Kasukuymi aswan allinqa ofrendakunamantaqa

ISRAEL nacionpa punta kaq reyninqa Saulmi karqa. Dios akllaruptinpas mana kasukuqmi rikurirurqa.

¿Imakunapim pantarurqa? ¿Atinmanchu karqa chaykuna mana rurayta? ¿Imakunatam paymanta yachachwan?

Diosmi willan pim rey kananmanta

Saul manaraq kamachichkaptinmi, Samuelqa Israelpi Diospa rantinpi karqa. Ichaqa machuyarurqañam hinaspa churinkunapas Diostaqa manam kasukurqakuchu. Chaymantapas Israelpa enemigonkunam yaykuramuyta munarqaku. Chaymi Israelpi ancianokuna Samuelta nirqaku huk reyta akllananpaq, hinaptinmi Jehová Diosqa nirqa Saul akllasqa kananpaq, nirqataqmi: “Paymi runaykunata libranqa Filistea runakunamanta”, nispa (1 Sam. 8:4-7, 20; 9:16).

Saulqa “buenmozo joven” kaspanpas huk sumaq kayninkunapas karqam. Qallarinapaqqa humildem karqa. Chaymi Samuelta nirqa: “Ñoqaqariki kani Benjamin ayllumanta kaqmi, chay aylluqariki kaniku Israel wakin ayllukunamantapas aslla kaqmi. Chaywanpas ñoqapa familiayqa manam Benjaminpa wakin castankuna hina ancha reqsisqachu. Hinaptinqa ¿imanasqamá chaykunataqa niwanki, taytáy?”, nispa. Payqa manam kikinmantapas nitaq familianmantapas alabakurqachu, Cis sutiyoq taytan valeroso otaq apu runa kaptinpas (1 Sam. 9:1, 2, 21).

Saulpa humilde kasqanqa qawakurqataqmi Israelpa reynin kananpaq runakunaman willaptin ima rurasqanpi. Ñawpaqtaraqmi Samuelqa sapallankupi Saulta rey kananpaq nombrarqa, chaypim Saulta nirqa: “Atisqaykiman hinayá imatapas ruray, Diosmi yanapasunki”, nispa. Ichaqa, ¿imatam Saulqa rurarqa Jehová Diospa tantearusqanta Israelitakunaman Samuel niptin? Saulqa manamá maypipas rikurirqachu. Manchakuq kaspanmi pakakururqa. Ichaqa Jehová Diosmi Samuelman willarqa maypi pakakusqanmanta, hinaptinñam rey kananpaq runakunaman willarqa (1 Sam. 10:7, 20-24).

Guerrapi kaptin

Ichapas wakin israelitakunaqa piensarqaku Saul mana kamachiy atinanta, ichaqa manam chaynachu karqa. Huk kutipim Amon casta runakuna Israelpa huk kaqnin llaqtanman yaykuyta munaptinku, ‘Saulman Diospa espiritun huntaykurqa’ hinaptinmi kallpanchasqa tarikurqa. Chaymi Saulqa soldadokunata  huñurachispan peleaq rirqaku, hinaspam atiparurqaku. Ichaqa vencesqankumantam kaynata nirqa: “Kunanqariki Tayta Diosmi libraykuwanchik lliw Israel casta runakunata”, nispa (1 Sam. 11:1-13).

Saulqa sumaq kayniyoqmi karqa hinaspa Diospa favornintapas chaskirqam. Reqsikurqataqmi Dios yanapasqantapas. Ichaqa guerrapi hinalla atipanankupaqqa israelitakunam Samuelpa kayna nisqanta kasunanku karqa: “Diosta respetaspayá paytaña adoraychik, payta uyarispayá kasukuychik nisqankunatapas. Yupaychasqanchik Tayta Diosta qatispaqa qamkunapas chaynataq gobiernasuqnikichik reypas allinmi kanqa”, nispa. Samuelqa nirqataqmi kasukuqkunapaq Dios ima rurananmanta: “Diosmi ichaqa hatun sutinrayku runankunataqa mana saqesunkichikchu. Payqariki runankunaña kanaykichiktam munarqa”, nispa (1 Sam. 12:14, 22).

Kasukuymi haykapipas ancha allin karqa Diospa favorecesqan kanapaqqa. Diospa serviqninkuna paypa kamachikuyninkunata kasukuptinkuqa payqa bendecinmi. Mana kasukuptinkuñataq mana.

“¡Loco hinam kaytaqa rurarunki!”

Hinalla rimasun Saulmanta. Kaqmanta peleasqanpim Filistea soldadokunaqa karqa “mana yupay atina aqo hinaña [. . .]. Israel runakunam llumpay sasachakuypi rikurirurqaku [. . .] chaymi machaykunapi, uchkukunapi, qaqakunapi, yarqakunapi hinaspa chakisqa pozokunapi pakakurqaku” (1 Sam. 13:5, 6). ¿Imatam Saulqa ruranman karqa?

Samuelmi Saulta kamachirqa Gilgal llaqtapi suyananpaq, chaypim favorninpaq ofrendakunata kañapunan karqa. Saulqa chaynatamá rurarqa, ichaqa Samuelmi mana chayamurqachu hinaspa soldadokunapas ayqekuytaña qallaykurqaku. Chaymi Saulqa kikinña ofrendakunata kañayta qallaykurqa. Hinaptinmi Samuelqa chayaramurqa, hinaspa Saul rurarusqanmanta yacharuspan nirqa: “¡Loco hinam kaytaqa rurarunki! Sichum kasukuwaq karqa Tayta Diospa kamachisusqaykita hinaptinqa paymi cheqapta takyachinman karqa Israel nacionpi gobiernoykita chaynapi wiñaypaq kananpaq. Kunanmi ichaqa kay gobiernoykiqa chaylla tukurunqa. Tayta Diosmi maskanqa paypa agradonpaq kaq runata hinaspam paytaña churanqa runakunata kamachinanpaq. Qamqariki manam kasukurqankichu imam kamachisusqaykita”, nispa (1 Sam. 10:8; 13:8, 13, 14).

Samuelta suyananmantaqa Saulqa mana iñispanmi yachastin Diospa kamachisqanta mana kasukurqachu. Ñawpaq tiempopi Israel tropakunata kamachiq Gedeonqa manamá chaynachu karqa. Jehová Diosmi kamachirqa 32 waranqa soldadonkunamanta 3 pachakman mesnosyachinanpaq, Gedeonqa chaynatamá rurarqa. ¿Imanasqam kasukurqa? Iñisqanraykum. Diospa yanapakuyninwanmi 135.000 enemigonkunata wañurachirqa (Jue. 7:1-7, 17-22; 8:10). Jehová Diosqa Saultapas yanapanmanmi karqa. Ichaqa mana kasukusqanraykum mana yanaparqachu. Chaymi Filistea tropakuna vencerurqaku (1 Sam. 13:17, 18).

¿Imatataq nichwan ñoqanchikmanta? ¿Imaynatam tanteanchik sasachakuykunapi tarikuspa? Mana iñiyniyoq runakunaqa chayllam Diospa nisqankunata qepancharunku. Chaynatam Saulpas rurarurqa, payqa piensarqachá Samuel mana chayamuptin rurasqan allin kasqanta. Ichaqa Diospa favorninta maskaq runakunapaqqa ancha allinmi Bibliapa nisqankunata kasukuyninqa.

Saultam Jehová Dios qepanchan

Amalec tropakunawan Saul peleaspanmi kaqmanta hatun huchata rurarurqa. Diosqa chay naciontaqa sentenciarqañam israelitakuna chunniqpi kachkaptinku yanqamanta contranpi churakusqankumanta (Exo. 17:8; Deu. 25:17, 18). Juezkunapa tiemponpipas Amalec runakunaqa Diospa llaqtanpi peleanankupaqmi huk llaqtakunawan hukllawakururqa (Jue. 3:12, 13; 6:1-3, 33). Chaymi  Jehová Diosqa Saulta kamachirqa wañuchinanpaq (1 Sam. 15:1-3).

Ichaqa chay nacionta tukuy imankunatawan puchukachinanmantaqa Saulqa reytam mana wañuchirqachu hinaspa allinneq animalninkunatapas. ¿Imatam rurarqa mana kasukusqanmanta Samuel qaqchaptin? Hukkunatam tumparqa kaynata nispan: “[Tropakunam] allinnin ovejakunatawan allinnin vacakunata puchuchirqaku chaynapi yupaychasqanchik Tayta Diosman ofrecespa kañapunapaq”, nispa. Imayna kaptinpas Saulqa manam kasukurqachu. Ñawpaqpi ‘mana valeqpaq kikinta hapikuchkaspanpas’, manañam humildechu karqa. Chaymi Samuelqa Diosta mana kasukusqanmanta kaynata nirqa: “Diosqa munan manam animalkuna ofrecenatachu nitaq animalkunata wañuchispa kañapunatachu, nisqan kasukunatam payqa munan. Animal ofrendakunamantapas [. . .] aswan allinqa payta kasukuymi [. . .] paypa kamachisusqaykitam yanqacharqanki. Paypas rey kaynikimantam qarqorusunki”, nispa (1 Sam. 15:15, 17, 22, 23).

Chaymantapas Diosqa espiritunta qechuruspanmi manaña bendecirqachu hinaspam ‘mana allin espirituña’ otaq mana allin ruray munayña Saulpi munaychakururqa. Chaymi Davidmanta envidiakuyta qallaykurqa, Jehová Diosqa paytañam favorecenan karqa. Saulqa achka kutitam wañurachiyta munarqa. Bibliaqa niwanchikmi ‘Davidta Tayta Diospuni yanapasqanta’ Saul qawaspan ‘wañukunankama Davidpa enemigon rikurirusqanta’ hinaspam qatikacharqa. Kamachirqataqmi 85 sacerdotekunatawan huk runakunatapas wañuchinankupaq. Chayraykuchá Diosqa qepancharurqa (1 Sam. 16:14; 18:11, 25, 28, 29; 19:10, 11; 20:32, 33; 22:16-19).

Filisteokuna israelitakunawan kaqmanta peleanankupaq hamuptinkum Saulqa huktawan Diosta mana kasukurqachu, payqa yanapakuytam maskarqa brujakunapi. Ichaqa yanqam karqa, paqarinnintintam peleasqanpi wañururqa (1 Sam. 28:4-8; 31:3, 4). Bibliam willawanchik imanasqa chaynapi tukusqanta, ninmi: “Diosta traicionasqanraykumá Saulqa wañururqa, payqa huchallikururqa Tayta Diospa palabranta mana kasukuspanmi chaynataq espiritistata tapukuspanmi. Tayta Diosta mana tapukusqanraykum pay wañurachirqa”, nispa (1 Cro. 10:13, 14).

Mana allin rurasqanmi yachachiwanchik imamantapas Diosta kasukuy ancha allin kasqanta. Apostol Juanpas nirqam: “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu”, nispa (1 Juan 5:3). Ama haykapipas kayta qonqasunchu: Diospa amistadnin hinalla kayta munaspanchikqa kasukunanchikmi.

[21 kaq paginapi dibujo]

Saulqa kamachiyta qallaykuspanqa humildem karqa

[23 kaq paginapi dibujo]

¿Imanasqam Saulta Samuelqa nirqa kasukuymi aswan allinqa ofrendakunamantaqa nispa?