Solterokunapaq hinaspa casadokunapaq allin consejokuna
Solterokunapaq hinaspa casadokunapaq allin consejokuna
“Kaytaqa nikichik allinnikichikpaqmi, manam harkakuspaychu aswanqa allinta kawsaspa mana hukpi afanakuspa Señorta servinaykichikpaqmi” (1 COR. 7:35).
1, 2. ¿Imanasqam solterokunapaqwan casadokunapaq Bibliapi consejokunamanta yachananchik?
QARIKUNAWAN warmikunawan kawsayninchikpiqa kusikuyta, llakikuyta, sasachakuyta, hukmanyayta hinaspa uma nanaykunatam tarinchik. Cristianokunaqa Jehová Diospa yanapakuynintam maskananchik mana piwanpas sientesqanchikpi sasachakurunapaq. Ichaqa manamá chayraykullachu Jehová Diosmanqa asuykuna. Wakin solterokunam sapanku kusisqa tarikuspankupas sasachakunku, ayllunkuna hinaspa amistadninkuna casarakunanpaq hikutaptinku. Wakinñataqmi casarakuyta munanku, ichaqa manamá tarinkuchu piwan casarakunankupaq. Casarakunankupaq rimanakuqkunapas yanapachikunankum casarakuruspanku allinta kawsanankupaq. Sapallanchikraq kaspapas otaq casadoña kaspapas llapanchikmi huchapakuyman mana wichinapaq kallpanchakuna.
2 Imayna tarikuptinchikpas, chay sasachakuykunam yanqachanman kawsakuyninchikta, aswantaraqmi Dioswan amistadninchiktapas. Chayraykumá qawarina apostol Pablopa consejasqankunata, paymi Corinto llaqtapi cristianokunaman punta kaq cartanpi 7 capitulonpi solterokunaman chaynataq casadokunamanpas consejarqa. Payqa nirqam ‘allinta kawsakunapaq’, mana penqaypi kanapaq hinaspa ‘mana hukpi afanakuspa Señorta servinaykichikpaq’ (1 Cor. 7:35). Kay nisqanman hina, qatiqninpi qawasun soltero otaq casado kasqanchikta Jehová Diosta servinapaq imayna servichikunamanta.
Sapakamam tanteakunanchik
3, 4. a) ¿Imataq pasanman ayllun otaq amistadnin soltero kasqanrayku llumpayta llakikuptinkuqa? b) ¿Imaynatam yanapawanchik apostol Pablopa consejonqa casarakuyta imayna qawanapaq?
3 Punta pachak watakunapim judio castakunapaq ancha allin karqa casarakuy. Chaynallataqmi kunanpas wakin llaqtakunapiqa. Pipas yuyayniyoqña kaspan unay wataña sapallanraq kaptinqa, ayllunkuna hinaspa amistadninkunam llakikunku, chaymi pitapas qawachinku rimapayananpaq. Yaqapaschá chayrayku yananta maskapunmanku otaq qawachinmanku pim paywan casarakunanpaq hina kasqanta. Wakinpiqa tanteanmankutaqmi imaynatapas tupachinankupaq. Kay ruraykunam ichaqa penqaypi churanman, amistadnintapas cheqninachinmanmi chaynataq sonqontapas nanachinman.
4 Pabloqa manam pitapas casarakunanpaq nitaq solterolla kananpaqqa haykapipas hikutarqachu (1 Cor. 7:7). Payqa, Jehová Diosta sapallan kusisqa servispanpas allintam qawarqa casarakuqkunataqa. Soltero otaq casado kayta munaspaqa, sapakamam tanteakunanchik mana piwanpas hikutachikunapaq.
Soltero kayta allinta servichikusun
5, 6. ¿Imanasqataq Pabloqa nirqa soltero kay allin kasqanta?
5 Corinto llaqtapi cristianokunaman qellqasqanpim Pabloqa qawachirqa soltero kaspa Diosta aswan allin servinamanta (leey 1 Corintios 7:8). Mana casarasqa kaspanpas manam haykapipas hatuntukurqachu kunan tiempopi cristiano tukuqkuna hinaqa. Aswanmi qawachirqa Diospa munayninmanta willakuqkunapaq soltero kayninku ancha allin kasqanta. ¿Imanasqa?
6 Soltero kaspaqa Dios serviypi wakin llamkaykunatam astawan chaskiyta atinmanku, casado kaymantaqa. Soltero kasqanraykum Pablopas ‘mana judio kaqkunapaq apostol’ karqa (Rom. 11:13). Hechos libropi 13-20 capitulonkunata leespam qawanchik, imaynam payqa huk musionerokunawan karu llaqtakunapipas Diospa munaychakusqanmanta willakamurqaku. Chaynapim congregacionkunatapas kaypi-chaypi hatarichirqaku. Chaymantapas, mana pasasqanchik sasachakuykunapim tarikurqa (2 Cor. 11:23-27, 32, 33). Ichaqa lliw runakunamanmi kusikuywan Diosmanta yachachiq, kikinpi mana reparaspa (1 Tes. 1:2-7, 9; 2:19). ¿Atinmanchu karqa casado hinaspa churiyoq kaspan chaykuna rurayta? Manapaschá.
7. ¿Imaynatam iskay precursorakuna soltera kasqankuta allinta servichikunku?
7 Achka cristianokunam soltero kasqankuta allinta servichikunku, Diospa munaychakusqanmanta astawan willakunankupaq. Bolivia nacionpi Sara hinaspa Limbania sutiyoq precursorakunam astakurqaku mana pipapas predicasqan karu llaqtachaman. Chay llaqtapi luzninku mana kaptinpas manam sasachakunkuchu, ninkum: “Radiowan televisionpas mana kasqanraykum runakunaqa mana sasachakuspanku gustollawanña imatapas leenku”, nispa. Wakinkupam ñawpa qellqanchikkuna kapusqa, kunan manaña aypukuptinpas paykunaqa hinallam leenku. Kay paninchikkunam yaqa llapan wasikunapi tarinku Diosmanta yachay munaq runakunata, chaymi ñaka-ñakayta chayanku llapallan wasikunaman. Yuyaqña warmim nisqa: “¡Puchukay tiempom hichpaykaramunña! Chaymi Jehová Diospa testigonkunapas kaykama chayaramunku”, nispa. Paninchikkuna kallpanchakusqankuraykum chay llaqtamanta achka runakuna huñunakuyman riyta qallaykurqaku.
8, 9. a) ¿Ima niytam munachkarqa Pabloqa soltero kay ancha allin kasqanmanta rimaspanqa? b) ¿Imakuna ruraytam solterokunaqa atinmanku?
8 Casadokunapas allintam llamkanku predicanapaq sasa kaq llaqtakunapiqa. Ichaqa solterokunam astawan riyta atinmanku casadokuna otaq churi-wawayoqkuna mana riy atisqanku karu llaqtakunamanpas. Diosta servinapaq soltero kay ancha allin kasqanmanta Pablo rimaspanqa, nichkarqam achkallaña llamkay kasqanmanta. Payqa munarqam Diosta serviypi pay hina ancha kusikuyta tarinankumanta.
9 Estados Unidospi huk precursoram qellqarqa: “Wakinkum ninku kusisqa kanapaqqa casarakunaraqmi nispanku. Ichaqa manam chaynachu, ñoqam qawarqani kusisqa kawsakuyqa Jehová Dioswan amistadninchikmanta kasqanta. Ichaqa, solterolla kanapaqqa kallpanchakunam, chayta allinta servichikuptinchikqa allin regalo hinam kanqa”, nispa. Nirqataqmi: “Kusisqa kawsakuyta yanqachananmantaqa, allinpaqmi kanman solterolla kayqa. Jehová Diosqa llapanchiktam kuyawanchik casadotapas, solterotapas”, nispa. Kunanmi chay paninchikqa kusisqa predicachkan mana llumpay Testigokunapa kasqanpi. Llapan solterokunam tapukunanku: “¿Servichikuymanchu soltero kasqayta Jehová Diosmanta astawan willakunaypaq?”, nispa. Chaynaqa yaqapaschá soltero kaynikiqa Diosmanta ancha chaninniyoq regalo kanman.
Casarakuyta munaq solterokuna
10, 11. ¿Imaynatam Jehová Diosqa yanapan casarakunankupaq mana tariqkunata?
10 Unay wataña soltero karuspankum wakiqnin iñiqmasinchikkunaqa casarakuytaña munanku. Chaypaq yanapakuyta necesitasqankuta reqsikuspankum Jehová Diosta mañakunku allin vida pasaqmasinta tarinankupaq (leey 1 Corintios 7:36 *).
11 Wakin cristianokunam casarakuyta munanku tukuy sonqowan Diosta serviq iñiqmasinwan. ¿Chaynachu qampas tarikunki? Chaynaqa sapa kutiyá Diosta mañakuy (Fili. 4:6, 7). Unayña suyaspapas, ama hukmanyaychu. Segurom kawaq Diosqa qanpi reparasqanmanta, chaynataq hawkayayta tarinaykipaq yanapasunaykimantapas (Heb. 13:6).
12. ¿Imanasqam allinta tanteana casarakunapaq manaraq arí nichkaspa?
12 Wakin casarakuy munaq iñiqmasinchikkunatam, iñiyninkupi mana allin takyasqa otaq mana iñiqmasinpas rimapayanku casarakunankupaq. Sapanchik kay sasa kaptinpas, astawanraqmi ñakarichikunman casarakunapaq mana allinta akllaruptinchikqa. Arí niruspaqa manam kutirichwanñachu, allinpaq otaq mana allinpaq kaptinpas (1 Cor. 7:27). Chaynaqa amayá haykapipas mana tantearispaqa arí nisunchu. Manachayqa wañunanchik punchawkamam pesakuchwan (leey 1 Corintios 7:39).
Imaynatam preparakuna casado vidapaq
13-15. ¿Ima sasachakuykunamantam rimana manaraq casarakuchkaspa?
13 Qawamusqanchikman hinaqa, Pablom nirqa soltero kayqa allin kasqanta, ichaqa manam haykapipas mana valeqta hinaqa qawarqachu casarakuy munaqkunataqa. Aswanqa, chuya espiritupa yanapakuyninwanmi qellqarqa casadokuna allin kawsakunankupaq consejokunata.
14 Wakin casarakuy munaqkunaqa mosoqmantam yuyaymanananku casarakuruspa imayna kanankupi. Casarakunankupaq reqsinakuqkunaqa piensankupaschá ancha kuyanakusqankurayku casado vidapi imawanpas mana sasachakunankuta. Casarakunan punchaw chayaramuptinmi piensanku wiñaypaq kusisqallaña kawsakunankuta. Sichum allinta musyanmanku imaynam casado vida kasqanta, hinaptinqa yachanmankum mana munay ima sasachakuykunapas kananmanta, manataqmi wayllunakusqallankuwanchu allichanqaku ima sasachakuyninkutapas (leey 1 Corintios 7:28). *
15 Chayraq casarakuspankum wakinkuqa qosanwan otaq señoranwan mana chaynalla piensasqankumanta admirakunku. Yaqapaschá mana tupanmanchu qollqemanta, kusirikuykunamanta, maypi yachanankumanta otaq ayllunku watukunankumanta rimasqankupas. Ichapas llumpayta sasachanman manaraq casarakuchkaspa mana kaqpaqpas hapisqanku mana allin mañankuna. Chayraykum manaraq casarakuchkaspanku kaykunamanta rimananku.
16. ¿Imanasqam casadokunaqa tanteanakunanku sasachakuyninkuta allichanankupaq?
16 Casadokunaqa kusisqa hinaspa hawkam kawsakunqaku kuskanku tukuy sasachakuykunata allichanankupaq kallpanchakuspankuqa. Sumaqtam parlananku warmankuta imayna uywanankumanta chaynataq yuyaqyaq tayta-mamanku imayna cuidanankumantapas, manam chaykunawanqa sientichinakunankuchu. Bibliapa nisqanman hina ruraspankuqa manam sasachakunqakuchu allichanankupaqqa, chaynamá kusisqa hinaspa hawkalla kawsakunqaku (1 Cor. 7:10, 11).
17. ¿Imakunataq “kay pachapi kaqkunamanta” casadokunapa afanakusqankuqa?
17 Pabloqa nirqam casadokuna imakunatawan pasanankumanta (leey 1 Corintios 7:32-34). Nirqam casado qarikuna “kay pachapi kaqkunamanta” afanakunankuta, huk rimaypiqa mikuymanta, pachamanta, wasimanta hinaspa imamantapas. ¿Imanasqam llumpayta preocupakunku? Señoran hawkalla hinaspa kusisqa kananta munasqanraykum. Soltero kaspanqa Dios serviyllapim afanakuq, casarakuruspanñataqmi señoranpaqña tiempochakunan hinaspa kallpanchakunan. Chaynatam warmikunapas ruranan. ¡Mayna allinmi hanaq pachapi Taytanchik chay necesitasqanchikmanta yachasqanqa! Payqa yachanmi casado vidanku allin takyasqa kananpaq Dios serviyninkumanta tiempochakunankuta hinaspa kallpanchakunankuta.
18. ¿Maymantam tiempota horqona casado vidanchikpaq?
18 Pablopa nisqanmantaqa kaytapas yachachwantaqmi: casadoqa vida pasaqmasinpaqmi Dios serviyninmanta tiempochakunan, chaynam tiempochakunantaq amistadninkunawan kasqanmantapas. Kaypi piensarisun: ¿Imaynach señoranqa sientikunman qosan soltero hina sapa kuti amigonkunawan pukllaq pasakuptinqa? ¿Imaynach qaripas sientikunman señoran amigankunallawanña pasakuptinqa? Chayna kaptinqa iskayrayanmankum kuyanakusqankumanta hinaspapas saqesqa hinach llakisqa tarikunman. Ichaqa manam kaykunaqa pasanmanchu kuyanakuyninkupi takyasqa kananpaq kuskanku kallpanchakuptinkuqa (Efe. 5:31).
Jehová Diosqa chuya kananchiktam munan
19, 20. a) ¿Manañachu haykapipas huchallikuchwan casarakuspaqa? b) ¿Ima sasachakuypim casadokunaqa tarikunmanku unayta karunchakuspankuqa?
19 Jehová Diosta serviqkunaqa yachanchikmi huchapakuymanta ayqeyqa ancha allin kasqanta. Chayraykumá wakinqa casarakunku. Ichaqa manamá nichwanchu: casarakuruspayqa manañam haykapipas huchallikusaqchu nispaqa. Ñawpa tiempopim murallasqa llaqtakunapa ukunpi kaqkunalla hawka tarikuqku. Chaymanta lloqsiqkunam ichaqa, suwachikuqku hinaspa wañuchisqapas kanmanku karqa. Chaynamá casadokunapas Jehová Diospa kamachisqanman hina kawsaspankuqa mana huchallikunqakuchu.
20 ¿Ima kamachikuykunataq chaykunaqa? Pablom 1 Corintios 7:2-5 nisqanpi chaymanta willarqa. Señorallanwanmi qariqa puñunan hinaspam debernintapas cumplinan, chaynataqmi warmipas qosallanwan. Ichaqa wakinkum chaypiqa mana reparankuchu, hinaspam llamkayrayku otaq sapakama huklawkunaman illasqankurayku qosankumanta otaq señorankumanta unay tiempo karunchakunku. ¡Mayna llakikunapaqchá kanman, pipas chayrayku Diablopa toqllanman wichiykuspan ‘mana controlakusqanrayku’ huchapakuyninqa! Jehová Diosqa allin kawsakuytam llapan qosakunaman qonqa casado vidankupi allin takyanankupaq kallpanchakuptinkuqa (Sal. 37:25).
Allinmi Bibliapi consejokuna kasukuyqa
21. a) ¿Imanasqataq soltero otaq casado kanapaq tanteayqa sasa? b) ¿Imaynatam 1 Corintios 7 capitulon yanapawanchik?
21 Soltero kanapaq chaynataq casado kanapaq tanteayqa sasam. Llapanchikmi pantaq kanchik, chayraykum ima sasachakuypipas tarikunchik. Chaymi Jehová Diospa favorecesqan kaspapas, soltero otaq casado kaspapas wakinpiqa sasachakunchik. Imayna kaptinpas, 1 Corintios 7 capitulonpi consejokunata kasukuq cristianoqa manamá ñakarinqachu, aswanmi Diospa qayllanpi ‘allinta ruranqa’ soltero otaq casado kaspanpas (leey 1 Corintios 7:37, 38 *). Manamá kanchu imapas aswan allinqa Jehová Diospa chaskisqan kaymantaqa. Chayna kaspaqa wiñaypaqmi kawsakusun mosoq pachapi, chaypiqa manam qaripas warmipas sasachakusunñachu kay pachapi runakunapa piensasqankunawanqa.
[Willakuykuna]
^ par. 10 1 Corintios 7:36 (NM): “Ichaqa pipas warmiwan otaq qariwan manaraq puñuchkaspan mana controlakuy atisqanta piensaspanqa, mozo-sipas kasqan waytariyta pasaruptinqa, munasqanta rurachun manam huchallikunchu. Casarakuchun”.
^ par. 14 Qaway Familiaykiwan kusisqa kawsakuy, niq qellqapa 2 kaq capitulonpi, 16-19 parrafonkunata.
^ par. 21 1 Corintios 7:37, 38 (NM): “Ichaqa pipas sonqonpi tantearunman, hinaspa mana munanmanchu aswanqa munayninkunapi controlakun hinaspa solterolla kananpaq sonqonpi tantearuspanqa, allintam ruran. Chaymantapas casarakuqqa allintataqmi ruran, mana casarakuqmi ichaqa aswan allintaraq ruran”.
¿Yachankichu?
• ¿Imanasqataq mana hikutanachu pitapas casarakunanpaqqa?
• ¿Imaynatam tiemponta allinta servichikunman soltero cristianoqa?
• ¿Imaynatam tanteananku rimapayanakuqkunaqa casado vidankupaq?
• ¿Manañachu haykapipas huchallikuruchwan casarakuspaqa?
[Kay yachachikuypa tapukuyninkuna]
[14 kaq paginapi dibujokuna]
Soltero cristianokunaqa astawanmi kusikunku Diosta aswan servinankupaq tiempochakuspanku
[16 kaq paginapi dibujo]
¿Imatam manaña ruranachu soltero kasqanchikpi hinaqa?
