Leeqkunapa tapukuyninkuna

¿Yaqachu yachachwan imay horatapuni Jesucristota qerupi warkurusqankuta?

Kay tapukuymi rikurin señorninchik Jesucristomanta Marcos hinaspa Juan yaqa mana chay horalla wañukusqanmanta qellqasqankurayku. Marcosmi nin: “Las nuevetam Jesusta chakatarurqaku [otaq warkururqaku]”, nispa (Mar. 15:25). Juanñataqmi nin “yaqa chawpi punchawta” Jesusta warkuruspa wañuchinankupaq Judiokunaman Pilato entregaykusqanmanta (Juan 19:14-16). Biblia estudiaq runakuna chayta allichanankupaq tukuytaña niptinkupas, Bibliaqa manamá anchatachu chaymantaqa willakun. Chayna kaptinpas, kanmi huk yanapakuy chayta entiendenapaq. Chaypaqqa yachananchikmi Jesuspa tiemponpi punchawkunata imayna yupasqankumanta.

Punta pachak watapiqa Intita qawaspallankum yachaqku imay hora kasqantaqa. Chaymantapas enteron watapiqa Intipa qespimusqanwan chinkaykusqanqa manam hina kaq horallapichu karqa. Chaymi imay hora kasqantaqa tanteaspalla yachaqku. Griego Rimaypi Qellqasqa Diospa Palabranqa las nuevemanta, chawpi punchawmanta hinaspa las tresmanta rimaspanqa, achka kutipim nin yaqa chay horakunallapi hina pasasqanmanta (Mat. 20:3, 5; Hech. 10:3, 9, 30).

Jesuspa wañukusqan punchawmanta Mateo, Marcos, Lucas hinaspa Juan qellqaspankuqa yaqa chay horalla Jesusta imakunapas pasasqanmantam willakunku. Tawankum ninku achikyaramuptinña sacerdotekunapa jefenkuna hinaspa Diospa leynin yachachiqkuna huñunakuruspa Jesusta Pilatoman aparusqankumanta (Mat. 27:1; Mar. 15:1; Luc. 22:66; Juan 18:28). Chaymantapas Mateo, Marcos hinaspa Lucasmi ninku Jesusta warkuruptinku chawpi punchawmanta “las treskama” tutayay kasqanta (Mat. 27:45, 46; Mar. 15:33, 34; Luc. 23:44).

Kaytam mana qonqananchikchu, Jesusta wañuchisqanku tiempoqa qallarirqam azotesqankumantapacha. Wakinpiqa llumpayta azotesqankuraykum runakunaqa wañuqku. Jesusta llumpayta azoteptinkum qeru apaytapas manaña atirqachu, chaymi hukña apaysirqa (Luc. 23:26; Juan 19:17). Sichu wañuchisqanku tiempo qallarirqa azotesqa kasqanmantapacha qerupi warkurunankukama hinaptinqa unay tiempochá pasarqa, chaychá wakin Biblia qellqaqkunaqa sapaq horapi pasakusqanmanta willakurqaku. Kaymi qawachin imay hora warkurusqankumanta willakusqanku mana tupasqanta.

Apostol Juanqa achka watakuna pasaruptinñam qellqarqa, hinaptinqa qawarqamá Mateopa, Marcospa hinaspa Lucaspa qellqasqankuta. Juanpa nisqan Marcospa willakusqanwan mana tupaptinpas, kayqa qawachinmi Marcospa nisqanman hinalla mana qellqasqanta. Iskayninkum Diospa yanapakuyninwan qellqarqaku, kaykunamanta Biblia mana anchata willawaptinchikpas mana iskayrayaspam willakusqanpi confiachwan.