Dios serviyninchikta anchata chaninchasun

“Yuyaymanaychikyá [. . .] imapas respetanapaq kaqpi.” (FILI. 4:8.)

1, 2. ¿Imanasqam achka runakuna kusirikuykunallaman qokunku, hinaspa ima tapukuykunatam rurakunanchik?

KUNAN tiempopi runakunaqa aswan sasachakuypim tarikunchik. Arí, ‘sasallaña tiempokunapim’ kawsanchik. Diospi mana iñiq runakunaqa manamá chay sasachakuykunata atipaytaqa atinkuchu (2 Tim. 3:1-5). Atipanankupaq tukuyta ruraspankupas manam lliwpichu atinku. Chaymi sasachakuyninkunata qonqayta munaspanku, achka runakuna imaymana kusirikuykunaman qokunku.

² Arí, runakunaqa kusirikuykunaman qokuspankum piensanku hukmanyasqa kasqankuta qonqayta. Mana cuidakuspanchikqa cristianokunapas chayna piensaytam qallaykuchwan. ¿Imatam rurachwan chay toqllaman mana wichinapaq? ¿Lliw kusirikuykunatachu qepanchana? ¿Imata ruraspataq rurayninchikkunata cumplichwan hinaspa kusirikuchwanpas? ¿Bibliapa ima nisqankunam yanapawasun aswan allin rurayninchikkunata cumplinapaq?

Kusirikuyman qokuq runakunapa kasqanpi aswan allin kaqkunata maskasun

3, 4. ¿Bibliapa ima nisqankunam qawachin Diosta agradanapaq kaqkunata ruray ancha allin kasqanta?

³ Runakunaqa ‘kikinkupa munasqallanpim purikunku’, chaymi kusirikuyllapi piensanku (2 Tim. 3:4). Paykuna hina piensayqa Dioswan amistadninchiktam yanqacharunman (Pro. 21:17). Chayraykum Pabloqa Timoteoman hinaspa Titoman cartasqanpi consejarqa Diosta agradanankupaq hinaspa respetowan imatapas ruranankupaq, nisqankunam yanapawanchik runakunapa kusirikuyllaman qokusqankuta mana qatipakunapaq (leey 1 Timoteo 2:1, 2 hinaspa Tito 2:2-8).

⁴ Ñawpaq tiempopiraqmi Salomonqa qawachirqa kusirikuykunata qepanchaspa aswan allin kaqkunata ruranamanta (Ecl. 3:4; 7:2-4). Pisillata kawsasqanchikraykum anchata kallpanchakunanchik salvacionta haypanapaq (Luc. 13:24). Chaypaqqa astawanmi tiempochakuna ‘imapas respetana kaqkunapaq’ (Fili. 4:8, 9). Huk rimaypiqa, Dios serviypi rurayninchikkunata cumplinapaqmi anchata kallpanchakunanchik.

5. ¿Imatam cristianokunaqa ancha allinpaq hapinanku?

⁵ Cristianokunaqa Jehová Diostawan Jesusta qatipakuspankum, llamkayta allinpaq hapinku (Juan 5:17). Chaymi wakinpiqa alabasqa kanku allin llamkaq runakuna kasqankumanta. Taytakunam astawanqa familianta mantienenanpaq kallpanchakunanku, mana chayta ruraspankuqa Diospi iñisqantapas ‘qepancharunkuñam’ (1 Tim. 5:8).

Dios serviyninchikta cumplispapas, kusirikuchwanmi

6. ¿Imayna yupaychananchiktam Diosqa munan?

⁶ Jehová Diosqa suyanmi munasqanman hina yupaychananchikta. Chaymi kamachikuyninkunata israelitakuna mana kasukuptinku Diosqa saqerqa rurasqankumanta ñakarinankuta (Jos. 23:12, 13). Cristianokunapa tiemponpim, serviqninkuta nirqa  mana allin ruraykunawan nitaq pantay yachachikuykunawan mana chaqrukunankupaq (2 Juan 7-11; Apo. 2:14-16). Kunan tiempopipas Diosqa niwanchikmi munasqanman hina yupaychananchikta (1 Tim. 6:20).

7. ¿Imaynatam Pabloqa Diosmanta yachachinanpaq preparakurqa?

⁷ Runakunaman Diosmanta yachachiyqa anchatam kusichiwanchik. Hinalla chayna kusisqa kanapaqqa, chay rurayninchiktam ancha allinpaq qawananchik. Apostol Pabloqa runakunata yachachispanqa imayna kasqankupim repararqa. Paymi qellqarqa: “Sapakamawanmi paykuna hina kani wakillantapas salvanayrayku. Tukuy imatam rurani Cristomanta allin noticia willakunayrayku hinaspa allin noticiamanta allin kaqkuna chaskinayrayku”, nispa (1 Cor. 9:22, 23). Pabloqa anchatam kusikurqa runakunaman Diosmanta yachachispan, hinaspa yuyaymanarqam imayna yanapananmantapas. Chaynata ruraspanmi Diosta servinankupaq kallpanchayta atirqa.

8. a) ¿Imaynatam qawananchik yachachisqanchik runakunata? b) ¿Imanasqam anchata kusichiwanchik Bibliamanta estudio qosqanchik?

⁸ Pablopaqqa ancha allinmi karqa Diosmanta yachachiyqa. Payqa sirviente hinam Diospa munayninta rurayta munarqa hinaspa runakunata yanapaytapas (Rom. 12:11; 1 Cor. 9:19). Ñoqanchikpas Diospa Palabranmantam runakunaman yachachinanchik, wakinpiqa wasinkupi yachachispa, Salonpi discursota qospa otaq familianchikwan estudiaspapas. ¿Chaninchanchikchu yachachisqanchik runakunata? Ichapas sasa kanman sapa semana Bibliamanta estudiota qoyqa, chaypaq rurayninchikkunamanta tiempota horqonanchikrayku. Ichaqa kay rurayqa tupanmi Jesuspa kayna nisqanwan: “Ima chaskiqmantapas aswan kusisqaqa imapas qoqmi”, nispa (Hech. 20:35). Arí, anchatamá kusichiwanchik salvakunankupaq hukkunaman Diosmanta yachachiyqa.

9, 10. a) Diospa munayninta puntapi churaqkunaqa, ¿manachu haykapipas kusirikunmanku? b) ¿Imataq ancianokunata yanapanman pipas asuykunanpaq?

⁹ Diospa munayninta puntapi churaspaqa, ¿manachu haykapipas amistadninchikkunawan kusirikuchwan? Jesusmi ejemplota saqewarqanchik. Manam runakuna yachachiyllapichu karqa, tiempochakurqataqmi samananpaq hinaspa amistadninkunawan kusirikunanpaqpas (Luc. 5:27-29; Juan 12:1, 2). Manataqmi nichkanchikchu mana asirikunamantaqa. Sichum Jesucristo piñasqa hina kaptinqa, manachá pipas asuykunmankuchu karqa. Ichaqa manam chaynachu karqa. Warmachakunapas kusikurqakum payman asuykuspanku (Mar. 10:13-16). ¿Imaynatam atichwan Jesucristopa chayna kasqanta qatipakuyta?

¹⁰ Huk cristianom congregacionkunata watukuq ancianomanta nirqa: “Imapas rurasqan alli-allin lloqsinantam munan, ichaqa manam suyanchu iñiqmasinkuna pay hina kanankutaqa”, nispa. ¿Ñoqanchikpas chaynachu kanchik? Munanchikmá hukkuna imatapas allinta ruranankutaqa. Ejemplopaq, warmankuta tayta-mamakuna imapas haypanankupaq nispanku chaynataq yanapaptinkuqa, warmankunaqa kallpanchasqam kanku chayta haypanankupaq. Congregacionpi iñiqmasinchikkunapas anchatam agradecekunku ancianokuna sapakamata iñiyninkupi aswan allin kanankupaq yanapaptinkuqa. Ancianoqa manam kikinkupiqa llumpaytaqa piensanankuchu, chaymi yanapanqa hukkuna asuykunankupaq (Rom. 12:3). Huk cristianam nirqa: “Manam munaymanchu ancianokuna asikunallapaq hina tukuyta qawanankutaqa, manataqmi munaymanchu tukuy tiempo piñasqa hina kanankutapas”, nispa. Huk cristianapas ninmi “wakin ancianokuna piñasqa hina kasqankuwan hukkunata manchachisqankuta”. Manamá pi ancianopas munanmanchu iñiqmasinkuna  paykunarayku ‘kusisqa Diosta’ hukmanyasqa servinankutaqa (1 Tim. 1:11, NM).

Congregacionpi rurayniyoq qarikuna

11. ¿Imaynatam pi cristianopas qawachinman ‘iñiqkuna nanachikunapaq’ kallpanchakusqanta?

¹¹ Congregacionpi rurayniyoq kanankupaq qarikunata Pablo kallpanchaspanqa, manam nichkarqachu kikillankupi piensanankupaqqa. Aswanqa nichkarqam hukkunarayku llamkanankupaq, nirqam: “Iñiqkuna nanachikuyta pipas munaspanqa, allin oficiotam [otaq allin ruraytam] munachkan”, nispa (1 Tim. 3:1, 4). ¿Imaynatam pi cristianopas qawachinman chayta haypananpaq kallpanchakusqanta? Munananmi iñiqmasinkuna serviyta hinaspa kallpanchakunanmi sumaq kayniyoq kananpaqpas. Ancianokunaqa 1 Timoteo 3:8-13 nisqanman hina kawsaq cristianokunataqa, akllanmankum huk wataña bautizasqa kaptinqa siervo ministerial kanankupaq. 8 versiculom nin: “[Siervo ministerial kaqkunaqa] allin respetana runakunam kananku”, nispa.

12, 13. ¿Imatam mozokuna ruranmanku congregaciopi rurayniyoq kanankupaq?

¹² Mozo, ¿bautizakurunkiñachu hinaspa allintachu Dios serviynikita cumplichkanki? Chayna kaptinqa kaykunatam rurawaq congregacionpi rurayniyoq kanaykipaq. Kallpanchakuy astawan predicanaykipaq. ¿Predicankichu lliw iñiqmasinchikkunawan? ¿Kallpanchakuchkankichu Bibliamanta estudiota qonaykipaq? Huñunakuypi niwasqanchikman hina estudiota qospaykiqa, allin yachachiqmi kanki hinaspa yachachisqayki runakunatapas entiendeytam atinki. Hinaspa estudio qosqaykikuna vidankupi cambianankuta entienderuptinkuqa, yachankim pacienciawan hinaspa sumaqllata Bibliapa nisqankunata kasukunankupaq yanapaytapas.

¹³ ¿Kallpanchakunkichu yuyaq iñiqmasinchikkunata imapipas yanapanaykipaq? ¿Kusikuywanchu yanapakunki Salon limpiaypi? Imapipas yanapakuq kaspaykiqa, qawachichkankim Dios servisqaykita ancha chaninchasqaykita. Timoteo hinam kawaq, payqa iñiqmasinkunapim anchata interesakurqa (leey Filipenses 2:19-22).

14. ¿Imaynatam mozokuna qawachinmanku congregacionpi ruraykunata chaskinankupaq hina kasqankuta?

¹⁴ Ancianokuna, congregaciopi llamkayta qoychik ‘jovenkunapa munapayasqanmanta ayqekuqkunaman’, ‘allin kaqkunata ruraqkunaman, Diospi confiakuqkunaman hinaspa kuyakuq kaspa hawkalla kawsakuq’ mozokunaman (2 Tim. 2:22). Chayna rurayniyoq kasqankum qawachinqa congregacionpi huk ruraykunata chaskinankupaq hinaña kasqankuta. Rurayninkuta allinta cumpliptinkuqa llapallankum qawanqaku ‘aswan-aswan ñawpaqman risqankuta’ (1 Tim. 3:10; 4:15).

Congregacionpi hinaspa familiapipas respetakuq kasun

15. 1 Timoteo 5:1, 2 nisqanman hina, ¿imaynatam cristianoqa qawachinman iñiqmasinkunata respetasqanta?

¹⁵ Cristianokunaqa iñiqmasinkunatam allinta respetananku, chayna kananpaqmi Pablopas Timoteota nirqa (leey 1 Timoteo  5:1, 2). Astawanraqmi chayna respetoyoq kananku qarikuna warmikunawan chaynataq warmikunapas qarikunawan. Jobmi allin ejemplo karqa, payqa respetarqam warmikunata, señoranmantaqa manam pitapas munapayaywanqa qawapayarqachu (Job 31:1). Iñiqmasinkunata respetaqkunaqa, mana casarakuyta piensaspaqa manam pitapas asipayanchu nitaq hukmanyachinchu. Astawanraqmi respetanakunanku casarakunankupaq reqsinakuqkunaqa. Respetakuq cristianoqa manam haykapipas kuyakuyninkuwanqa pukllanankuchu (Pro. 12:22).

16. ¿Imaynatam Satanaspa munaychakusqan runakunaqa qawachinku taytakunata otaq qosakunata Bibliapa nisqanmantaqa?

¹⁶ Chaymantapas respetananchikmi familiapi sapakamaman ima rurayniyoq kanapaq Diospa kamachisqanta. Satanaspa munaychakusqan runakunaqa yanqacharunkum qosakunapa ima rurayniyoq kasqankuta. ¿Imaynata? Televisionwan hinaspa chayman rikchakuq kaqkunawanmi qosakunata chaynataq taytakunata mana respetanapaq hinata qawachinku. Bibliam ichaqa niwanchik ‘qosaqa warmipa uman’ kasqanrayku achka rurayniyoq kasqankuta (Efe. 5:23; 1 Cor. 11:3).

17. ¿Imaynatam qawachinchik familianchikman Diosmanta yachachiy ancha allin kasqanta?

¹⁷ Familiankuta mantienenanrayku Diosmanta mana yachachiq cristianoqa, manam yachaywanchu rurachkan (Deu. 6:6, 7). Chaymi congregacionpi ima rurayniyoq kananta munaspanqa kasukunanmi 1 Timoteo 3:4 kayna nisqanta: “Chayna runaqa kanan wasinpi kaqkunawan kasuchikuqmi hinaspa churinkunata educaspa paykunawan respetachikuqmi”. Tayta kaspaykiqa tapukuy: “¿Sapa semanachu Familiawan Diosta Yupaychanapaq Tutata rurani?”, nispa. Llakikunapaq hinam, achka cristianakuna qosankuta rueganankuraq chayta ruranankupaq. Lliw qosakunam ancha allinpaq hapinanku familiankuwan estudiaytaqa. Señoranpas yanapananmi chayta rurananpaq.

18. ¿Imam warmallaraq kaqkunata yanapanqa ancha allin kaqkunapi piensanankupaq?

¹⁸ Churi-wawakunatapas Bibliaqa ninmi ancha allin kaqkunapi piensanankupaq (Ecl. 12:1). Allinmi kanman watanman hina chaynataq atisqanman hina wasipi imapas rurayninkuqa. Kaymi taksachanmantapacha yanapanqa allin llamkaq kanankupaq (Lam. 3:27). Warmallaraq kaspanmi Davidqa oveja michiyta yacharurqa. Yacharurqataqmi allin tocaq kayta hinaspa takikuna ruraytapas, chaykunam yanaparqa Israelpi reyta yanapananpaq (1 Sam. 16:11, 12, 18-21). Davidqa warmaraq kaspanqa wakin warmachakuna hinachá pukllarqa, ichaqa yacharqataqmi allin ruraykunata, chaykunatam servichikurqa Diosta servinanpaq. Ejemplopaq, oveja michiq kaspan pacienciakusqanmi yanaparqa  Israel nacionta kamachinanpaq. Mozo-sipaskuna, ¿allin ruraykunatachu yachachkankichik chaynapi Diosta allinta servinaykichikpaq hinaspa hamuq tiempopipas huk rurayniyoq kanaykichikpaq?

Entiendeq kasun

19, 20. ¿Imaynam kananchik hinaspa imaynatam qawananchik Dios serviyninchikta?

¹⁹ Llapanchikmi kallpanchakunanchik kikinchikmanta mana llumpayta piensanapaq hinaspa entiendeq kanapaqpas. Manam pipas ‘alli-allin’ otaq llumpay justo runa kaytaqa munanchikchu (Ecl. 7:16). Wakinpiqa asirikunapaq rimaykunaqa wasinchikpi, llamkayninchikpi hinaspa congregacionpi hukmanyasqa tarikuptinchikqa yanapawanchikmi. Manataqmi familianchikpipas nanachikuq rimaykunataqa rimanachu, chayqa hawka kawsakuytam yanqacharunman. Congregacionpipas iñiqmasinchikkunawanqa asirikunam hinaspa kusirikunataqmi paykunawanqa. Ichaqa rimasqanchikkunawan yachachisqanchikkunaqa kallpanchananpaq hinam kanan (2 Cor. 13:10; Efe. 4:29).

²⁰ Mana iñiyniyoq runakunaqa, Jehová Diostawan kamachisqankunataqa manam respetankuchu. Cristianokunam ichaqa kallpanchakunchik Diosta tukuypi kasukunapaq. ¡Anchatam kusikunchik Diospa llaqtanpi kasqanchikmanta! Kallpanchasqam tarikunchik Dios serviyninchikta anchata chaninchanapaq hinaspa kawsayninchikpipas allin kanapaq.

¿Imatam niwaq?

• ¿Imanasqam runakunapa kusirikuyllaman qokusqankuta mana qatipakunachu?

• ¿Imaynatam Dios serviyninchikta cumplispapas kusirikuchwan?

• ¿Imaynatam Dios serviyninta cumpliq cristianoqa congregacionpi rurayninkunata qawan?

• ¿Imanasqam congregacionpi kaqkunatawan familianchikta respetayqa ancha allin?

[Kay yachachikuypa tapukuyninkuna]

[12 kaq paginapi dibujokuna]

Qosakunaqa familianta mantienespanpas Diosmantam yachachinan