Ama onqosqaykiwanqa kusikuyniki chinkachunchu

PIENSARIY, llumpay osqosqaykirayku munawaqña achikyasqayki punchaw chaylla tutayarunantaña. Ichapas Job hina tarikunki, paymi nirqa: “Cuerpoymantapas mastaqa kuyani wañukuytañam”, nispa (Job 7:15). ¿Sichu chayna onqosqayki unay wataña kaptinqa?

Chaynam Davidpa amigon Jonatanpa churin Mefi-boset tarikurqa. Pichqa watanpim “wichiykurqa, chayraykum wistuña karqa” (2 Sam. 4:4). Tiempopa risqanman hinam yanqa tumpasqa karqa reypa contranpi churakusqanmanta, chaymi wakin kapuqninkunata qechurachikurqa, chaywanqa nanayninkunapas aswanraqchá yapakurqa. Ichaqa, manamá chaykunaqa kusikuyninta qalaypaqtaqa chinkarachirqachu (2 Sam. 9:6-10; 16:1-4; 19:24-30).

Apostol Pablopas chaynallataqmi karqa. Huk kutipim nirqa ‘tipaqnin kichkawan hina’ ñakarisqanta (2 Cor. 12:7). Chay tipaqnin kichkaqa yaqapaschá karqa imawanpas unay onqosqan otaq apostol hina servisqanta hukkuna mana allinta qawasqankupas. Imayna kaptinpas, chayna tarikusqanqa unaymi karqa, chaymi ñakarirqa onqospan otaq llumpayta hukmanyaspanpas (2 Cor. 12:9, 10).

Kunan tiempopipas, onqoykunaqa otaq llumpay hukmanyasqa tarikuyqa wakin cristianokunatam llumpayta ñakarichin. Magdalena iñiqmasinchik 18 watanpi kachkaptinmi, lupus eritematoso sistémico nisqanku onqoywan kasqanta nirqaku. Paymi nin: “Llumpay mancharisqam tarikurqani. Tiempopa risqanman hinam aswan peorchakurqa hinaptinmi wiksaypas manaña valeqchu, simiypipas heridakunam rikuriramurqa, kunkaypas punkirurqam”, nispa. Izabelapa onqosqanñataqmi mana suti rikuyllachu. Paymi nin: “Warmacha kasqaymantapacham llumpay llakiwan onqorqani. Chaymi imamantapas llumpayta manchakuni, samatyaytapas atinichuqaya hinaspapas wiksaypim calambre hapiwan. Chayraykum hukmanyasqallaña kani”, nispa.

Imayna tarikusqaykita reqsikuy

Imawanpas onqosqanchikqa hukmanyasqatam tarichiwanchikman. Chayna kaptinqa ancha allinmi imayna tarikusqanchikmanta qawakuykuspa reqsikuyninchikqa. Magdalenam nin: “Onqoyniyqa tiempopa risqanman hinam aswan yapakun. Sapa kuti llumpay pisipasqa tarikuspaymi camaymanta hatariytapas mana atinichu. Haykapi llumpay onqorunayta mana yachasqayraykum, imatapas mana ñawpaqmantaqa  tanteanichu. Astawanraqmi hukmanyani ñawpaqpi hina Jehová Diosta mana serviy atisqaywan”, nispa.

Zbigniew iñiqmasinchikpas ninmi: “Watakuna risqanman hinam, artritis onqoyniy llumpayta pisipachiwan astawan peorchakuspan. Wakinpi llumpayta punkiruwaptinmi, ima ruraytapas mana atinichu. Chaymi hukmanyasqallaña kani”, nispa.

Pasaq watakunallapim, Barbarapa umanpi wiñaq tumorta tarirurqaku. Paymi nin: “Qonqayllamantam mana kallpayoq tarikuni, umaypas nanakunmi hinaspam ima piensaytapas mana atinichu. Mana allin tarikusqayta reqsikuspaymi, vidaywan ima ruranayta kaqmanta tanteakurqani”, nispa.

Kay rimamusqanchik iñiqmasinchikkunapaqqa, ancha allinmi Diospa munayninta puntapi churayninku. Paykunaqa tukuy sonqonkuwanmi Jehová Diospi hapipakunku hinaspam yanapakuyninta chaskinku (Pro. 3:5, 6).

¿Imaynatam Jehová Diosqa yanapakun?

Ama haykapipas piensasunchu Dios qepancharuwasqanchikrayku ima onqoywanpas tarikusqanchikta (Lam. 3:33). Yuyarisun Jobmanta, payqa mana huchallikuq hinaspa allin ruraq kachkaspanpas tukuy imatam pasarqa (Job 1:8). Diosqa manam haykapipas mana allinkunawanqa pruebamanqa churawanchikchu (Sant. 1:13). Tukuy imaymana onqoykunaqa, punta tayta-mamanchik Adanpawan Evapa saqewasqanchikmi (Rom. 5:12).

Ichaqa Jehová Dioswan Jesusqa manam saqenqachu allin ruraq runakunataqa (Sal. 34:15). Aswan ñakariypi tarikuptinchikmi Jehová Diosqa ñoqanchikpaq ‘amparakuna wasi hina’ kapuwanchik (Sal. 91:2). Chaynaqa, sasa hampina onqoywan tarikuptinchikqa, ¿imataq yanapawasun kusisqalla kananchikpaq?

Diosta mañakuy: Ñawpaqpi Diosta serviqkuna hinam, imapas llakinchikkunataqa  Diospa makinpi saqeyta atichwan mañakuyninchiktakama (Sal. 55:22). Chayta ruraspaqa, ‘Diosninchikmi hawkayachiwasun runakunapa mana entiendey atinan hawkayaywan. Chaynapim imamantapas mana preocupakusunchu nitaq llakikusunchu’ (Fili. 4:6, 7). Magdalena iñiqmasinchikmi llumpay pisipachiq onqoyninta aguantan tukuy sonqonwan Diosta mañakuspan. Paymi nin: “Jehová Diosman sonqoyta kicharispaymi kaqmanta kusisqa tarikuni. Kunanmi allinta entiendeni Diospa makinpi kay ima ninan kasqanta”, nispa (2 Cor. 1:3, 4).

Mañakusqanchikta uyarispanmi, Diosqa kallpanchawasun chuya espirituntakama, Palabrantakama hinaspa wawqe-paninchikkunawanpas. Manamá suyachwanchu milagrota ruraspan onqoyninchikta chinkarachinantaqa, ichaqa suyachwanmi ima sasachakuytapas atipanapaq yachaytawan kallpata qowananchikmanta (Pro. 2:7). Bibliapa nisqanman hinaqa paymi ‘hatu-hatun atiyta’ qowasunchik (2 Cor. 4:7).

Familianchik: Familianchikkunawan kuyanakuspa kawsaypas anchatam yanapan onqoyninchikta aguantanapaq. Ayllunchikkuna sasachakuyninchikpi yanapawaptinchikpas, yuyarinanchikmi paykunapas ñakarisqankuta hinaspa wakinpi mana ima ruray atisqankutapas. Chaymi Diosta huñulla mañakuyqa ancha allin hawkalla tarikunapaq (Pro. 14:30).

Barbaram wawankunamantawan iñiqmasinchikkunamanta kaynata nin: “Predicaq rinaypaqmi paykuna yanapawan. Kusikuyninkum sonqoyta anchata kusirichin”, nispa. Zbigniew iñiqmasinchiktapas anchatam yanapan señoran. Paymi nin: “Señoraymi wasiykupi yaqa llapallan ruraykunata ruran. Yanapawantaqmi pachakunaypaq hinaspapas maletinniytam apan predicayman otaq huñunakuyman riptiyku”, nispa.

 Iñiqmasinchikkuna: Congregacionpi iñiqmasinchikkunapas anchatam kallpanchawanchik. Ichaqa, ¿imatam iñiqmasinchikkuna ruranku pipas onqosqayrayku huñunakuykunaman mana riptin? Magdalenam nin: “Iñiqmasiykunam huñunakuyman mana riyta atiptiy kallpanchakunku grabaspanku uyarichiwanankupaq. Chaymantapas sapa kutitaqmi watukamuwanku imapipas yanapaykuwanankupaq. Apachimuwankutaqmi cartakunatapas. Chayna yuyariwasqankum yanapawan onqoyniyta aguantanaypaq”, nispa.

Izabelañataqmi kaynata nin: “Congregacionpim achka tayta-mamaykuna kapuwan, paykunam uyariwaspan entiendewan. Iñiqmasinkunaqa familiay hinam, paykunawanmi kusisqa hinaspa hawkalla tarikuni”, nispa.

Lliw onqoqkunaqa manam haykapipas karunchakunankuchu, aswanmi kallpanchakunanku huñunakuykunaman rinankupaq (Pro. 18:1). Chaynata ruraspankum hukkunapatapas allinta kallpanchanqaku. Yaqapaschá qallariypiqa iskayrayanmanku imapas necesitasqankumanta iñiqmasinkunaman willakuyta. Ichaqa anchatam kusikunqaku chayna willasqaykimanta, chaynapi cheqap kuyakuyninkuta qawachinankupaq (1 Ped. 1:22). Qam chaynapi tarikuspaykiqa, willakuy huñunakuyman rinaykipaq yanapakuy necesitasqaykimanta otaq paykunawan kuska predicay munasqaykimantawan parlay munasqaykita. Ichaqa manamá llumpaytaqa hikutanachu, aswanmi agradecekunanchik yanapawasqanchikmanta.

Allin kaqkunapi piensay: Yaqa llapanpiqa, makillanchikpim kachkan kusikuyninchikta onqoyninchikkuna mana chinkachinanpaqqa. Llumpay llakisqa kayqa mana allin piensaykunamanmi apawachwan. Bibliam nin: “Onqoq runataqa kallpanchakusqanmi hatarichinman. ¿Pitaqsi hukmanyasqa runataqa kallpanchanman?”, nispa (Pro. 18:14).

Magdalenam nin: “Anchatam kallpanchakuni sasachakuyniykunapi mana piensanaypaq. Allin tarikusqay punchawkunapiqa kallpanchakunim kusisqalla kanaypaq. Anchatam kallpanchawan llumpay onqoq iñiqmasinchikkunamanta qellqanchikkunapi  leesqay”, nispa. Izabelatañataqmi kallpanchan Jehová Dios kuyasqanmanta yachasqan. Paymi nin: “Ancha chaninniyoqmi Jehová Dios servisqayqa, payraykutaqmi kawsanipas. Hinaspapas kapuwanmi hamuq tiempopi suma-sumaq suyakuypas”, nispa.

Zbigniew iñiqmasinchikñataqmi nin: “Onqoyniyqa yanaparuwanmi aswan humilde, kasukuq, allin tanteaq kanaypaq hinaspa sonqomanta pampachakuq kanaypaqpas. Yacharunitaqmi kusikuywan Jehová Diosta servinaypaq hinaspa kikillaypi mana llumpayta piensanaypaqpas. Arí kallpanchasqam tarikurqani iñiyniypi hinalla ñawparinaypaq”, nispa.

Ama qonqaychu Jehová Dios tukuy aguantasqaykita yachasqanmanta hinaspa kuyasusqaykitapas. Yuyariytaq “Diosqa justom. Payqa llamkasqaykichiktaqa manam qonqanqachu, manataqmi qonqanqachu pay kuyasqaykichiktapas” (Heb. 6:10). Chaymantapas hapipakuy Jehová Diospa kayna nisqanpi: “Manapunim dejasqaykichu nitaqmi saqesqaykichu”, nispa (Heb. 13:5).

Haykapipas llakisqa tarikuspaykiqa, hamuq tiempopi sumaqllaña kay Pachapi kawsakuymanta piensariy. Ñam qawankiña Diospa Gobiernon sumaqllaña kawsakuyta apamunanmanta.

[28 hinaspa 29 kaq paginakunapi dibujokuna hinaspa recuadro]

Llumpayta onqospankupas hinallam predicachkanku

“Sapallayqa manañam puriyta atinichu, chaymi señoray otaq huk kaqnin iñiqmasiy riysiwan predicanaypaq. Umallaymantam yacharuni textonkunata hinaspa imayna predicanaypaqpas.” (Jerzy iñiqmasinchikqa manam rikukunchu.)

“Telefonontakama predicaspaypas, cartakunatam qellqani hinaspam yachay munaqkunaman kaqmanta apachini. Hospitalpi kaspayñataqmi camaypa waqtanpi saqeq kani Bibliatawan wankin qellqakunata. Chay rurasqaymi achka kutipi yanapawarqa runakunaman predicanaypaq.” (Magdalenaqa lupus onqoywanmi kachkan.)

“Wasin-wasin predicayqa gustawanmi, ichaqa lloqsinaypaq hina mana kaspayqa telefonontakamam predicani.” (Izabelaqa llumpay llakikuywanmi onqon.)

“Runakunaman kaqmanta watukuymi hinaspa Bibliamanta estudio qoqkunawan riymi gustawan. Wakinpi allin sientekuspayqa, wasin-wasin predicanaypaqmi kallpanchakuni.” (Barbaraqa umanpi tumorniyoqmi.)

“Aslla qellqakunatam apani. Hinaspaymi aguantay atinallaykama predicani.” (Zbigniew iñiqmasinchikpa tullu nanaywanmi ñakarin.)

[30 kaq paginapi dibujo]

Mozo-sipaskunawan yuyayniyoqkunapas kallpanchawanchikmanmi