Sonqomanta kuyasun allin rurayta

‘Allin ruraytam kuyarqanki.’ (SAL. 45:7.)

1. ¿Imataq yanapawasun ‘allin ñanpi’ hinalla kanapaq?

JEHOVÁ DIOSQA Palabranta servichikuspanmi serviqninkunata ‘allin ñanninta pusawanchik’ (Sal. 23:3). Ichaqa pantaq kaspanchikmi chay allin ñanmanta karunchakunchik. Kaqmanta kutirinapaqqa anchatamá kallpanchakuna. ¿Imataq chaypaq yanapawasun? Chaypaqqa Jesus hinam allin kaqkunata kuyana (leey  Salmo 45:7).

2. ¿Imataq ‘allin ñankunaqa’?

² ¿Imataq ‘allin ñankunaqa’? Kay ñankunaqa Diospa kamachisqanman hina kawsayninchikmi. Hebreo hinaspa Griego rimaypi ‘allin ñan’ ninanqa, imayna kawsanapaq kamachikuykunata allintapuni kasukuymi. Jehová Diospa ñanninkuna “allinpuni” kasqanraykum, serviqninkunaqa imayna kawsanapaq hinaspa pusawananchikpaq Diospa yanapakuyninta maskanchik (Apo. 15:3).

3. ¿Imaynatam allinta yachachwan Diospa allin ruraq kasqanmanta?

³ Diospa favorninta chaskinapaqqa, allinninchikpaq kamachikuynintam kasukunanchik (Deu. 32:4). Chaypaqqa Palabrantakamam paymanta puntata allinta yachananchik. Diosmanta allinta yachaspanchikmi, astawan payman asuykusun hinaspa allin ruraq kasqantapas kuyasun (Sant. 4:8). Chaymi Palabranpi niwasqanchikman hina imatapas tanteasun.

Maskasun Diospa munasqan allin rurayta

4. ¿Ima ninantaq Diospa munasqan allin rurayta maskayqa?

⁴ (Leey Mateo 6:33.) ¿Ima ninantaq Diospa munasqan allin rurayta maskayqa? ¿Diosmanta willakuyllachu kanman? Manamá. Servisqanchikta Dios chaskiwananchikpaqqa sapa punchawmi kamachikuyninkunata kasukunanchik. Diospa allin rurasqanta maskaqkunaqa ‘mosoqwan pachakuchkaq hinam mosoq runaña kananchik Diosman rikchakunanchikpaq, chayna runatam Diosqa unancharqa cheqaptapuni mana huchallikuq justo kanapaq’ (Efe. 4:24).

5. ¿Imataq yanapawasun mana hukmanyanapaq?

⁵ Diospa kamachikuyninta kasukunapaq maynataña kallpanchakuspapas pantanchikmi. ¿Imataq yanapawasun mana hukmanyanapaq hinaspa allin rurayta kuyanapaqwan chayman hina ruranapaqpas? (Pro. 24:10.) Yanapawasunmi sapa punchaw ‘sonqomanta ama iskayrayaspa confianzawan’ ‘Diosman asuykuyninchik’ (Heb. 10:19-22). Kay Pachapi otaq hanaq pachapi kawsanapaq suyakuyniyoq kaspanchikpas, Librawaqninchik hinaspa Sacerdotekunapa jefen Cristopim iñinanchik (Rom. 5:8; Heb. 4:14-16). Apostol Juanmi qellqarqa: “Jesucristopa yawarninñataqmi llapallan huchanchikmanta mayllawanchik”, nispa (1 Juan 1:6, 7). Bibliam nin: “Cochinilla hina guindoña huchaykichik kaptinpas ritita hinam yuraqyachisaq”, nispa. ¡Maynatam agradecekunchik salvawananchikpaq Jehová Dios kuyasqan Churinta kachamusqanmantaqa! (Isa. 1:18.)

Diospa qowasqanchik armakunamanta

6. ¿Imanasqam ancha allin Diospa qowasqanchik armakunata servichikuyqa?

⁶ Sapa punchawmi Diospa qowasqanchik  armakunataqa servichikunanchik, hukninmi Diospa munasqanman hina kawsanapaq ‘soldadopa qasqon harkaqwan’ tupachisqa kachkan (Efe. 6:11, 14). Chayllaraq otaq unay wataña Diosta servispanchikpas, ancha allinmi Diospa qowasqanchik armakunata sapa punchaw servichikuyninchikqa. ¿Imanasqa? Satanaswan angelninkuna kay Pachaman wischumusqa kasqankurayku (Apo. 12:7-12). Piñasqallañam kachkan, yachantaqmi pisi tiempoyoqllaña kasqanta. Chaymi astawan Diospa llaqtanpa contranpi churakun. Chayraykum sapa kuti servichikunanchik ‘soldadopa qasqon harkaqwan’ tupachisqanta.

7. ¿Imakunatam mana rurasunchu ‘soldadopa qasqon harkaqwan hina’ churasqa kaptinchikqa?

⁷ Soldadopa qasqon harkaqqa sonqontam waqaychan. ¿Imanasqam sonqonchikta cuidananchik? Pantaq kasqanchikraykum mana allinkuna rurayta munanchik (Gen. 8:21). Arí, sonqonchikqa engañakuqllañam (Jer. 17:9). Chaymi yachachina hinaspa controlana. Yachanchikmi soldadopa qasqon harkaqwan tupachisqa kaqqa ancha allin kasqanta chaymi sapa kuti servichikuna. Hinaptinqa manamá Diospa cheqnisqan kaqkunawanqa kusirikunchikchu nitaq huchapakuykunapipas piensanchikchu. Manataqmi tiemponchiktaqa usuchinchikchu television qawayman qokuspaqa. Aswanmi sapa kuti kallpanchakunchik imayna kawsasqanchikwan Diosta agradanapaq. Ichaqa ¿mana allinkuna piensayta otaq rurayta qallaykuptinchikqa? Chaywanqa manam atipachikunachu, aswanmi Diospa yanapakuyninwan atipanapaq kallpanchakunanchik (leey Proverbios 24:16).

8. ¿Imanasqam necesitanchik iñiyninchikta waqaychaq harkachikuyta?

⁸ Diospa qowasqanchik armakunapiqa kachkantaqmi iñiyninchikta waqaychaq harkachikuna, chayqa allinpunim ‘Diablopa rupachkaq flechankunata amachanapaq’ (Efe. 6:16). Iñiyqa yanapawanchikmi allin kaqkunata rurananchikpaq, chayqa wiñay kawsaymanmi apawasun. Necesitanchiktaqmi sonqomanta Jehová Dios kuyayta, astawan kuyaspaqa allin ruraytapas kuyasunmi. Yanapawanchiktaqmi conciencianchikpas. Ichaqa, ¿imaynatam yanapawanchik allin rurayta kuyanapaq?

Allin concienciayoq kasun

9. ¿Imakunapim yanapawanchik allin concienciayoq kayqa?

⁹ Bautizakusqanchik punchawpim Jehová Diosta “mañakurqanchik conciencianchikta limpiawananchikpaq” (1 Ped. 3:21). Huchanchikrayku yawarninta Jesus chaqchusqanpi iñisqanchikmi yanapawanchik Dioswan allinyanakunanchikpaq. Ichaqa salvasqa kananchikpaqqa conciencianchikmi hinalla limpio kanan. Rurasqanchik mana allin kasqanta willawaptinchikqa agradecesqam kananchik. ¿Imanasqa? Chayqa qawachinmi mana qarayarusqanta, aswanqa allin kasqantam qawachin hinaspa Diospa nisqankunata kasukusqantapas (1 Tim. 4:2).  Conciencianchikqa hukkunapipas yanapawanchikmi allin rurayta kuyananchikpaq.

10, 11. a) Huk ejemplowan willamuy allin conciencianchikta kasukuy allinpuni kasqanmanta. b) ¿Imanasqam allin kawsakuyqa kusikuyta apamun?

¹⁰ Mana allinkunata ruraruptinchikqa conciencianchikmi acusawanchik. Chaynam pasarqa chayllaraq Biblia estudiaq huk mozota. Paymi millakuypaq qalalla kaqkuna qawayman hinaspa cigarro pitayman qokururqa. Huñunakuypim conciencian acusarqa, predicacionpiñataq iskay uya kasqanta sientekurqa. Chayraykum Diosmanta karunchakururqa, paymi nin: “Manam piensarqanichu rurasqaymanta concienciay hinalla acusawananmantaqa. Chaywanpas mana umayoq runa hinam tawa wata chayna kawsarqani”, nispa. Payqa kaqllam tantearurqa Diospa llaqtanman kutimunanpaq. Dios mana uyarinanta piensaspanpas, pampachaykunanpaqmi mañakurqa. Hinaptinmi 10 minutollamanta maman watukurqa hinaspam kallpancharqa huñunakuyman rinanpaq. Riruspanmi huk ancianota nirqa Bibliamanta estudiota qonanpaq. Tiempopa risqanman hinam bautizakururqa hinaspam Diosta agradecekun vidan salvasqanmanta.

¹¹ Qawasqanchikman hinaqa allin kawsakuyqa kusikuytam apamun. Diospa kamachikuyninkunata kuyaspa chaynataq kasukuspaqa, kusisqam tarikusun kawsasqanchikwan Diosta kusichisqanchikmanta. Chayamuchkanñam huk punchaw lliw runakuna Diosman astawan rikchakunanchikpaq, hinaptinmi conciencianchikpas hawka tarikunqa. Ichaqa kunanmi allin rurayta sonqomanta kuyananchik, chaynapi Diosta kusichinapaq (Pro. 23:15, 16).

12, 13. ¿Imatam rurananchik allin concienciayoq kanapaqqa?

¹² ¿Imatam rurachwan conciencianchik allin kananpaq? Bibliatawan qellqanchikkunatam estudiana hinaspa kay consejotam kasukuna: ‘Sumaqtam piensan allin kawsaq runaqa’ (Pro. 15:28). Ejemplopaq, ancha allinmi llamkaymanta tapukuykuna kaptin allinta piensayqa. Arí, ima llamkaykunapas Bibliapa contranpi kasqanta allin yuyayniyoq confianza sirviente niwaptinchikqa, cristianokunaqa chay llamkaytam qepanchanchik. Ichaqa Bibliapi mana sutilla kaptinqa, manaraq imatapas tanteachkaspam Diosta mañakunanchik Bibliapa yachachisqankunapi piensanapaq. * Hukninqa kanman runamasinchikpa conciencianta respetaymi (1 Cor. 10:31-33). Ichaqa imamantapas puntataqa munanchikmi Dioswan amistadninchikta waqaychayta. Jehová Diosta kuyaspaqa, puntatam kaynata tapukusun: “¿Diospa sonqontachu llakichisaq kay llamkayta chaskispay?”, nispa (Sal. 78:40, 41).

¹³ Llaqta Cuidaq revistata otaq Biblia Estudianapaq Huñunakuypaq qellqanchikta preparakuspaqa ama qonqasunchu yuyaymanaytaqa. ¿Utqayllamanchu sapa parrafokunata  rayaparunchik? Chayna preparakuyqa manam yanapawasunchu allin concienciayoq kanapaqqa nitaq allin rurayta kuyanapaqpas. Aswanqa allintapunim estudiananchik hinaspa yuyaymanarinanchik. Anchatam kallpanchakuna Diospa Palabran sonqonchikpi takyananta munaspaqa.

Allin ruray munasqanchikta qawachisun

14. Servispanchik ¿imayna kananchiktam munan Jehová Dios hinaspa Churinpas?

¹⁴ Jehová Dios hinaspa Churinpas munankum Diosta servispanchik kusisqa kananchikta. ¿Imam yanapawasun chaypaq? Allin rurayta kuyaymi. Ancha Reqsisqa Yachachikuyninpim Jesusqa nirqa: “Mayna kusisqam yarqachikuchkaq hina hinaspa yakunayachikuchkaq hina Diospa munasqan ruray munaqkunaqa, paykunaqa saksaykuchkaq hinam kanqaku”, nispa (Mat. 5:6). Diospa nisqankunata kuyaqkunapaq, ¿ima ninantaq Jesuspa kayna nisqanqa?

15, 16. ¿Imaynatam allin ruray munaqkuna saksachisqa hina kanqaku?

¹⁵ Runakunaqa Satanaspa munaychakusqanpim kachkanku (1 Juan 5:19). Maypiña kawsaspanchikpas noticiakunapim qawanchik wañuchinakuyllaña kasqanmanta. Allin rurayta kuyaqkunaqa admirakunkum runakunapa manchakuypaq rurasqankumanta (Ecl. 8:9). Arí, Jehová Diosta hinaspa nisqankunata kuyaq runakunaqa yachankum Dioslla iñiyninkupi yanapananmanta. Mana allin runakunaqa ñam tukunqakuña. Hinaptinmi allin runakunaqa manaña ñakarisunchu mana allin runakunapa rurasqankuwanqa (2 Ped. 2:7, 8). ¡Mayna allinmi chayqa!

¹⁶ Cristota qatiqkuna hinaspa Diosta serviqkunaqa yachanchikmi, allin ruraykunata munaqkuna ‘saksachisqa hina kanankumanta’. Arí, kusisqam tarikunqaku mosoq Pachapi ‘tukuy imapas allin arregloman hina rurasqa kaptin’ (2 Ped. 3:13). Chaymi mana hukmanyanchikchu Satanaspa munaychakusqan kay pachapi mana allinkuna kasqanwanqa (Ecl. 5:8). Diosqa tukuytam qawachkan, hinaspam salvaykunqa allin ruraq runakunata.

Allin ruray kuyaqkunapaq bendicionkuna

17. ¿Ima bendicionkunatam chaskinchik allin rurayta kuyasqanchikmanta?

¹⁷ Salmo 146:8 nin: ‘Diosqa kuyanmi allin ruraqkunataqa’, nispa. ¿Cuentata qokunkichu ima bendiciontam chaskinku allin rurayta kuyaqkunaqa? Paykunaqa Diospa kuyasqanmi kanku. ¡Chayqa mayna sumaqmi! Chaymi seguro kanchik Diospa Munayninta puntapi churaspaqa ima necesitasqanchiktapas qowananchikmanta (leey Salmo 37:25 hinaspa Proverbios 10:3). Hamuq tiempopiqa allin rurayta kuyaqkunapaqmi kay Pachaqa kanqa (Pro. 13:22). Yaqa llapanpim Diospa serviqninkunaqa kasukusqankumanta kay Pachapi wiñaypaq kawsakunqaku. Kunanpas hawkayaytam tarinku chaymi familiankunapiwan iñiqmasinkunawanpas allinta apanakunku (Fili. 4:6, 7).

18. ¿Imatam rurananchik Diospa piñakuynin chayamunankama?

¹⁸ Diospa piñakuynin chayamunankamaqa hinallam Diospa munasqan allin rurayta maskananchik (Sof. 2:2, 3). Kamachisqankunata sonqomanta kuyasqanchiktam qawachinanchik. Manam haykapipas allin ruray  kuyasqanchiktaqa saqenanchikchu, mana chayqa mana allin ruraykunatam qallaykuchwan. Kallpanchakunanchiktaqmi conciencianchik hinalla allin kananpaq, chaynapim kusisqa kawsasun hinaspa Diosninchiktapas kusichisun (Pro. 27:11).

19. ¿Imapaqmi kallpanchasqa kachkanchik, hinaspa imamantam qatiqnin estudiopi yachasun?

¹⁹ Jehová Diosqa ‘qawachkanmi llapallan kay pachapi pasasqanta’, chaynapi “allin sonqoyoqkunaman atiyninta qawachinanpaq” (2 Cro. 16:9). ¡Kay nisqanqa anchatamá kusichiwanchik mana allin runakunapa chawpinpi allinta kawsanapaq kallpanchakuqkunataqa! Diosta mana serviq runakunaqa admirakunkuchá Diospa kamachisqankunata kasukuptinchik, ichaqa allinninchikpaqmi kasukuyqa (Isa. 48:17; 1 Ped. 4:4). Chaymi kallpanchasqa tarikunchik allin rurayta hinalla tukuy sonqonchikwan kuyanapaq. Ichaqa manam chayllachu. Dios kuyasqanchikta qawachinapaqqa, mana allinkunatapas cheqninanchikmi. Qatiqnin estudiopim chaymanta astawan yachasun.

[Willakuy]

¿Imatam niwaq?

• ¿Imaynatam Jesucristopa wañukusqanmanta entiendeyqa yanapawanchik allin rurayta hinalla kuyanapaq?

• ¿Imanasqataq allinpuni ‘soldadopa qasqon harkaqwan’ tupachisqa kaqta servichikuyqa?

• ¿Imatam rurananchik allin concienciayoq kanapaq?

[Kay yachachikuypa tapukuyninkuna]

[26 kaq paginapi dibujo]

Ima llamkaytapas chaskinapaqqa allin conciencianchikmi niwasun chaskinapaq otaq manapas