Biblia leesqaymi anchata kallpanchawarqa

Kaytam willakun Marceau Leroy

CUARTOYPI mana pipapas rikuwasqanpim kayna niqta leerqani: ‘Tukuy imapa qallariyninpim cielokunata hinaspa kay pachata Dios unancharqa’ nisqanta. ¿Imanasqataq pakakuspallay leerqani? Taytaymi Diospi mana creeqchu, yacharqanim Biblia leeqta tariwaspan imakunatapas niwananmanta.

Manamá haykapipas Bibliataqa leerqanichu, chaymi Genesis libropa punta kaq versiculopa nisqanta chayllaraq leespay admirakururqani. Yuyachkanim kayna nisqayta: “¡Kunanqa chayllaraqmi yachani imanasqa imapas maypi churasqa kasqanta!”, nispa. Llumpay kusisqa tarikuspaymi tutapi pusaq kaq horamanta tawa kaq madrugawkama mana samaspay Bibliata leerqani. Chay punchawmanta kunankamam Biblia leeyqa anchata kallpanchawan. Imanasqa chayna nisqaymanta willasqaykichik.

“Sapa punchawmi leenayki”

1926 watapim Francia nacionpa Vermelles sutiyoq llaqtapi nacerqani, chaypiqa carbonmanta minam tarikun. Enteron Pachapi iskay kaq guerra tiempopim nacionniykupaq carbonqa ancha valorniyoq karqa, chaymi ñoqa hina kaq minerokunaqa mana hikutasqaqa karqanikuchu soldado kanaykupaq. Allinta kawsanayraykum radio electrónica hinaspa electricidad nisqata estudiarqani. 21 wataypi kachkaptiymi huk estudiaqmasiy Bibliata qowarqa, hinaspam niwarqa: “Kay libroqa ancha allinmi”, nispa. Leeyta tukuruspaymi convencesqa tarikurqani Diospa Palabran runakunapaq ancha allin kasqanmanta.

Piensarqanim vecinoykunapas Bibliayoq kay munasqankumanta, chaymi pusaqta aparqani. Ichaqa piñakuspankum tukuyta niwarqaku. Layqakunapi creeq wakin aylluykunapas niwarqam: “Qallarispaykiqa, sapa punchawmi leenayki”, nispa. ¡Chaynatamá rurarqani! Tukuy kay watakunapiqa manam haykapipas leeytaqa saqerqanichu, chayna rurasqaymantaqa manam ñakakurqanichu.

Bibliamanta yachay munasqayta qawaspankum, vecinoykunaqa qoykuwarqa Jehová Diospa Testigonkunapa achka qellqankunata. Chay qowasqanpim karqa Un solo mundo, un solo gobierno sutiyoq folleto *, chaypim nin Diospa Munaychakusqallan tukuy imata allichananmanta (Mat. 6:10). Chaymi kallpanchawarqa yachasqaykunamanta hukkunaman astawanraq willanaypaq.

Wiñaymasiy Noël sutiyoq amigoymi Bibliata chaskiykuwarqa. Catolico kasqanraykum niwarqa, sacerdote kananpaq estudiaq huk  runata watukunaykupaq. Qallariypi manchakuspaypas confianzawanmi leerqani Salmo 115:4-8 hinaspa Mateo 23:9, 10 nisqanta, chaypim qawachichkan taytacha-mamachakuna servichikuy hinaspa taytawan sutichachikuytapas Dios cheqnisqanta. Chay leesqaymi kallpanchawarqa yachasqaykunata defiendenaypaq. ¿Imapim tukurqa? Noëlmi Biblia estudiayta qallarirqa, kunanpas hinallam Diospa testigon kachkan.

Huk kutipiñataq watukurqani paniyta, qosanpam karqa layqakunapa libronkuna, demoniokunapas ñakarichirqam. Qallariypi imayna yanapayta mana atiptiypas, Hebreos 1:14 versiculopim entienderqani angelkuna yanapawasqanmanta. Chaykunamanta Bibliapa ima nisqantam qawachirqani, chayta kasukuptin hinaspa tukuy ima libronkunata kañaruptinmi demoniokunaqa manaña ñakarichirqañachu. Ancha kusikunapaqmi, paniypas hinaspa qosanpas Jehová Diospa testigonña kasqankuqa.

1947 watapim Estados Unidos lawmanta Arthur Emiot sutiyoq Testigo watukamuwarqa. ¡Anchatam kusikurqani! Tapurqanim Testigokuna maypi huñunakusqankumanta, hinaspam niwarqa kaymanta 10 kilometro Liévin llaqtapi kasqanmanta. Chay tiempopiqa sasam karqa bicicletayoq kayqa, chaymi achka killakuna chakillawan huñunakuykunaman rirqani. Chay watakunapim Francia nacionpi 2.380 Testigokunalla karqa, yaqa llapanku Polonia nacionmanta hinaspapas pusaq watañam predicasqayku harkasqa karqa. Ichaqa 1947 watapa 1 septiembre killapim autoridadkunaqa manaña predicasqaykuta harkakurqakuñachu hinaptinmi París lawpi Villa Guibert llaqtapi Betel wasi kichakururqa. Chay nacionpi mana huk precursorllapas kasqanraykum 1947 watapa diciembre killapi Informador otaq Diospaq Llamkayninchik qellqapi lliw iñiqmasinchikkunata kallpancharqa precursor kanankupaq. Chay tiempopiqa 150 horatam sapa killa predicarqaku, ichaqa 1949 watapim pachakllaña karqa. Ñoqaqa 1948 watapim bautizakurqani Jehová Diosman Jesuspa kayna nisqanmanta seguro kaspay: “Palabraykiqariki cheqapmi” (Juan 17:17). Precursormi karqani 1949 watapa diciembre killapi.

Carcelmanta Dunkerque llaqtaman

Precursor kaytam qallarirqani Franciapa sur lawninpi Agen sutiyoq llaqtapi. Ichaqa manam unaychu chaypiqa karqani, minapi llamkayta saqeruptiymi tropapi kanaypaq qayasqa karqani, ichaqa mana munasqayraykum presocharuwarqa. Chaypiqa manam saqewarqakuchu Bibliayoq kanaykutaqa ichaqa Salmos libropa wakin paginankunam kapuwarqa. Chay leesqaymi anchata kallpanchawarqa. Hinaptinmi kachaykuwaptinku tapukurqani sichu hinalla precursor kasaq icha manañachu nispa. Ichaqa kay kutipipas Bibliam yanapawarqa ima ruranaymanta. Filipenses 4:11-13, NM versiculopa nisqanmi yuyaymanachiwarqa, chaypim nin: “Tukuy imata ruranaypaqmi kallpayoq kani kallpata qowaqniy yanapawaptillan”, nispa. Hinaptinmi hinalla precursor kanaypaq tanteakururqani. 1950 watapiñataqmi niwarqaku Dunkerque llaqtaman rinaypaq.

Chaymanqa mana imayoqmi chayarqani. Chaymantapas iskay kaq guerra kasqanraykum sasa karqa maypi samapakuyta tariyqa. Chaymi ñawpaqpi predicasqay huk runapa wasinman rinaypaq tantearurqani. Señoran chaylla rikuykuwaspanmi kusikurqa hinaspa niwarqa: “¡Kusikunim carcelmanta lloqsimusqaykimanta! Qosaymi niwan qam hina allpantinpi achka runakuna kaptinqa manach guerraqa kanmanchu karqa”, nispa. Samachinankupaq wasinku kaptinmi niwarqa turistakuna hamunanku tiempokama chaypi qepanaypaq. Chay punchawllapim Arthurpa wawqen Evans Emiot niwarqa barcota tutapi cuidaspay llamkanaypaq *. Carcelmanta chayllaraq lloqsisqayraykum llumpayta tulluyarurqani. Evansmi barcopi huknin kaq capitanta reqsiykachiwarqa hinaptinmi nirqa imanasqa chayna tulluyarusqaymanta. Chayllam niwarqa mikuy churasqankumanta munasqayta mikunaypaq. Pisi rimayllapiqa, ¡huk punchawllapim wasita, llamkayta  hinaspa mikuytapas tarirqani! Chaykunam astawan kallpanchawarqa Mateo 6:25-33 nisqanpi astawan iñinaypaq.

Turistakuna chayaramuptinmi Simon Apolinarski precursormasiywan huklawpi samapakunaykupaq maskanayku karqa. Ichaqa manam imaraykupas chaypi predicasqaykuta saqeytaqa munarqanikuchu. Manapas unaymantam huk runa niwarqaku uywakunapa ñawpaq kasqan wasipi pajamanta colchonkunapi puñunaykupaq. Chay wasiyoqtam predicarqaniku hinaptinmi huk runakuna hina Jehová Diospa testigon karqa. Sapa punchaw predicasqaykuraykum periodicokunapi kaynata willakurqaku: “Jehová Diospa testigonkunam llaqtaman huntaramun”, nispa. Chaypim ichaqa ñoqawan iskay-kimsa predicaqkunalla karqaniku. Tukuy ima sasachakuykunatam atiparqaniku suyakuyniykupi yuyaymanaspa hinaspa Jehová Dios sumaqta cuidawasqankupipas. 1952 watapi huk lawman rinaypaq kamachisqa kaptinmi, Dunkerque lawpiqa yaqa 30 precursorkunalla karqa.

Huk ruraykunapaqmi preparakuni

Amiens sutiyoq llaqtapi pisi tiempolla kachkaspaymi, Boulogne-Billancourt lawpi precursor especial hina serviyta qallarirqani, chayqa kachkan París llaqtapa hawa lawninpim. Chay lawpi Bibliamanta yachachisqaykunamantam achka precursor karqaku, wakinñataqmi misionerokuna. Guy Mabilat sutiyoq huknin mozom congregacionkuna watukuq anciano karqa chaymantañataq distrito. Chaymantapas encargakurqam qellqakuna rurakunanpaq wasi hatarichiypi, chayqa kachkan Louviers llaqtapa Betel wasipim. Anchatam kusikurqani predicasqay lawpi runakunaman Bibliamanta rimaspay. Manam kusichiwasqanraykullachu chaytaqa rurarqani, aswanqa umaypi takyachinaypaqmi hinaspa aswan allin yachachiq kanaypaqmi.

1953 watapim mana piensasqay punchawpi Alsacia-Lorena lawpi congregacionkuna watukuq anciano kanaypaq niwarqaku, kay llaqtatam Alemania nacion 1871 hinaspa 1945 watakunapi dueñochakururqa. Chaypiqa alemán rimaytam rimanku, chaymi yachanaypaq kallpanchakurqani. Chay tiempopiqa pisi runakunallapam karqa carron, television, qellqanapaq maquina hinaspa radionkupas. Manamá computadoraqa karqachu. Chaywanpas manam niymanchu llakisqa hinaspa mana imayoq kasqaytaqa. Aswanmi kusisqa karqani. Astawanmi tiempoy karqa mana imawanpas harkachikuspay Diosta servinaypaq. Chaymantapas mana llumpay imayoq kanapaq Bibliapa nisqantam kasukurqani (Mat. 6:19-22).

1955 watapim París lawman rirqani asambleaman, sutichakurqam “Reino Triunfante” nispa. Chay asambleapim reqsirqani señoray kananpaq Irène Kolanski cristianata, payqa ñoqamanta huk wata ñawpaqtaraqmi precursora karqa. Polonia nacionniyoq tayta-mamanmi  ñawpaqmantaraq Diosmanta yacharqaku. Franciapi kaspankum Adolf Weber cristiano watukuykurqa, payqa Russell iñiqmasinchikpa jardineronmi karqa hinaspam Europa lawman astakurqa Diospa allin noticianmanta willakunanpaq. 1956 watapim Irènewan casarakurqani, paywan kuskam congregacionkunata watukurqaniku. ¡Anchatam chaninchani unay watakuna mana pisipaspa yanapawasqanmanta!

Casarakusqaykumanta iskay wata pasaruptinmi superintendente de distrito kanaypaq niwarqaku. Ichaqa experienciayoq cristianokuna mana achka kasqanraykum huk tiempo hinalla congregacionta watukuq anciano karqani. Manam tiempoypas karqañachu. Killapi 100 horakunata predicaspaypas, sapa semanam achka discursokunata qonay karqa, aslla huñunakuspa Bibliamanta kimsa estudiokunaman watukunay karqa, congregacionpa papelninkunata qawanay karqa hinaspa imayna tarikusqankumantapas qellqanay karqa. ¿Imaynatam tiempochakurqani Bibliata leenaypaq? Tantearurqanim mawka Bibliaypa paginankunata horqospay pitapas suyastin chaypi leenaypaq. Chay leesqaymi anchata kallpanchawarqa Diospa munayninta hinalla ruranaypaq.

1967 watapim Betelpi kanaykupaq invitawarqaku, chay tiempopiqa Boulogne-Billancourt lawpim tarikurqa. Ñoqatam Departamento de Servicio nisqapi llamkanaypaq niwarqaku, ñam 40 wata masninña chaypiqa kachkani. Anchatam kusikuni Bibliamanta runakunapa tapukuyninkunata kutichispay. Munanitaqmi Bibliamanta astawan yachayta hinaspa allin noticiata defiendeytapas (Fili. 1:7). Kusikunitaqmi sapa madrugaw Betelpi kaqkunaman textomanta yachachispay. 1976 watapiñataqmi Franciapi Betel Wasimanta Encargakuqkunamanta huk kaqnin kanaypaq niwarqaku.

Aswan allin kawsaymi

Tukuy kay watakunapi achka sasachakuykunawan tarikuptiykupas, aswan sasaqa karqa yuyaqyasqaykurayku hinaspa onqosqaykurayku manaña ñawpaqpi hina rurasqaykum. Chayna kaptinpas suyakuyniykuqa allin takyasqam kachkan Bibliata sapa punchaw huñulla estudiasqaykurayku. Kusikunikutaqmi predicasqayku lawpi willakusqaykumanta, chaymanmi chayaniku runakunapa risqanku carropi. Iskayniykumantaqa 120 wata masninñam tukuy tiempoykuwan Diosta serviniku, munaymankum kayna sumaq kawsayta akllakunaykichikta. Rey David hinam tarikuni, paymi nirqa: “Yuyaq kaspaypas allin runataqa manam qonqarusqataqa rikurqanichu”, nispa (Sal. 37:25).

Tukuy kawsasqaypim Diospa Palabranta leesqay anchata kallpanchawarqa. Allintamá aylluykuna yaqa 60 wata qepata nirqaku Bibliata sapa punchaw leenaymanta. Arí, manam haykapipas saqerqanichu Biblia leeytaqa nitaqmi haykapipas ñakakusaqchu chay rurasqaymantaqa.

[Willakuykuna]

[5 kaq paginapi dibujo]

Simonwan ñoqa

[5 kaq paginapi dibujo]

Congregacionkunata watukuq kaspay

[5 kaq paginapi dibujo]

Punta Biblia leesqay

[6 kaq paginapi dibujo]

Casarakusqayku punchaw

[6 kaq paginapi dibujo]

Irènewanmi kuska Bibliata estudianiku