¿Gustasunkichu Biblia leeyta?

“SAPA kuti Biblia leeyta qallarispaymi kusikunaymantaqa qellapakurqani. Mana entiendespaymi chaylla imamantapas piensayta qallaykuq kani”, chaynatam Lorraine nin.

Chaynam tarikunku achka iñiqmasinchikkuna. Ichaqa, ancha allin kasqanraykum hinalla kallpanchakunku. Marc sutiyoq cristianom nin: “Imawanpas harkarachikuchwanmi Biblia leeyta hinaspa sapallanchikpi estudiaytaqa. Ñoqaqa anchatam Diosta mañakurqani hinaspapas kallpanchakurqanim Bibliata sapa punchaw leenaypaq”, nispa.

¿Imatam rurawaq Diospa Palabranta astawan chaninchanapaq? ¿Imam yanapasunkiman Biblia leey gustasunaykipaq? Qawasun qatiqninpi yanapakuykunata.

Imakuna haypanamantawan imayna ruranamanta

Manaraq qallarichkaspa Diosta mañakuy hinaspa atencionwan leey. Diosta mañakuy Biblia leey gustasunaykipaq hinaspa yuyaynikitawan sonqoykita kichaykunanpaq, chaynapi yachayninta entiendenaykipaq (Sal. 119:34). Mana chayqa chayllam amirunki. Lynn iñiqmasinchikmi nin: “Wakinpiqa utqaylla leesqayraykum sumaq yachachikuyninkunapi reparanichu, nitaqmi cuentata qokunichu imamanta yachachisqantapas. Chaymi Jehová Diosta mañakuni yanapawananpaq, chaynapim atencionwan estudiani”, nispa.

Yachasqaykita chaninchay. Yuyariy, vidaykiqa kanqa Bibliapa yachachisqankunata entiendesqaykimantawan rurayman churasqaykimantam. Chaymi kallpanchakunayki kawsaynikipi yanapasuqniki yachachikuykunata tarinaykipaq. Chris iñiqmasinchikmi nin: “Leespaymi reparani imakuna yanapawananmanta chaynapi imayna kasqayta cambianaypaq. Qellqaqkunata mana reqsichkaspaypas, anchatam kusikuni Bibliapiwan qellqanchikkunapi ñoqapaq hina yachachikuykunata tarispay”, nispa.

Imam haypay atisqaykipi tanteay. Kallpanchakuy Bibliapi leesqayki runakunamanta astawan yachanaykipaq. Chaypaqqa yanapachikuwaqmi Perspicacia para comprender las Escrituras otaq Índice de las publicaciones Watch Tower qellqakunawan. Sichum cheqap runakunata hina qawaspaykiqa allintam yanapachikunki.

Runakunata piensarichinapaq mosoq yachachikuykunata maskay (Hech. 17:2, 3). Chaytam Sofiaqa ruran estudiaspan, ninmi: “Mosoq yachachikuykunatam maskani Diosmanta yachachispay servichikunaypaq. Chaynapim Bibliapa yachachisqankunata allinta yachachini. Chaypaqmi allintapuni yanapawan Llaqta Cuidaq qellqa”, nispa (2 Tim. 2:15).

Qawachkawaqpas hina leey. Hebreos 4:12 nin: “Diospa palabranqa kawsachkanmi”, nispa. Hinaptinqa leespaykiqa chaypi runakunapa qawasqanman, uyarisqanman hinaspa sientesqanman hina leey. Tapukuy:  “¿Imapim tupan paykunapa tarikusqanku ñoqapa imayna tarikusqaywan? ¿Imaynatam paykunata qatipakuyman kawsakuyniypi?”, nispa. Kaykunam yanapasunki leesqaykita entiendenaykipaqwan yuyarinaykipaqpas.

Sasa entiendena yachachikuykunatawan chaymanta willakuq qellqakunata estudiay. Allinta tiempochakuy sapa yachachikuypaq. Leesqaykipi mana entiendesqaykikunata estudiay, diccionariopi maskay mana reqsisqayki palabrakunata, qawaytaq Bibliapa ura patanpi wakin palabrakunata hinaspa huk textokunawan tupasqantapas. Astawan yachaspayki hinaspa kasukuptikiqa Biblia estudiaymi astawan gustasunki. Hinaptinmi Salmo qellqaq hina kaynata ninki: “Kamachikuynikikunam wiñaypaq herenciay hinaña kapuwachkan. Sonqoyta kusichisqanraykum herenciay hinaña kapuwachkan”, nispa (Sal. 119:111).

Ama utqayllamanqa estudiaychu, aswanqa allillamanta. Amataq qonqaychu huñunakuypaq preparakuytapas. Raquelmi nin: “Estudianapaq achkallaña kasqayraykum wakinpiqa hikutasqa hina tarikuni. Chaymi munani asllata estudiayta, chaynata ruraspaymi aswan allinta estudiani”, nispa. Chrispas nintaqmi: “Utqayllaman estudiaspayqa hukmanmi tarikuni mana umaypi nitaq sonqoypi takyasqanrayku”, nispa. ¿Imatam rurawaq? Amayá utqayllamanqa estudiaychu.

Bibliata astawan leeyta gustasunaykipaq kallpanchakuy. Apostol Pedrom nirqa: “Chayraq nacekuq wawakuna ñuñuta maskachkaq hinayá Diospa cheqap palabranta maskaychik chaywan wiñaspa salvo kanaykichikpaq”, nispa (1 Ped. 2:2). Wawakunaqa ñuñuta maskastinñam nacenku, ñoqanchikmi ichaqa kallpanchakunanchik Biblia estudiayta munanapaq. Sichum huk paginallata sapa punchaw leespaykiqa munankipunim astawan leeyta. Qallariypiqa sasapaschá kanqa, chaymantam ichaqa astawan munanki.

Leesqaykipi yuyaymanay. Yuyaymanayqa yanapasunkim yachasqaykikuna imayna tupasqanta allinta entiendenaykipaq. Tiempopa risqanman hinam cuentata qokunki aswan yachayniyoq kasqaykita (Sal. 19:14; Pro. 3:3).

 Tiempotaqa manam usuchichkanchikchu

Sasamá sapa punchaw Bibliata leenapaq tiempochakuyqa, ichaqa allinpim tukunqa. Allintataqmi entiendenki Bibliapa yachachikuyninkunata (Heb. 5:12-14). Chaymantapas, yachaytam tarinki kusisqa, hawkalla hinaspa allinlla kawsakunaykipaq. Yuyariy, Bibliapa yachachikuyninkunaqa “kawsay qokuq sacha hinam hatalliqninkunapaq” (Pro. 3:13-18).

Diospa Palabranta allintapuni estudiaspaqa allin yachayniyoqmi kanki (Pro. 15:14). Chaynapim hukkunatapas Bibliapa nisqanman hina consejanki. Sichu imatapas tanteanki Bibliapa hinaspa ‘allin yuyayniyoq confianza sirvientepa’ qowasqanchik qellqakunaman hina, hinaptinqa kawsakuynikim sumaqllaña kanqa (Mat. 24:45). Atipankitaqmi ima sasachakuykunatapas hinaspam Diostapas allinta servinki. Chaymantapas Dios servisqaykipim aswan allin kanki (Sal. 1:2, 3).

Tukuy sonqonchikwan Jehová Diosta kuyaspanchikqa, iñiyninchikmantam runakunaman rimasun. Kay rurayqa suma-sumaqmi. Sofiam tantearun achka textokunata yuyarinanpaq hinaspa predicasqanpi servichikunanpaq, kunanqa aswan allintañam predican. Ninmi: “Mayna sumaqmi Bibliapa ima nisqanta runakuna leespanku entiendesqankuqa”, nispa.

Chaymantapas Diospa Palabranta leespaykiqa Jehová Dioswanmi aswan allin amistad kanki. Estudiasqaykim yanapasunki Diospa kamachikuyninkunatawan sumaq kayninkunata astawan entiendenaykipaq. Kay ruraywanqa manam ima ruraypas tupanmanchu. Chaynaqa allintayá tiempochakuy Bibliata estudianaykipaq. Chaywanqa manam tiempoykitaqa usuchichkankichu (Sal. 19:7-11).

[5 kaq paginapi dibujokuna hinaspa recuadro]

BIBLIATA LEESPA: IMAKUNA HAYPANAMANTAWAN IMAYNA RURANAMANTA

▪ Manaraq qallarichkaspa Diosta mañakuy hinaspa atencionwan leey

▪ Yachasqaykita chaninchay

▪ Imam haypay atisqaykipi tanteay

▪ Runakunata piensarichinapaq mosoq yachachikuykunata maskay

▪ Qawachkawaqpas hina leey

▪ Sasa entiendena yachachikuykunatawan chaymanta willakuq qellqakunata estudiay

▪ Ama utqayllamanqa estudiaychu

▪ Bibliata astawan leeyta gustasunaykipaq kallpanchakuy

▪ Leesqaykipi yuyaymanay

[4 kaq paginapi dibujo]

Bibliapa huk kaqnin yachachikuyninta leespayki piensay chaypi kasqaykita