Amayá engañakusunchu pantay piensaykunawanqa

‘¿IMATATAQ kaytaqa rurarunki?’ nispanmi Diosqa Evata tapurqa mana mikunapaq ruruta mikuruptin. Evañataqmi nirqa: “Culebram engañaruwarqa chaymi mikururqani”, nispa (Gen. 3:13). Sacrellaña Satanasmi culebrata servichikuspan Diosta mana kasukunanpaq engañarurqa, chaymi reqsichikurqa ‘ñawpaqmantaraq kaq culebrawan. Paymi llapallan kay pachapi runakunata engañachkan’ (Apo. 12:9).

Genesis librom sutillata qawachin Diabloqa engañakuq kasqanmanta, paymi Evata llullakunawan engañasqanman hina imatapas ruran mana experienciayoqkunata pantarachinanpaq. Cristianokunam ichaqa kayta yachanku: manamá Satanasllachu pantachikuqqa. Bibliapa nisqanman hinaqa ‘kikinchikpas engañakuchwanmi’ (Sant. 1:22).

¿Imaynatam kikinchikqa engañakuchwan? Chaytaqa manachá piensayllapas-piensachwanchu. Ichaqa chayna kasqanmanta Dios niwaptinchikqa razonniyoqchá. Chaymi yachananchik imaynatataq kikinchikqa engañakuyta qallaykuchwan hinaspa ima pantay piensaykunam chayman apawachwan. Chaymanta entiendenapaq Bibliapi huk ejemplomanta qawasun.

Kikinkum engañakurqaku

537 watapim Persia nacionmanta rey Ciro kamachirqa, Babiloniaman apasqa judiokuna Jerusalenman kutinankupaq chaynapi kaqmanta templonkuta hatarichinankupaq (Esd. 1:1, 2). Diospa nisqan cumplikunanpaqmi, qatiqnin watapi judiokunaqa templonpa cimientonta hatarichiyta qallaykurqaku. Anchata kusikuspankum Jehová Diosta alabarqaku chay ruray qallaykusqankuta bendecisqanmanta (Esd. 3:8, 10, 11). Ichaqa enemigonkunamanta harkakuy kaptinmi judiokunaqa hukmanyayta qallaykurqaku (Esd. 4:4). Chaymantapas kutimusqankumanta 15 wata pasaruptinmi kamachikuy lloqsiramurqa templo hatarichisqankuta saqenankupaq. Arí, Persia nacionmanta autoridadkuna hamuruspankum, “judiokunata obligarqaku amaña llamkanankupaq” (Esd. 4:21-24).

Chay sasachakuykunawanmi judiokunaqa kikinku engañakuyta qallaykurqaku. Mana allinta piensaspankum nirqaku: “Diospa templon qespichina tiempoqa manaraqmi chayamunraqchu”, nispa (Hageo 1:2). Piensarqakum templota hatarichinankupaq Dios manaraq munasqanta. Chaymi Diospa kamachisqanta cumplinankumantaqa templo rurayta saqerurqaku hinaspa kikinkupa wasinkuta sumaqyachiyta qallaykurqaku. Chayraykum Diosmanta willakuq Hageo nirqa: ‘¿Sumaq tablakunawan tableasqa wasikunapi yachakunaykichik tiempochum chayaramun? ¿Chaychum kay templotaqa purmasqataña qawakuchkankichik?’, nispa (Hageo 1:4).

¿Imatam kay ejemplo yachachiwanchik? Diospa munaynin haykapi rurakunanmanta mana yachaspam, facilta Dios serviypi rurayninchikkunata saqeruchwan hinaspapas kikinchikpa rurayninchikkunapim afanakuyta qallaykuchwan. Kay rikchanachiypi piensasun. Wasikipi pitapas samachinaykipaq suyaspaykiqa, yaqachá tukuy imata ruranki listollaña kananpaq. Ichaqa ¿imatam rurawaq mana chaylla chayamunanmanta yacharuspayki? ¿Imatapas allichayta saqeruwaqchu?

Judiokunaqa entiendenankum karqa templota chaylla hatarichinankuta Jehová Dios munasqanta. Chaytam Hageowan Zacariaspas yuyarichirqaku. Hageom nirqa: “Kay allpapi  llapallan runakuna, qamkunapas kallpanchakuychikyá [. . .]. Qamkunaqa llamkaychikyá”, nispa (Hageo 2:4). Arí, llamkanankum karqa chuya espiritu yanapananmanta seguro kaspanku (Zac. 4:6, 7). Kaymi yachachiwanchik Diospa piñakuynin punchawmanta mana pantaykunata rimanapaq (1 Cor. 10:11).

Kikinchikpa piensayninchikpiqa ama hapipakusunchu

Apostol Pedrom cartanpi nirqa Dios “mosoq cielokunatawan mosoq allpata” apamunanmanta (2 Ped. 3:13). Nirqataqmi runakunapa asuntonkunapi Dios yanapananta wakin runakuna mana creesqankuta. Imapas mana pasananmanta burlakuspankum nirqaku: ‘Tukuy imapas hina kaqllam kachkan, chaynaqa kachkan kay pachata unanchay qallarisqanmantaraqmi’, nispa (2 Ped. 3:4). Chayna piensasqanku pantay kasqanta qawachinanpaqmi nirqa: ‘Rikcharichimuchkaykichikmi allin piensaq kanaykichikpaq’, nispa. Iñiqmasinkunatam nirqa chay burlakuqkuna hatun pantaypi kasqankuta. Jehová Diosqa mana allinkunata puchukachinanpaqmi sinchi parata kay pachaman kachamurqaña (2 Ped. 3:1, 5-7).

520 watapim cristianokunapa tiemponmanta ñawpaqtaraq, Hageoqa iñiqmasinkunata kallpancharqa piensayninkuta allinta servichikunankupaq. Hukmanyasqa tarikuqkunata yanapananpaqmi nirqa: ‘Imayna kawsasqaykichikmantayá allinta piensariychik’, nispa (Hageo 1:5). Yuyaymanachiyta munaspanmi, yuyarichirqa paykunapaq Diospa ima munasqanta chaynataq hatun promesankuna rurasqantapas (Hageo 1:8; 2:4, 5). Chayna nisqanmi judiokunata kallpancharqa harkakuy kaptinpas hinalla templota ruranankupaq. Enemigonkunam kaqmanta contrankupi churakurqaku ichaqa manam atirqakuchu harkaytaqa. Chay harkakuy tukuruptinmi 5 wata pasaqta temploqa qespichisqaña karqa (Esd. 6:14, 15; Hageo 1:14, 15).

Yuyaymanasun imayna kasqanchikpi

Hageopa tiemponpi kaq judiokunam sasachakuykunawan hukmanyasqa tarikurqaku. Ñoqanchiktapas, ¿chayna pasawachwanchu? Chayna kaptinqa tukuy sonqowan predicasqanchikmi chiriyarunman. Ichaqa ¿imanasqataq hukmanyasqa tarikuchwan? Yaqapaschá kanman hukkunapa mana allinkuna rurawasqanchikrayku. Chayna tarikuspanmi Habacucpas tapukurqa: “Dios Taytalláy ¿haykapikamataq mana uyariykuwankichu qayakamusqaytaqa? ¿Haykapikamataq mana salvaykuwankikuchu daño ruraymanta qaparimuchkaptiyqa?”, nispa (Hab. 1:2). Kunanpas wakinkuqa tukupay tiempopi kasqankuta qonqaspankum kapuqniyoq kayta maskanku, chaytam ruranku Dios tardeasqanta piensaspanku. ¿Chaynatachu ñoqanchikpas piensanchik? Chayna kaptinqa kikinchikmi engañakuchkanchik. Kunanmi cristianokunaqa haykapimantapas ‘imayna kawsasqanchikpi allinta piensarinanchik’ hinaspa ‘allin piensaq kananchikpaq’ kallpanchakunanchik. Arí, kay Pachapi mana allinkunaqa unay tiempoñam piensasqanchikmantaqa kachkan. Ichaqa manam hukmanyanachu. ¿Imanasqa?

 Bibliaqa willawanchikmi suyananchik tiempomanta

Tukupay tiempomanta Cristopa ima nisqanmanta qawasun. Marcos libropim Jesusqa tukupay tiempomanta willakuspan nirqa listo kay ancha allin kasqanta (Mar. 13:33-37). Yaqa chaynallatam nirqa Diospa piñakuynin Armagedon punchaw chayamunanmanta rimaspanpas (Apo. 16:14-16). ¿Imanasqam listo kanamanta achkanpi rimarqa? Kayqa yanapawanchikmi suyasqanchik unaypaq hina kaptin listo kasqanchikta mana chinkachinapaq.

Diospa piñakuyninta listolla suyanapaqmi Jesusqa huk rikchanachiymanta rimarqa. Nirqam suwakuna huk wasiman yaykurusqankumanta. ¿Imatam ruranman karqa mana suwachikunanpaq? Tukuy tutam rikchasqalla kanan karqa. Rikchanachisqantam Jesusqa tukurqa qatiqninkunaman kaynata nispan: “Listollayá kaychik, Diosmanta Hamuq Runaqa kutiramusaq mana piensasqaykichik horam”, nispa (Mat. 24:43, 44).

Jesuspa nisqanqa qawachinmi unay tiempo kaptinpas suyayqa allinpuni kasqanta. Manam hukmanyanachu tukuy mana allinkuna kunankama hinalla kasqanmantaqa. Manataqmi engañakunachu Jehová Diospa piñakuynin ‘manaraq chayamunanta’ piensaspaqa. Chaynata piensaspaqa manachá tukuy sonqowanqa predicasunchu (Rom. 12:11).

Kikinchikpa piensasqanchikta saqesun

Kikinpa piensasqanta saqenanpaq kallpanchakuqqa yuyarinanmi Galatas 6:7 nisqanta: “Amayá qamkunaqa pantachinakuychikchu, [. . .] runaqa imapas tarpusqantam cosechanqa”. ¿Imam pasanman chakrata samachiptinchik? Mana allin qorakunam wiñayta qallaykun. Chaynam pasanman piensayninchikta mana cuidaspaqa. Mana musyayllam hukmantaña piensayta qallaykuchwan. Ichapas kaynata piensachwan: “Arí, Diospa piñakuyninqa chayamunqam, ichaqa haykapiraqya”, nispa. Chaynata piensaspaqa huk ruraykunapiñam afanakuyta qallaykuchwan hinaspam Dios serviypi rurayninchikkunata saqeruchwan. Hinaptinmi Diospa punchawninqa qonqayllamanta hapiruwachwan (2 Ped. 3:10).

“Diospa munasqanta, imam allin rurayta, imam agradonpaq kasqanta hinaspa imam allinpuni kasqanta” yachanapaq kallpanchakuptinchikqa, manamá yuyayninchikpiqa pantay piensaykunaqa sapichakunqachu (Rom. 12:2). Chaypaqmi sapa punchaw Bibliata estudiana. Chaynapim aswan seguro kasun tanteasqan punchawpi piñakuyninta Jehová Dios apamunanmanta (Hab. 2:3).

Sapa kuti estudiaspa, orakuspa, huñunakuspa, predicaspa chaynataq hukkunata yanapaspaqa, listollam ‘Diospa punchawnin chayamunanta suyasunchik’ (2 Ped. 3:11, 12). Chayna rurasqanchiktaqa manam Jehová Diosqa qonqanqachu. Chayna kasqanmantam Pablo nin: “Amayá amirusunchu imapas allin ruraytaqa, mana amiruspaqa tiempo chayaramuptinmi cosechata hina premiota chaskisunchik”, nispa (Gal. 6:9).

Manamá piensanachu Jehová Diospa piñakuynin chayamunanpaq unay tiemporaq faltasqantaqa. Aswanqa segurom kananchik chay punchaw haykapimantapas hichpallapiña kasqanta.

[4 kaq paginapi dibujo]

Hageopas, Zacariaspas judiokunatam kallpancharqaku templota hatarichinankupaq

[5 kaq paginapi dibujo]

¿Imatam wasiyoq ruranman karqa suwa hamunanta yachaspanqa?