¿Reqsiwanchu Jehová Dios?

“[Diosqa] reqsinmi pim paypa kasqantaqa” (2 TIM. 2:19).

1, 2. a) ¿Imatam Jesusqa astawan munarqa? b) ¿Ima tapukuytam rurakunanchik?

HUK kutipim huk fariseo Jesusta kaynata tapurqa: “Diospa kamachikuyninkunamantaqa ¿mayqantaq hatunnin kamachikuy?”, nispa. Payñataqmi nirqa: “Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan”, nispa (Mat. 22:35-37). Kikin Jesucristopas chaynatam rurarqa. Taytanta anchata kuyaspanpas, payqa munarqam Taytan chaskiykunanta, chaytam qawachirqa tukuypi kasukuspan. Chaymi manaraq wañukuchkaspan nirqa Taytan tukuypi kasukusqanmanta yachasqanta. Chaynapim Jehová Diospa kuyakuyninpi takyarqa (Juan 15:10).

² Kunan tiempopi achka runakunam ninku Diosta kuyasqankutawan reqsisqankutapas. Ichaqa manam chayllachu. Yachananchiktaqmi Jehová Dios ‘reqsiwasqanchikta’ otaq chaskiwasqanchikmantapas. Chaymi kaynata tapukunanchik: “¿Niymanchu Dios ñoqata reqsiwasqanta hinaspa qawawanchu paypaq kasqayta?”, nispa (2 Tim. 2:19). Arí, Llapallan Kamachiq Diospa amistadnin kayqa suma-sumaqmi.

3. ¿Imanasqam wakin runakuna mana segurochu kanku Diospa amistadnin kanankumanta hinaspa imam yanapanman mana chaynata piensanankupaq?

³ Wakinku Diosta sonqomanta kuyaspankupas, manam segurochu kanku Diospa amistadnin kanankumantaqa. Chaynataqa piensanku mana kaqpaqpas hapikusqankuraykum. Ichaqa manam chaynatachu Diosqa qawawanchik (1 Sam. 16:7). Pablom kaynata nirqa: “Dios kuyaq runaqa Diospa reqsisqanmi”, nispa (1 Cor. 8:3). Qawasqanchikman hinaqa, Dios reqsiwananchikpaqqa paytam kuyananchik. Kaynata tapukuy: “¿Imanasqataq kay revistata leechkani? ¿Diosta tukuy sonqoywan, yuyayniywan hinaspa kallpaywan serviyta munaspaychu? ¿Payman qokuruspay bautizakuruniñachu? Chayna kaptinqa, ¿imanasqam chayta rurarqani?”, nispa. Yuyarisun, hanaq pachapi Taytanchikqa lliw runakunapa sonqontam reqsin hinaspa ‘munayllapaqña kaqkunatam’ payman pusamun (leey Ageo 2:7 *; Juan 6:44). Hinaptinqa amistadnin kanapaq pusamuwasqanchikraykum payta servichkanchik. Payman sonqo kaptinchikqa manam haykapipas saqewasunchu. Aswanmi kuyakuywan waqaychawasun, paypaq ancha chaninniyoq kasqanchikrayku (Sal. 94:14).

4. ¿Imanasqam yuyaymanananchik Dioswan amistadninchik ancha allin kasqanmanta?

⁴ Jehová Dios payman pusawaptinchikqa, ¿imatam astawan rurananchik? Kuyakuyninpim takyananchik (leey Judas 20, 21). Bibliam cristianokunata niwanchik mana cuidakuspaqa, ‘pantarunamanta’ hinaspa ‘kawsaq Diosmanta rakikurunamantapas’ (Heb. 2:1; 3:12, 13). Chaynam pasarurqa Himeneo hinaspa Fileto cristianokunata, paykunamantam Pablo rimarqa 2 Timoteo 2:19 nisqanta manaraq rimachkaspan. Paykunaqa Jehová Diospaqmi karqaku, ichaqa cheqap yachachikuymantam karunchakururqaku (2 Tim. 2:16-18). Chaynallataqmi Galacia lawpi wakin iñiqkunawanpas pasarqa. Diospa reqsisqan kaspankupas, manam yachachikuyninpiqa takyarqakuchu (Gal. 4:9).  ¡Amayá haykapipas chaytaqa rurasunchu! Manam imawanpas tupachichwanchu Diospa amistadnin kaytaqa.

5. a) ¿Imayna kananchiktam Diosqa munan? b) ¿Pikunamantam yachasun?

⁵ Pipas Diospa reqsisqan kayta munaspaqa, paypa munasqanman hinam kawsanan (Sal. 15:1-5; 1 Ped. 3:4). Iñiyniyoq hinaspa humilde runataqmi kanan. Ñawpaq tiempopi Diosta serviq chayna iskay runakunamanta qawasun, chayna kasqankuraykum Diospa kuyasqan karqaku. Qawasuntaqmi hatunchakuq huk runamantapas, paymi Jehová Diospa amistadnin kasqanta piensaspanpas qepanchasqa karqa. Paykunamanta yachayqa allinninchikpaqmi kanqa.

‘Llapallan iñikuqkunapa taytan’

6. a) ¿Imaynatam Abrahamqa Diospa promesankunapi confiasqanta qawachirqa? b) ¿Imatataq Diosqa niyta munachkarqa Abrahamta ‘reqsisqanta’ nispanqa?

⁶ Bibliam niwanchik Abraham ‘Diospi iñisqanta’ hinaspa “llapallan iñikuqkunapapas taytan” kasqanta (Gen. 15:6; Rom. 4:11). Payqa wasinta, kapuqninta hinaspa amistadninkunatam saqerqa karu nacionman rinanpaq (Gen. 12:1-4; Heb. 11:8-10). Anchatam Diospi hapipakurqa. Watakuna pasaptinpas chaynam karqa. Achka kutipim chayna kasqanta qawachirqa, astawanraqmi churin Isaacta wañuchinanpaq Dios kamachiptin (Heb. 11:17-19). Diosqa yacharqam Abraham tukuy sonqonwan promesankunapi confiasqanta, chaymi anchatapuni chanincharqa hinaspam ‘reqsisqanmantapas’ nirqa (leey Genesis 18:19 *). Chaynata nispanqa manam kawsasqallanmantachu yacharqa, aswanqa amistadninta hinam kuyarqa (Sant. 2:22, 23).

7. ¿Imatam Abrahamqa Diospa promesankunamanta yacharqa hinaspa imaynatam chayta qawachirqa imayna kawsasqanpi?

⁷ Abrahamtam Diosqa nirqa Prometesqan Allpaman mirayninkuna yaykunankumanta hinaspa ‘lamar qochapa patanpi aqo hina’ kanankumantapas (Gen. 22:17, 18). Chayta qawananpaq manaña kawsaspanpas, Jehová Diospim hapipakurqa. Yacharqam Diosqa imapas nisqanta rurananmanta. Chayna iñiyniyoq kasqantam qawachirqa imayna kawsasqanwan (leey Hebreos 11:13). ¿Imatam nichwan ñoqanchikmanta? ¿Chayna iñiyniyoqtachu Dios reqsiwanchik?

Iñiyniyoq runakunaqa Diospim suyanku

8. ¿Imakunatam runakunaqa munanchik?

⁸ Runakunaqa munanchikmi allinlla kayta, casarakuyta hinaspa churi-wawayoq kaytapas.  Chayna kaptinpas wakinpiqa manam rurakunchu. Hinaptinqa, ¿imatam rurasun? Chaykunapi imayna tanteasqanchikmi qawachinqa imayna iñiyniyoq kasqanchikta.

9, 10. a) ¿Imatam wakinkuna ruranku munasqankunata haypanankupaq? b) ¿Imaynatam Diospa promesankunata qawanki?

⁹ Serviqninkunata hina Dios reqsiwananchikta munaspaqa, manachá allinchu kanman paypa contranpi kaqkunata ruraspa chaykunata haypayqa. Wakinkuqa Bibliapa yachachisqanpa contranpi ruraspankum hampichikunku. Wakinkunañataq familianmantawan congregacionmanta karunchaq llamkayta chaskinku. Hukkunañataqmi Jehová Diosta mana serviq runakunawan reqsinakuyta qallarinku. ¿Yaqachu Jehová Diospa amistadninta chaninchachkanku chayna ruraqkunaqa? Abrahampi piensasun. Sichu Diospa promesankuna rurakunanpaq suyasqanta amiruspa, chaynataq allinta kawsananpaq sumaqllaña wasikunata rantikuruspa hinaspa ancha reqsisqa kayta maskaptinqa, ¿imatam Diosqa ninman karqa? (Tupachiy Genesis 11:4.) ¿Hinallachu payta yanapanman karqa?

¹⁰ ¿Ima munasqaykikuna rurakunantam munanki? ¿Iñinkichu Jehová Dios tukuy ima munasqaykita qosunaykimanta? (Sal. 145:16.) Ichaqa Abrahamta pasasqanman hinam, Diospa wakin promesankunaqa ichapas mana chayllachu cumplikunqa. Ichaqa Abrahampa iñiyninta qatipakunapaq kallpanchakuspaqa, Diosqa manam qonqawasunchu hinaspam suyasqanchikkunata chaskisun (Heb. 11:6).

Manam chaynallachu karqaku

11. ¿Imatam nichwan Coreymanta hinaspa imaynam unay wata karqa?

¹¹ Moisestawan Coreytaqa manam chaynallatachu Jehová Diosqa qawarqa. ¿Imanasqa? Paykunaqa manam chaynallatachu qawarqaku Diospa kamachisqankunataqa. Coreyqa Leviy castamantam karqa, Coat ayllumanta. Payqa qawarqam Puka lamar qochamanta Dios llaqtanta salvasqanta, allinpaqmi qawarqa Sinai orqopi mana kasukuqkunata Dios wañuchisqanta hinaspa yanaparqataqmi Diospa baulnin apasqa kananpaqpas (Exo. 32:26-29; Num. 3:30, 31). Yaqachusmi unay wata Diosman sonqo karqa, chayraykum achka israelitakuna respetarqaku.

12. ¿Imaynam Coreyqa Dioswan amistadninpi karqa hatunchakusqanrayku, 28 paginapi qawasqanchikman hina?

¹² Ichaqa Prometesqa Allpaman risqankupim, Coreyqa manaña allinpaqñachu qawarqa Diospa llaqtan imayna pusasqa kasqanta. Chaymi 250 reqsisqa israelitakunawan munarqa tanteasqankuna rurakunanpaq. Yaqapaschá piensarqaku Diospa chaskisqan kasqankuta, chayraykum Moisespa contranpi hoqarikurqaku. Moisestawan wawqen Aarontam nirqaku: “¡Chaynallañayá qamkunapa munaychakuynikichikqa kachun! Llapallan kay runakunapas Diospa sapaqchasqanmi kachkan chaynataqmi paykunawantaq Tayta Diospas kachkan”, nispa (Num. 16:1-3). ¡Hatunchakuq kasqankutamá qawachichkarqaku! Piñakurunanmantaqa Moisesmi nirqa: ‘Diosmi qawachiwasunchik [. . .] pim paypaq sapaqchasqa kasqanta’, nispa (leey Numeros 16:5). Paqarinnintintam Coreywan yanapaqninkuna wañuchisqa karqaku (Num. 16:31-35).

13, 14. ¿Imaynatam Moisesqa qawachirqa humilde kasqanta?

¹³ Coreymantaqa “Moisesmi karqa chay tiempopi llapallan runakunamantapas ancha humillakuq runa” (Num. 12:3). ¿Imaynatam chayna kasqanta qawachirqa? Diospa kamachisqankunata sonqomanta kasukuspanmi (Exo. 7:6; 40:16). Bibliaqa manam willawanchikchu Jehová Diospa kamachisqankunata otaq tanteasqankunata sapa kuti yanqachasqanmantaqa. Piensasun Diospa yachanan karpanta ruranankupaq Jehová Dios kamachisqanpi. Moisestam kamachirqa cortinakuna imayna rurakunanmanta,  qaytupa colorninmanta, hayka ojalniyoq kananmanta hinaspa hukkunamantapas (Exo. 26:1-6). Unay watañam Jehová Diosqa punta apaqkunata servichikurqa llaqtanta pusananpaq. Ichapas hukmanyasqa tarikunchik imatapas imayna rurasqa kananpaq kamachiwaptinchik. Ichaqa Jehová Diosqa mana pantaq kaspanmi yachan imarayku serviqninkunapi confiasqanta. Hinaptinqa, imapas imayna rurakunanmanta niwaptinchikqa allinninchikpaqmi. Yachanan karpanta imayna rurakunanpaq Moisesta kamachispanqa, manam Diospaqqa piñakurqachu nitaq piensachirqachu mana ruray atisqantaqa. Aswanqa tukuypim kasukurqa, qawarqataqmi llamkaqkunapas Diospa nisqanman hina chay karpata ruranankupaq (Exo. 39:32). ¡Mayna humilde kasqantam Moisesqa qawachirqa! Payqa reqsikurqam Diosmanta chay ruray kasqanta, hinaspa serviqnillan kasqantapas.

¹⁴ Watakuna pasaruptinmi huk sasachakuypi tarikuptin kaqmanta qawachirqa humilde kasqanta. Chaypim israelitakunaqa contranpi rimayta qallaykurqaku. Hinaptinmi Moisesqa mana allinta ruraruspan Diostapas hatuncharqachu. Chayna rurasqanmantam Diosqa nirqa Prometesqa Allpaman mana yaykunanmanta (Num. 20:2-12). Payqa wawqen Aaronwanmi unay watakunata aguantarqaku israelitakunapa mana allin rimasqankuta. Kunanñataqmi mana allin rurasqanmanta Diosqa nirqa suyasqanta mana qawananmanta. ¿Imaynam tarikurqa? Hukmanyasqa tarikuspanpas Diospa nisqantam allinpaq hapirqa. Yacharqam Diosqa ‘allinninpi derecho ruraq’ kasqanta (Deu. 3:25-27; 32:4). Arí, Jehová Diosqa Moisestam reqsirqa kasukuq serviqninta hina (leey Exodo 33:12, 13).

Humildem kananchik Diosta kasukunapaq

15. ¿Imatam yachanchik Coreypa rurasqanmanta?

¹⁵ Kunanpas Diospa llaqtanpi punta apaqkunaqa imakunamantapas tanteaspankum cambiachkanku. ¿Imaynatam chaykunata qawanchik? Yuyarisun, Diospa nisqankunata kasukuptillanchikmi payqa chaskiwasun. Manam Coreypa rurasqantaqa qatipakunachu. Paytawan amistadninkunatam Diosqa qepancharurqa munasqanman hina imatapas rurasqankurayku  hinaspa hatunchakuq chaynataq mana iñiyniyoq kasqankuraykupas. Israelitakunapaq Moises sapa punchaw tanteaptinpas, Coreyqa manam reqsikurqachu Jehová Dios israelitakunata pusasqantaqa. Chayna rurasqanwanmi qawachirqa Diospa churasqan runakunata mana kasukusqanta. ¡Mayna allinmi kanman karqa Diospi hapipakuyninqa! Diosqa yanapanmanmi karqa paypa qawasqanman hina qawananpaq otaq imatapas allichanmanmi karqa. Ichaqa Coreyqa manam chaynatachu rurarqa, chaymi hatuntukuq kasqanrayku Dios servisqanta yanqacharurqa.

16. ¿Imaynatam Moisespa humilde kasqan yanapawanchik?

¹⁶ Coreypa rurasqanmi llapallanchikta, ancianokunatapas huk yachachikuyta saqewanchik. Ancha allinpunim humilde kayqa, kaymi yanapawasun Jehová Diospi hapipakunanchikpaq hinaspa llaqtanpi punta apaqkunapa nisqankunata kasukunapaq. ¿Kallpanchakuchkanchikchu Moises hina humilde kananchikpaq? ¿Reqsikunchikchu punta apaqkuna Diospa churasqan kasqankuta hinaspa kasukunchikchu niwasqanchikkunata? ¿Yachaywanchu allichanchik hukmanyasqa tarikusqanchikta? Humilde hinaspa kasukuq kaspanchikqa Jehová Diosmi reqsiwasun hinaspa anchatapuni kuyawasun.

Diosqa “reqsinmi pim paypa kasqantaqa”

17, 18. ¿Imam yanapawasun Diospa chaskisqan kanapaq?

¹⁷ ¡Anchatamá yanapawanchik Diospa pusamusqan amistadninkunamanta yachayqa! Qawasqanchikman hinam, Abrahanwan Moises pantaq runakuna kaspankupas Diospa chaskisqanmi karqaku. Coreymi ichaqa Diosmanta karunchakuruspan qepanchasqa karqa. Chayraykum tapukunanchik: “¿Jehová Diosqa reqsiwanchu kasukuq serviqninta hina? ¿Imatam yacharuni Bibliapi willakuq kay serviqninkunamanta?”, nispa.

¹⁸ Anchatam kusikunchik Jehová Dios payman pusamuwasqanchikmanta hinaspa chaninchawasqanchikmantapas. Payman sonqo hinaspa iñiyniyoq chaynataq humilde kaspaqa, astawanmi chaninchawasun. Paypa reqsisqan kayqa ancha kusikunapaqmi. Chayraykum kunanpas hinaspa hamuq tiempopipas suma-sumaq bendicionkunata chaskisun (Sal. 37:18).

[Willakuykuna]

Yuyarinapaq

• ¿Imataq yanapawanchik Jehová Diospa amistadnin kanapaq?

• ¿Imaynatam Abrahampa iñiyninta qatipakuchwan?

• ¿Imatam yachanchik Coreymantawan Moisesmanta?

[Kay yachachikuypa tapukuyninkuna]

[26 kaq paginapi dibujo]

¿Abraham hinachu Jehová Diospa promesankunapi confiani?

[28 kaq paginapi dibujo]

Coreyqa manam respetarqachu Jehová Diospa churasqan kaqkunataqa

[29 kaq paginapi dibujo]

¿Jehová Diosqa qawawanchikchu kasukuq hinaspa humilde kasqanchikta?