¿Finees hinachu sasachakuykunata atipanki?

CONGREGACIONPI ancianokunapa rurasqankuqa chaninchanapaqmi. Ichaqa Bibliam nin wakin rurayninku sasa kasqanta. Wakinpim hatun huchaman wichiykuqta Diospa nisqanman hina juzgananku (2 Cro. 19:6). Wakinpiñataqmi congregacionpi mana ancha yachasqanku rurayta rurananku. Chaynam Moisespas tarikurqa. Huk rurayta Dios kamachiptinmi nirqa: “¿Pitaq ñoqaqa kani Rey Faraonman rinaypaqqa?”, nispa (Exo. 3:11).

Yachasqanchikman hinam Bibliaqa Diospa chuya espiritunpa yanapayninwan qellqakurqa, chay yanapakuywanmi congregacionpi ancianokunatapas nombranku. Bibliapim tarinchik achka punta apaqkuna imaymana sasachakuykuna atipasqankumanta. Hukninmi karqa Finees. Eleazarpa churin hinaspa Aaronpa willkan kasqanraykum, sacerdotekunapa jefen kananpaq derechoyoq karqa. Vidanpim kimsa sasachakuykunata atiparqa, chaykunapim qawachirqa mana manchakuq, allin tanteoyoq hinaspa iñiyniyoq kasqanta, chaytaqa lliw ancianokunam qatipakunanku.

‘Lloqsispanmi lanzanta aparikurqa’

Qawasun israelitakuna Moab llaqtapi tarikuptinku Finees mozollaraq kasqanpi ima pasakusqanmanta: ‘Qarikunam Moab nacionniyoq warmikunawan huchallikuyta qallaykurqaku’ hinaspa “mikuspanku Moab casta runakunapa taytachankuta adorarqaku” (Num. 25:1, 2). Chaymi Jehová Diosqa chay huchallikuqkunata castigarqa. Imaynaraqchá Fineesqa tarikurqa chay hucha rurasqankumanta yacharuspan hinaspa imapi tukusqanta qawaspanpas.

Ima pasasqanmantam Biblia nin: “Diosman asuykuna karpapa punkunpi Moiseswan Israel casta runakuna waqachkaptinkum, llapallankupa qawasqanta huk kaqnin Israel casta runa kikinpa karpanman pusaykurqa Madian casta warmita”, nispa (Num. 25:6). ¿Imatam Fineesqa rurarqa? Sasachakurqam tanteananpaq, chay huchallikuq runaqa israelitakunapa huknin punta apaqninmi karqa (Num. 25:14).

Ichaqa runakunata manchakunanmantaqa Fineesqa Diostam respetarqa. Chay iskay huchapakuqkunata rikuruspanmi qepanta rirqa hinaspa karpankuman yaykuruspan iskayninkuta lanzawan tuksirurqa. ¿Imaynatam Jehová Diosqa chay rurasqanta qawarqa? Mana manchakuq hinaspa chaylla ruraq kasqanmantam, Jehová Diosqa nirqa Fineeswan mirayninkunapas ‘sacerdotekunaña wiñaypaq kanankumanta’. Chaymantapas Jehová Diosqa israelitakunata castigasqantam saqerurqa (Num. 25:7-13).

Kunan tiempopi punta apaqkunaqa manam haykapipas imatapas piñakuywanqa rurankuchu. Ichaqa Finees hinam chaylla ruraq hinaspa mana manchakuq kanku. Chaynam karqa Guilherme sutiyoq cristiano, paymi iskay-kimsa killakunallaraq anciano karqa. Nirqakum huk huchallikuqta wakin ancianokunawan yanapananpaq, chay huchallikuqqa karqa pasaq tiempokunapi payta yanapaq huk ancianom. Paymi nin: “Hukmanmi tarikurqani chaymi  wakin kutipi puñuytapas atirqanichu. Manam munarqanichu sonqoypa nisqanman hina juzgaytaqa. Chaymi sapa punchaw Diosta mañakurqani hinaspapas qellqanchikkunata allintapuni estudiarqani”, nispa. Chayna rurasqanraykum, mana manchakuspa chay iñiqmasinta iñiyninpi yanaparqa (1 Tim. 4:11, 12).

Chayna sasachakuypi ancianokuna mana manchakuspa rurasqankum, iñiypiwan Diosman sonqo kaypi qatipakunapaq kanku. Lliw cristianokunapas paykuna hinam kananchik, pipapas hatun hucha rurarusqanmanta yachaspa willakuspanchik. Diosman sonqo kasqankutapas qawachinmankum congregacionmanta qarqochikuqwan manaña rimaspa, chaynaqa kananku amistadninku otaq ayllunku kaptinpas (1 Cor. 5:11-13).

Allin tanteoyoq kasqanraykum wañuchinakuyqa karqañachu

Fineespa mana manchakuspa chaylla rurarusqanqa manam mozokunapa rurasqanman hinachu karqa. Payqa allin tanteoyoq hinaspa yachaywan ruraqmi karqa, chaytam qawachirqa kay qatiqnin sasachakuyta imayna allichasqanpi. Ruben ayllupa, Gad ayllupa chaynataq Manases parten ayllukuna Jordan mayupa patan lawpi altarta hatarirachisqankumanta achka israelitakuna uyarispankum, piensarqaku Diosta qepanchasqankumanta hinaptinmi huñunakururqaku contrankupi peleanankupaq (Jos. 22:11, 12).

¿Imatam Fineesqa rurarqa? Israel ayllukunapa sapa jefenkunawan huñunakuruspanmi, tapurqa imanasqa chay altarta hatarichisqankumanta. Paykunam nirqaku ‘Dios adorasqankuta’ qawachinallankupaq chay rurasqankuta. ¡Chayraykum hatun wañuchinakuyqa karqañachu! (Jos. 22:13-34.)

Pi iñiqmasinchikpa contranpi mana allinkunata otaq yanqa rimaykunata uyarispanchikqa, Finees hinam allin tanteoyoq kananchik, chaymi yanapawasun mana chaylla piñakunapaq otaq yanqakunata mana rimanapaqpas (Pro. 19:11).

¿Imaynatam ancianokunaqa Fineespa allin tanteoyoq kasqanta qatipakunmanku? 10 wata masninña anciano hina serviq Jaimem nin: “Pipas huk iñiqmasinwan mana allinta apanakusqanmanta willawaptinqa, puntatam Jehová Diosta mañakuni mana pimanpas sayapakunaypaq hinaspa Bibliapa nisqanman hina yanapanaypaqpas. Huk kutipim huk cristiana willawarqa huk congregacionmanta anciano mana allin rimapayasqanmanta. Chay ancianoqa amistadniymi karqa, ichaqa chaylla willanaymantaqa, chay cristianawanmi yuyarirqaniku Bibliapa ima nisqankunata. Nirqanim puntata paywan rimananmanta (Mat. 5:23, 24). Cristianaqa kasukurqam, ichaqa manam allinyanakurqakuchu chaymi kallpancharqani Bibliapa wakin nisqankunata qawananpaq. Paymi tantearurqa Diosta kaqmanta chay sasachakuyninmanta willananpaq hinaspa pampachaykunanpaq”, nispa.

¿Imapim tukurqa? Jaimem nin: “Killakuna pasaruptinmi chay cristianaqa kaqmanta  asuykamuwarqa. Niwarqam chay anciano pampachaykunanpaq nisqanmanta. Paywan predicananpaqmi nirqa hinaspam yuyarichirqa ancha chaninchasqanmanta. ¡Sasachakuyninqa allichakururqamá! Sasachakuyninpi chapukuspayqa, yaqapaschá mayqenmanpas sayapakuyman karqa hinaspa manapaschá allichakunmanchu karqa”, nispa. Chaychá Biblia kaynata nin: “[Ama] chaylla juezkunaman willaramuychu”, nispa (Pro. 25:8). Allin tanteoyoq ancianokunaqa, iñiqmasinwan sasachakuq cristianokunatam kallpanchanku Bibliapa nisqanman hina hawkayayta maskanankupaq.

Jehová Diostam mañakurqa

Watakuna pasaruptinmi Fineesqa sacerdotekunapa jefen karqa. Mana manchakuq hinaspa allin tanteoyoq kasqanmi, mozollaraq kasqanmanta yanaparqa sasachakuykunata atipananpaq. Ichaqa allin rurasqanqa karqa, Jehová Diospi hapipakusqanmantam.

Huk kutipim Benjamin lawpi Gabaa llaqtamanta runakuna Leviy ayllu runapa compañeranta abusarurqaku hinaspa wañurachirqaku. Chaymi wakin castakuna Benjamin ayllupa contranpi hatarirqaku (Jue. 20:1-11). Manaraq peleaq rinankupaq Diosta mañakuptinkupas, iskay kutikamam atiparachikurqaku (Jue. 20:14-25). ¿Piensarqakuchu mañakuyninku yanqa kasqanta hinaspa castiganankuta Dios mana munasqanta?

Diospi tukuy sonqonwan hapipakusqanta mana chinkachispanmi Fineesqa Jehová Diosta tapurqa: “¿Huktawanchu peleamusaqku aylluyku Benjamin castakunapa contranpi icha manañachu?”, nispa. Jehová Diosmi mañakusqankuta uyarirqa hinaptinmi Benjamin castakunata atiparqaku chaynataq Gabaa llaqtata kañaykurqaku (Jue. 20:27-48).

¿Imatam kaymanta ancianokuna yachanmanku congregacionkunapi huk sasachakuy hinalla kaptin? Allichanankupaq kallpanchakuptinku hinaspa Diosta sapakuti mañakuptinkupas mana allichaspankuqa manam hukmanyanankuchu. Aswanmi Jesuspa kayna nisqanta yuyarinanku: “Mañakuptikichikqa Diosqa qosunkichikmi. Maskaychik, tarinkichikmi, qayaychik, kichasunkichikmi”, nispa (Luc. 11:9). Ichapas piensanmanku mañakusqankuta Dios mana chaylla uyarisqanta, ichaqa yanapanqamá tanteasqan tiempopi.

Qawasun Irlanda lawpi huk congregacionpi ima pasasqanmanta. Chaypi iñiqmasinchikkunaqa Huñunakunanku Salontam anchata necesitarqaku, ichaqa chay lawpi autoridadkunam sapa kuti imatapas nispanku mana munarqakuchu maypi hatarichinankupaq mañakuptinku. Chaymi huk autoridadkunamanña rirqaku. Ichaqa manaraq richkaspankum Diosta mañakurqaku. ¿Yaqachu Fineespa hina mañakuyninku uyarisqa karqa?

Huk ancianom nirqa: “Achka kutita mañakuspaykum chay autoridadkunapa kasqanman watukurqaniku. Hinaspam niwarqa chay autoridadwan mana chaylla rimay atinaymanta ichaqa atirqanikum pichqa minutollatapas rimayta. Imayna rurasqa kananmanta qawaspanmi chaylla saqewarqaku Salonta hatarichinaykupaq, chaymantapacham chay lawpi autoridadqa tukuypi yanapawarqaku. Chay pasakusqanmi qawachiwarqaku Diosta mañakuy atiyniyoq kasqanmanta”, nispa. Diospa yanapakuyninta maskaq ancianokunaqa segurom kanmanku mañakusqankuta Jehová Dios uyarinanmanta.

Ñawpaqpim Fineesqa Israelitakunata iñiyninkupi cuidanan karqa. Chaytam rurarqa mana manchakuspan, yachaywan hinaspa iñiywanpas. Chaynapim Diospa chaskisqan karqa. Waranqa wata pasaruptinmi Diospa yanapakuyninwan Esdras kaynata qellqarqa: ‘Sacerdote Eleazarpa churin Fineesmi ñawpaq tiempopi paykunapa jefen karqa. ¡Tayta Diosmi paywan karqa!’, nispa (1 Cro. 9:20). Chaynayá kachun kunan tiempopi lliw ancianokunawanpas chaynataq tukuy sonqonkuwan Diosta serviq lliw cristianokunawanpas.