Diospa favorninqa wiñay kawsaymanmi apawanchik

“Qamqa allinlla rurallaqtam bendeciykunki. Qamqa kuyakuq kallaspaykim harkaykullanki [otaq favoreceykunki].” (SAL. 5:12.)

1, 2. ¿Imatam Eliasqa Sarepta llaqtayoq viudata mañakurqa, hinaspa imatam prometerqa?

SAREPTA llaqtamanta huk viudam wawanwan yarqaymanta kachkarqaku chaynallataq Diosmanta willakuq Eliaspas. Yanukunanpaq ninata ratachichkaptinmi Eliasqa mañakurqa tantatawan yakuta. Viudaqa yakutam qoykurqa, ichaqa ‘tinajanpi putqoy harinawan puyñuchanpi pisi aceitellañam kapurqa’. Payqa yacharqam Eliasta mikuchinanpaq manaña imanpas kapusqanta, chayna tarikusqanmantam willarqa (1 Rey. 17:8-12).

² Eliasmi ichaqa nirqa: “Ñoqapaqyá puntata ruraykapamuway tortillata, chayta aparamuwaspaykiñam, qampaqwan wawaykipaqqa ruramunki. Israelpa yupaychasqan Tayta Diosmi nin: ‘Tinajaykipi harinapas chaynataq puyñuchaykipi aceitepas manam pisinqachu’”, nispa (1 Rey. 17:13, 14).

3. ¿Ima tapukuytam rurakunanchik?

³ Viudaqa manam pisi mikuyninta Eliasman qonallanpaqchu tanteanan karqa. ¿Astawanchu preocupakunman karqa paypa hinaspa wawanpa imapas necesitasqanpi icha Diospa favornintawan amistadninta tariypichu? ¿Confianmanchu karqa paytawan wawanta Jehová Dios salvaykunanmanta? Ñoqanchikpas tapukunanchikmi: ¿imamantam astawan preocupakunay, kapuqniyoq kaymantachu icha Diospa favorninta tariymantachu? Achka razonkunam kachkan Jehová Diospi confianapaq hinaspa servinapaqpas. Paymi willawanchik favorninta chaskinapaq imakuna ruranamanta.

Jehová Diosllatam yupaychanaqa

4. ¿Imaraykum Jehová Diosllata yupaychananchik?

⁴ Jehová Diosqa derechoyoqmi paypa munasqanman hina yupaychananchikta mañawananchikpaqqa. Chayna kasqantam qawachin hanaq pachapi angelkunapa kayna nisqanku: “Señor Diosllayku, qamllam kanki tukuy atipayniyoq adorana hinaspa yupaychana Diosqa. Qanmi unancharqanki tukuy  ima kaqkunataqa. Munaynikiman hina unanchaptikim kachkan tukuy imakunaqa”, nispa (Apo. 4:11). Paymi tukuy imakunapa Unanchaqnin, chayraykum payllata yupaychananchik.

5. ¿Imanasqam Diospa kuyakuynin tanqawananchik payta servinapaq?

⁵ Jehová Diostaqa yupaychananchiktaqmi lliw runakunata anchata kuyawasqanchikrayku. Bibliam niwanchik Diosqa runata ‘kikinman rikchakuqta rurasqanta. Qaritawan warmitam unancharqa’ (Gen. 1:27). Unanchawarqanchiktaqmi kikinchik imatapas tanteanapaq. Unanchawasqanchikraykum payqa Taytanchik (Luc. 3:38). Chaymi kusisqa kananchikpaq tukuy ima necesitasqanchiktapas qowanchik. “Paymi intitapas qespichimun [. . .] paytaqmi parachimun”, chaymi chakrapi kawsaykuna wiñaspan achka mikuyta qowanchik hinaspa sumaqllañam qawanapaqpas (Mat. 5:45).

6, 7. a) ¿Imaynatam Adanqa mirayninkunata huchaman entregaykurqa? b) Diospa favornin maskaqkunata, ¿imaynatam Cristopa wañukusqan yanapanqa?

⁶ Chaymantapas Diosqa librawarqanchikmi huchamantawan wañuymanta. Diospa contranpi Adan churakusqantam tupachichwan, familianta mantienenanpaq lliw qollqenta imapipas usuchiq taytawan. ¿Imanasqa? Diosta mana kasukuspanmi mirayninkunamanta qechururqa wiñaypaq kusisqa kawsakuyninkuta. Kikillanpi piensaspanmi lliw runakunata huchaman entregaykuwarqanchik. Chayraykum onqonchik, ñakarinchik hinaspa wañunchik. ¡Anchatamá munanchik kaykunamanta librakuytaqa! Ichaqa, huk sirviente librasqa kananpaqqa pipas pagananmi, chaynatam Jehová Diospas rurarqa librawananchikpaq (leey Romanos 5:21). Chaytam rurarqa Churinta ‘achka runakunapa rantinpi wañunanpaq’ kachamuspan (Mat. 20:28). Pisi tiempollamantañam Diospa favorecesqan runakunaqa, rantinchikpi Cristopa wañusqanmanta yanapakuykunata chaskinqaku.

⁷ Jehová Diosninchikmi pimantapas tukuy imata rurarqa kusisqallaña kawsananchikpaq. Favorninta chaskispaqa qawasunmi runakunapa ñakarisqankunata imayna chinkachisqanta. Jehová Diosmi sapakamata qawachiwasun ‘maskaqninkunata favorecesqanta’ (Heb. 11:6).

‘Runaykikunam entregakusunki’

8. ¿Imatam yachachiwanchik Isaiaspa ejemplon Dios serviymanta?

⁸ Diosqa manam pitapas obliganchu servinankupaqqa. Payqa saqenmi sapakama runakuna libre kasqankuta servichikunankupaq. Servinankupaq akllaqkunatam ichaqa bendecin. Isaiaspa tiemponpim Diosqa kayna tapurqa: “¿Pitataq kachasaq? ¿Pitaq willakamunqa ñoqaykumanta?”, nispa. Qawasqanchikman hinaqa, Isaiasta tanteananpaq saqespanmi Diosqa qawachirqa respetasqanta. Isaiasñataqmi kusisqa kaynata nirqa: ‘Kaypim kachkani [. . .]. Ñoqatayá kachaway’, nispa (Isa. 6:8).

9, 10. a) ¿Imaynatam Diosta servinanchik? b) ¿Imanasqataq tukuy sonqowan Diosta servinanchik?

⁹ Sapakamam libre kanchik Diosta servinapaq otaq manapas. Jehová Diosqa munanmi kikinchikmanta servinanchikta (leey Josuey 24:15). Manam haykapipas chaskiwasunchu mana munastin otaq hukkunarayku serviptinchikqa (Col. 3:22). Kay pachapi kaqkunata munapayaspa ‘Diosta tukuy sonqowan’ mana serviptinchikqa, manamá Diospa favornintaqa chaskisunchu (Sal. 119:2). Payqa yachanmi tukuy sonqowan servisqanchik allinninchikpaq kasqanta. Chaymi Moisesqa israelitakunata nirqa kawsakuyta akllakunankupaq. Chaytam ruranmanku karqa ‘Diosta kuyaspanku, kasukuspanku hinaspa paymanta mana kacharikuspanku’ (Deu. 30:19, 20).

¹⁰ Rey Davidmi Jehová Diosman kaynata takirqa: “Atiywan peleasqayki punchawpim runaykikuna entregakusunki. Sumaqllaña kasqayki  punchawpim kikinkumanta hamusunki. Achikyaq sulla hinam akllasqayki mozokuna hamusunki”, nispa (Sal. 110:3). Kunan tiempopi achka runakunam qollqetawan kusirikuykunata puntata maskanku. Jehová Diosta kuyaqkunam ichaqa yachanku Dios serviyninku puntapi kananta. Tukuy sonqonkuwan predicasqankum qawachin chayna kasqanta. Segurom kanku imapas necesitasqankuta Jehová Dios qonanmanta (Mat. 6:33, 34).

Diospa chaskisqan ofrendakuna

11. ¿Imatam israelitakuna suyarqaku ofrendakunata Diosman qospanku?

¹¹ Israelitakunaman Leyta qosqanpim Diosqa kamachirqa agradonpaq hina ofrendakunata qospanku favorninta chaskinankumanta. Chaytam qawachin Levitico 19:5 versiculopa nisqan: “Ñoqawan allinlla kasqaykichikmanta ofrendata ñoqa Tayta Diosman presentawaspaykichikqa, qowaychik chaskisqa kanaykichikpaq hinayá”, nispa. Hina chay libropitaqmi nin: “Diosman graciasta qonaykichikpaq animalta wañuchispaqa chaskinaypaq hinam rurankichik”, nispa (Lev. 22:29). Israelitakuna sapa kuti allin ofrendakunata altarpi kañaptinkuqa, hoqarikusqan qosninqa Diospaqmi ‘miskillaña asnariq ofrenda’ karqa (Lev. 1:9, 13). Huk rimaypiqa, serviqninkupa kuyakuywan chayna rurasqankum anchata kusichirqa (Gen. 8:21). Chay rurasqankum kayta yachachiwanchik: Diospa favorninta chaskinapaqqa agradonpaq ofrendakunatam qonanchik. ¿Imataq chay ofrendakunaqa kanman? Iskay asuntomanta rimarisun: imayna kawsasqanchikmanta hinaspa rimasqanchikmanta.

12. ¿Imakunatam mana ruranachu cuerponchikta ‘ofrendata hina’ Diosman qospaqa?

¹² Pablom Romapi cristianokunaman qellqaspan nirqa: “Cuerpoykichiktaqa Diosmanyá qoychik kawsachkaq ofrendata hina hinaspayá payllapaqña kawsaychik agradowan chaskisunaykichikpaq”, nispa (Rom. 12:1). Qawasqanchikman hinaqa, Diospa favorninta chaskinapaqqa Diospa agradonpaq hinam cuerponchikqa kanan. Payqa manam ofrendata hinaqa chaskinqachu tragowan, cigarrowan, cocawan hinaspa hukkunawanpas cuerponchikta qachachaptinchikqa (2 Cor. 7:1). Manataqmi agradonpaqchu kanman huchapakuptinchikqa, Bibliaqa ninmi: “Huchapakuqmi ichaqa kikinpa cuerponpa contranpi huchallikun”, nispa (1 Cor. 6:18). Diosta agraday munaqkunaqa kawsakuyninkupim ‘chuya’ kananku (1 Ped. 1:14-16).

13. ¿Imanasqam Jehová Diosta alabananchik?

¹³ Rimasqanchikpas ofrenda hinam Diospaqqa kanman. Jehová Diosta kuyaq runakunaqa paymantam allinta rimanku wasinkupi hinaspa huk lawpipas (leey Salmo 34:1-3). Salmos libropa 148-150 capitulonkunata leespam qawanchik, Diosta alabanapaq achka kutita niwasqanchikta. Arí, ‘Diospa  munasqanman hina kawsaqkunapa alabasqankum’ “suma-sumaqllaña” paypaqqa (Sal. 33:1). Diostaqa alabanchikmi allin noticiamanta predicaspapas, chay ruraymi Jesuspaqpas ancha allin ruray karqa (Luc. 4:18, 43, 44).

14, 15. ¿Imatam ofrendata hina qonankupaq Oseas nirqa, hinaspa imaynatam Jehová Dios chaskirqa?

¹⁴ Tukuy sonqowan predicaspam qawachinchik Dios kuyasqanchikta hinaspa favorninta chaskiy munasqanchiktapas. Piensasun israelitakuna taytacha-mamachakunata yupaychasqankurayku Diospa favorninta chinkachisqankumanta Oseaspa nisqanpi (Ose. 13:1-3). Oseasmi Diosta kaynata mañakunankupaq nirqa: “Pampachaykuwaykuyá tukuy mana allin rurasqaykumanta. Kuyakuywanyá chaskiykuy alabamusqaykuta. [“Toro”, NM] ofrendata hinayá chaskiykuy alabamusqaykuta”, nispa (Ose. 14:1, 2).

¹⁵ Israelitakunapaqmi toroqa ancha valorniyoq ofrenda qosqanku karqa. Ñoqanchikpaqqa, ¿imataq kanman toro ofrendakunawan hina alabayqa? Sonqomanta chaynataq yuyaymanaspa Diosta alabanapaq rimaykunam. ¿Imaynatam Diosqa qawarqa chay ofrenda qosqankuta? Kikinmi nirqa: ‘Mana pipapas harkakusqanmi kuyasqaykichik qamkunataqa’, nispa (Ose. 14:4). Qawasqanchikman hinaqa, Diosqa munanmi alabaqninkunapa huchankuta pampachayta, favoreceyta hinaspa amistadnin kaytapas.

16, 17. ¿Imaynatam Jehová Diosqa qawan iñisqankurayku chayllaraq predicaspa alabaqkunata?

¹⁶ Cheqap cristianokunaqa reqsichikunkum runakunapa qayllanpi Diosta alabasqankuwan. Salmos qellqaqpaqqa ancha allinmi karqa Diosta alabayqa, chaymi kaynata mañakurqa: “Dios Taytalláy, ruegakuykim ofrendata hina alabasqayta chaskiwanaykipaq”, nispa (Sal. 119:108). ¿Imatam nichwan kunan tiempomanta? Kay tiempopi achkallaña yupaychaqkunamanta rimaspanmi Isaias nirqa: ‘Tayta Diosta alabanankupaqmi noticiakunata willakunqaku’. Hinaspam ‘altarninpi agradonpaq ofrecesqankuta chaskinqa’, nispa (Isa. 60:6, 7). Kunan tiempopi millonnintin cristianokunam chayna nisqanta cumplinchik ‘kañasqa ofrendata qochkaq hina sutinmanta willakuspa’ (Heb. 13:15).

¹⁷ ¿Imatam qanmanta niwaq? ¿Diospa agradonpaq hina ofrendakunatachu qochkanki? Mana chayna kaptinqa, ¿kallpanchakuwaqchu hukkunapa qayllanpi Diosmanta willakunaykipaq? Chayna rurasqaykiqa iñiynikitam qawachin, hinaspa toro ‘ofrendamantapas’ aswan agradonpaqmi kanqa (leey Salmo 69:30, 31). Segurom kawaq Diosta alabasqayki “miski asnaq ofrenda hina” trononman chayasqanta hinaspapas favornintam chaskinki (Eze. 20:41). Chayta ruraspaqa ancha kusisqam tarikunki.

‘Qamqa allin ruraqtam bendeciykunki’

18, 19. a) ¿Ima ninkum achka runakuna Dios yupaychaymanta? b) ¿Imapim tukun Diospa favorninta chinkachiyqa?

¹⁸ Kunan tiempopi achka runakunam, Malaquiaspa tiemponpi wakin israelitakuna hina pantaspanku kaynata ninku: “Yanqapaqmi Diosta adorayqa. ¿Imatataq horqokunchik paypa kamachikusqankunata ruraspaqa?”, nispa (Mal. 3:14). Qollqella kuyaq kaspankum piensanku Diospa promesankuna mana haykapipas cumplikunanta hinaspa kamachikuyninkuna manaña valesqantapas. Piensankum predicayqa tiempo usuchiy kasqanta hinaspa  runakunata rabiachisqankutapas.

¹⁹ Chayna piensayqa Eden huertapiraqmi qallarirqa. ¿Pim Evata piensachirqa Diospa sumaq kawsakuy qosqanmantapas astawanraq necesitasqanta? ¿Pim iskayrayachirqa Jehová Diospa favorninta tarinapaq kallpanchakuyqa yanqa kasqanta? Satanasmi karqa, paymi kunanpas runakunata piensachin Diospa munaynin ruray yanqa kasqanta. Ichaqa, Adanwan Evam cuentata qokururqaku Diospa favorninta chinkachiyqa wañuyman apasqanta. Pisi tiempollamantañam paykunapa mana allin rurasqankuta qatipakuqkunapas paykuna hina tukunqaku (Gen. 3:1-7, 17-19).

20, 21. a) ¿Imatam Sareptamanta viuda rurarqa hinaspa ima bendiciontam chaskirqa? b) ¿Imanasqam rurasqanta qatipakunanchik hinaspa imaynatam rurachwan?

²⁰ Punta tayta-mamanchikmantaqa Sarepta llaqtayoq viudam yachaywan rurarqa. ¿Imatam payqa rurarqa Eliaspa nisqanta uyarispan? Tortillata ruraspanmi puntata payman qoykurqa. Jehová Diosqa cumplirqam Eliaswan nisqantaqa, chayna kasqanmantam Biblia nin: “Viudapas, Eliaspas chaynataq viudapa familianpas unay tiempo mikurqaku. Tinajapi harinapas manam tukurqachu, manataqmi pisirqachu puyñuchapi aceitepas. Chaynamá karqa Eliaswan Tayta Diospa nichisqanpi hina”, nispa (1 Rey. 17:15, 16).

²¹ Kay pachapi millonnintin runakunamantaqa wakillankum viudapa rurasqanman hina ruranku. Viudaqa Diospim iñirqa hinaptinmi yanapakuyninta chaskirqa. Kay willakuy hinaspa Bibliapi huk willakuykunapas qawachiwanchikmi Jehová Dios confianapaq kasqanta (leey Josuey 21:43-45 hinaspa 23:14). Kunanpas achka pruebakunatam qawanchik favorecesqan serviqninkunata Dios mana haykapipas saqesqanmanta (Sal. 34:6, 7, 17-19). *

22. ¿Imanasqam kunanpuni Diospa favorninta maskananchik?

²² Diospa piñakuynin punchawqa chayamunqapunim ‘kay pachapi llapallan runakunapaq’, manam imapas harkanqachu (Luc. 21:34, 35). Tukuy kapuqninkunapas manam valenqachu. Imamantapas aswan valorniyoqqa kanqa Jesuspa kayna nisqanta uyariymi: “Hamuychik Taytaypa favorecesqankuna, hinaspayá [. . .] qamkunapaq alistasqa munaychakunaykichikta chaskiychik”, nispa (Mat. 25:34). Hinaptinmi kay rimaykunapa cumplikusqanta qawasun: “Qamqa allinlla rurallaqtam bendeciykunki. Qamqa kuyakuq kallaspaykim harkaykullanki [otaq favoreceykunki]” (Sal. 5:12). Arí, kunanpunim Diospa favornintaqa maskananchik.

[Willakuy]

¿Yuyachkankichu?

• ¿Imanasqam Jehová Diosta tukuy sonqomanta yupaychananchik?

• ¿Ima ofrendakunatam kunanqa Jehová Diosman qonanchik?

• ¿Imataq kanman toro ofrendakunawan hina alabayqa, hinaspa imanasqam Diosman qonanchik?

• ¿Imanasqam Diospa favornintaqa maskananchik?

[Kay yachachikuypa tapukuyninkuna]

[13 kaq paginapi dibujo]

¿Ima rurananpaqmi tanteanan karqa Sarepta llaqtamanta wakcha viuda?

[15 kaq paginapi dibujo]

¿Ima bendicionkunatam chaskisun Diosta alabasqanchikmanta?

[17 kaq paginapi dibujo]

Jehová Diospi confiaspaqa manam haykapipas hukmanyasqaqa tarikusunchu