Achka bendicionkunatam chaskirqani

Kaytam willakun Arthur Bonno

SEÑORAY Edithwanmi kimsa punchaw asambleapi tarikurqaniku 1951 watapi. Chay asambleapim kallpancharqaku misionero kay munaqkuna huk huñunakuyman rinankupaq.

Chaymi kusisqallaña señorayta nirqani: “¡Haku chay huñunakuyman!”, nispa.

Señorayñataqmi nirqa: “Chayqa manam ñoqanchikpaqchu”, nispa.

Ñoqañataqmi nirqani: “Hakuchik, uyariyllam uyarimusun”, nispa.

Chay huñunakuy tukuytam solicitudta qowarqaku Galaad Escuelaman rinaykupaq.

“¡Kayta huntarachisun!”, nispam señorayta kallpancharqani.

Señorayñataqmi niwarqa: “¿Familianchikri?”, nispa.

Hinaptinmi huk wata parten pasaruptin Galaad nisqa Escuelaman rirqaniku hinaspam Ecuadorman rinaykupaq niwarqaku.

Kay rimasqaykuwanqa yaqapaschá cuentata qokunkichik chaylla tanteaq kasqaymanta señorayñataq piensarispa tanteaq kasqanmanta. Señoraymi wiñarqa Elizabeth sutiyoq llaqtachapi (Estados Unidos), payqa manam haykapipas huklaw nacionniyoq runakunataqa reqsirqachu, manataqmi karutaqa viajarqachu chaymi anchata sasachakurqa familianta saqenanpaq. Chaywanpas listom karqa huklaw nacionpi servinanpaq. Ecuadormanmi 1954 watapi chayarqaniku, kaypim kunankama kachkaniku. Misionero kasqaykupim achka bendicionkunata tarirqaniku. Wakillanmantam willasqaykichik.

Kusikuywanmi yuyaniku

Ecuadorman chayaruptiykum kachawarqaku Quito sutiyoq capitalninman. Chay tiempopim Guayaquilmanta trenwan otaq camionwan viajaspa demorarqaniku 2 punchawta (kunanqa avionpim 30 minutollapi chayanku). Chaypim kusisqa 4 wata karqaniku. 1958 watapim huk bendicionta chaskirqaniku: congregacionkunata watukunaypaqmi nombrawarqaku.

Chay watakunapiqa enteron nacionpim Diosta serviqkuna pisilla karqaku chaymi  congregacionkunata watukuq iskaylla karqa. Hinaptinmi congregacionkunata watukuspaykupas testigokunapa mana kasqan llaqtakunapi achka semana predicaq kaniku. Yaqa sapa kutim samapakunaykupaq tariq kaniku mana ventanayoq chullalla camayoq cuartochata. Hinaptinmi maderamanta cajonpi apaq kaniku pachakuyta, primusta, sartenta, platokunata, lavatoriota, sabanasta, chuspimanta harkachikunata, hinaspa mawka periodicota chaywanmi uchkukunata tapaq kaniku ratakuna sasata yaykumunanpaq.

Chay tutayaq cuartochakunapi kaspaykupas kusikuywanmi yuyaniku imamantapas tuta parlasqaykuta. Primuschaykupi imachatapas yanuspam camaykupi tiyaykuspa parlastin mikuq kaniku. Chay tutakunapim Edith respetowan niwaq congregacionpi kaqkunata llampu simiwan rimapayanaypaq, mana tanteaspa chaylla rimaq kasqaywanmi pitapas sientichiq kani. Chayna consejawasqanwanmi congregacionkunata allinta kallpanchaq kani. Chaymantapas mayqen iñiqmasiykumantapas mana allinta rimaptiyqa payqa manam uyariyta munaqchu chaywanmi cuentata qokurqani pimantapas allin kasqallanmanta rimanaypaq. Yaqa sapa kutim rimaq kaniku Llaqta Cuidaq revistapi imamantapas yachasqaykumanta otaq predicacionpi imapas pasawasqankumanta. ¡Kaqpunim imamantapas willanakunaykupaq!

Carlosta imayna tarisqaykumanta

Jipijapa sutiyoq llaqtapim niwarqaku Carlos Mejía Biblia estudiay munasqanmanta. Ichaqa manam yacharqanikuchu wasin maylawpi kasqanta hinaptinmi huk tuta cuartochaykumanta lloqsirqaniku chay runata maskaq. Tukuy tuta parasqanwanmi ñankuna mitullaña karqa chaymi qocharayaq yakukunata saltastin rirqaniku. Ñoqam ñawpaqta rirqani. Hinaptinmi qonqaymanta señoray qaparirqa “¡Art!”, nispa. Muyurispa qawariptiymi moqonkama cenegarusqa. Yaqallam asiymanta wañururqani ichaqa señoray waqaqta qawaspaymi mana asirqanichu.

Mitumanta aysaruptiymi zapaton qeparurqa hinaptinmi qawawaqniyku 2 warmachakunata nirqani: “Zapatonta horqoruptikichikqa pagasqaykichikmi”, nispa. Manaraqpas rimayta tukuchkaptiymi zapatotaqa horqorusqakuña, señoraymi mayllakunanpaq sitiota necesitarqa. Chay warmachakunapa mamanpas wasinmantam qawamuwachkasqaku chaymi wasinman yaykuchiwarqaku. Chaypim señorayta yanaparqa mayllakunanpaq, warmachakunañataq zapatonta limpiarqaku. Manaraq pasakuchkaspaykum nirqaniku Carlos Mejía maskasqaykumanta. Señorañataqmi admirasqa niwarqaku: “¡Payqa qosaymi!”, nispa. Chay punchawkunallapim estudiayta qallaykurqaniku hinaptinmi llapanku bautizakurqaku. Tiempo pasaptinmi Carloswan señoran hinaspa iskay warmi churinkuna precursor especial karqaku.

Viajepi sasachakuspapas allin chaskisqam karqaniku

Congregacionkuna watukuyqa sasam karqa. Viajaqmi kaniku trenpi, camionpi, botepi, avionetapi. Huk kutipim viajarqaniku superintendente de distrito nisqa John McLenachan hinaspa señoran Dorothywan, paykunam yanapawarqaku Colombiaman hichpaq llaqtachakunapi predicanaykupaq. Botepim viajarqaniku tiburonkunapa kasqan yakunta. Boteta manejaqqa experienciayoq runam karqa chaywanpas mancharikurqam bote sayay tiburonkunata qawaspan chaymi tantearqa yaku patallanta manejananpaq.

Viajay sasa kaptinpas congregacionkunata watukuyqa kusikunapaqmi karqa. Kuyakuywan samaykachikuq iñiqmasinchikkunatam reqsirqaniku. Sapa kutim chay familiakunaqa hikutawaqku kimsa kutikama mikunaykupaq otaq camankupi puñunaykupaq, huk  kutillata mikunanku kaptinpas otaq pampapi puñunanku kaptinpas. Señoraymi niq: “Kay kuyasqa iñiqmasinchikkunam yacharachiwan kawsanapaqqa tukuy ima mana necesitakusqanta”, nispa.

‘Imata kamachiwaptinkupas rurarqanikum’

Huk bendiciontawanmi 1960 watapi chaskirqaniku Ecuadorpi: Betel wasipi llamkanaykupaqmi invitawarqaku. Chaypim oficinapi llamkarqani Edithñataqmi hichpa kaq congregacionpi hinalla predicarqa. Manam haykapipas oficinapi allin llamkaq kasqaypaqqa hapikurqanichu ichaqa Hebreos 13:21, nisqanman hinam Dios ‘tukuy allinta qowanchik’ munasqanta rurananchikpaq. 2 wata qepatam invitasqa karqani Brooklynpi Betelman Galaadpi 10 killa astawan yachachiwanankupaq. Señorayñataqmi qepanan karqa congregacionpi hinalla predicananpaq, chay tiempopiqa manam tanteasqachu karqa kuska viajanaykupaq. Chaypaqmi Edithqa chaskirqa Brooklynmanta cartata sapallan qepananpaq allinta tanteananpaq.

Chay cartata contestaspanmi Edithqa nirqa: “Yachanim sapallay qepayqa sasa kasqanmanta ichaqa confianikum ima sasachakuypipas Jehová Dios yanapawanankupaq kasqanpi. [. . .] Imata kamachiwaptinkupas ruraytam munaniku, Diosta allinta servinaykupaq astawan yachachisqa kaytapas”, nispa. Brooklynpi kaspaymi señoraypa cartanta sapa semana chaskirqani.

Diosman sonqo iñiqmasinchikkunatam reqsirqaniku

Onqosqayraykum 1966 watapi Quito llaqtaman kutirqaniku kaqmanta misionero kanaykupaq hinaptinmi chaypi kaq iñiqmasinchikkunawan predicarqaniku. ¡Paykunaqa Diosman sonqom karqaku!

Huk chayna cristianapa qosanmi mana Testigochu karqa, payqa sapa kutim maqaq. Hinaptinmi huk kuti tutapayta (6.00 a.m.) qayamuwarqaku kaqmanta maqasqanta willawanankupaq chaymi wasinman chaylla pawarqani. Chayaruspaymi admirakuywan qawarqani: camapim kachkasqa punkipay-punkipay hinaspa qoyuy-qoyuy. Qosanmi kaspiwan waqtaparusqa kaspipas pakikunankama. Chay punchaw kaqmanta kutispaymi qosanta tarirurqani hinaspam qawachirqani abusivo kasqanta, chaymi imaymanata disculpakurqa.

Ñoqañataq sanoyayta qallaykurqani 1970 wata pasayta chaymi congregacionkuna watukuyta kaqllamanta qallaykurqani. Ibarra sutiyoq llaqtapi congregacionkunatam watukurqani chay llaqtataqa rirqanikuñam ñawpaqta. Chay watakunapiqa iskay Testigollam karqa, huk misionero hukninñataq chay llaqtayoq iñiqmasinchik. Kutinaykupaqqa achka Testigokunañam karqaku, paykuna reqsiykuyta munaspaykum kusikuywan rirqaniku.

Chayaruptiykum punta kaq huñunakuypi iñiqmasinchik Rodrigo Vaca, huknin yachachikuyta tapukuywan hinaspa kutichiywan  yachachirqa. Sapa tapukuyta tapuptinmi makinku hoqarinankumantaqa fuerteta niqku: “¡Ñoqa!, ¡ñoqa!”, nispa. Edithwan ñoqañataqmi imanasqa chayna rurasqankuta mana yacharqanikuchu. Chaymantam cuentata qokurqaniku chay iñiqmasinchikqa ñawsa kasqanmanta ichaqa vozninkuta uyarispanmi cuentata qokurqa pi kasqanmanta. ¡Paymi ichaqa ovejankunata sapakamata allinta reqsisqa! Yuyarirqanikum Juan 10:3, 4, 14-15 nisqanta, chaypim rimachkan ovejakuna Allin Michiqninwan reqsinakusqankumanta. Kunan tiempokamam payqa hinalla anciano hinaspa precursor especial kachkan. * Kunanqa Ibarra llaqtapim soqta congregacionkuna kachkan castellanopi, quichuapi huk, señaspiñataq huk.

Diostam agradecekuni bendeciwasqanmanta

Kaqmantam 1974 watapi Jehová Dios bendeciwaptinku Betelman kutinaykupaq invitawarqaku. Oficinapim llamkarqani chaymantam Betel wasimanta encargakuqkunawan llamkanaypaq nombrawarqaku. Señorayñataqmi cocinapi llamkarqa chaymantañam oficinakunapi. Kunanqa cartakunata yupaypim llamkan.

Tiempopa risqanman hinam achka misionerokunata kusikuywan chaskirqaniku. Paykunaqa iñiyninkupi takyasqa hinaspa kusikuywan Diosta servispankum congregacionkunata kallpanchanku. Kusichiwankutaqmi waranqantin iñiqmasinchikkuna yaqa 30 nacionmanta Ecuadorpi predicanankupaq hamusqankumanta. Chay rurasqankuqa admirakuypaqmi. Wakinqa wasinkuta otaq negocionkuta rantikuspam necesitakusqan lawpi predicaq hamurqaku. Carrota rantiruspam llaqtachakunaman predicaq rirqaku, congregacionkuna kananpaq hinaspa salonkuna ruraypim yanaparqaku. Huklaw nacionkunamanta hamuq cristianakunam yaqa llapanku precursora hinaspa soltera kanku. ¡Paykunaqa ancha llamkaq warmikunam!

Qawasqaykichikman hinam Diosta servisqaypi achka bendicionkunata chaskirqani. Mayqenmantapas aswan allinqa Jehová Dioswan amistadniymi. Chaymantapas Diosmi qowarqa ‘yanapaqniyta’, chaymantam tukuy sonqoywan agradecekuni (Gen. 2:18). Soqta chunka isqonniyoq wataña casarasqa kasqaypi piensaspaymi yuyarini Proverbios 18:22 nisqanta: “Allin kaqtam tarikun allin warmiwan casarakuq runaqa”. Anchatam kusikuni Edithwan kuska kawsasqaymanta. Payqa tukuy imapim yanapawarqa. Chaymantapas mamantam anchata kuyarqa. Ecuadorman chayamusqaykumantapacham sapa semana cartata apachiq, suegraymi wañukurqa 97 watayoq, 1990 watapi.

Ñoqam tarikuni 90 wataypi Edithñataq 89 watanpi. Kusikunikum yaqa 70 runakunata Diosta reqsinankupaq yanapasqaykuwan. Kusikunikutaqmi 60 wata ñawpaqta Galaad Escuelaman rinaykupaq solicitudta huntasqaykumanta. Chaypaq tanteakusqaykuwanmi achka bendicionkunata chaskirqaniku.

[Willakuy]

[29 kaq paginapi foto]

Estadio Yankee de Nueva York nisqankupi escuelaykumanta kaq wakin misionerokunawan (1958)

[31 kaq paginapi foto]

Iñiqmasinchikkunata watukusqaykupi (1959)

[32 kaq paginapi foto]

Ecuadorpi Betel wasipi (2002)