“Qamkuna ukupi llamkaqkunapaqyá kachun reqsikuynikichik”

“Qamkuna ukupi llamkaqkunapaqyá kachun reqsikuynikichik, paykunaqariki Señorpa rantinpim kamachisuchkankichik hinaspa consejasuchkankichik.” (1 TES. 5:12.)

1, 2. a) ¿Imaynam tarikurqaku Tesalonica lawpi iñiqkuna punta kaq cartanta Pablo apachiptin? b) ¿Imatam paykunaman nirqa?

PUNTA pachak wataman kutirisun. Piensasun Tesalonica congregacionpi kasqanchikta. Pabloqa iñiqmasinkunata kallpanchaspam unay tiempo paykunawan karqa. Yaqachusmi huk lawkunapi hina Diospa ovejankunata michinankupaq ancianokunata akllarqa (Hech. 14:23). Ichaqa congregacion kachkaptinñam Pablotawan Silasta chay llaqtamanta qarqonankupaq, judiokuna runakunata umacharqaku. Tesalonicapi qepaq iñiqkunaqa saqesqa hinachá karqaku hinaspa mancharisqallaña.

² Pabloqa llakisqachá tarikurqa chayllaraq qallarichisqan congregacionmanta. Payqa chay lawman kutiytam munarqa, ichaqa ‘Satanasmi harkarurqa’. Hinaptinmi Timoteota kacharqa iñiqkunata kallpanchananpaq (1 Tes. 2:18; 3:2). Kutiramuspanñataqmi allin kasqankumanta willakurqa, hinaptinmi Pabloqa kallpanchaq cartata apachirqa. Chay cartasqanpim kaynata nirqa: “Qamkuna ukupi llamkaqkunapaqyá kachun reqsikuynikichik”, nispa (leey 1 Tesalonicenses 5:12, 13).

3. ¿Imanasqataq Tesalonica lawpi ancianokunata ‘sinchita kuyananku’ karqa?

³ Tesalonicapi ancianokunaqa manam Pablowan yanapaqninkuna hinachu experienciayoq karqaku, nitaq Jerusalenpi ancianokuna hina unayraqchu karqaku. Imayna kaptinpas chayraqmi chay congregacionqa qallarichkarqa. Ichaqa Pablom 3 razonkunata  qorqa ancianonkunawan agradecesqa kanankupaq, nirqam: ‘[Paykunatayá] reqsikuychik, paykunaqariki Señorpa rantinpim kamachisuchkankichik hinaspa consejasuchkankichik’, nispa. Kaywanqa nichkarqam ‘sinchita kuyanankupaq’. Tukunanpaqñataqmi nirqa: “Qamkunapurapas hawkalla kawsakuychik”, nispa. Tesalonicapi kaspaykiqa, ¿chaninchawaqchu karqa ancianokunapa rurasqankuta? Chaynaqa, ¿congregacionnikipi ancianokunata chaninchankichu? ¿Cristontakama ‘regalokunata runakunapi’ Diospa qosqanta hinachu qawanki? (Efe. 4:8, NM.)

Sinchita ‘llamkanku’

4, 5. ¿Imanasqam Pabloqa nirqa chay tiempopi ancianokuna sinchi llamkasqankumanta, hinaspa imanasqam nichwan kunanpas chayna rurasqankuta?

⁴ Qawamusqanchikman hinaqa, ¿imatataq ancianokunaqa rurachkarqaku Pablowan Silas Tesalonicamanta Berea llaqtaman ripukuptinku? Sinchitam llamkachkarqaku. Paykunaqa Pablopa rurasqanman hinam kallpanchakurqaku iñiqmasinkuta Diospa Palabranwan yachachinankupaq. Bibliaqa niwanchik “Berea llaqtapi kaq judiokunam Tesalonicapi kaqkunamantapas [. . .] gustollawanña Diospa palabranta uyarispanku sapa punchaw Bibliata estudiarqaku” (Hech. 17:11). ¿Nichkarqachu chaywanqa Tesalonicapi cristianokuna Diospa Palabranta mana chaninchasqankuta? Manam, kaypiqa Tesalonicapi iñiqmasinkunamantachuqaya rimachkarqa aswanqa chaypi kaq yaqa lliw judiokunamantam. Pablom paykunamanta nirqa: ‘Diospa palabrantaqa chaskirqankichik [. . .] manam runapa rimasqanta hinallachu aswanqa Diospa cheqap palabranta hinam’, nispa (1 Tes. 2:13). Ancianokunaqa anchatachá llamkarqaku iñiqmasinkunata yachachinankupaq.

⁵ Kunanpas ‘allin yuyayniyoq confianza sirvienteqa’ Diospa ovejankunatam ‘horallanpi mikuchin’ (Mat. 24:45). Achka rimaykunapim Bibliamanta qellqakunata ruranku hinaspa kay yanapakuykunatapas: Índice de las publicaciones Watch Tower hinaspa Watchtower Library niqtapas. Paykunapa yanapakuyninwanmi ancianokunapas iñiqmasinkuta iñiyninpi yanapanankupaq sinchita llamkanku. Yanapanankupaqmi unay tiempota servichikunku kallpanchaq discursokunata ruranankupaq. Wakinkuqa akllasqataqmi kanku asambleakunapi yachachinankupaq. ¿Yaqachu haykallapipas piensarqanchik hayka tiempota chaypaq servichikusqankuta?

6, 7. a) ¿Imayna kanankupaqmi Tesalonicapi ancianokunata Pablo yachachirqa? b) ¿Imanasqam ancianokuna sasachakunku Pablota qatipakunankupaq?

⁶ Diospa ovejankunata michispankum Tesalonicapi kaq ancianokunaqa Pablota qatipakurqaku. Payqa manam cumplinallanpaqchu iñiqmasinkunataqa watukurqa. Ñawpaq yachachikuypim qawarqanchik Pabloqa ‘wawankunata uywachkaq mama hina’ iñiqmasinkunata kuyakuywan qawasqanta (leey 1 Tesalonicenses 2:7, 8). Chaymantapas iñiqmasinkunata yanapananpaqmi tukuyta rurarqa. Chaynatamá Tesalonicapi ancianokunapas Diospa ovejankunata michinanku karqa.

⁷ Kunanpas ancianokunaqa Pablo hinam kuyakuywan Diospa ovejankunata michinanku. Wakinkuqa sumaqllatam uyarikunku, wakinkuqa manam, chayna kaptinpas allin michiqqa allin rurasqankunapim reparan (Pro. 16:20). Pantaq kaspankum sasachakunmanku wakin iñiqmasinkupa allin kayninkuta qawanankupaq. Chaywanpas sinchitam kallpanchakunku Jesusta qatipakunankupaq hinaspa lliwta kuyanankupaq. ¿Manachu kallpanchakusqankuta chaninchananchik?

8, 9. ¿Imakunata ruraspankum ancianokunaqa ‘almanchikmanta cuentallikuchkanku’?

⁸ Lliw cristianokunam ancianokunaman ‘sujetakunanku’. ¿Imanasqa? Pablopa nisqanman hina ‘almanchikmanta cuentallikusqankurayku’ (Heb. 13:17). Imaynam michiqkunapas tutapi mana puñuspa uywankunata  qawanku, chaynam ancianokunapas iñiqmasinkunata yanapanankupaq mana allintapas puñunkuchu. Wakinpiqa Comités de Enlace con los Hospitales nisqapi llamkaq ancianokunam tutapipas hatarinku iñiqmasinkuta yanapanankupaq. ¡Maynatam kusikunchik chaylla yanapawaptinchik!

⁹ Yanapananchiktaqmi Salonkuna rurakunanpaq kamachiqkunata hinaspa comités de socorro nisqapi llamkaq ancianokunatapas. Myanmar sutiyoq nacionpi 2008 watapi sinchi wayra-para kaptin imayna yanapakusqankumanta qawasun. Aswan sasachakuypim tarikurqaku Pothigon sutiyoq congregacionpi kaqkuna. Iñiqmasinkuta yanapanankupaqmi purmasqa chaynataq achkallaña wañuqkunapa chawpinta pasarqaku. Punta chayaqkunawanmi tarikurqa ñawpaqpi congregacionninkuta watukuq anciano. Iñiqmasinkuna rikuykuspankum kusisqa kaynata nirqaku: “¡Qawaychik, congregacionkunata watukuq ancianonchikmi! ¡Jehová Diosmi libraykuwanchik!”, nispa. Ñoqanchikpas, ¿paykuna hinachu chaninchanchik tuta-punchaw chayna ancianokunapa sinchi llamkasqankuta? Manataqmi qonqananchikchu pipapas mana yachasqallanta congregacionpi ancianokunapa juzganankupaq rurasqankutaqa (Mat. 6:2-4). Yanapayninta chaskiqkunaqa sonqomantam agradecekunku.

10. ¿Imakunatam pipapas mana yachasqallankuta ancianokuna ruranku?

¹⁰ Achka ancianokunataqmi pipapas mana yachasqallanta llamkanku. Congregacionpi ancianomasinkunawan ruranankupaq yanapaq ancianom sapa semana huñunakuy imayna apakunanpaq ruran. Secretario kaqñataqmi sapa killa chaynataq sapa wata congregacionpa hayka predicasqankuta huñun. Diosmanta Yachachiq Escuelapi ancianoñataqmi pikunaman escuelapi tupasqanta sumaqta akllan. Chaymantapas huk-huk iñiqmasinchikkunam kimsa killamanta qollqe churasqanchikmanta recibokunata qawanku. Chaymantapas lliw ancianokunam, Betel wasimanta carta chaskisqankuta leenanku hinaspa chayman hina imatapas rurananku ‘iñiyninchikpi [. . .] hukllaña kananchikpaq’ (Efe. 4:3, 13). Tukuy chaykuna rurasqankum yanapan imapas ‘respetowan hinaspa ordenninpi’ rurakunanpaq (1 Cor. 14:40).

“Kamachisuchkankichik”

11, 12. ¿Pikunataq congregacionta kamachinku hinaspa imakunam rurayninkuqa?

¹¹ Tesalonicapi iñiqkunaman Pablo cartasqanpim nirqa ancianonkuna ‘kamachiqninku’ kasqankuta. Griego rimaypi chay ninanqa “ñawpaqninkupi sayaymi”, ninantaqmi “umalliq” hinaspa “punta apaq” (1 Tes. 5:12). Kay ancianokunaqa Pablopa rimasqan sinchi ‘llamkaq’ ancianokunallam kanku. Chaynaqa, chay ancianokunam congregacionta kamachinku manam hukllachu. Kunanpas yaqa lliw ancianokunam huñunakuykunapi yachachispanku iñiqmasinkupa ‘ñawpaqninkupi sayanku’. Chaymantapas ñawpaqpi “presidente kaq ancianom” kunanqa sutichakun “congregacionpi ancianomasinkunawan ruranankupaq yanapaq” nisqawan, chaymi qawachiwanchik llapanku chaynalla kasqankuta.

¹² Congregacionpi kamachiq kayqa manam yachachiyllachu. Pablom 1 Timoteo 3:4 nisqanpi qawachin imakunatawan ruranankumanta, nirqam: “Chayna [kamachikuq] runaqa kanan wasinpi kaqkunawan kasuchikuqmi hinaspa churinkunata educaspa paykunawan respetachikuqmi”, nispa. Kaypi nisqanman hinaqa wasinpi kamachiyqa manam churinkuna yachachiyllachu, paykunawanpas ‘respetachikunanmi’ hinaspam lliw familianmanta nanachikunan. Chaynallataqmi ancianokunapas congregacionpi kaqkunamanta nanachikunanku hinaspa yanapananku Diosta kasukunankupaq (1 Tim. 3:5).

13. ¿Imanasqataq ancianokunaqa sasachakunku acuerdoman chayanankupaq?

¹³ Ancianokunam congregacionta allinta kamachinapaqqa qawananku iñiqmasinkuta  imakunapi hinaspa imayna yanapanankumanta. Ichapas tapukunchik, imanasqam huk kaqnin ancianolla imatapas mana tanteanchu nispa. Kay tiempopi ancianokunaqa punta pachak watapi Diospa Llaqtanpi Punta Apaqkunatam qatipakunku. Huñunakuspankum ancianomasinkunapa nisqankuta uyarinku hinaspa Bibliapa nisqantam qawanku iñiqmasinkunata imayna yanapanankupaq. Sapakamam yanapanku chay huñunakuyninku allin kananpaq, ñawpaqmantaraq Bibliata hinaspa confianza sirvientepa nisqankunata qawaspanku. Tukuy kaykunapaqqa tiempochakunankum. Punta pachak watapi señalasqa kanankumanta tanteasqankupi hinam, kunanpas mana chaynallata piensaspankum sasachakunku acuerdoman chayanankupaq. Chayna kaptinqa hinallam chaymanta estudianku, Bibliapa nisqanman hina tanteanankukama (Hech. 15:2, 6, 7, 12-14, 28).

14. ¿Imanasqataq chaninchanchik ancianokunapa huñulla llamkasqankuta?

¹⁴ ¿Imataq pasanman sichu pi ancianopas tanteasqallanta ruranankupaq hikutaptin otaq Diotrefes hina rakinachiyta munaptin? (3 Juan 9, 10.) Lliw iñiqkunatam sasachanman. Punta cristianokunapa hawkalla kasqankuta Satanas sasachasqanman hinam kunanpas chayta rurachkan. ¿Imaynata? Hukkunamanta hatunchakunankupaq tanqaspanmi. Chaymi ancianokunaqa humilde kananku hinaspa kallpanchakunanku huñulla llamkanankupaq. Arí, congregacionmi anchata chaninchan ancianokuna humilde kaspanku yanapanakusqankuta.

“Consejasuchkankichik”

15. ¿Imanasqam ancianokuna iñiqmasinkunata consejan?

¹⁵ Pabloqa ancianokunatam qawachirqa  huk sasa rurayninkumantapas, chayqa: iñiqkunata consejay otaq anyaymi, chay rurayqa allinpaqmi karqa. Griego Rimaypi Qellqasqa Diospa Palabranpiqa Pablollam ‘consejay’ niq rimayta servichikurqa. Kay rimayqa ninantaqmi rimapayay otaq yachachiy, ichaqa chaytaqa rurana mana sientichispallam (Hech. 20:31; 2 Tes. 3:15). Chaymi Pabloqa Corintopi iñiqkunaman kaynata nirqa: “Manam kaykunataqa qellqamuykichik penqachinaypaqchu aswanqa kuyasqay churiykunaman hina consejanaypaqmi”, nispa (1 Cor. 4:14). Qawasqanchikman hinaqa, Pablom iñiqmasinkunata consejarqa kuyasqanrayku hinaspa allinninkuta munaspan.

16. ¿Imatam ancianokunaqa yuyarinanku iñiqmasinkuta anyaspanku?

¹⁶ Ancianokuna pitapas anyaspaqa sumaqllatam rurananku. Pablo hinam kuyakuywan, llakipayakuywan hinaspa allinninpaq consejananku (leey 1 Tesalonicenses 2:11, 12). Chaymantapas “payqa waqaychananmi chaskisqa cheqap yachachikuykunatapas chaynapi wakinkunatapas allin kaqkunata yachachispa kallpanchananpaq” (Tito 1:5-9).

17, 18. ¿Imatam yuyarinanchik ancianokuna anyawaptinchikqa?

¹⁷ Ancianokunaqa pantaq kasqankutam yachanku, chaymi wakinpiqa rimasqankumanta ñakakunku (1 Rey. 8:46; Sant. 3:8). Yachankutaqmi pipaqpas anyasqa kayqa ‘mana gustonpaq’ kasqanta ‘aswanqa llakikunanpaqmi’ (Heb. 12:11). Chaymi yuyaymanaspa Diosta mañakunku manaraq pitapas anyachkaspa. Pi ancianopas anyawaptinchikqa allinninchikpaq kasqantam qawananchik.

¹⁸ Piensarisun mana reqsisqa onqoywan kasqanchikta. Imawan onqosqanchikta yachaq doctortam tariruchwan ichaqa willawasqanchikmi mana kusikuypaqchu. ¿Piñakusunchu paypaq? Manamá. ¿Sichu allinyanapaq operakunaykim niwaptinchikqa? Allinninchikpaq kasqanta yachaspanchikqa operachikusunpaschá. ¿Hukmanyaruchwanchu nanay simiwan niwaptinchik? Qallariypiqa yaqapaschá, ichaqa manam chayraykuchu saqenchik hampiwananchiktaqa. Chaynallataqmi ancianokuna consejawaptinchikpas, manam uyariytaqa saqerunachu imayna niwasqanchikraykuqa. Yuyarinanchikmi Jehová Dioswan Jesus iñiyninchikpi yanapawananchikpaq paykunata servichikusqankuta.

Ancianokunaqa Diospa regalonmi

19, 20. ¿Imaynatam ‘regalokunata runakunapi’ Diospa qowasqanchikta chaninchanchik?

¹⁹ Pipas huk regalota qowaptinchikqa, ¿imaynatam chaninchasqanchikta qawachichwan? Servichikuspanchikmi. Jehová Diosqa Churintakamam ‘regalokunata runakunapi qowanchik’, paykunaqa ancianokunam. ¿Imaynatam chaninchasqanchikta qawachinchik? Huñunakuykunapi yachachiwasqanchikta sumaqta uyarispa hinaspa nisqankuta kasukuspa, rimarinanchikpaq niwaptinchik chaylla kutichispa. Hinaspa predicaypi chaynataq congregacionpi ima ruraykunapipas yanapaspa. Chaymantapas consejawasqanchik imayna yanapawasqanchikmanta willakuspa. Ayllunkunatapas agradecekunchikmi paykunawan kanan tiempota ñoqanchikpaq servichikusqankumanta.

²⁰ ¡Kusisqamá tarikunchik sinchita llamkaq, kamachiq hinaspa consejaq ancianokuna kapuwasqanchikmanta! Arí, paykunaqa Jehová Diospa sumaq regalokuna qowasqanchikmi.

¿Yuyachkankichu?

• ¿Imanasqataq Tesalonicapi iñiqkuna michiqninkuta reqsikunanku karqa?

• ¿Ima ruraykunapim ancianokunaqa sinchita llamkanku?

• ¿Imaynatam yanapawanchik ancianokunapa kamachiwasqanchikqa?

• ¿Imatam yuyarina ancianokuna consejawaptinchik otaq anyawaptinchik?

[Kay yachachikuypa tapukuyninkuna]

[27 kaq paginapi dibujo]

¿Chaninchanchikchu congregacionpi ancianokunapa tukuy ima rurasqankuta?