Hukkunawanpas kusikusun

SAPA kutim astawan sasachakunchik kusisqa kawsananchikpaq. Achka runakunam ninku kallpanchawaqninchik kaqkunata hukkunaman willay allin kasqanta. Ichaqa hatun llaqtapi imayna kawsasqanchikraykum chaykuna ruraytaqa mana atinchikchu.

Alberto Oliverio sutiyoq profesorpa nisqanman hinaqa, sapallanchik sientikuyqa manam admirakunapaqchu hinaspam hatun llaqtapi kaspanchikpas chaynam sientekuchwan. Chayna tarikuspankum runakunaqa llamkaqmasinkupi, vecinonkupi hinaspa rantikuqkunapipas mana reparankuchu. Kay profesorpa nisqanman hina chayna tarikuyqa hukmanyachiwanchikmanmi.

Ichaqa imayna tarikusqanchikrayku hinaspa Diospa espiritun yanapawasqanchikraykum mana chaynachu kanchik. Apostol Pablopas kaynatam niwanchik: “Tukuy tiempoyá kusisqa kaychik”, nispa (1 Tes. 5:16). Achka razonkunam kan chayna tarikunanchikpaq hinaspa hukkunawan kuska kusirikunanchikpaqpas. Taytanchik Jehová Diostam yupaychanchik, Bibliapi cheqapmantam  entiendenchik, wiñay kawsayta chaskinapaq suyakuyniyoq kanchik hinaspapas runakunatam yanapanchik chay bendicionkunata chaskinankupaq (Sal. 106:4, 5; Jer. 15:16; Rom. 12:12).

Cheqap cristianokunaqa kusisqam kawsanku hinaspa hukkunawanpas kusikunkutaqmi. Chaymi Filipos cristianokunaman Pablo nirqa: “Kusikuywanmi rurayman, kusikuymantaqmi llapallaykichikwanpas. Chaynaqa chaykunamantayá qamkunapas ñoqawan kuska kusikuychik”, nispa (Fili. 2:17, 18). Pabloqa iskay kutikamallam kusisqa kaymanta rimarqa hinaspa iñiqmasinchikwan kusikunamantapas.

Chaynaqa, kusikuyninchikqa manam ñoqallanchikpaqchu kanan, chayna kaptinqa iñiqmasinchikkunawanpas kusikuytaqa manam atisunchu. Pabloqa niwanchiktaqmi: “Señorninchikpiyá kusikuychik”, nispa (Fili. 3:1). ¿Imaynatam iñiqmasinchikkunawanpas kusikuchwan?

Iñiqmasinchikkunawanpas kusikusun

Filipos iñiqmasinkunaman Pablo qellqaspanqa yaqapaschá Romapi preso tarikurqa predicasqanrayku (Fili. 1:7; 4:22). Ichaqa preso kasqanqa manam hukmanyachirqachu hinalla kusisqa predicananpaqqa. Hinallam Jehová Diosta kusisqa servirqa haykapipas, ‘Diosman ofrendata’ qochkaq hina (Fili. 2:17). Pablopa kusisqa kasqanqa manam imayna tarikusqanmantachu karqa, aswanmi preso kachkaspanpas kaynata nirqa: “Mastaraqmi kusikusaq”, nispa (Fili. 1:18).

Filipos congregacionpa qallariyninmantam Pabloqa chaypi karqa, chaymi paykunata anchata kuyarqa. Yacharqataqmi Dios serviypi kusikuyninta willasqan paykunatapas kallpanchananmanta. Chaymi kaynata qellqarqa: “Wawqe-panillaykuna, yachanaykichiktam munani, tukuy ima sucedewasqanwanqa Cristomanta allin noticiam aswanraq mirarun. Chayraykum Palaciopi kaq lliw soldadokunapas chaynataq wakin runakunapas Jesucristorayku preso kasqayta yacharunku”, nispa (Fili. 1:12, 13). Kay kusikuyninmanta willaspanmi Pabloqa Filipos iñiqmasinkunawan kusikusqanta qawachirqa. Paykunapas chay willasqanwanqa kusikurqakuchá. Arí, kallpanchakunankum karqa Pablopa preso kasqanwan mana hukmanyanankupaq hinaspa imayna kasqanta qatikunankupaqpas (Fili. 1:14; 3:17). Filipos cristianokunaqa atinmankutaqmi karqa paypaq Dios mañakuyta hinaspa ima yanapakuy qoytapas (Fili. 1:19; 4:14-16).

 ¿Pablo hinachu kanchik? ¿Kallpanchakunchikchu allin kaqkuna pasawasqanchikpi piensanapaq hinaspa predicasqanchikpipas? Iñiqmasinchikkunawan kaspaqa allinmi kanman predicasqanchikpi imapas pasawasqanchikmanta willayninchik. Chayqa manamá admirakuypaqraqchu kanan. Ichapas predicaspa imayna qallarisqanchikwan uyariwasqanchikmanta otaq yuyaymanachisqanchikmanta willachwan. Ichapas Bibliapa huk kaqnin textonmanta unayta rimarqanchik otaq Jehová Diospa testigon kasqanchikta musyarqaku, chaywanqa ñam willakuchkanchikña. Sapa kuti kaykunamanta rimaspaqa llapallanchikmi kusirikuchkanchik.

Achka Dios serviqkunam anchata kallpanchakunku predicaq lloqsinankupaq. Precursorkuna, congregacionta watukuq ancianokuna, Betelpi llamkaqkuna, misionerokuna hinaspa huñunakuna wasita ruraqkunam tukuy tiemponkuwan kusisqa llamkanku. Anchatam kusikunchik ‘Diospa munayninta willakuqkunawan’ kuska (Col. 4:11). Chayna kaptinqa, ¿imanasqataq chaninchasqanchikta mana qawachinchikchu? Paykunawan huñunakuypi otaq asambleapi kaspanchikqa kallpanchanakuchwanmi. Chaynallataqmi kusikuyninkuta hinaspa ejemplontapas qatipakunanchik. Wakinpiqa imapas pasasqanmanta willawaptinchik chaynataq niwasqanchikwan kallpanchawaptinchikqa, paykunawan kuska mikunanchikpaqmi nichwan (Fili. 4:10).

Kusikusuntaq sasachakuypi kaqkunawanpas

Pabloqa qatikachasqa kayta hinaspa sasachakuytam atiparqa, chaykuna pasasqanmi kallpancharqa Diosman sonqo kananpaq (Col. 1:24; Sant. 1:2, 3). Chaymantapas kusisqam tarikurqa Filipos cristianokunata ejemplonwan yanapasqanmanta, paykunapas Pablopa sasachakuyninwan hinachá tarikurqaku. Chaychá kusikuyninmanta kaynata qellqarqa: “Cristoraykum Diosqa favoreceykusunkichik ichaqa manam payman iñinallaykichikpaqchu aswanqa payrayku ñakarinaykichikpaqwanmi. Chaynaqa kankichik sasachakuypi kasqayta qawasqaykichikpi hinam hinaspa kunan uyarisqaykichikpi hinam”, nispa (Fili. 1:29, 30).

Kunanpas achka cristianokunam sasachakuypi tarikunku cheqapmanta willakusqankurayku. Wakinpiqa maqachikunkupas ichaqa manam chayllachu. Diosta qepanchaqkuna, ayllunchikkuna hinaspa estudiaq otaq llamkaqmasinchikkunam burlakuwaspanchik hukmanyachiwanchikman. Jesusqa willawarqanchikñam chaykunawan hukmanyanamantaqa aswan kusikunamanta. Nirqam: “Mayna kusisqam kankichik ñoqarayku runakuna kamispa ñakarichisuptikichikqa hinaspa contraykichikpi llullakuspa tukuy imatapas nisuptikichikqa. Anchatayá kusikuychik, hatun premiotam chaskinkichik hanaq pachapi”, nispa (Mat. 5:11, 12).

Huk law nacionpi iñiqmasinchikkuna qatikachasqa kasqankumanta willakuy chayamuwaptinchikqa, manam llumpaytaqa hukmanyananchikchu nitaq llakikunanchikchu. Aswanqa kusikunanchikmi Diosrayku chayna tarikusqankumanta. Chaymantapas Diostam iñiytawan kallpata qonanpaq mañakunanchik (Fili. 1:3, 4). Chaykunamanta huktaqa manam ima rurayta atichwanchu paykunaraykuqa. Ichaqa congregacionninchikpi iñiqmasinchikkuna sasachakuypi kaptinqa yanapachwanmi. Chaymantapas paykunawanqa kusirikuchwanmi Familiawan Diosta Yupaychana Tutapaq, predicananpaq otaq ñoqanchikwan kuska kanankupaq nispanchik.

Achka razonkunam kan kusisqa kananchikpaqqa. Amayá kay pachapi runakuna hinaqa sapaqchakusunchu aswanqa iñiqmasinchikkunawan kusikusunchik. Chaynapim iñiqmasinchikkunawan astawan kuyanakusun, huñulla kasun hinaspapas kusirikusunmi (Fili. 2:1, 2). Chaymantapas ama qonqasunchu Pablopa kayna nisqanta: “Señorninchikwan huklla kaspayá tukuy tiempo kusikuychik, huktawanraqmi nikichik: Kusikuychikyá” (Fili. 4:4).

[6 kaq paginapi reqsikusqanchikmanta]

Globo terráqueo: cortesía de Replogle Globes