpinpi kawsasqanchikrayku otaq Diospa enemigonkunapa cheqniwasqanchikrayku (Gen. 3:15). Ñawpaqmantaraqmi Jehová Diosqa llaqtanta yanaparqa religionkuna qatikachaptin, mana allinkunata ruranankupaq hikutaptin hinaspa huk sasachakuykunatapas aguantanankupaq. Chuya espiritunmi sapakamaman atiyta qowanchikman mana hukmanyanapaq.

Qatikachasqa kayta atipanapaq

2. ¿Imaraykum pipas religionkunapa qatikachasqan kanman, hinaspa imaynatam chayta ruranku?

² Pipas religionkunapa qatikachasqanmi kanman iñiyninpa contranpi churakuptinku. Munankum iñisqankuta chinkarachiyta chaynapi manaña pimanpas willakunankupaq otaq creesqankuta saqenankupaq. Satanaspa kayna rurasqanqa manam chaynallachu. Bibliapa nisqanman hinaqa wakinpim malta leon hina chayta ruran, wakinpiñataqmi mana musyaylla culebrapa rurasqanman hina (leey Salmo 91:13).

3. ¿Imanasqam ninchik Satanaspa contranchikpi rurasqanqa leonpa otaq culebrapa rurasqan hina kasqanta?

³ Piñasqa leon hinam Satanasqa contranchikpi churakun, chaymi runakuna ñakarichiwanchik, presochawanchik hinaspa predicasqanchiktapas harkakunku (Sal. 94:20). Anuario libropim willawanchik kay tiempopi Jehová Diospa testigonkunapa contranpi Satanaspa tukuy ima rurasqanmanta. Ejemplopaq, wakin nacionkunapim religiosokuna  otaq politico kaqkuna, runakunata tanqarqaku Diospa serviqninkunata ñakarichinankupaq. Chayraykum wakin cristianokuna Dios servisqankuta saqerurqaku. Wakinpiñataqmi Satanasqa venenoyoq culebra hina ruran. Pakakuchkanmanpas hinam pitapas qonqayllamanta kachurun, chaytaqa ruran pipapas yuyayninta yanqachaspam hinaspa paypa munayninta ruranankupaq engañaspam. Chayna rurasqanwanmi Diosman sonqo kasqanchikta hukmanyarachiyta munan. Ichaqa Diospa espiritunwanmi kaykunataqa atipayta atichwan.

4, 5. ¿Imaynatam qatikachay kaptin preparakuna, hinaspa imanasqa? Huk ejemplota willamuy.

⁴ Lliwmi allin preparasqa kananchik qatikachay tiempopaq. Ichaqa manam llumpaytachu piensana Satanas imakunawan ñakarichiwananchiktaqa. Manamá imaynatapas yachayta atichwanchu imakunawan ñakarichiwananchiktaqa, chaymi mana llumpaytaqa preocupakunachu, ichapas mana piensasqanchikman hinachu kanqa. Ichaqa qatipakuchwanmi Diosman sonqo cristianokunapa ñakarichisqa kaptinku aguantasqankuta. Paykunamanta yaqa llapankum aguantayta atirqaku Bibliapi willakuq Diosman sonqo serviqkunapa rurasqankupi chaynataq Jesuspa yachachisqanpi hinaspa ejemplonpi yuyaymanaspanku. Chaynapim Jehová Dios kuyayninku aswan yapakurqa, chaymi ima sasachakuykunatapas atipanankupaq yanaparqa.

⁵ Malaui nacionpi 2 cristianakunata ima pasasqanta qawasun, paykunatam piñasqallaña runakuna obligarqaku tarjetata rantispanku politicapi paykunata yanapanankupaq. Mana rantiptinkum maqarurqaku, qalatururqaku hinaspa amenazarqaku abusanankupaq. Chaymantapas Betelpi kaqkuna chay tarjetata rantirusqankuta nispankum engañayta munarqaku. Ichaqa paykunam nirqaku: “Jehová Diosllatam servinikuqa, chaymi Betel wasipi iñiqmasiykuna tarjetata rantiruptinkuqa manam ñoqaykutaqa imanawankuchu. ¡Wañuchiwanaykiku kaptinpas manam rantisaqkuchu!”, nispa. Chaynata niruptinkum chay runakuna pasakurqaku.

6, 7. ¿Imaynatam Diosqa serviqninkunata yanapan qatikachasqa kaptinku aguantanankupaq?

⁶ Apostol Pablom nirqa Tesalonica lawpi cristianokuna ‘llumpay ñakarichisqa’ kaspankupas Diospa palabranta chaskisqankuta, hinaspa ‘chuya espiritupa kusikuyninwan’ kasqankutapas (1 Tes. 1:6). Ñawpaqpi hinaspa kunan tiempopi qatikachayta aguantaq achka cristianokunam nirqaku llumpay ñakariypi tarikuspankupas hawkayayta sientesqankuta. Hawkalla kayqa chuya espiritupa rurunmi, kaymi yuyayninkutawan sonqonkuta waqaycharqa (Gal. 5:22). Arí, Jehová Diosqa espirituntakamam serviqninkunaman atiyta qon pruebakunata atipanankupaq hinaspa ñakariykuna kaptin yachaywan tanteanankupaq.

⁷ Achka runakunam admirakunku cristianokuna llumpay qatikachasqa kaspankupas Diosman sonqo kasqankumanta. Piensankum mana entiendey atina kallpawan kasqankuta, chayqa cheqapmá. Chaymi apostol Pedro nirqa: ‘Cristorayku insultasuptikichikqa mayna kusisqam kankichik sumaq kanchariq Diospa espiritun qamkunapi kasqanrayku’, nispa (1 Ped. 4:14). Chaywanqa nichkarqam, pipas Diospa kamachisqanta kasukusqanrayku ñakarispanqa qawachichkanmi Diospa chaskisqan kasqanta, chayraykum ancha kusisqa tarikunanchik (Mat. 5:10-12; Juan 15:20).

Runakuna hikutawaptinchik aguantanapaq

8. a) ¿Imataq Josueytawan Calebta yanaparqa wakin israelitakunapa hikutasqankuta aguantananpaq? b) ¿Imatam yachachiwanchik Josueypa hinaspa Calebpa ejemplon?

⁸ Cristianokunaqa ñakarinchiktaqmi runakuna mana allinkunata rurananchikpaq hikutawaptinchik. Ichaqa Jehová Diospa  espiritunmi yanapawanchik, chayqa mana tupachiy atina kallpam. Chaywanmi runakunapa burlakuwasqanchikta, imamantapas tumpawasqanchikta hinaspa paykuna hina kawsanapaq hikutawasqanchikta aguantanchik. Piensasun Diosta serviq Josueypi hinaspa Calebpi. ¿Imataq paykunata yanaparqa Canaan lawmanta kutiramuptinku 10 wateqaqkuna hina mana rimanankupaq? Diospa chuya espiritunmi, chaymi paykunaqa wakinku hinaqa mana karqakuchu (leey Numeros 13:30 hinaspa 14:6-10, 24).

9. ¿Imanasqam kallpanchakunanchik hukkuna hina mana kanapaq?

⁹ Punta cristianokunapa tiemponpim, chuya espiritu apostolkunaman atiyta qorqa Diosta kasukunankupaq hinaspa religionkunapi punta apaqkunapa amenazasqankuwan mana hukmanyanankupaq (Hech. 4:21, 31; 5:29, 32). Kunan tiempopi achka runakunam, sasachakuykunapi mana tarikunankupaq hukkunapa rurasqankuta ruranku. Cristianokunam ichaqa mana chaynachu kananchik, aswanqa allin kaqkunatam defiendenanchik. Ichaqa chuya espiritupa qowasqanchik atiywanmi kallpanchasqa tarikunchik hukkuna hina mana kanapaq (2 Tim. 1:7). Qawasun imakunapim cristianokunaqa mana hikutachikunanchikchu.

10. ¿Ima ruranankumantam iskayrayanku wakin cristianokuna?

¹⁰ Wakin mozo-sipaskunam amistadninkupa mana allin rurasqankumanta yacharuspanku iskayrayanku. Piensankum ancianokunapa yanapakuyninta amistadninpaq maskayqa confianakusqankuta chinkachisqanta. Amistadninkuraykum chay rurasqanmanta willayta munankuchu. Wakinpiqa mana allin ruraqmi amistadninta hikutan mana willakunanpaq. Chayna sasachakuyqa manam mozo-sipaskunallapichu qawakun. Wakin yuyayniyoq cristianokunapas sasachakunkum amistadninku otaq familianku huchallikuptin ancianokunaman willaytaqa. ¿Imatam rurananchik chaynapi tarikuspanchikqa?

11, 12. ¿Imatam rurananchik huk iñiqmasinchik huchallikusqanmanta mana willananchikpaq niwaptinchik?

¹¹ Piensasun kaypi, Luiswan Carlos mozokunaqa hina kaq congregacionllamantam kanku. Luismi yacharun amigon millakuypaq qalalla kaqkunata qawasqanta, chaymi nin ancianokunapa yanapakuyninta maskananpaq. Carlosñataqmi mana kaqpaqpas hapispan kasukunchu, hinaspam nin amigon kaspaqa mana willananpaq. ¿Manchakunanchu Luis amistadninku chinkananta? Ichapas piensanman ancianokuna mana creenanta Carlos mana chayna kasqanta niptin. Yachantaq upallalla qepaptinqa amigon mana cambiananmanta hinaspa Dioswan amistadnin chinkarunanmantapas. Yuyarintaqmi runata manchakuyqa ‘kikinpaq toqlla churakuchkaq hina’ kasqanta, hinaspa Diospi confiaqñataq waqaychasqa kasqanmanta (Pro. 29:25). Carlospaq allinninta  munaspanmi valorchakun paywan kaqmanta rimananpaq, chaynapi reqsikuspan sasachakuyninta allichananpaq. Luisqa kallpanchanmi ancianokunawan rimananpaq, hinaspam nin mana willaptinqa pay willaykunanmanta (Lev. 5:1).

¹² Yaqapaschá ñoqanchikpas chayna sasachakuypi haykapipas tarikuchwan. Chayna kaptinqa, yaqachá amistadniki ima rurananmanta niptiki qallariypiqa hukman tarikunqa. Ichaqa tiempopa risqanman hinachá musyakunqa allinninpaq rurasqanchikta. Chayna yanapasqanchikta chaskikuspanqa agradecekunqamá mana manchakuq hinaspa allin amigon kasqanchikmanta. Ñoqanchikwan sientikuruptinqa, ¿allinninchikpaqchu amistadnin kanman? Chayna kaptinqa aswan allin amistadninchik Jehová Diostam agradananchik. Diosta pimantapas kasukuspaqa, payta kuyaqkunapas respetawasunmi hinaspa cheqap amistadninchikkunam kanqaku. Ama saqesunchu congregacionta Diablo yanqacharunantaqa. Mana chayqa Diospa chuya espirituntam llakichichkachwan, hinaspa contranpipas churakuchkachwan. Chaymi kallpanchakunanchik congregacion chuya kananpaq (Efe. 4:27, 30).

Huk sasachakuytapas aguantanapaq

13. ¿Ima sasachakuykunawanmi cristianokunaqa tarikunchik hinaspa imanasqa?

¹³ Sasachakuykunaqa kanmanmi qollqemanta, llamkaymanta, hatun desgraciakunamanta, familianchik wañukusqanmanta hinaspa llumpay onqosqanchikmantapas. Sasallaña tiempokunapim kawsanchik, chaymi haykapipas sasachakuyniyoq kasunchik (2 Tim. 3:1). Chaynapi tarikuspanchikqa amayá llumpaytaqa hukmanyarusunchu. Chuya espiritum atiyta qowasun ima sasachakuykunatapas aguantanapaq.

14. ¿Imam Jobta yanaparqa ñakariykunata aguantananpaq?

¹⁴ Jobmi qatinasllanpi sasachakuykunawan ñakarirqa. Kapuqninkunam chinkarurqa, churinkunawan amistadninkunapas wañururqam, onqorurqataqmi hinaspa señoranpas Diospi confiaytam saqerurqa (Job 1:13-19; 2:7-9). Chayna sasachakuypi tarikuchkaptinmi Eliu sutiyoq mozo kallpanchaykurqa. Diospa yanapayninwanmi kaynata consejarqa: “Qawariyá Diospa admirakuypaq rurasqankunata”, nispa (Job 37:14). Kayna nisqanmi qawachin sasachakuykunata Job aguantananpaq huk yanapakuy chaskisqanmanta. ¿Musyankichu ima kasqanta? Yuyaymanarqam tukuy ima rurananpaq Dios espiritunta hinaspa atiyninta imayna servichikusqanpi (Job 38:1-41; 42:1, 2). Chay ruraymi ñoqanchiktapas yanapawasun. Yaqachá yuyachkanchik Dios ñoqanchikpi interesakuspan imakuna rurasqanmanta. Chayna kasqanqa manamá cambianchu.

15. ¿Imam Pablota yanaparqa pruebakunata aguantananpaq?

¹⁵ Apostol Pablopas iñiyninraykum llumpay sasachakuykunapi tarikurqa (2 Cor. 11:23-28). ¿Imam yanaparqa mana hukmanyarunanpaq? Diosta mañakusqan hinaspa  confiasqanmi. Yaqachá wañunanpaqña hatun pruebakunapi tarikuspan kaynata qellqarqa: “Señorninchikmi ichaqa yanapawaspan kallpanchawarqa, mana hukmanyaspaymi salvacionmanta willakurqani chaymi mana judio kaqkunapas uyarirqaku. Señorninchikqa librawarqataqmi leonmantapas”, nispa (2 Tim. 4:17). Pabloqa allintamá yacharqa iñiqmasinkunaman kayna nisqanmantaqa: “Amayá imamantapas afanakuychikchu”, nispa (leey Filipenses 4:6, 7 hinaspa Efesios 6:10).

16, 17. Huk ejemplowan willamuy sasachakuykunapi serviqninkunata Dios imayna yanapasqanmanta.

¹⁶ Roxana sutiyoq precursorapas cuentatam qokurqa serviqninkunata Jehová Dios cuidasqanmanta. Asambleaman rinanpaq patronninta 3 punchawta mañakuptinmi, patronninqa piñakuspan nirqa llamkayman faltakuruptinqa qarqorunanmanta. Roxanam ichaqa asambleaman rirqa. Jehová Diostam mañakurqa llamkayninmanta mana qarqosqa kananpaq, chaymi hawkalla tarikurqa. Lunes punchawta llamkayninman riptinmi patronninqa qarqorurqa, chaymi llakisqa tarikurqa. Pisillata ganaspanpas necesitarqam familianta uywananpaq. Kaqmantam Jehová Diosta mañakurqa. Payqa piensarqam iñiyninpi allin kananpaq asambleapi Dios yanapaspanqa, ima necesitasqanpipas yanapananta. Wasinman richkaspanmi huk willakuypi rikururqa siranapaq maquinawan llamkaqkunata necesitasqankuta. Encargadowan rimananpaq riptinmi mana experienciayoq kasqanta qawarqa. Chayna kaptinpas contratarurqam, hinaspam ñawpaqmantaqa yaqa iskay kuti mastaraq pagarqa. Roxanaqa musyakurqam mañakusqanta Jehová Dios uyarisqanta. Chaymantapas llamkaqmasinkunatam predicarqa, chaymi encargadowan pichqa llamkaqmasinkuna Bibliamanta yacharuspanku bautizakururqaku.

¹⁷ Wakinpiqa piensachwanmi mañakusqanchikta Dios mana uyarisqanta otaq chaylla nitaq munasqanchikman hina mana rurasqanta. Mana chaylla entiendeptinchikpas payqa yachanmi imanasqa chayna rurasqanmanta. Ichaqa kaymantam seguro kachwan: payqa kasukuq serviqninkunataqa manam haykapipas saqenqachu (Heb. 6:10).

Pruebakunatawan tentacionkunata atipanapaq

18, 19. a) ¿Imanasqam pruebakunapiwan tentacionkunapi tarikunchik? b) ¿Imam yanapawasun chaykunata aguantanapaq?

¹⁸ Jehová Diospa serviqninkunaqa mana allin runakunapa chawpinpim kawsanchik, chaymi tentacionkunapi, hukmanyaypi, qatikachasqa kaypi hinaspa runakunapa hikutasqan tarikunchik (Juan 15:17-19). Chuya espiritupa yanapayninwanmi atisunchik Dios serviyninchikpi tukuy ima sasachakuykunata atipaytaqa. Payqa manam saqenqachu mana aguantay atina sasachakuypi kananchiktaqa (1 Cor. 10:13). Manamá haykapipas saqewasunchu (Heb. 13:5). Bibliapa nisqanta kasukusqanchikmi amparawanchik hinaspa kallpanchawanchikpas. Chaymantapas Diosqa espiritunwanmi iñiqmasinchikkunata tanqanman necesitasqanchik tiempopi yanapawananchikpaq.

¹⁹ Hinallayá chuya espiritupa yanapakuyninta maskasun orakuspa chaynataq Bibliata estudiaspa. Diospa ‘hatu-hatun atiyninwan kallpanchakuspaqa’, atisunmi ‘ima mana allintapas pacienciakuspa kusikuywan aguantaytaqa’ (Col. 1:11).

¿Imatam niwaq?

• ¿Imaynatam allinta preparakuchwan qatikachay tiempopaq?

• ¿Imatam rurananchik pipas huchallikusqanmanta mana willakunapaq niwaptinchik?

• ¿Imamantam seguro kachwan ima sasachakuypipas tarikuspa?

[Kay yachachikuypa tapukuyninkuna]

[28 kaq paginapi dibujo]

¿Imatam yachachwan Josueymantawan Calebmanta?

[29 kaq paginapi dibujo]

¿Imaynatam yanapachwan amistadninchik mana allinkunata ruraruptin?