Jehová Diosmi herencianchikqa

“Israelpa mirayninkuna ukupiqa ñoqam kasaq tocanciayki chaynataq herenciaykipas” (NUM. 18:20).

1, 2. a) ¿Imataq pasarqa Leviy castawan Prometesqa Allpata Josuey rakiptin? b) ¿Imatam Jehová Diosqa Leviy castaman prometerqa?

ISRAELITAKUNA Prometesqa Allpaman yaykuruspa chaypi yachaqkunata atiparuspankum, chay allpata rakinakuyta qallaykurqaku. Chayta ruranankupaqmi churasqa karqaku Josuey, sacerdote Eleazar hinaspa sapa ayllumanta punta apaqnin (Num. 34:13-29). Paykunam sapa aylluman tupaqninta qorqaku, ichaqa manamá Leviy castamanqa qorqakuchu (Jos. 14:1-5). ¿Imanasqa? ¿Yaqachu qonqarurqaku? ¿Icha manachu karqa tupaqninqa?

² Jehová Diosqa manamá Leviy castataqa qonqarurqachu. Aswanmi Leviy castapa punta apaqnin Aaronman kaynata nirqa: “Israelpa mirayninkuna ukupiqa ñoqam kasaq tocanciayki chaynataq herenciaykipas”, nispa (Num. 18:20). ¡Mayna sumaqchá chayna nisqanqa karqa! ¿Imaynam tarikuchwan ñoqanchiktapas chaynata Dios niwaptinchik? Yaqapaschá tapukuchwan: “¿Yaqachu ñoqaqa Tukuy Atiyniyoq Diosta herenciata hina chaskiyman? ¿Yaqachu pantaq cristiano kaspanchikpas herencianchikta hina chaskichwan?”, nispa. Kay tapukuykunaqa ancha allinmi ñoqanchikwan hinaspa familianchikwan tupasqanrayku. Chaynaqa qawasunyá Jehová Dios herencianchik otaq tupawaqninchik ima ninan kasqanmanta. Qawasuntaqmi imaynam Diosqa kanman sapakamapaq tupawaqninchik.

Jehová Diosqa Leviy castatam waqaychan

3. ¿Imaynatam Leviy aylluqa sacerdotekuna kanankupaq akllasqa karqaku?

³ Diosmanta Kamachikuykunata Moises manaraq chaskiptinqa, familiapi uma kaqkunam sacerdotekunapa rurasqanta ruraqku. Kamachikuyta chaskiruptinkum ichaqa Leviy castaña chayta rurananku karqa. Arí, paykunallam sacerdotekuna otaq yanapaqninkuna hina chayta ruraspa llamkananku karqa. ¿Imaynatam chay rurayqa qallaykurqa? Egipto runakunapa piwi churinkunata Jehová Dios wañurachispanmi nirqa israelitakunapa piwi churinkunata payta servinanpaq sapaqchasqanmanta. Tiempopa risqanman hinam ichaqa, Israelpa ‘llapa piwi churikunapa rantinpi’ Leviy ayllutaña Diosqa akllarurqa chayta ruranankupaq. Ichaqa Israel runakunapa piwi churikunaqa achkallañam karqaku Leviy ayllu runakunamantaqa, chaymi puchuqninpa rantinpi Jehová Diosqa kamachirqa  qollqeta qonankupaq (Num. 3:11-13, 41, 46, 47). Chaymantapacham Leviy aylluqa chay llaqtapi Diosllataña servirqaku.

4, 5. a) ¿Imaynanpitaq Jehová Diosqa Leviy castakunapaq herencian karqa? b) ¿Imaynatam Diosqa Leviy castakunata cuidarqa?

⁴ Qawasqanchikman hinaqa, Leviy casta runakunaqa manam allpataqa chaskirqakuchu, aswanmi “herenciankupaq” chaskirqaku “Diospaq sacerdoten” kanankupaq (Jos. 18:7). Chaymi paykunata Diosqa nirqa: “Ñoqam kasaq tocanciayki”, nispa (Num. 18:20). Hinaptinqa, ¿yaqachu wakchayaypi kananku karqa mana allpayoq kasqankurayku? Manamá (leey Numeros 18:19, 21, 24). Diospa ‘karpanpi servisqankuraykum’, Israelpi lliw ayllukunaqa cosechasqankumantawan animalninkunamanta diezmota qonanku karqa. Leviy casta runakunapas chaskisqankumantam sacerdotekunapaq diezmota qonanku karqa (Num. 18:25-29). * Sacerdotekunaqa chaskirqakutaqmi, israelitakuna ‘Diospaq sapaqchasqanku ofrendakunata’. Chaynaqa, sacerdotekunaqa manamá iskayrayanmankuchu karqa ima necesitasqankutapas Dios qonanmanta.

⁵ Yaqachusmi Moisespa chaskisqan Kamachikuyqa nirqa Israelpi lliw familiakuna sapaq diezmota rakinankupaq, chaynapi Diospa akllasqan lawman watapi rispanku mikunankupaq (Deu. 14:22-27). Ichaqa wakinpim qanchis wata ukupi kimsa hinaspa soqta kaq watapi, chay sapaq diezmota servichikunanku karqa wakchakunata hinaspa Leviy castakunata yanapanankupaq. ¿Imanasqataq Leviy castakunapaqpas karqa? Israelpi “mana herencia allpayoq” kasqankuraykum (Deu. 14:28, 29).

6. ¿Maypitaq Leviy castakunaqa yacharqaku mana allpata chaskispankuqa?

⁶ ¿Maypitaq Leviy castakunaqa yachananku karqa mana allpata chaskispankuqa? Jehová Diosmi cuidarqa hinaspam qorqa wakin llaqtakunapi hinaspa hichpan lawkunapi yachanankupaq. Llapanpim karqa 48 llaqtakuna chaypim 6 amparakunapaq llaqtakunapas karqa, chay llaqtakunapim yachaqku santuariopi mana llamkaspanku (Num. 35:6-8). Qawasqanchikman hinaqa tukuy tiemponkuwan serviqninkunamanqa Diosqa tukuy necesitasqankutam qorqa. ¿Imaynatam paykunaqa qawachinmanku karqa Jehová Dios herencianku kasqanta? Dios cuidananmanta mana iskayrayaspankum.

7. ¿Imatam Leviy castakuna qawachinanku karqa Jehová Dios herencianku kananpaqqa?

⁷ Wakinpim israelitakunaqa diezmota mana qoqkuchu. Chayna rurasqankumanta mana castigasqa kaspankupas, lliw Leviy castakunatawan sacerdotekunatam sasacharqa. Nehemiaspa tiemponpi chay pasakusqanraykum, Leviy castakunaqa chakrankupi llamkaq pasakurqaku hinaspam Diospa templonpi llamkasqankuta saqerurqaku (leey Nehemias 13:10). Leviy castakuna allin kanankupaqqa, lliw Israel runakunam kasukuspanku diezmota qonanku karqa. Chaypaqmi chay castaqa Jehová Diospi hinaspa imayna yanapananpaq churasqanpi confiasqankuta qawachinanku karqa.

Jehová Dios herenciayoq levitakuna

8. ¿Imatam Asafqa qonqarunman karqa iskayrayasqa kananpaq?

⁸ Lliw Leviy castakunapaq Jehová Dios herencianku kaptinpas, wakinkum Diospi hapipakusqankuta qawachinankupaq kaynata nirqaku: “Tayta Diosmi kapuqniyqa”, nispa (Lam. 3:24). Paykunamanta huk kaqninmi karqa Salmo 73 kaqta qellqaq Asaf. Chayna  sutiyoqmi karqa rey Davidpa tiemponpi Leviy casta takiqkunamanta nanachikuq. Ichaqa yaqapaschá kaypiqa rimachkan huk kaqnin churinmanta (1 Cro. 6:31-43). Imayna kaptinpas, payqa mana allin runakuna allinllaña kawsasqankuta qawaspanmi iskayrayasqanmanta rimarqa. Envidiakuspanmi nirqa: “Yanqapaqmi limpiakuchkani sonqoytapas. Chaynaqa yanqapaqmi mana allinman makiypa mana chapukusqanpas”, nispa. Yaqachusmi Jehová Dios herencian hinaspa servisqan ancha valorniyoq kasqanta qonqarurqa. Ichaqa ‘Diospa santuarionman yaykuspanmi’ chayna tarikusqanta cambiarurqa (Sal. 73:2, 3, 12, 13, 17).

9, 10. ¿Imanasqam Asafqa ninman karqa: “Diosnillaymi herencia hina wiñaypaq kapuwachkan”, nispa?

⁹ Diospa santuarionman yaykuruspanmi, Asafqa Diospa piensasqanman hinaña piensayta qallaykurqa. Achka iñiqmasinchikkunapas yaqa chaynam tarikurqaku. Dios serviyninkumanta iskayrayaspankum, qollqe maskayman astawan qokururqaku. Ichaqa Diospa Palabranta estudiaspanku hinaspa llaqtanwan huñunakuspankum imayna piensasqankuta cambiarurqaku. Asafqa cuentatamá qokururqa mana allin runakunata ima suyasqanmanta. Payqa Dios yanapasqanpi yuyaymanaspanmi, entienderurqa Jehová Dios makinmanta pusachkanmanpas hina yanapasqanta. Chaymi nirqa: “Qanwan kaspayqa manam munanichu imatapas kay pachapiqa”, nispa (Sal. 73:23, 25). Payqa onqospanpas otaq hukmanyaspanpas kaynatam ninman karqa: “Diosnillaymi herencia hina wiñaypaq kapuwachkan”, nispa (leey Salmo 73:26). ¡Mayna hawkayaypim karqa Dios amistadnin kasqanmanta yuyarispan hinaspa servisqanta mana qonqananmanta yachaspanpas! (Ecl. 7:1.) Chaychá kaynata takirqa: “¡Mayna sumaqmi Diospa ñawpaqninpi kayqa! Señor Diosnillaypim amparakuni ñoqallayqa”, nispa (Sal. 73:28).

¹⁰ Jehová Dios herencian kasqanmanta Asaf rimaspanqa, manam imapas pisipuqninta qonallanmantachu rimachkarqa. Rimachkarqataqmi satuarionpi servisqanmantawan amistadnin kasqanmantapas (Sant. 2:21, 23). Hinalla amistadnin kananpaqqa, qawachinanmi karqa Jehová Diospi iñisqanta hinaspa kasukuspan allin kananmantapas. ¡Ñoqanchikpas atichwanmi chayna iñiyniyoq kayta!

11. ¿Imataq hukmanyachirqa Jeremiasta, hinaspa imatam Diosqa nirqa?

¹¹ Leviy castamanta Jeremiaspas nirqam: “Tayta Diosmi kapuqniyqa”, nispa. Qawasun ima niy munasqanmanta. Payqa Jerusalen llaqtapa hichpan Anatot llaqtapim yacharqa (Jer. 1:1). Huk kutipim hukmanyarurqa allin runakuna ñakariptin, mana allin runakunañataq allinllaña kawsasqankuta qawaspan (Jer. 12:1). Payqa yacharqam Dios allin ruraq kasqanmanta, chaymi Jerusalenpiwan Juda lawpi tukuy pasakusqanta qawaspan hukmanyasqanmanta willakurqa. ¿Imatam Jehová Diosqa nirqa? Kamachirqam piñakuyninmanta willakunanpaq hinaspa nisqanman hina rurasqa kananpaqpas. Mana  kasukuqkunaqa wañuchisqam karqaku, kasukuqkunam ichaqa salvakurqaku (Jer. 21:9).

12, 13. a) ¿Imanasqam Jeremiasqa nirqa: “Tayta Diosmi kapuqniyqa” nispa, hinaspapas imatam qawachirqa? b) ¿Imanasqam Israelpi lliw castakuna Diospi suyananku karqa?

¹² Jerusalenwan Juda llaqta puchukachisqa kaptinmi, Jeremiasqa chayta qawaspan tutayaypi Jehová Dios purichichkanman hina tarikurqa. Arí, yaqapas ‘unayña wañuqkuna hinam’ tarikurqa (Lam. 1:1, 16; 3:6). Chayna puchukachisqam karqaku israelitakuna mana allin rurasqankuta mana saqeyta munasqankurayku hinaspa Diosman mana kutirikusqankurayku. Chay pasakusqanmanta Jeremias mana huchayoq kaspanpas ancha llakisqam tarikurqa. Ichaqa ‘Diospa kuyakuyninrayku’ hinaspa llakipayakuynin ‘sapa temprano’ mosoq kasqanraykum, mana qalaypaqchu chinkachisqa karqaku. Hinaptinmi Diospa willakuqnin kasqanta chaninchaspan nirqa: “Diosmi kapuqniyqa”, nispa (leey Lamentaciones 3:22-24).

¹³ “Diosmi kapuqniyqa” nispanqa, Jeremiasqa qawachichkarqam Jehová Diospa kuyapayakuyninpi confiasqanta hinaspa paypi suyasqantapas. Israel nacionpi lliw castakunam chayna kananku karqa, llapankum allpankuta qechurachikurqaku hinaspam llaqtankupas chunniqpi 70 wata kanan karqa (Jer. 25:11). Diosllam suyakuyninkuqa karqa. 70 wata pasaruptinmi paykunataqa llaqtankuman kutichirqa chaypi servinankupaq (2 Cro. 36:20-23).

Manam Laviy castakunallapaqchu herencia karqa

14, 15. Leviy castakunamanta hukqa, ¿pitaq Jehová Diosta herencianta hina qawarqa hinaspa imarayku?

¹⁴ Manam Leviy castakunallapaqchu Diosqa herencian karqa. Davidmi manaraq Israelpa reynin kachkaspan Jehová Diosta nirqa: “Qamllam kay pachapi llapa imay kanki”, nispa (leey Salmo 142:1, 5). Kayta qellqaspanqa, manam palacionpichu nitaq wasinpichu tarikurqa, aswanmi machaypi enemigonkunamanta pakakuchkarqa. Yaqa llapanpiqa iskay kutikamam machaypi pakakurqa, puntatam Adulam llaqtapa hichpanpi chaymantañataqmi En-gadi chunniq lawpi. Yaqachusmi chay huk kaqnin pakakusqanpi Salmo 142 nisqanta qellqarqa.

¹⁵ Yachasqanchikman hinaqa, rey Saulmi qatikacharqa wañuchinanpaq. Paymanta ayqekuspanmi Davidqa sasa tarina machaypi pakakurqa (1 Sam. 22:1, 4). Chaypi kaspanmi sapallan hinaspa saqesqa hina tarikuspam Diosta mañakurqa (Sal. 142:4).

16, 17. a) ¿Imaraykum Davidqa sapallan hina tarikurqa? b) ¿Pitaq yanapaqnin karqa?

¹⁶ Davidqa chay Salmo 142 nisqanta qellqaruspanqa yaqapaschá yacharurqaña Ahimelecta ima pasarusqanta. Paymi mana yachastin Davidta yanapaykurqa rey Saul wañuchinanpaq maskachkaptin, chaymi Saulqa kamachirqa familiantinta wañuchinankupaq (1 Sam. 22:11, 18, 19). Chaymi Davidqa llakisqallaña tarikurqa payrayku kay sacerdoteta wañurachisqankumanta. Kikin wañurachinmanpas hinam sientekurqa. ¡Mayna llakipichá tarikurqa! Ichaqa manam chayllachu, rey Saulqa ñam tariykuchkarqa wañurachinanpaq.

¹⁷ Chaymantapas Samuelmi wañukurqa, paymi Davidta akllarqa rey kananpaq (1 Sam. 25:1). Wañukusqanwan aswan sapallan tarikuspanpas, Davidqa manam qonqarqachu Dios yanapananmantaqa. Leviy castakuna hina servinanpaq Diosta mana akllaptinpas, Israel nacionta kamachinanpaqmi akllarurqa (1 Sam. 16:1, 13). Chaymi Davidqa tukuy sonqonwan Diosta mañakurqa hinaspa yanapakuyninta maskarqa. Ñoqanchikpas Jehová Diosta herencianchikta hina qawaptinchikqa hinaspa paypi amparakuptinchikqa, tukuy sonqowan servinanchikpaqmi yanapawasun.

18. Huk rimaypiqa, ¿imaynataq Jehová Diosqa israelitakunapaq herencian karqa?

¹⁸ Kay yachachikuypim qawarqanchik Davidpas,  Leviy castakunapas chaynataq huk israelitakunapas Jehová Dios herencianku kasqankumanta. Huk rimaypiqa Diosmantam huk llamkayta chaskirqaku, hinaspam chayta rurarqaku Dios waqaychananmanta mana iskayrayaspanku. Ñoqanchikpas sapakamam nichwan Jehová Dios herencianchik otaq tupawaqninchik kasqanmanta. Qatiqnin yachachikuypim qawasun chayna kananpaq ima ruranamanta.

[Willakuy]

¿Yuyachkankichu?

• ¿Imanasqam Leviy castakunaqa nirqaku Dios herencianku kasqanta?

• ¿Imaynatam Asaf, Jeremias hinaspa Davidpas qawachirqaku Jehová Dios herencianku kasqanta?

• ¿Imaynam kananchik Jehová Dios herencianchik kananta munaspaqa?

[Kay yachachikuypa tapukuyninkuna]

[8 kaq paginapi suti rikuylla kaq willakuy]

Leviy castakunapa herencianqa manam allpachu karqa, aswanmi Jehová Diosta serviyninku

[7 kaq paginapi dibujo]

Leviy castakunaqa huk llamkaytam Jehová Diosmanta chaskirqaku herenciankuta hina

[9 kaq paginapi dibujo]

¿Imataq Asafta yanaparqa herencianta hina Jehová Diosta hinalla qawananpaq?