“Kuyakuywan kamachiq hinaspa sumaq amigo”

JOHN BARR sutiyoq iñiqmasinchikmi, 97 watanpi kay pachapi servisqanta tukurun 2010 watapa 4 punchaw diciembre killapi sabado madrugawta. Payqa Jehová Diospa Llaqtanpi Punta Apaqmi karqa, hinaspam reqsirqaku “kuyakuywan kamachiq hinaspa sumaq amigo” kasqanwan.

Payqa kimsa wawqenkunapa sullkanmi karqa, paykunaqa karqaku Aberdeen (Escocia) llaqtamanta, tayta-mamanmi hanaq pachaman riy suyakuyniyoq karqaku. Payqa kuyakuywanmi rimarqa warmacha kasqanmanta tukuy pasasqanmanta hinaspam anchata agradecekurqa tayta-mamanpa sumaq ejemplo qosqanmanta.

Mozoyasqanpim llumpay penqapchu karqa. Anchatam kallpanchakunan karqa runakunawan mana manchakuspa rimananpaq. Chaytaqa atirurqamá. 1927 watapim domingo tarden law punchawta, 14 watanpi kachkaspan taytanta nirqa wasin-wasin predicaysinanpaq listoña kasqanta. Chaymantapacham Dios serviyta qallaykurqa. Wañukunankamam tukuy sonqonwan predicarqa.

Huk kutipim John Barr iñiqmasinchikpa maman wañuy patapi tarikurqa. Chayraykum payqa imanasqa kawsasqanmanta yuyaymanaspan 1929 watapi Jehová Diosman qokururqa. Ichaqa Bautizakunanpaq mana atikusqanraykum, 1934 watapiña bautizakurqa. Pichqa watamantam Londres lawman rirqa, Inglaterra Betel wasipi servinanpaq. Chaymantapacham 71 watapuni tukuy tiemponwan Jehová Diosta servirqa.

1960 watapa 29 octubre killapim kay iñiqmasinchikpa nisqanman hina “sumaqllaña amistad rurayta” qallaykurqa. Paymi casarakurqa Mildred Willett sutiyoq cristianawan, payqa ancha experienciayoq kusikuywan predicaq precursora hinaspa misioneram karqa. 2004 watapa octubre killapim kay Pachapi servisqanta wañukuspan tukurqa, iskayninkum allin ejemplo karqaku huk sonqolla hinaspa iñiyninkupi allin kasqankuwan. Casarasqa kasqankumantapacham sapa punchaw Bibliata kuskanku leeqku.

Kay iñiqmasinchikqa reqsiqninkunapaqmi karqa allin consejaq, allin tanteaq, kuyapayakuq hinaspa Bibliapa nisqanman hina imatapas ruraq. Chaymantapas payqa karqa ancha llamkaq, kuyakuywan kamachiq hinaspa sumaq amigom. Rimasqankuna, yachachikuyninkuna hinaspa Diosta mañakuyninkunam qawachirqa cheqap yachachikuyta kuyasqantawan Dioswan sumaq amistad kasqantapas.

Anchatamá llakikusun John Barr iñiqmasinchikmantaqa. Ichaqa kusikunchikmi hanaq pachapi wiña-wiñay kawsayta chaskisqanmanta, chaytaqa anchatapunim suyarqa, rimasqanpipas chaymantam rimarqa. Chaytam anchatapuni munarqa (1 Cor. 15:53, 54). *

[Willakuy]