Achka razonkunam kan kusisqa kananchikpaq

LLIW unanchasqa kaqkunam qawachin ordenninpi kasqanta. Chayqa manamá admirakunapaqchu, Diosqa ‘manam chaqwa ruraqchu’ (1 Cor. 14:33). Serviqninkuna payta yupaychanankupaq tukuy ima rurasqanpas admirakunapaqmi. Diostam millonnintin angelkuna chaynataq runakunapas servinku, paykunaqa yuyayniyoq hinaspa imapas akllakuyniyoqmi kanku, huñullataqmi tarikunku Diosta servispanku. ¡Mayna sumaqmi chayqa!

Ñawpaq tiempopiqa, kay Pachapi Diospa llaqtanqa Jerusalenpim karqa, chaypim templopas, Diospa akllasqan reypas tarikurqa. Babiloniapi presochasqa tarikuq huk israelitam, Jerusalenta kuyasqanmanta nirqa: “Qanmanta mana yuyariptiyqa qallullaypas pasaypaqtayá laqakuruchun. Jerusalenrayku tukuymanta llalliqta mana kusikuptiyqa qallullaypas pasaypaqtayá laqakuruchun”, nispa (Sal. 137:6).

¿Chaynatachu qampas Diospa llaqtanta kuyanki? ¿Kusikunkichu Diospa llaqtanmanta? ¿Warmaykikuna yachankuchu kay pachapi Diospa llaqtan imayna rikurimusqanmantawan imakuna rurasqanmanta? ¿Entiendenkuchu allpantinpi Jehová Diospa testigonkunapa parten kasqankuta? (1 Ped. 2:17.) Diosta Yupaychanapaq Tutapi familiaykichikwan qatiqnin consejokunata kasukuptikichikqa, Diospa llaqtanta kuyasqaykichikmi aswan yapakunqa.

‘Ñawpaq tiempokunamanta’ yachachiychik

Israelitakunam sapa wata huñunakurqaku Pascua fiestata ruranankupaq. Kay fiesta rurakuyta qallaykuptinmi, Moises kaynata kamachirqa: “Churiki qepa punchawta tapuspa: ‘¿Imataq kayqa?’ nisuptikiqa paytam ninki: ‘Tayta Diosmi sirviente kasqaykumanta hatun atiyninwan Egipto nacionmanta horqomuwarqaku’”, nispa (Exo. 13:14). Arí, tayta-mamakunaqa manam qonqanankuchu karqa Dios llaqtanrayku rurasqanmantaqa. Achka israelitakunam Moisespa nisqanta kasukurqaku, chaymi pachaknintin watakuna pasaruptin Salmos qellqaq kaynata mañakurqa: “Diosnillayku, ñoqaykum uyarirqaniku ñawpaq tiempokunapi imam rurasqaykimanta. Abueloykum willawarqaku paykunapa tiemponpiqa imam rurasqaykimanta”, nispa (Sal. 44:1).

Kunan tiempopi achka mozo-sipaskunaqa ichapas piensanku kay pachak wata qepapi Jehová Diospa Testigonkuna tukuy pasasqankuna ‘ñawpaq tiempokunapiraq’ kasqanta. ¿Imatam rurawaq churi-wawaykikuna chaynata mana piensanankupaq? Wakin taytakunam servichikunku Los testigos de Jehová, proclamadores del Reino de Dios hinaspa Anuario librokunata chaynataq revistakunapi lloqsiqmuq experienciakunata hinaspa kay tiempopi Diospa llaqtanmanta rimaq DVD nisqatapas. Unión Soviética hinaspa Alemania nacionkuna Testigokunapa contranpi churakusqankumanta videokunaqa, familiakunatam yanapan imaña kaptinpas Jehová Diospi confianankupaq. ¿Imanasqataq chaykunamanta mana qawankichikchu familiawan Diosta yupaychanapaq tutapi? Chaynapim warmaykichikkunapa iñiyninta kallpanchankichik hinaspam preparasqa kanqaku pruebakunata atipanankupaq.

Ichaqa yuyarinanchikmi: warmachakunaqa willakuykunataqa chayllam aminku. Chaymi allinpuni kanman paykuna rimanankupaq imatapas rurayqa. ¿Imaynatam chayta rurachwan? Niwaqmi huk nacionta akllaspanku chaypi Testigonkunapa imakuna pasasqankuta estudianankupaqwan willakunankupaq. Ichapas congregacionnikipi kanman Diosta unayña serviq cristiano, paytam niwaqchik familiawan estudiasqaykichikpi kananpaq.  Warmaykikunatam niwaq tapunankupaq. Niwaqchiktaqmi Betel wasita, huk law nacionniyoqkunapaqwan asambleata, gramófonos nisqawan predicayta dibujanankupaq.

‘Sapakamapa rurasqankumanta’ yachachiychik

Apostol Pablom congregacionta tupachirqa cuerpopa partenkunawan. Nirqam: “Llapallan iñiqkuna cuerpon kaptinchikmi Cristo [otaq “Jehová Dios”, NM] hukllanchawanchik, chaynataqa rurawanchik cuerponpa partenkunata yanapanakunanpaq tinkinachkaq hinam, sapakamam rurananchikta allinta ruraspa kuyakuywan kallpanchakuspa sumaqta wiñananchik”, nispa (Efe. 4:16). ¿Manachu Unanchawaqninchikmanta admirakunchik imayna rurasqa kasqanchikmanta? ‘Diosninchikpa mana haypay atina yachayninmantam’ aswan admirasqa kasun, Diospa llaqtan imayna kasqanmanta estudiaspanchikqa (Efe. 3:10).

Jehová Diosqa willawarqanchikmi hanaq pachapi llaqtan imayna kasqanmanta. Ejemplopaq, piensasun imakunam pasarqa apostol Juan huk revelacionta chaskisqanpi. Puntataqa Diosmi Churinman revelaykurqa. Chaymantam Jesucristoqa “kay revelasqanta serviqnin Juanman angelninwan entiendechirqa. Chaymi Juan willakurqa [. . .] tukuy ima rikusqanta” (Apo. 1:1, 2). Hanaq pachapi llaqtan imatapas imayna rurakusqanmanta Dios willawaptinchikqa, ¿manachu munanman kay Pachapi serviqninkuna llaqtanpi ima rurayniyoq kasqankuta yachananchikta?

Ichapas congregacionta watukuq anciano congregacionnikiman hamunman, ¿manachu allin kanman watukuq ancianopa rurayninta chaynataq imayna yanapawasqanchikmanta familiaykiwan estudiayqa? Huk kutipiñataqmi estudiawaqchik kay tapukuykunamanta: ¿Imanasqam predicasqanchikmanta sapa killa informananchik? ¿Maymantam qollqeta horqonku ima gastokunapaqpas? ¿Imaynatam Diospa Llaqtanpi Punta Apaqkuna rurayninkuta rakinakunku? ¿Imaynatam iñiyninchikpi allin kanapaq yachachiwanchik?

¿Imapim yanapawanchik Diospa llaqtan ordenninpi kasqanmanta yachayqa? Yanapawanchikmi punta apaqkunapa rurasqankuta astawan chaninchanapaq (1 Tes. 5:12, 13). Kallpanchasqataqmi tarikusun kamachisqankunata kasukunapaq (Hech. 16:4, 5). Chaymantapas astawanmi confiasun Diospa llaqtanta pusaqkunapi, qawasunmi imapas tanteasqankuqa hinaspa imapas rurasqankuqa Bibliapa nisqanman hina kasqanta (Heb. 13:7).

“Sumaqtayá qawamuychik chaypi tarikuq palaciokunata”

“Purispayá Sion Moqota muyurimuychik. Torrenkunatayá chay llaqtapata yupamuychik. Sumaqtayá qawamuychik murallapa cimienton hapiq perqankunata. Sumaqtayá qawamuychik chaypi tarikuq palaciokunata. Chaynapim qepa wiñaqkunaman willankichik chaykunamanta” (Sal. 48:12, 13). Kaynata nispanmi salmistaqa israelitakunata kallpancharqa Jerusalenman rispanku templota qawanankupaq. Imaynaraqchá judiokunaqa tarikurqaku sapa wata fiestata ruranankupaq Jerusalenman rispankuqa hinaspa suma-sumaq templota qawaspankupas. Qawasqankuqa admirakuypaqmi karqa, chaymi ‘qepa wiñaqkunaman willayta’ munarqaku.

Piensasun Saba nacionpa reinanpi, payqa manam creerqachu Salomonpa suma-sumaq kamachisqanmanta nitaq alli-allin yachayniyoq kasqanmantapas. ¿Imam yanaparqa uyarisqankunata creenanpaq? Kikinmi nin: “Niwasqankutaqa manam creerqanichu ñawiykunawan kunan rikuykunaykama”, nispa (2 Cro. 9:6). Arí, ñawinchikwan qawasqanchikkunam astawanqa admirachiwanchik.

¿Imaynatam churi-wawaykita yanapawaq Diospa llaqtan imayna kasqanmanta kikinkupuni qawanankupaq? Kasqayki lawpi Betel Wasi kaptinqa allinmi kanman rinaykichikpaq kallpanchakuyqa. Piensarisun Mandy hinaspa Bethany sutiyoq sipaskunapi. Llaqtankumanta Betel wasiqa karu-karupim tarikun (1.500 kilometros), chaywanpas tayta-mamanmi sapa kuti reqsinankupaq aparqaku, aswanraqmi  warmallaraq kasqankupi. Paykunam ninku: “Betel wasita manaraq reqsispaykum piensarqaniku chaypi mana kusirikunapaq hina kasqanta hinaspa yuyaqkunalla kasqankutapas. Ichaqa, rikurqanikum achka mozo-sipaskuna kusisqallaña tukuy sonqonkuwan Jehová Diospaq llamkasqankuta. Entienderunikum Diospa llaqtanqa huk lawkunapipas kasqanta. Betel wasiman sapa kuti risqaykum Diosman astawan asuykachiwarqaku hinaspa kallpanchawarqaku astawan servinaykupaq”, nispa. Mandywan Bethany cristianakunaqa Diospa llaqtantam astawan reqsirqaku, chaymi kallpancharqa precursora kanankupaq, chaymantañataqmi invitarqaku wakin kutipi Betelpi servinankupaq.

Kunan tiempopi Diospa llaqtanta astawan reqsinapaqmi huk yanapakuy kachkan, chayqa manam karqachu israelitakunapa tiemponpiqa. Kay watakunallapim rurakurqa videopi chaynataq DVD nisqapi Diospa llaqtanta astawan reqsinapaq, ejemplopaq, Hasta los cabos de la Tierra, Los testigos de Jehová: organizados para predicar las buenas nuevas, Toda nuestra asociación de hermanos hinaspa Unidos gracias a la enseñanza divina. Betelitakunapa chaynataq desgracia pasaptin yanapakuqkunapa hinaspa misionerokunapa rurasqanta chaynataq asambleakuna rurakunanpaq preparasqankuta familiaykiwan qawaspaykiqa, aswanmi kuyanki allpantinpi iñiqmasinchikkunata.

Arí, congregacionninchikqa yanapawanchikmi hinalla predicanapaq hinaspa kallpanchasqa tarikunapaq. Ichaqa familianchikwanmi tiempochakuna allpantinpi ‘iñiqmasinchikkunapi’ piensarinapaq. Kayqa yanapawasunmi iñiynikichikpi ‘qaqa hina sayanapaq’ hinaspa kusisqa kanapaqpas (1 Ped. 5:9).

 [18 kaq paginapi dibujokuna hinaspa recuadro]

Diospa llaqtanmanta yachayqa allinpunim

Achka yanapakuykunam kan Diospa llaqtan imayna rikurimusqanmanta hinaspa imakunatapas imayna rurakusqanmanta yachanapaq. Qatiqnin tapukuykunamanta yachasun:

☞ ¿Imaynatam kay tiempopi congregacionkuna watukuq ancianokunapa llamkaynin qallarirqa? (Los testigos de Jehová, proclamadores del Reino de Dios, págs. 222-228.)

☞ ¿Imanasqam allinpuni karqa 1941 watapi asamblea, “Día de los hijos” nisqa? (Los testigos de Jehová, proclamadores del Reino de Dios, págs. 86, 88.)

☞ ¿Imaynatam Diospa Llaqtanpi Punta Apaqkuna imatapas tanteanku? (“Testimonio cabal” del Reino de Dios, págs.108-114.)