Leeqkunapa tapukuyninkuna

¿Yachanchikchu Hebreo Rimaypi Qellqasqa Diospa Palabranpi hayka willakuykuna Jesucristopi cumplikusqanta?

Hebreo Rimaypi Qellqasqa Diospa Palabranta allinta estudiaspaqa, tarisunchikmi Jesucristopi achka willakuykuna cumplikusqanta. Kay willakuykunam nirqa maypi nacenanmanta, haykapi Cristo hina rikurimunanmanta, imakuna rurananmanta, imayna wañunanmanta hinaspa Jehová Diospa munaynin cumplikunanpaq ima rurayniyoq kananmantapas. Lliw kay willakuykunam allintapuni qawachiwanchik Jesus Mesias kasqanta. Ichaqa, Jesucristopi hayka willakuykuna cumplikusqanta yachanapaqqa allintam tanteananchik.

Mesiasmanta willakuykuna hayka kasqanmantaqa manam lliwchu acuerdopi kanku. Comentario bíblico histórico nisqanpim Alfred Edersheim runa nirqa ñawpaq judiokunapa qellqasqankupi Mesiasmanta 456 willakuykuna Hebreo Rimaypi Qellqasqa Diospa Palabranpi kasqanta. Ichaqa kay 456 willakuykunamanta allinta yachaspaqa, manamá wakinqa sutillatachu Cristomanta rimachkan. Edersheim runapa nisqanman hinam, judiokunaqa piensarqaku Genesis 8:11 nisqanpi willakuyqa Mesiasmanta rimasqanta. Nirqakum “aceitunas sachapa rapinta [buqueman] palomapa apamusqan Mesiaspa orqonmanta apamusqa kasqanta”. Payqa nintaqmi Exodo 12:42 willakuymanta judiokuna pantasqankuta, kaynatam judiokuna nirqaku: “Imaynam Moisespas chunniqmanta lloqsimurqa, chaynallataqmi Mesiaspas Romamanta lloqsimunqa”, nispa. Arí, estudioyoq runakuna hinaspa Biblia leeqkunapas cuentatam qokunku chay textokuna Jesucristomanta mana rimasqanta.

Bibliapi willakuykuna Jesucristopi cumplikusqanta yupaspapas, sasamá hayka kasqanta yachayqa. Chaypaq qawasun Isaiaspa 53 capitulonta. 2-7 versiculokunapim Mesiasmanta kaynata willakun: “Manam karqachu allin rikchayninqa [. . .]. Runakunam payta despreciarqa. Paykunam payta wischupakurqa [. . .]. Cheqaptapunipas ñakariyninchikkunawanmi ñakarichkarqa. [. . .] Tuksipasqam karqa mana kasukusqanchikkunarayku [. . .]. Nakanankupaq carnerota hina pusaptinkum mana rimarirqachu”, nispa. Chaynaqa, kay capitulopi lliw willakuykunata huk willakuyllata hinachu yupana icha achkata hinachu.

Piensasuntaq Isaias 11:1 kayna willakusqanpipas: “Kuchusqa sachapa kullunmanta ikllimuchkaq hinam runa nacemunqa. Sachapa sapinmanta wiñamuchkaq hinam Isai castamanta nacemunqa”, nispa. 10 versiculopipas chayna kaqlla willakuymi kan. Hinaptinqa, ¿kay iskay versiculokunapi willakuytaqa sapakamatachu yupana icha chullalla willakuyta hinachu? Isaiaspa 53 hinaspa 11 capitulonkuna imayna yupasqa kaspanpas, Mesiasmanta rimaq willakuykunapim kachkan.

Chaynaqa, manamá llumpaytaqa reparanachu Hebreo Rimaypi Qellqasqa Diospa Palabranpi hayka willakuykuna Jesucristopi cumplikusqantaqa. Diospa llaqtanqa achka kutipim chay willakuykunamanta hinaspa imayna cumplikusqanmanta qellqankunapi horqomurqa. * Kaykunam allinta yanapawachwan predicayninchikpi hinaspa sapallanchikpi otaq familianchikwan estudianapaqpas. Chaymantapas kay willakuykuna haykaña kaspanpas allintam qawachiwanchik Jesus Mesias kasqanta.

[Willakuy]