¿Yachanchikchu imaynatam Dios pusawasqanchikta?

MANAM haykapipas israelitakunaqa nitaq Egipto runakunapas chaytaqa qawarqakuchu. Diospa llaqtan Egiptomanta lloqsiruptinkum sayanpa puyu ñawpaqninkuta rirqa, tutapiñataqmi sayanpa ninaman tikrakurqa. ¡Admirakunapaqmi karqa! Ichaqa ¿imaynatam rikurirurqa? ¿Imapaqmi karqa? 3.500 watakunaña pasaruptinpas, ¿imatam yachanchik ‘sayanpa nina puyuta’ israelitakuna imayna qawasqankumanta? (Exo. 14:24.)

Chay milagro imayna rikurimusqanmanta hinaspa imapaq kasqanmantam Biblia nin: “Diosmi paykunapa ñawpaqninta punchaw rirqa sayanpa puyupi ñanninkupi pusananpaq, tutañataqmi rirqa sayanpa ninapi paykunata achkinanpaq chaynapi punchawpas tutapas rinankupaq”, nispa (Exo. 13:21, 22). Qawasqanchikman hinaqa Egiptomanta lloqsimusqankumantam Diosqa sayanpa puyuta servichikurqa israelitakunata chunniqpi pusananpaq. Maymanpas risqanmanmi israelitakunaqa qatinanku karqa. Servichikurqataqmi Faraonpa tropankunamanta israelitakunata harkananpaq (Exo. 14:19, 20). Chay puyu, karu ñanninta riptinpas israelitakunaqa qatispallankum Prometesqa Allpaman chayananku karqa.

Chay puyuqa qawachirqam israelitakunawan Dios kasqanta. Diospa rantinpim karqa, wakinpiñataqmi chaynintakama paykunata rimarqa (Num. 14:14; Sal. 99:7). Hinaspapas chaynintakamam Jehová Diosqa qawachirqa Moises akllasqa kasqanta (Exo. 33:9). Servichikurqataqmi Moisespa rantinpi Josueyta Dios akllasqanmanta qawachinanpaqpas, chayqa karqa Moises wañukunanpaqña kachkaptinmi (Deu. 31:14, 15). Prometesqa Allpaman israelitakuna chayanankupaqqa reqsikunankum karqa chay puyuntakama Dios pusasqanta.

Diospa yanapasqantam qonqarurqaku

Chay milagrota chayllaraq israelitakuna rikuspankuqa admirakurqakuchá. Sapa kuti chayta qawaspankupas manam Jehová Diospiqa astawanqa confiarqakuchu. Achka kutipim iskayrayarqaku Diospa yanapasqanmanta. Ejemplopaq, Egipto runakuna paykunapa qepanta hamusqankuta qawaspankum piensarqaku Dios mana salvay atinanmanta. Aswanmi Moisesta acusarqaku chunniqpi wañunankupaq horqoramusqanmanta (Exo. 14:10-12). Puka Lamar Qochata chimparuptinkum Aaronpa, Moisespa hinaspa Jehová Diospa contranpi rimarqaku yakuwan mikuy pisinanmanta piensaspanku (Exo. 15:22-24; 16:1-3; 17:1-3, 7). Qatiqnin semanakunapiñataqmi Aaronta hikutarqaku toro taytachata rurapunankupaq. Piensariy, kasqanku lawpa hichpanpim kachkarqa sayanpa nina puyu, chaymi qawachirqa paykunawan Salvaqninku Jehová Dios kasqanta. Ichaqa hichpallanpitaqmi israelitakunaqa huk taytachata yupaychachkarqaku kaynata nispanku: “¡Yaw Israel runakuna, kaymi Egipto nacionmanta horqomuwaqninchik dioskuna!”, nispa. Chaywanqa Diostam ‘llumpayta piñachirqaku’ (Exo. 32:4; Neh. 9:18).

Chayna rurasqankuwanmi israelitakunaqa Jehová Diospa pusasqanta qepancharqaku. Paykunaqa iñiyninkupim tutayaypi hina tarikurqaku. Sayanpa puyuta qawaspankupas manam kaqpaqpas hapirqakuchu. Chaynata  ruraspankum ‘Israelpa chuya Diosninta llakichirqaku’, chaywanpas Diosqa llakipayarikurqam hinaspa Prometesqan Allpaman chayanankukamam sayanpa puyuwan pusarqa (Sal. 78:40-42, 52-54; Neh. 9:19).

Kay tiempopi pikunawan Dios pusawasqanchikta reqsikusun

Kunanpas Diosqa hinallam llaqtanta pusachkan. Payqa israelitakunataqa manam nirqachu chunniqpi tanteasqankuman hina rinankupaqqa, chaynam ñoqanchiktapas mana niwanchikchu kikinchik imaynatapas mosoq pachaman chayananchikpaqqa. Jesucristotam churarqa congregacionpa Uman kananpaq (Mat. 23:10; Efe. 5:23). Payñataqmi rantinpi churarurqa allin yuyayniyoq confianza sirvienteta otaq hanaq pachaman rinankupaq qepaqkunata. Paykunañataqmi ancianokunata churanku congregacionta cuidanankupaq (Mat. 24:45-47; Tito 1:5-9).

¿Imaynatam yachachwan confianza sirviente pikuna kasqankuta? Kikin Jesusmi nirqa: “Qamkunaqa allin yuyayniyoq confianza mayordomo hinayá kaychik, paytam wasinpi patronnin churarqa sirvientenmasinkunata imam horapi mikuchinanpaq. Ancha kusisqam chay runaqa sichum patronnin kutimuspa chayna rurachkaqta tariykamuptinqa”, nispa (Luc. 12:42, 43).

Hanaq pachaman rinankupaq suyakuyniyoq cristianokunaqa confianzam kanku. Haykapipas kasukurqakum Jehová Diosta, Jesusta, Diospa llaqtanta hinaspa Bibliatapas. Chaymantapas allin yuyayniyoqmi kanku, kaymi qawakun ‘Diospa munaychakusqanmanta kay allin noticiata’ imayna willasqankupi hinaspa ‘llapallan nacionpi runakuna’ Jesuspa qatiqninña kanankupaq yachachisqankupipas (Mat. 24:14; 28:19, 20). Chaymantapas iñiyninchikpi yanapawananchikpaqmi “imam horapi” qellqakunata qowanchik. Sutillam qawakun paykunata Jehová Dios yanapasqanta, chaymi llaqtanqa astawan wiñachkan. Hinaspapas Diospa llaqtanmanmi yachayta qon allinta tanteanankupaq hinaspa Bibliapa nisqanta astawan entiendenankupaqpas. Kayqa yanapantaqmi enemigonkuna mana chinkarachinankupaq hinaspa hawkalla kanankupaqpas (Isa. 54:17; Fili. 4:7).

Dios pusawasqanchikmanta agredecekusun

¿Imaynatam agradecekuchwan Dios pusawasqanchikmanta? Pablom niwanchik: “Pusasuqnikichik runakunata kasukuspayá paykunaman sujetakuychik”, nispa (Heb. 13:17). Chay rurayqa manamá facilchu. Ejemplopaq, piensariy Moisespa tiemponpi huk kaqnin israelita kasqaykita. Achka punchawkunaña sayanpa puyuta qatichkawaq. Qonqaymantañataqmi puyu sayarunman. Hinaspam piensanki: “¿Haykapikamaya kaypi sayanqa?, ¿huk punchawllachu, huk semanachu icha achka killakunachu?”, nispa. Hinaptinqa tapukunkichá, ¿imaykunatapas horqosaqchu?, nispa. Iskayrayaspaykim necesitasqallaykita horqoyta qallarinki. Ichaqa achka punchawkuna pasaruptinmi imaykikunatapas horqopayasqaykimanta amiruspa llapan imaykikunata horqoruwaq. Hinaptinmi chaylla sayanpa puyuqa pasakuyta qallaykunman, qamñataq tukuy imaykikunata allichayta qallaykuwaq. ¡Hukmanyanapaq hinamá! Ichaqa mana munaspapas wakinkuna hinam chaylla qatinayki (Num. 9:17-22).

¿Imaynatam Diospa pusawasqanchikta kunan qawanchik? ¿Chayllachu kasukunchik icha ñawpaqpi hinachu imatapas ruranchik? ¿Kasukunchikchu estudiota qonapaq, huk law nacionniyoqkunata predicanapaq, familiawan Diosta yupaychanapaq chayllaraq chaskisqanchik yachachikuykunata hinaspa asambleakunapi imayna kanapaq niwasqanchikta chaynataq Comités de Enlace con los Hospitales nisqata imayna yanapanapaq? Agradecekuchwantaqmi Diospa pusawasqanchikmanta lliw consejo qowasqanchikkunata kasukuspa. Chaymi imatapas tanteaspaqa  manam piensasqanchikman hinachu ruranchik aswanqa Diospa hinaspa llaqtanpa yanapakuynintam maskanchik. Manchakuypaq imapas hamuptinqa warmachakunaqa tayta-mamanmanmi kallpanku, chaynam ñoqanchikpas sasachakuykuna kaptin congregacionpi amparakunchik.

Diospa llaqtanpi punta apaqkunaqa llapallankum pantaq kanku. Moisespas pantaqmi karqa, chaywanpas sayanpa puyuwan ninaqa qawachirqa Diospa churasqan kasqanta hinaspa yanapasqantapas. Chaymantapas israelitakunaqa ‘Moisesman Tayta Dios kamachiptillanmi’ pasananku karqa, manam pipas kikillanmantaqa tantearqachu haykapi rinankutaqa (Num. 9:23). Qawasqanchikman hinaqa Dioswan hinaspa israelitakunawan Moises allinyanachiq kasqanraykum payqa nirqa haykapi rinankumanta.

Kunanpas confianza sirvienteqa yanapawanchikmi ñawparinapaq. Chaypaqmi servichikun Llaqta Cuidaq revistata hinaspa Diospaq Llamkayninchik nisqata, chaynataq mosoq qellqakunatawan asambleakunapi discursokunatapas. Chaymantapas congregacionta watukuq ancianowan, cartakunawan hinaspa akllasqan serviqninkunapaq escuelakunawanmi yachachikuykunata chayachimuwanchik.

¿Reqsikunchikchu pikunawan kay tiempopi Dios pusawasqanchikta? Payqa llaqtanwanmi pusawanchik mana allin ruraq runakunapa kasqanpi, chayraykum amparasqa, kuyasqa hinaspa huñulla tarikunchik.

Prometesqa Allpapiña israelitakuna tarikuptinkum Josuey kaynata nirqa: “Yachaychikyá tukuy sonqoykichikwan chaynataq tukuy vidaykichikwan yupaychasqanchik Tayta Diospa tukuy allin prometesqankunaqa cumplikusqanta”, nispa (Jos. 23:14). Kay tiempopi Diospa llaqtanpas chayanqapunim prometewasqanchik mosoq pachamanqa. Chayqa kanqa Diospa pusawasqanchikta reqsikuptillanchikmi. Chaynaqa kallpanchakusunyá pikunawan Dios pusawasqanchikta reqsinapaq.

[5 kaq paginapi fotokuna]

Kunanqa Diospa llaqtanmi pusawanchik

Mosoq qellqakuna

Diospa llaqtanpi escuelakuna

Predicayman lloqsinapaq yachachikuykuna