Allin pusaqninchik Jesucristota qatikusun

KAY pachapi kamachiqkunata qatiqkunaqa llumpay hukmanyachisqam qepanku. Jesucristota qatiqkunam ichaqa ancha kusisqa tarikunku. Kikinmi kaynata nirqa: “Hamuychik ñoqaman llapallan pisipasqakuna hinaspa qepichkaq hina ñakariqkuna, ñoqam samachisqaykichik. Llasawaqniy yugoyta apaspayá ñoqamanta yachaychik, ñoqaqa kani llampu sonqo humillakuqmi, chaynata ruraspaqa tarinkichikmi samayta”, nispa (Mat. 11:28, 29). Jesuswan pusachikuyqa kawsarichiwachkanchikmanpas hinam kallpanchawanchik. Payqa llakipayanmi haykam ñakariqkunata, hinaspam kuyakuywan niwanchik qatikunanchikpaq. Ichaqa, ¿ima ninantaq Jesusta qatikuyqa?

Apostol Pedrom nin: “Cristopas ñoqanchikraykum ñakarirqa chaynapi paypa ejemplonta qatinanchikpaq”, nispa (1 Ped. 2:21). ¿Imanasqataq Jesuspa ejemplonta allintapuni qatinanchik? Kayta rikchanachisunchik. Sichu hukkunawan richkawaq bombakunapa kasqan lawninta hinaspa huklla yachanman mayninta rinapaq, ¿manachu chay yachaq runapa risqallanta qatichwan, wakinpiqa ichapas maymi sarusqanllanta saruspa? Chaynatam ñoqanchikpas Jesucristota qatinanchik. Salvasqa kayta munaspaqa ejemplontam qatipakunanchik. Chaypaqqa uyarinanchiktaqmi niwasqanchikta hinaspa kasukunanchikmi paypa rantinpi churasqan runakunatapas.

Uyarikuq hinaspa kasukuq kasunchik

Ancha Reqsisqa Yachachikuyninpim Jesus kaynata nirqa: “Nisqaykunata uyarispan ruraqqa taqra rumipa hawanpi wasichakuq allin yachayniyoq runamanmi rikchakun. Para chayaramuptinmi lloqlla huntaramurqa, nisyu wayram pukumurqa wasiman, ichaqa manam tuñirqachu taqra rumipi cimientasqa kasqanrayku”, nispa (Mat. 7:24, 25).

Nisqankunata uyarispa kasukuq runakunatam Jesusqa nirqa “allin yachayniyoq” kasqankuta. ¿Imatam nichwan ñoqanchikmanta? ¿Qawachinchikchu Jesuspa kamachiwasqanchikkunata sonqomanta kasukuspa ejemplonta respetasqanchikta? ¿Icha munasqanchik kaqkunallatachu kasukunchik? Payqa nirqam Taytanpa agradonpaq kaqkunallata tukuy tiempo rurasqanta (Juan 8:29). Chaynam ñoqanchikpas kananchik.

Punta cristianokunapa tiemponpim, apostolninkunaqa allinta qawachirqaku Jesus kasukusqankuta. Pedrom huk kutipi Jesusta nirqa: “Ñoqaykuqa tukuy imata saqeruspam qanwan purichkaniku”, nispa (Mar. 10:28). Arí, apostolkunaqa anchatam munarqaku Jesus pusaqnin kananta, chaymi tukuy imankuta saqerqaku payta qatinankupaq. (Mat. 4:18-22).

Kasukusun Cristopa rantinpi kaqkunata

Manaraq wañukuchkaspanmi Jesusqa imayna kasukunamanta kaynatawan nirqa: “Ñoqapa kachasqayta pipas chaskiqqa ñoqatapunim chaskiwan”, nispa (Juan 13:20). ‘Wawqeykuna’ nispanqa hanaq pachaman rinankupaq suyakuyniyoq kaqkunamantam Jesusqa rimachkarqa (Mat. 25:40). Paykunatam Jesusqa hanaq pachaman kutiruspan rantinpi kanankupaq kay pachapi churarurqa. Jesuspa rantinpim runakunata Dioswan allinyanachinanku karqa (2 Cor. 5:18-20). Chaynaqa, Jesus  pusawaqninchik kasqanta reqsikuspaqa kasukunanchiktaqmi ‘wawqenkunatapas’.

Llapanchikmi tapukunanchik, ¿kasukuchkanichu Bibliapi, qellqanchikkunapi hinaspa huñunakuykunapi tukuy niwasqanchikta? Kay yanapakuykunawanmi yuyarinchik pusawaqninchik Jesucristopa ima niwasqanchikta (2 Ped. 3:1, 2). Chay yanapakuykunata chaninchasqanchiktam qawachisun chaykunapaq tiempochakuspa. Ichaqa, ¿imaynatam qawanchik yapa-yapamanta huk yachachikuyta uyarispa? Ichapas sapa kuti uyarirqanchik Diospa llaqtallanpi kaqkunallawan casarakunamanta (1 Cor. 7:39). Kaymantaqa achka kutitañam Llaqta Cuidaq qellqapi estudiarqanchik. Qellqanchikkunapi kaykunamanta yachasqanchikmi qawachiwanchik Jesuspa wawqenkunaqa ancha kuyawasqanchikta hinaspa allinninchikta munasqankuta. Tukuy niwasqanchikta kasukuspaqa, Jesus pusawaqninchik kasqantam reqsikuchkanchik.

Proverbios 4:18 nin: “Allin ruraqkunapa vidanqa chayraq achikyamuchkaq hinam. Inti qespiramuspan aswan-aswan punchawyaruq hinam”, nispa. Kaypi nisqanman hinaqa Jesuspa yachachikuyninkunaqa tiempopa risqanman hinam pisi-pisimanta astawan entiendekun. Chaymi Jesuspa ‘wawqenkunata’ kasukusqanchiktaqa qawachisuntaq ‘allin yuyayniyoq confianza sirvientepa’ allichasqanku yachachikuykunata chaskikuspa (Mat. 24:45).

¿Imaynatawanraqmi qawachichwan Jesuspa wawqenkunata kasukusqanchiktaqa? Congregacionpi ancianokunata kasukuspam. Apostol Pablom nirqa: “Pusasuqnikichik runakunata kasukuspayá paykunaman sujetakuychik. Paykunaqa almaykichikmantam cuentallikuchkanku”, nispa (Heb. 13:17). Ichapas huk anciano niwanchikman Familiawan Diosta Yupaychanapaq Tutata sapa semana rurananchikpaq, otaq Dios serviyninchikpi imallapipas aswan allinta ruranapaq. Congregacionta watukuq ancianopas niwanchikmantaqmi cristiano kasqanchikpi imakunapi astawan kallpanchakunapaq. Kasukuspaqa reqsikuchkanchikmi Jesucristo pusawaqninchik kasqanta.

Kay pachapiqa manam kanchu alli-allin kamachiq runaqa. Ichaqa, ¡anchatamá kusikunchik Cristo kuyakuywan pusawaqninchik kasqanmanta! Arí, kallpanchasqam tarikunchik Jesucristota hinaspa rantinpi churasqankunata kasukunapaq.

[27 kaq paginapi dibujokuna]

¿Imaynatam qawanchik iñiqmasillanchikwan casarakunapaq Bibliapa niwasqanchikta?