Respetasun Diospa qallarichisqan casado vidata

“Chayraykum qariqa Tayta-mamanta saqespa hukllawakunqa warminmanña chaymi iskayninku huk runa hinallaña kanqaku.” (GEN. 2:24.)

1. ¿Imanasqataq Jehová Diosta pimantapas astawan respetananchik?

CASADO vidata qallarichiq Jehová Diostam pimantapas anchata respetananchik. Bibliam nin ‘llapa ima allin kaqkunata’ paymanta chaskisqanchikta, payqa Unanchawaqninchik, Llapallan Kamachiwaqninchik hinaspa Taytanchikmi (Sant. 1:17; Apo. 4:11). Tukuytam qowanchik anchata kuyawasqanchikrayku (1 Juan 4:8). Arí, tukuy yachachiwasqanchik, mañawasqanchik hinaspa qowasqanchikpas allinninchikpaqwan kusikunanchikpaqmi (Isa. 48:17).

2. Punta warmi-qariman, ¿ima kamachikuykunatam Dios qorqa?

² Bibliaqa niwanchikmi casado vidaqa Diospa ‘allin kaq’ regalon kasqanta (Rut 1:9; 2:12). Adantawan Evata casarachispanmi kamachikuykunata qorqa kusisqa kawsanankupaq (leey Mateo 19:4-6). Kasukuspankuqa wiñaypaqmi kawsakunmanku karqa. Ichaqa manam kasukurqakuchu, chaymi mana allinpi tukurqaku (Gen. 3:6-13, 16-19, 23).

3, 4. a) ¿Imaynatam achka runakuna casarakuytawan Diosta mana respetasqankuta qawachinku? b) ¿Ima ejemplokunatam yuyarisun kay estudiopi?

³ Yaqa lliw runakunam casarakunankupaq tanteaspankuqa Adanwan Eva hina Unanchawaqninchikpa nisqankunata kasukunankupaq anchataqa preocupakunkuchu. Wakinkuqa casarakuytaqa manam allinpaqchu qawanku hinaspa munasqankuman hina ruranku (Rom. 1:24-32; 2 Tim. 3:1-5). Manam entiendeyta munankuchu Diospa regalon kasqanta, chaymi casarakuyta mana respetaspanku Diosta piñachinku.

⁴ Wakin cristianokunapas casarakuytaqa manam Jehová Diospa qawasqanman hinachu qawanku. Chaymi wakin casarasqakunaqa Bibliapa nisqanta mana kasukuspanku imallamantapas rakinakunku otaq divorciakunku. ¿Imatam casarasqakunaqa rurananku chaynapi mana tukunankupaq? ¿Imaynatam Genesis 2:24 nisqan casadokunata yanapanman? Casarakuy munaqkuna, ¿imatam ruranmanku casarakuspanku kusisqa kanankupaq? Llapanchiktam yanapawasun Bibliapi kusisqa kimsa casarasqakunapa ejemplonkumanta yuyariyninchik. Imayna kawsasqankum qawachin casado vida takyananpaqqa Jehová Dios respetay ancha allin kasqanta.

Confianza kanapaq kallpanchakusun

5, 6. ¿Ima sasachakuypim Zacariaswan Elisabet tarikurqaku, hinaspa ima bendiciontam chaskirqaku Diosman sonqo kasqankumanta?

⁵ Zacariaswan Elisabetmi Juda llaqtapi yacharqaku, paykunaqa tukuypim allinta tantearqaku. Iskayninkum kallpanchakurqaku Diosman sonqo serviqninkunawan casarakunankupaq. Zacariasqa allin sacerdotem karqa, hinaspam iskayninku kallpanchakurqaku Diospa Leyninta kasukunankupaq. Achka razonkunam karqa agradecesqa kanankupaq. Ichaqa wasinkupi kaspankum cuentata qokurqaku mana churi-wawayoq kasqankumanta. Payqa mana wachakuq warmim karqa, hinaspapas qosan hinam yuyaqña karqa (Luc. 1:5-7).

⁶ Ñawpaq Israelpiqa warmikunam anchata chaninchaqku wawayoq kaytaqa, chaymi yaqa lliw familiakuna achka wawa-churiyoq  karqaku (1 Sam. 1:2, 6, 10; Sal. 128:3, 4). Punta pachak watapim, judiokunaqa divorciakuyta atinmanku karqa mana wachakuq warmimantaqa. ¡Chayqa manamá allinchu karqa! Zacariasmi ichaqa chayta mana rurarqachu, aswanmi señorallanwan qeparqa. Manam mayqankupas munarqakuchu casado vidankuta yanqacharuytaqa. Mana churi-wawayoq kanankumanta llakisqa kaspankupas hinallam Jehová Diosta tukuy sonqonkuwan servirqaku. Tiempo pasaruptinmi Diosqa paykunata bendecirqa yuyaqña kaspanku warmayoq kanankupaq (Luc. 1:8-14).

7. ¿Imaynam Elisabetqa qosanpaq confianza warmi karqa?

⁷ Elisabetpas qawachirqam confianza warmi kasqanta. Zacariasmi churin naceruptin mana rimayta atirqachu angelpa nisqankunata mana creesqanrayku. Yaqachá imatapas ruraspan señoranman willarqa angelpa nisqanman hina warmachanku Juan sutiyoq kananmanta. Vecinonkunawan familianku taytanpa sutinwan sutichananta hikutaptinkum Elisabetqa qosanta respetaspan nirqa: “Juanmi sutinqa kanqa”, nispa (Luc. 1:59-63).

8, 9. a) ¿Imaynatam confianza kayqa casarasqakunata astawan hukllawan? b) ¿Imaynatam qawachinmanku confianza kasqankuta?

⁸ Zacariaswan Elisabet hinam, kunan tiempopipas casarasqakunaqa sasachakuykunapi tarikunku. Chaymi casado vidapi kusisqa kanapaqqa, warmi-qarim confianza kananku. Ichaqa hukkunata asikachay, qalalla kaqkunata qaway hinaspa huchapakuypas confianza kasqankutawan hawka kawsakuytam yanqacharunman. Chayna kaptinqa kuyakuypas chiriyarunmi. Confianza kasqankum cerco hina casado vidata waqaychan hinaspa hawkallata kawsachin. Chayna kasqankuqa yanapanmi mana manchakuspa sientesqankuta willanakunankupaq, chaywanmi astawan kuyanakunqaku. Qawasqanchikman hinaqa confianza kayqa allinpunim.

⁹ Jehová Diosmi Adanta nirqa: ‘Qariqa tayta-mamanta saqespam hukllawakunqa warminmanña’, nispa (Gen. 2:24). Kay nisqanqa qawachinmi pipas casarakuruptinqa, amistadninkunawan familianqa manaña puntapi kananmanta. Aswanmi qosanpaq otaq señoranpaq tiempochakunan hinaspa puntata atiendenan. Mosoq familiaña kaspanmi mana saqenankuchu tanteasqankupi otaq wasinpi sasachakuy kaptin tayta-maman chaqrukunankutaqa. Ancha allinpunim qosanman otaq señoranman hapipakuyninkuqa. Chaytam Jehová Dios kamachirqa.

10. ¿Imataq casarasqakunata yanapanqa confianza kanankupaq?

¹⁰ Confianza kayqa haykapipas allinpunim, huk kaqninku Jehová Diospa testigon mana kaptinkupas. Chayna tarikuq huk cristianam nin: “Diostam anchata agradecekuni qosaypa niwasqankunata kasukunaypaq hinaspa anchata respetanaypaq yachachiwasqanmanta. Chaymi 47 watakunaña respetanakuspa hinaspa kuyanakuspa kawsaniku”, nispa (1 Cor. 7:10, 11; 1 Ped. 3:1, 2). Arí, casarasqakunaqa kallpanchakunankum kusisqa kawsanankupaq. ¿Imatam rurawaq qosayki otaq señorayki qanmanta mana iskayrayananpaq? Rimasqaykiwan otaq rurasqaykiwan qawachiy pi runamantapas payta kuyasqaykita. Tukuyta ruray mana pipas nitaq imapas karunchasunaykichikpaq (leey Proverbios 5:15-20). Ron hinaspa Jeannette cristianokunam 35 wata masninña casarasqa kasqankumanta ninku: “Kusisqam kawsakuniku confianza kasqaykurayku hinaspa Diospa niwasqankuta kasukuspayku”, nispa.

Kuska rurasqankum casarasqakunata yanapan

11, 12. ¿Imaynatam Aquilawan Priscilaqa yanapanakuqku a) wasinkupi, b) llamkasqankupi hinaspa c) predicasqankupipas?

¹¹ Apostol Pablom amistadnin Aquilamantawan Priscilamanta rimaspan, iskayninkumanta rimarqa. Kuska rurasqankum qawachin “huk runa hinallaña” Diospa nisqan ima ninan kasqanta (Gen. 2:24). Paykunaqa wasinkupi, llamkasqankupi hinaspa Diosta  servisqankupim yanapanakuqku. Corinto llaqtata Pablo chayllaraq watukuptinmi paykunaqa wasinkupi qepananpaq nirqa, yaqachusmi chay wasimanta arreglokunata rurarqa predicananpaq. Chaymantapas Efeso llaqtapi wasinkutam servichikurqaku huñunakuykunata ruranankupaq, iskayninkutaqmi Apolostawan mosoq cristianokunata yanaparqaku iñiyninkupi ñawparinankupaq (Hech. 18:2, 18-26). Roma lawman astakuruspankupas, chaypi wasinkutam servichikurqaku huñunakuykuna rurakunanpaq. Tiempo pasaruptin Efeso lawman kutispankupas, hinallam iñiqmasinkunata kallpancharqaku (Rom. 16:3-5).

¹² Huk tiempom Aquilawan Priscilaqa Pablowan kuska karpakuna ruraypi llamkarqaku. Kaypipas qawanchikmi kay casarasqakunaqa mana llallinakuspa nitaq atipanakuspa kuska llamkasqankuta (Hech. 18:3). Arí, Diosta kuska servisqankum paykunata yanaparqa casado vidanku allin takyasqa kananpaq. Paykunaqa Corintopi, Efesopi hinaspa Romapim reqsisqa karqaku ‘Cristo Jesuspa llamkaqmasin’ kasqankuwan (Rom. 16:3). Maypi kaspankupas Diospa Gobiernonmantam kuskanku willakuqku.

13, 14. a) ¿Imakunam casarasqakunata karunchachinman? b) ¿Imatam casarasqakuna ruranmanku astawan “huk runa hinallaña” kanankupaq?

¹³ Chaynaqa, casado vida allin takyasqa kananpaqqa yanapanmi allin ruraykunapi kuska rurasqanku (Ecl. 4:9, 10). Llakikunapaqmi, achka casarasqakunam mana tiempochakunkuchu kuska kanankupaq. Llamkayninkullamanmi qokunku, hukkunañataq llumpayta illanku llamkanankupaq otaq huk nacionkunaman rinku familiankuman qollqeta apachimunankupaq. Wakinkuqa wasinkupi kaspankupas Internet otaq televisionrayku, ima ruray munasqankurayku hinaspa pukllayraykum karunchakunku. ¿Chaynachu wasikipi pasan? Chayna kaptinqa allinmi kanman kuska imatapas ruranapaq astawan tiempochakuyqa, ejemplopaq: mikuyta ruranapaq, platokunata mayllanapaq, huertata allichanapaq hinaspa warmakunata otaq yuyaq tayta-mamankuta cuidanapaqpas.

¹⁴ Aswan allinraqmi Dios serviyninkupi sapa semana kuskanku imapas rurayninkuqa. Chaypaqmi anchata yanapakun, Diospa Palabranta sapa punchaw estudianapaq folleto hinaspa Familiawan Diosta Yupaychanapaq Tutapas. Yanapantaqmi predicacionman kuska lloqsiypas, ichapas precursor kaspa. ¿Atiwaqchikchu chayna serviyta huk killata, huk watata otaq masnintapas? (Leey 1 Corintios 15:58.) Huk cristianam qosantin precursor kasqankumanta nin: “Precursor kayqa yanapawarqakum imatapas kuska ruranaykupaq hinaspa astawan rimanakunaykupaqpas. Runamasiykuta Diosmanta yachachiy munasqaykum qawachiwarqa qosaywan huk sonqolla kasqaykuta. Astawanmi paypi hapipakurqani, manam qosay kasqanraykullachu, aswanmi allin amistadniy kasqanraykupas”, nispa. Qamkunapas kuskam allin ruraykunapi llamkanaykichik. Chaynapim imapas munasqaykichikkunapi hinaspa rurasqaykichikkunapipas sapa punchaw huk sonqolla kankichik. Aquila hinaspa Priscila hinam sapa kuti “huk runa hinallaña” kankichik  piensaynikichikpi, sientesqaykichikpi hinaspa imayna rurasqaykichikpipas.

Dios serviytam puntapi churana

15. ¿Imataq ancha allin casado vidapi kusisqa kanapaq, hinaspa imanasqa?

¹⁵ Jesusqa yacharqam casado vidapi Jehová Diosta puntapi churayqa ancha allin kasqanta. Payqa qawarqam punta kaq runakunata Taytan casarachisqanta. Rikurqataq Adanwan Eva Diosta kasukuspanku kusisqa kasqankuta. Qawarqataqmi mana kasukusqankurayku sasachakuykunapi tarikusqankuta. Chaymi runakunata yachachispan Genesis 2:24 nisqanpi Taytanpa kamachisqanta rimarqa, hinaspam nirqa: ‘Runaqa manam rakinmanchu Diospa kuskanchasqantaqa’, nispa (Mat. 19:6). Kunanpas casado vidapi kusisqa kanapaqqa, Jehová Diostam anchata respetana. Chaytam qawachirqa kay Pachapi Jesuspa tayta-maman.

16. ¿Imaynatam Joseywan Mariaqa qawachirqaku vidankupi Diosta puntapi churasqankuta?

¹⁶ Reqsinakusqanku tiempomantam Joseyqa Mariata kuyarqa hinaspa respetarqa. Wiksayakurusqanta yacharuspanmi, Joseyqa llakipayaywan allichananpaq tantearurqa manaraq Diospa angelnin ima pasasqanmanta nichkaptinpas (Mat. 1:18-20). Casarasqa kaspankupas kasukurqakum autoridadkunapa nisqanta hinaspa Moisespa chaskisqan Leytapas (Luc. 2:1-5, 21, 22). Jerusalenpi Diosta yupaychanapaq fiestakunaman qarikunalla obligasqa rinankupaq kaptinpas, sapa watam Mariaqa wakin familiankunapiwan Joseyta compañarqa (Deu. 16:16; Luc. 2:41). Chaykunata ruraspam paykunaqa kallpanchakuqku Jehová Dios kusichiyta hinaspa qawachiqku yupaychayninkuta respetasqankutapas. Chayraykuchá Jehová Diosqa paykunata akllarqa Churinta yuyayniyoq kanankama kay Pachapi cuidanankupaq.

17, 18. a) ¿Imaynatam casarasqakuna qawachinku vidankupi Jehová Diosta puntapi churasqankuta? b) ¿Imanasqam ancha allin chayna rurayninkuqa?

¹⁷ ¿Ima niwaqtaq qanmanta? ¿Diospa munasqanman hinachu wasikichikpi kawsankichik? Manaraq imatapas tanteachkaspa, ¿Bibliapa nisqanta qawankichikchu, Diosta mañakunkichikchu hinaspa experienciayoq cristianokunata tapukunkichikchu? Sasachakuykunatapas, ¿piensasqaykichikman otaq aylluykichikpa hinaspa amistadnikichikpa nisqanman hinachu allichankichik? ¿Kasukunkichikchu casado vidapaq confianza sirvientepa sumaq yachachikuykuna qosqanta? ¿Icha llaqtapa hinaspa runakunapa costumbrenman hinachu rurankichik? ¿Kuskachu sapa kuti Diosta mañakunkichik, estudiankichik, hinaspa rimankichikchu ima haypay munasqaykichikmantawan familiapi ima necesitasqaykichikmanta?

¹⁸ Ray sutiyoq iñiqmasinchikmi 50 wataña kusisqa casado vidanpi kachkan, paymi nin: “Manam haykapipas saqerqanikuchu ima sasachakuytapas mana allichasqataqa, sapa kutim kallpanchakurqaniku casado vidaykupi Jehová Dioswan ‘kimsa pata qaytu’ hina kanaykupaq”, nispa (leey Eclesiastes 4:12). Danny hinaspa Trina sutiyoq iñiqmasinchikkunapas ninkum: “Jehová Diosta servisqaykum, casado vidaykupi iskayniykuta sapa punchaw yanapawanku aswan allin kanaykupaq”, nispa. Paykunaqa ñam 34 wataña casado vidankupi kusisqa kawsakunku. Arí, casado vidapi Jehová Diosta puntapi churaptinchikqa, paymi yanapawasun allin kawsanapaq hinaspapas achkanpim bendeciwasun (Sal. 127:1).

 Casado vidata haykapipas respetasun

19. ¿Imanasqam casado vidata Jehová Dios qallarichirqa?

¹⁹ Achka runakunam casarakuspanku kikinkupa kusikuyllanpi piensanku. Cristianokunam ichaqa mana chaynatachu piensanchik. Yachasqanchikman hinaqa, Jehová Diosmi casado vidataqa qallarichirqa munayninkuna cumplikunanpaq (Gen. 1:26-28). Sichu Adanwan Eva casado vidankuta respetanmanku karqa, kay Pachaqa paraisom kanman karqa hinaspapas lliwmi Diosta kusisqa servinmanku karqa.

20, 21. a) ¿Imanasqam casado vidata ancha valorniyoqta qawananchik? b) ¿Imamantam qatiqnin estudiopi yachasun?

²⁰ Cristianokunaqa Jehová Diosta hatunchanankupaqmi casado vidankuta servichikunku (leey 1 Corintios 10:31). Qawasqanchikman hinaqa casado vidatam allintapuni yanapan confianza kayqa, kuska rurayqa hinaspa Diosta puntapi churayqa. Casarakuyta piensaspapas otaq casado vidayki allin takyasqa kananpaq otaq rakinakuyman mana chayanaykipaq kallpanchakuspapas, casado vidaykitam qawanayki ancha valorniyoqta, Dios qallarichisqanrayku. Chaynata qawaspaqa, familianchikpaq imatapas tanteaspam tukuyta rurasun Bibliapa nisqanta kasukunapaq. Chaynapim qawachisun casado vidatawan Jehová Diosta respetasqanchikta.

²¹ Ichaqa manam casado vidallatachu Jehová Diosqa regalota hinaqa qowarqanchik. Manataqmi chaynintakamallachu kusikuytaqa tarinchik. Qatiqnin estudiopim qawasun Diospa huknin regalo qowasqanchikmanta, chayqa soltero kaymi.

¿Imatam niwaq?

• ¿Imaynatam casadokunata yanapan confianza kasqanku?

• ¿Imanasqam imatapas kuska rurayqa casadokunata yanapan?

• ¿Imaynatam casadokuna qawachinku Diosta puntapi churasqankuta?

• ¿Imaynatam qawachinchik casado vidata qallarichiq Dios respetasqanchikta?

[Kay yachachikuypa tapukuyninkuna]

[15 kaq paginapi dibujo]

Imatapas kuska ruraymi casadokunata yanapan huklla kanankupaq