Aswan rurayniyoq kanankupaq yanapasun

“Astawan yachaspanqa yachachiqnin hinam kanqa” (LUC. 6:40).

1. Kay Pachapiraq Jesus kachkaspanqa, ¿imatam rurarqa allpantinpi hinalla predicakunanpaq?

APOSTOL Juanmi qellqasqanpa tukuyninpi kaynata nirqa: “Achkallañam kachkan Jesuspa tukuy ima rurasqankunaqa, sichu sapakamamanta qellqaptinkuqa piensasqayman hinaqa manachá kay pachapas haypanmanchu llapa libro churanapaq”, nispa (Juan 21:25). Kay Pachapi wakin rurasqankunamantapas Jesusqa qarikunata akllaspanmi sumaqta yachachirqa, chaynapi wañukunan qepata predicaypi punta apaq kanankupaq. Chaymi 33 kaq watapi hanaq pachaman kutiptin achkaña qatiqninkunaqa karqaku, hinaspam pisi tiempollamanta waranqanpi mirarurqaku (Hech. 2:41, 42; 4:4; 6:7).

2, 3. a) ¿Imanasqataq bautizasqa qarikunaqa astawan kallpanchakunanku ñawparinankupaq? b) ¿Imamantam kay yachachikuypi qawasun?

² Kunanpas 100 waranqa congregacionkunapim Diosmanta willakuqkunaqa 7 millon masninña kachkanku, chayna yapakusqanraykum congregacionpi punta apaq qarikunata otaq ancianokunata astawan necesitakun. Chayta haypananpaq kallpanchakuq qarikunaqa alabanapaqmi hinaspa allin serviytamá munachkanku (1 Tim. 3:1).

³ Manamá pipas mana kallpanchakuspanqa  congregacionpi punta apaqqa kanmanchu. Manataqmi allin educacionniyoqraqchu nitaq ancha yuyayniyoqraqchu kanan. Aswanmi Bibliapa nisqanta kasukunanpaq kallpanchakunan. Arí, ancha educacionniyoq kaymantaqa aswan allinmi chuya espirituman hina kawsayninku. ¿Ima yanapakuytam qarikuna chaskinmanku chayta haypanankupaq? Jesucristom nirqa: “Astawan yachaspanqa yachachiqnin hinam kanqa”, nispa (Luc. 6:40). Kay yachachikuypim qawasun aswan rurayniyoq kanankupaq qatiqninkunata Jesus imayna yachachisqanmanta, yachasuntaqmi paykunata yachachispan imayna kasqanmantapas.

‘Amistadniymi kankichik’

4. ¿Imakunata ruraspam Jesusqa qawachirqa qatiqninkunapa amistadnin kasqanta?

⁴ Jesusqa amistadninta hinam qatiqninkunataqa qawarqa. Paykunawanmi sapa kuti karqa hinaspam mana iskayrayarqachu paykunamantaqa. Chaymi nirqa: ‘Taytapa niwasqankunatam yachachirqaykichik’, nispa (leey Juan 15:15). Kusikurqakutaqmi kay tapukuyninkuta Jesus kutichisqanmanta: “¿Haykapitaq kay nisqaykikunaqa kanqa? ¿Imaynataq yachasaqku kutimunaykimantaqa hinaspa kay pacha puchukananmantaqa?” (Mat. 24:3, 4). Chaymantapas Jesucristoqa piensasqantawan imayna tarikusqantam willakurqa. Wañukunanpaq tutapim Pedrota, Santiagota hinaspa Juanta Getsemani huertaman pusarqa, chaypim qawarqaku imayna tarikusqanmanta Diosman willakusqanta. Yaqapaschá paykunaqa mañakusqanta mana uyarirqakuchu, ichaqa musyakurqakum ancha llakikuywan kasqanta (Mar. 14:33-38). Piensasuntaq Jesusta hanaq pachamanta Taytan rimamuptin paykuna imayna tarikusqankupipas (Mar. 9:2-8; 2 Ped. 1:16-18). Jesuswan allin amistad kasqankuqa yanaparqamá Diospaq astawan llamkanankupaq.

5. ¿Imakunata ruraspam ancianokunaqa iñiqmasinkunata yanapanku?

⁵ Jesus hinam congregacionpi ancianokunaqa iñiqmasinkuta iñiyninkupi yanapanku. Paykunawan allin amistad kanankupaq hinaspa allinninkuta maskanankupaqmi tiempochakunku. Wakinpim ancianokunaqa mana willanapaq kaqtaqa mana rimankuchu. Ichaqa Bibliamanta yachasqankutam iñiqmasinkunaman willakunku. Siervo ministerial iñiqmasinkuna mozollaraq kaptinkupas, manam piensankuchu paykunamanta aswan allin kasqankutaqa. Aswanmi iñiyninkupi ñawparispanku congregacionpi astawan yanapakunankupaq hapinku.

“Ejemplotam qamkunaman qoykichik”

6, 7. ¿Imatam qatiqninkunaman Jesusqa imayna kasqanwan yachachirqa, imapaqmi chayna kaynin yanaparqa?

⁶ Jesuspa qatiqninkuna Diospa munasqanman hina kawsaptinkupas, piensasqankuqa llaqtankupi imayna uywasqa kasqankuman hinam karqa (Mat. 19:9, 10; Luc. 9:46-48; Juan 4:27). Chaywanpas Jesusqa manam imayna piensasqankumantaqa qaqchaparqachu. Manataqmi mana atisqankutaqa kamachirqachu, nitaqmi nirqachu: “Nisqaytayá ruraychik, amayá rurasqaytachu”, nispa. Aswanmi rurasqanwan yachachirqa (leey Juan 13:15).

⁷ ¿Imatam qatiqninkunaman Jesusqa imayna kasqanwan yachachirqa? (1 Ped. 2:21.) Payqa manam tukuy imayoqchu kawsarqa, chaynapi runamasinta yanapananpaq (Luc. 9:58). Piensasqanman hina yachachinanmantaqa, Diospa Palabranman hinam yachachirqa (Juan 5:19; 17:14, 17). Paymanqa lliwmi asuykuqku, allin sonqoyoqmi karqa hinaspapas tukuytam kuyakuywan rurarqa (Mat. 19:13-15; Juan 15:12). Imayna kasqanmantam apostolninkunapas allinta yacharqaku. Jacobomanta otaq Santiagomanta rimasun. Payqa manam qatikachasqa kaytaqa manchakurqachu, aswanmi wañuchisqa kanankama Diosman sonqo karqa (Hech. 12:1, 2). Chaynallataqmi Juanpas 60 wata masnin Jesuspa rurasqanta qatipakurqa (Apo. 1:1, 2, 9).

8. ¿Ima ejemplotam ancianokuna saqenku mozokunaman hinaspa wakin iñiqmasinkunamanpas?

 ⁸ Kallpanchakuq, llampu sonqo hinaspa kuyakuq ancianokunaqa qatipakunapaq hinam kanku mozokunapaq (1 Ped. 5:2, 3). Diosman hapipakuyninkupi, sumaq yachachiyninkupi hinaspa imayna kawsayninkupi iñiqmasinkupaq allin ejemplo kasqankum anchata kusichin (Heb. 13:7).

‘Jesusmi kacharqa kaynata kamachispan’

9. ¿Imam qawachin predicay apakunanpaq qatiqninkunata Jesus yachachisqanmanta?

⁹ Tukuy sonqowan iskay wata predicaspanmi, Jesusqa 12 qatiqninkunata kacharqa tukuy hinastinpi predicanankupaq. Arí, chaypaqqa puntatam allinta yachachirqa (Mat. 10:5-14). Chaymantapas, waranqantin runakunata mikuchinanpaq manaraq milagrota rurachkaspanmi, Jesusqa qatiqninkunata kamachirqa imayna ruranankuta (Luc. 9:12-17). Qawasqanchikman hinaqa, Jesusqa qatiqninkunatam yanaparqa allinta yachachispan. Chayna yanapasqa kasqankuwan hinaspa chuya espiritupa yanapakuyninwanmi, 33 watamantapacha tukuy hinastinpi Diosmanta willakuyta atirqaku.

10, 11. ¿Imaynatam pisi-pisimanta yanapachwan Biblia estudiaqkunata?

¹⁰ Ñoqanchikwan Biblia estudiayta qallarispanmi runaqa iñiyninpi ñawparin. Wakinpiqa leeyta yachananpaqmi yanapana kanqa. Imayna kaptinpas, Biblia estudiasqanman hinam aswan yanapakuyta chaskinan. Sapa semana huñunakuyman riptinqa, kallpanchanam Diosmanta Yachachinapaq Escuelaman yaykunanpaq hinaspa manaraq bautizakuspan predicaqña kananpaqpas. Bautizakuruptinmi ichaqa kallpanchachwan huñunakuna Salonta allichaypi hinaspa huk ruraykunapipas yanapakunanpaq. Tiempopa risqanman hinam siervo ministerial kananpaq ima rurananta nispa yanapachwan.

¹¹ Bautizasqa cristianota ima ruraypipas yanapakunanpaq kamachispaqa, imayna rurananpaqmi ancianoqa yachachinan. Chaynata yachachispanqa ninantaqmi yachachisqanman hina rurananmanta. Chay iñiqmasinchik rurayninpi sasachakuptinqa, ancianoqa manamá piensananchu mana ruray atisqantaqa. Aswanmi yachachinan imakunapi kallpanchakunanta hinaspa imayna rurananmantapas. Arí, ancianokunaqa anchatam kusikunku iñiqmasinku yanapachikusqanman hina ruraptin hinaspa kusikuywan Diosta serviptinpas (Hech. 20:35).

“Yachayniyoq runam ichaqa consejaqninkunata kasukun”

12. ¿Imanasqam Jesuspa corregisqanqa ancha allin karqa?

¹² Qatiqninkuna imapi kallpanchakunankupaq hinam Jesusqa sapakamata consejarqa. Yuyarisun, Santiagotawan Juanta Samaria runakuna mana chaskiptinkum cielomanta nina para chayamunanpaq Diosta mañakurqaku, hinaptinmi Jesusñataq corregirqa (Luc. 9:52-55). Chaymantapas, paykunapa mamanmi Jesusta mañakurqa gobiernonpi wawankunata favoreceykunanpaq, hinaptinmi Jesusqa iskayllankuta nirqa imanasqa chay mañakusqankumanta. Nirqam: “Alleq lawniypi otaq ichoq lawniypi tiyaykuyqa manam ñoqallamantachu, chayqa kachkan Taytaypa akllasqankunapaqmi”, nispa (Mat. 20:20-23). Jesusqa manam imayna kanallankupaqchu nirqa, aswanqa Bibliapa nisqanman hinam yuyaymanachirqa (Mat. 17:24-27). Yacharqataqmi pantaq runakuna kasqankuta. Sonqomanta kuyasqanraykutaqmi paykunataqa corregirqa (Juan 13:1).

13, 14. a) ¿Pikunataq necesitanku astawan consejanata? b) Willarimuy, ¿imaynakunatam huk anciano yanapanman pipas iñiyninpi mana ñawpariptin?

¹³ Congregacionpi qarikuna aswan rurayniyoq kanankupaqqa, haykapipas consejokunatam chaskinanku hinaspa imayna ruranankupaq yanapakuytapas. Chaymi Proverbios 12:15 nin: “Yachayniyoq runam ichaqa consejaqninkunata kasukun”, nispa. Chayna kasqanmantam huk mozo nin: “Ñoqaqa  sasachakurqanim pantasqaykunata reqsikunaypaq. Ichaqa ancianopa consejawasqanmi allinta yanapawarqa”, nispa.

¹⁴ Pipas mana allin rurasqanwan ñawparinanpaq sasachakuqta ancianokuna qawaspankuqa, kuyakuywanmi corregikunanpaq ninmanku (Gal. 6:1). Chaymantapas yaqapaschá huk kaqnin iñiqmasinchiktapas imayna kasqanmanta consejananku. ¿Imatam huk anciano ruranman pi iñiqmasinchikpas mana anchata kallpanchakuptinqa? Yuyarichinmanmi Diospa munaychakusqanmanta ganaswan Jesuspa willakusqanmanta hinaspa runakunata yanapanapaq kamachisqanmantapas (Mat. 28:19, 20; Luc. 8:1). Ichaqa, ¿imatam ruranman imatapas astawan munaptin? Chayna kaptinqa allinmi kanman qatiqninkunata Jesus imayna yanapasqanmanta yuyarichiynin (Luc. 22:24-27). Hinaspa ¿imaynatam yanapanman mana pampachay munaqta? Pisilla debeqnin sirviententa mana pampachay munaq rikchanachiymantam qawanmanku (Mat. 18:21-35). Consejanapuni kaptinqa chayllam rurana (leey Proverbios 27:9).

Hinalla kallpanchakuy

15. ¿Imaynatam qarikunapa familianpas yanapanman congregacionpi rurayninta cumplinanpaq?

¹⁵ Qarikuna aswan rurayniyoq kanankupaq ancianokuna yanapaptinkupas, hukkunapas yanapaytaqa atinmankum. Familianqa yanapaytam atinman otaq yanapananmi iñiyninpi ñawparinanpaq. Sichu ña ancianoña kaspanqa señoranpawan churinkunapa yanapakuynintam necesitan. Paykuna yanapakuyta mana munaptinkuqa congregacionpi rurayninkunataqa manam cumpliyta atinqachu. Yanapananpaq familian kallpanchakuptinkuqa manam kikillanchu kusisqa kanqa, aswanqa congregacionpi kaqkunapas kusikunqakum (Pro. 15:20; 31:10, 23).

16. a) ¿Pitaq yanapanan iñiyninpi qarikuna ñawparinanpaq? b) ¿Imaynatam huk qariqa qawachinman congregacionpi aswan rurayniyoq kay munasqanta?

¹⁶ Hukkuna yanapaptinpas kikinmi qariqa iñiyninpi ñawparinan (leey Galatas 6:5). Arí, hukkunata yanapanapaqqa manam ancianoraqchu nitaq siervo ministerialraqchu kana chaynataq astawan predicanapaqpas. Chayna kaptinpas congregacionpi punta apaq kanapaqqa kallpanchakunam Bibliapa niwasqanchikkunata kasukunapaq (1 Tim. 3:1-13; Tito 1:5-9; 1 Ped. 5:1-3). Chayta haypanapaqqa qawarikunanmi imakunapi kallpanchakunanmanta. Bibliatam sapa punchaw leenan, sapallanpitaq allinta estudianan, yuyaymananan, Diosta tukuy sonqowan mañakunan chaynataq Diosmantapas yachachinan. Chaynata ruraspanmi Timoteoman Pablopa kayna nisqanta kasukunqa: “Ejerciciota rurachkaq hinayá Diosman agradaqta ruray”, nispa (1 Tim. 4:7).

17, 18. ¿Imatam pi cristianopas ruranman mana valeqpaq hapikusqanrayku otaq mana ganasniyoq kasqankurayku mana ñawpariptin?

 ¹⁷ Ichaqa ¿sichu pi cristianopas mana valeqpaq hapikusqanrayku munasqanta mana haypaqtinqa? Chayna kaptinqa yuyaymanananmi ñoqanchikrayku Jehová Dioswan Jesuspas rurasqankupi. Arí, hanaq pachapi taytanchikqa ‘sapa punchawmi qepinchikta apaysiwanchik’ (Sal. 68:19). Chaymi payqa congregacionpi astawan llamkananchikpaqpas yanapawanchikman. Diospa llaqtanpi punta apaqkuna astawan necesitakusqanpi yuyaymanasqanmi iñiqmasinchiktaqa astawan kallpanchanqa manaraq siervo ministerial otaq manaraq anciano kaptinpas, chayta haypananpaq. Kaykunata qawasqanmi yanapanqa mana ruray atiqpaq hapikusqanta atipananpaq. Hinaspapas Diospa espirituntam mañakunan, hawkallata hinaspa controlakuqta kachinanpaq, kaykunam yanapanqa mana atiqpaq hapikusqanta atipananpaq (Luc. 11:13; Gal. 5:22, 23). Chaymantapas Jehová Diosqa yanapanmi iñiyninkupi ñawparinankupaq kallpanchakuqkunataqa.

¹⁸ Wakin bautizasqa qarikunaqa mana ganasniyoq kasqankuraykum iñiqmasinku yanapaytaqa mana munankuchu. Congregacionpi aswan rurayniyoq kayta mana haypayta munaspanqa, ¿imatam ruranman? Apostol Pablom nirqa: “Diosmi munasqanman hina allin munayta qosuspaykichik allinkuna ruranaykichikpaq yanapasunkichik”, nispa (Fili. 2:13). Qawasqanchikman hinaqa, Jehová Diosmi kallpanchawanchik hukkunata yanapanapaq, paytaqmi chuya espiritunwan mayqan cristianotapas kallpanchaykunman Payta astawan servinanpaq (Fili. 4:13). Ñoqanchikpas mañakunanchiktaqmi yanapaykuwananchikpaq (Sal. 25:4, 5).

19. ¿Imatam ‘pusaq ancha reqsisqa runakunamanta’ willakuyqa qawachiwanchik?

¹⁹ Jehová Diosqa bendecinmi qarikuna ñawparinankupaq ancianokunapa kallpanchakusqankutaqa. Yanapantaqmi congregacionpi aswan rurayniyoq kanankupaq kallpanchakuqkunatapas. Bibliam niwanchik “pusaq ancha reqsisqa runakunata”, otaq llaqtanta pusananpaq yuyayniyoq qarikunata rikurichinanmanta (Miq. 5:5). Anchatamá kusikunchik achka qarikuna ñawparinankupaq yachachisqa kasqankumanta hinaspa astawan ruranankupaq kallpanchakusqankumantapas, chaynapi Diosta hatunchanankupaq.

¿Imatam nichwan?

• ¿Imaynatam qatiqninkunata Jesusqa yanaparqa aswan rurayniyoq kanankupaq?

• ¿Imaynatam ancianokuna Jesucristota qatipakunmanku qarikunata congregacionpi ñawparinankupaq yanapaspanku?

• ¿Imaynatam qarikunapa familian yanapanman iñiyninpi ñawparinankupaq?

• ¿Imatam kikin qari ruranan iñiyninpi ñawparinanpaq?

[Kay yachachikuypa tapukuyninkuna]

[31 kaq paginapi dibujokuna]

¿Imaynatam iñiyninpi ñawpariy munaq Biblia estudiaqta yanapachwan?

[32 kaq paginapi dibujo]

¿Imaynatam qarikuna qawachinku congregacionpi ñawpariy munasqankuta?