Ingles rimaypi chaylla entiendenapaq Llaqta Cuidaq

ANCHA kusikuywanmi willamuykiku kay killamantapacha hinaspa huk watakamalla, lloqsimunqa ingles rimaypi chaylla entiendenapaq mosoq Llaqta Cuidaq qellqa. Huñunakuykunapi estudianapaq yachachikuykunaqa kanqam, haypasqanman hinaqa kanqataqmi wakin yachachikuykunapas. ¿Imapaqmi kanqa ingles rimaypi kay mosoq revistaqa? Achka cristianokunatam yanapanqa Jehová Diosmanta allinta yachanankupaq.

Fiji, Ghana, Kenia, Liberia, Nigeria, Papúa Nueva Guinea hinaspa islas Salomón nisqa nacionkunapim ingles rimayta astawan rimanku. Kay rimaytam iñiqmasinchikkunaqa huñunakuykunapi hinaspa predicayninkupi rimanku, wasinkupi mana chayta rimaspankupas. Ichaqa ñawpaqmantaraq chaskisqanku ingles rimaypi qellqakunaqa, sasa entiendenapaqmi paykunapaqa. Chaymantapas achka iñiqmasinchikkunam ingles rimayniyoq nacionpi yachanku inglesta mana allinta rimaspankupas. Wakinkuqa rimasqanku idiomapi huñunakuytapas manam atinkuchu.

Yachasqanchikman hinam, huñunakuypi estudianapaq Llaqta Cuidaq qellqantakamam tiempollanpi chaskinchik allin yachachikuykunata. Chaymi ingles rimayniyoq iñiqmasinchikkuna allinta entiendenankupaq chaskinqaku facil rimayllapi ingles rimaypi mosoq qellqata. Qaranqa manam hina kaqllachu kanqa, ichaqa ukunpi tarikuq: parrafonkuna, tapukuykuna, dibujonkuna hinaspa wakiqninkunapas hina kaqllam kanqa. Hinaptinmi sapakama mayqentapas huñunakuypi servichikunmanku. ¿Munawaqchu qawayta imayna kasqanmanta? Ura patanpim kachkan punta yachachikuypa iskay kaq parrafon imayna tikrakusqanmanta.

Achka iñiqmasinchikkunam Jehová Diosta kaynata mañakurqaku: ‘Kamachisqaykikunata entiendechiway’, nispa (Sal. 119:73). Chaypaqmi kay mosoq qellqa allintapuni yanapanqa. allintachá mozo-sipaskuna hinaspa inglesta mana allinta rimaqkunapas Llaqta Cuidaq qellqata sapa semana huñunakuypi estudianankupaq preparakunqaku. ¡Anchatamá Jehová Dios agradecekuykiku lliw serviqnikikunata kuyasqaykimanta hinaspa ‘confianza sirvientewan’ sumaqta yachachiwasqaykikumantapas! (1 Ped. 2:17; Mat. 24:45.)

Diospa Llaqtanpi Punta Apaqkuna