¿Pitataq anchatapuni chaninchanki?

“Qamllamá kanki kay pachapa altonpi Kamachiqqa.” (SAL. 83:18, NM.)

1, 2. ¿Imanasqataq mana Diospa sutillantachu yachana salvakunapaqqa?

YAQACHÁ Diospa sutintaqa chayllaraq yacharurqanchik pipas Bibliapi qawaykachiwaptinchik. Hinaspachá admirakurqanchik kikinchikpuni Bibliapi tariruspa. Chaymantapacham Bibliataqa servichikurqanchik runakuna Jehová Diosta reqsinankupaq (Rom. 10:12, 13, NM).

² Diospa sutinta yachayninchik ancha allin kaptinpas, manam chayraykullachu salvakusunqa. Qawasun imatawanmi salmos qellqaq nirqa: “Qamllamá kanki kay pachapa altonpi Kamachiqqa”, nispa. Arí, Diosmi pimantapas aswan allinqa. Tukuy imata Unanchasqanraykum payqa munan lliwpi kasukunanchikta (Apo. 4:11). Chaymi allin kanman kayna tapukuyninchik: “¿Pitataq anchatapuni ñoqaqa chaninchani?”, nispa. Ancha allinmi kay tapukuymanta sapakama yuyaymanayninchikqa.

Diospa kamachikuynin iskayrayachisqa kasqanmanta

3, 4. ¿Imakunata nispanmi Satanasqa Evata engañarurqa?

³ Ñawpaq parrafopi tapukuy ancha allin kasqanmi qawakun Eden huertapi imakuna pasasqanpi. Chay huertapim Diosta qepanchaq angel, Evata hikutarqa Diospa kamachikuyninmantaqa kikinpa munasqanpi piensananpaq (Gen. 2:17; 2 Cor. 11:3). Evaqa mana mikuna ruruta mikuruspanmi qawachirqa Jehová Diospa Llapallan Kamachiq kasqanta mana respetasqanta. Manam qawachirqachu Diosta anchatapuni chaninchasqantaqa. Ichaqa, ¿imakunata nispanmi Satanasqa Evata engañarurqa?

⁴ Satanasqa sacrellawanñam Evata rimapayarqa (leey Genesis 3:1-5). Puntataqa, Evawan rimaspanqa Satanasqa manam Jehová Diospa sutintaqa rimarqachu, aswanqa ‘Dios’ nispallanmi nirqa. Ichaqa hebreo rimaypi qellqakusqan Diospa Palabranpiqa, Genesis librota qellqaqqa 3 kaq capitulonpa qallariyninpim Diospa sutinta churarqa. Chaymantapas, Satanasqa Diospa ima ‘nisqanmantam’ tapurqa, manam ima ‘kamachikuy’ qosqanmantachu (Gen. 2:16). Yaqachusmi chaynata nispan Satanasqa Diospa kamachisqanta mana kamachikuyta hina qawachiyta munarqa. Chaymantañataq, Evallawan rimachkaspanpas Satanasqa nirqam ‘Diosqa nisurqankichik’ nispa, yaqa iskaywanpas rimachkanman hina. Chaynata nispanqa yaqapaschá Evataqa allinta sientechichkarqa qosanpa rantinpi kasqanta qawachispan. Imayna kaptinpas, Evaqa qosanpa rantinpi rimaspanmi nirqa: “Huertapi sachakunapa ruruntaqa mikunikum”, nispan.

5. a) ¿Imapi llumpayta piensananpaqmi Satanasqa Evata umacharurqa? b) ¿Imatam Evaqa qawachirqa mana mikunanku ruruta mikuruspan?

⁵ Satanasqa manataqmi imam kaqtachu rimarqa. Aswanmi Diospa nisqanta kaynanpataña nirqa: “Huertapi llapa sachakunapa ruruntaqa amam mikunkichikchu” nispa, kaynata nispanmi Satanasqa Adantawan Evata piensachirqa Jehová Dios mana allin kasqanta. Hinaspam Evata umacharurqa kikinpi hinaspa imayna aswan allin kananmanta piensananpaq chaynataq ‘Dios hina’ kayta atinanmantapas. Hinaspanmi Jehová Dioswan amistadninpi piensachinanmantaqa, Satanasqa  atirurqa sachapa rurunpi llumpayta Eva piensananpaq (leey Genesis 3:6). Chaymi Evaqa sachapa rurunta mikuruspan qawachirqa Jehová Diosta mana ancha chaninchasqanta.

Jobpa tiemponpi runakunapa contranpi Satanas rimasqanmanta

6. ¿Imatam Satanasqa Jobmanta rimarqa, hinaspa imatam Jobqa qawachiyta atinman karqa?

⁶ Tiempopa risqanman hinam, Diosman sonqo Jobqa qawachirqa vidanpi pita astawan chaninchasqanmanta. Allin runa kasqanmanta Jehová Dios rimaptinmi, Satanasqa nirqa: “Jobqariki adorasuchkanki manam debaldellachu”, nispa (leey Job 1:7-10). Qawasqanchikman hinaqa, Satanasqa manam allin ruraq kasqantachu iskayrayachirqa, aswanmi imarayku Dios servisqanta. Mana musyayllam Jobta tumparqa tukuy kapuqniyoq kasqanraykulla servisqanta, manam kuyasqanraykuchu. ¿Pillataq qawachinman karqa Satanaspa rimasqan llulla kasqanta? Chaytaqa qawachinman karqa Jobllam.

7, 8. ¿Ima ñakariykunapim Jobqa tarikurqa, hinaspa imatam qawachirqa Diosman sonqo kasqanwan?

⁷ Jehová Diosmi Satanasta saqerqa qatinasninpi ñakariykunawan Jobta sasachananpaq (Job 1:12-19). ¿Imatam Jobqa nirqa chayna ñakariykunapi tarikuspan? Bibliam nin: “Jobqa manam huchallikurqachu, manataqmi chaykunamantaqa Diosmanchu culparqa”, nispa (Job 1:22). Chaywanpas Satanasqa manamá upallarurqachu, nirqaraqmi: “Qararayku qara, vidanraykum runaqa tukuy ima kapuqnintapas qonman”, nispa (Job 2:4). * Chaynata nispanmi Satanasqa nichkarqa aychanpi Job nanayta chaskispan rurasqankunawan Diosta mana chaninchananmanta.

⁸ Jobqa millakuypaq onqoywan ñakarispanmi mana reqsinapaq hina rikurirurqa. Señoranpas nirqam: “¡Diosta ñakaspaykiyá wañuy!”, nispa. Kimsa amistadnin tukuqkunapas mana allin ruraq kasqanmantam tumparqaku (Job 2:11-13; 8:2-6; 22:2, 3). Chayna ñakariykunapi tarikuspanpas Jobqa hinallam Diosman sonqo karqa (leey Job 2:9, 10). Aguantasqanwan hinaspa Diosman sonqo kasqanwanmi qawachirqa Jehová Diosta anchatapuni chaninchasqanta. Qawachirqataqmi runakuna pantaq kaspankupas, Satanaspa llulla kasqanta qawachiy atisqankuta (tupachiy Proverbios 27:11).

Wañukunankama Jesuspa Diosman sonqo kasqanmanta

9. a) ¿Imaynatam Satanasqa Jesuspa yarqaywan kasqanta servichikurqa tentananpaq? b) ¿Imatam Jesusqa rurarqa?

⁹ Jesus bautizakuruptillanmi Satanasqa hikutarqa kikillanpi piensananpaq hinaspa Diosta mana chaninchanapaq. Diablom  kimsakama tentarqa. Puntataqa Jesus yarqaywan kasqanta qawaspanmi nirqa rumikunata tantayachinanpaq (Mat. 4:2, 3). Yuyarisun, Jesucristoqa 40 punchawñam mana mikusqanrayku llumpay yarqaywan kachkarqa. ¿Imatam Jesucristoqa rurarqa atiyninta servichikunanpaq Diablo niptin? Evamantaqa Jesusqa chayllam qepancharurqa hinaspam Diospa Palabran ima nisqanpi repararqa (leey Mateo 4:4).

10. ¿Imanasqataq Satanasqa Jesusta nirqa templopa hawanmanta pawaykunanpaq?

¹⁰ Satanasqa munarqataqmi Jesus kikillanpi piensananta, chaymi nirqa templopa hawanmanta pawaykunanpaq (Mat. 4:5, 6). ¿Imatam chaywanqa Satanasqa munarqa? Diabloqa nirqam pawaykuspan mana imanakuptinqa “Diospa Churin” kasqanta Jesus qawachinanmanta. Chaywanqa munachkarqam kikillanpi piensaspan admirakuypaq kaqta rurananpaq. Satanasqa yacharqam runakuna qari tukuspanku otaq penqaypi mana qepanankurayku vidankuta peligropi churasqankuta. Diospa Palabranta servichikuspanraqmi Satanasqa Jesusta pantarachiyta munarqa, Jesusmi ichaqa Diospa Palabranta alli-allin reqsisqanta qawachirqa (leey Mateo 4:7). Satanaspa nisqankunata qepanchaspanmi Jesucristoqa qawachirqa Jehová Diosta anchatapuni chaninchasqanta.

11. ¿Imanasqataq Jesusqa Satanaspa munachisqanta qepancharurqa?

¹¹ Chaymantapas Satanasqa Jesucristota hikutayta munaspanmi, kay pachapi llapallan nacionkunata munachirqa (Mat. 4:8, 9). Paymi ichaqa mana iskayrayaspan chaylla qepancharurqa, Jesusqa yacharqam Satanaspa munachisqanta chaskispanqa Diospa Llapallan Kamachiq kasqanta qepancharunanmanta (leey Mateo 4:10). Arí, Jesusqa sapa tentasqa kasqanpim hebreo rimaypi Diospa Palabranpa nisqanman hina Diospa sutinta rimaspan kutichirqa.

12. ¿Ima hatun sasachakuypim Jesusqa tarikurqa, hinaspa imatam paymanta yachachwan?

¹² Wañukunan punchaw hichpallaña kachkaptinmi, Jesusqa hatun sasachakuypi tarikurqa. Achka kutipim rimarqaña runakunapa rantinpi wañunanmanta (Mat. 20:17-19, 28; Luc. 12:50; Juan 16:28). Yacharqataqmi judiokunapa  leyninkuman hina wañuchisqa kananmanta hinaspa Diosta kamisqanmanta tumpaspanku wañuchinankumantapas. Kayna wañunanmanta yachasqanmi llumpayta hukmanyachirqa. Chaymi Diosta mañakurqa: “Taytáy, atina kaptinqa ñoqamantayá asurichiy kay ñakariyta”, nispa. Nirqataqmi: “Ichaqa amayá ñoqapa munasqaychu kachun aswanqa qampa munasqaykiyá”, nispan (Mat. 26:39). Arí, Jesusqa wañunankama Diosman sonqo kasqanwanmi qawachirqa Taytanta anchatapuni chaninchasqanta.

Ñoqanchik ima rurananchikmanta

13. ¿Imakunatam yacharunchik Evamanta, Jobmanta hinaspa Jesucristomanta?

¹³ ¿Imakunatam qawamusqanchikmanta yacharunchik? Evamanta qawamusqanchikmi yachachiwanchik hatun tukuspa munasqallanchikta maskaspaqa, qawachichkanchikmi Jehová Diosta mana ancha chaninchasqanchikta. Diosman sonqo Jobmi ichaqa qawachiwanchik, pantaq kaspanchikpas ñakariykuna imanasqa kasqanmanta mana yachaspapas aguantay atisqanchikmanta. Chayna kaspanchikmi qawachinchik Jehová Diosta anchata chaninchasqanchikta (Sant. 5:11). Jesuspa imayna kasqanpas yanapawanchikmi penqaypi tarikuyta mana manchakunapaq hinaspa mana llumpayta kikillanchikpi piensanapaqpas (Heb. 12:2). Hinaptinqa, ¿imatam paykunamanta yachachwan?

14, 15. ¿Imapim mana chaynallachu Evapa rurasqan Jesuspa rurasqanwan tentasqa kaptinku, hinaspa imaynatam Jesusta qatipakuchwan? (Rimariy 18 paginapi dibujomanta.)

¹⁴ Amayá Jehová Diostaqa qonqasunchu tentacionkunapi kaspaqa. Evaqa Satanaspa nisqankunawan hinaspa munachisqanwanmi aysachikurqa. Evaqa qawarqam sachapa rurun “mikunapaq allin sacha kasqanta, qawarqataqmi sumaqllaña kasqantapas” (Gen. 3:6). ¡Jesusmi ichaqa tentasqa kaspan mana chaynachu karqa! Sapa tentasqa kasqanpim Jesusqa yuyaymanarqa rurasqan imapi tukunanmanta. Hapipakurqataqmi Diospa Palabranpi hinaspam Diospa sutinta rimarqa.

¹⁵ ¿Imatam rurananchik mana allinkunata ruranapaq tentasqa kaspanchikqa? Chay mana allinkunapi astawan piensaspaqa astawanmi rurayta munasun (Sant. 1:14, 15). Chaymi imatapas rurananchik sonqonchikmanta chay mana allin munaykunata horqonanchikpaq, cuerponchikpa mayqen partentapas qoruruchkachwanpas hina (Mat. 5:29, 30). Jesus hinam piensananchik rurasqanchikkuna imapi tukunanmanta hinaspa Dioswan amistadninchik imayna qepananmantapas. Yuyarinanchiktaqmi chaykunamanta Bibliapa ima yachachisqantapas. Chayta ruraspallam qawachisun Jehová Diosta anchatapuni chaninchasqanchikta.

16-18. a) ¿Imakunam sinchita ñakarichiwachwan? b) ¿Imam yanapawasun ñakariykunata aguantanapaq?

¹⁶ Amayá Jehová Dioswanqa piñakurusunchu ñakariykunapi tarikuspaqa (Pro. 19:3). Mana allinkunapa tukupaynin hichpallapiña kasqanrayku aswan ñakariykuna kaptinmi, Diospa serviqninkunaqa hukmanyasqa tarikunchik. Kunan tiempopiqa manamá Diosqa milagrokunata ruraspanqa waqaychawasunchu. Job hinam ancha llakipi tarikunchik pi ayllunchikpas wañukuptin otaq hatun sasachakuykunapi tarikuspanchikpas.

¹⁷ Jobqa manamá yacharqachu imanasqa ñakarinanpaq Dios saqesqantaqa. Chaynallataqmi ñoqanchikpas wakinpiqa mana yachanchikchu imanasqa wakin ñakariykuna kasqantaqa. Ichapas uyarisun wakin iñiqmasinchikkuna terremoto kaptin wañusqankumanta, Haití nacionpi pasasqanman hina. Uyarichwantaqmi Diosman sonqo huk iñiqmasinchikta maqarusqankumanta otaq hatun desgraciapi wañukusqanmanta. Ichapas yanqamanta hina ñoqanchikpas ima ñakariykunapi kachkanchik, hinaspa hukmanyasqa tarikuspa ninchik: “¿Imanasqamá Taytallay ñoqataqa pasawan? ¿Ima mana allintataq  rurarullani?”, nispa (Hab. 1:2, 3). ¿Imataq yanapawachwan chayna sasachakuypi tarikuptinchik?

¹⁸ Manam piensananchikchu pipas chayna ñakariykunapi tarikuptin Dios castigasqantaqa. Chayna piensay mana allin kasqantam Jesusqa qawachirqa tiemponpi iskay desgraciakuna pasakusqanmanta rimaspan (leey Lucas 13:1-5). Achka ñakariykunam kan ‘qonqayllamanta imapas pasakusqanrayku’ (Ecl. 9:11, NM). Imaraykuña ñakarispanchikpas atichwanmi ‘sinchi kallpanchaqninchik Diospi’ hapipakuspa aguantaytaqa, Diosninchikmi kallpata qowanchik payman sonqo kanapaq (2 Cor. 1:3-6).

19, 20. ¿Imam Jesusta yanaparqa penqaykunata atipananpaq hinaspa imataq ñoqanchiktapas yanapawasun?

¹⁹ Amayá penqaypi tarikuyta manchakuywanqa harkachikusunchu. Jesusmi humillakuspan “menoschakururqa sirviente hinaña kananpaq” (Fili. 2:5-8). Penqaypi churasqankutam Jesusqa atiparqa kuyakuq Taytanpi hapipakusqanrayku (1 Ped. 2:23, 24). Chaynata ruraspanmi Diospa munayninta puntapi churarqa, hinaspam hanaq pachapi hatunchasqa karqa (Fili. 2:9). Chayna rurananchiktam Jesusqa niwanchik (Mat. 23:11, 12; Luc. 9:26).

²⁰ Wakinpiqa ñoqanchikpas penqaypi churasqam kanchik. Ichaqa Pablo hinam ñoqanchikpas kananchik, nirqam: “Chayraykum kaynataña ñakarini, aswanqa piman iñisqayta yachakuspaymi mana penqakunichu. Payqa atiyniyoq kasqanraykum Jesucristo kutimunankama waqaychaykunqa payman qosqay almallayta”, nispa (2 Tim. 1:12).

21. Kikillankupi piensaq runakunapa chawpinpi kaspanchikpas, ¿imaynam kananchik?

²¹ Kay tiemponchikmantam Biblia nirqa: “Runakunam kanqaku kikillanpaq munaqkuna”, nispa (2 Tim. 3:2). Chaychiki kikillankupi piensaq runakunapa chawpinpi tarikunchik. Amayá paykunapa imayna kasqankutaqa qatipakusunchu. Aswanqa tentacionkunapi, desgraciakunapi otaq penqachisqa kaspanchikpas qawachisunyá Jehová Diosta anchatapuni chaninchasqanchikta.

[Willakuy]

Imatam yacharunchik:

• Evata imayna Satanas engañarusqanmanta.

• Ñakariykunapi Job tarikuspan imayna kasqanmanta.

• Jesuspa imata puntapi churasqanmanta.

[Kay yachachikuypa tapukuyninkuna]

[17 kaq paginapi dibujo]

Evaqa manam chanincharqachu Dioswan amistadnintaqa

[18 kaq paginapi dibujo]

Satanaspa tentasqantam Jesusqa atiparqa hinaspam Diospa munayninta rurananpaq kallpanchakurqa

[20 kaq paginapi fotokuna]

Haití nacionpi terremoto pasasqan qepatam carpakunapi predicachkanku

Ñakariykunapi tarikuspanchikqa ‘sinchi kallpanchaqninchik Diospi’ hapipakusun