¿Imanasqataq Diospa chuya espiritunwan pusachikunanchik?

“Qamqa Diosniy kasqaykiraykuyá [. . .] allin espirituykiwan pusachiway” (SAL. 143:10).

1. ¿Imanasqam ancha allin mana reqsisqayki llaqtaman rispa reqsiq runawan pusachikuyqa?

KAYPI piensariy, richkawaq mana reqsisqayki llaqtaman. Ichaqa manamá sapallaykichu richkanki, richkankim chay llaqtata reqsiq runawan. Chay runa allinta reqsisqanraykum payqa maymi ñanninta pusasunki, nisusqaykita kasukuspaykiqa manachá chinkankichu.

2, 3. a) ¿Ima mana rikuy atina kallpatam Jehová Diosqa servichikurqa tukuy imata unanchananpaq? b) ¿Imanasqam saqekunanchik chuya espiritu pusawananchikta?

² Ichaqa kanmi mana rikusqanchik kallpa pimantapas aswan allin pusawaqninchik. Kaymantam Bibliapa qallariynin versiculokunallapi rimachkan. Jehová Diospa unanchasqanmanta rimaspanmi, Genesis libro nin: ‘Tukuy imapa qallariyninpim cielokunata hinaspa kay pachata Dios unancharqa’, nispa. Hina qatiqllanpitaqmi willawanchik tukuy chaykunata unanchananpaq imata Dios servichikusqanmanta. Ninmi: ‘Diospa espiritunmi yakukunapa hawanpi muyurqa’, nispa (Gen. 1:1, 2). Qawasqanchikman hinaqa, chuya espiritunta servichikuspanmi Jehová Diosqa tukuy imakunata unancharqa. Arí, ñoqanchikta unanchawananchikpaqpas chuya espirituntam servichikurqa (Job 33:4; Sal. 104:30).

³ Ichaqa manamá chayllatachu yachananchik, aswanmi saqekunanchik vidanchikpi yanapawananchikpaq. Jesucristom qatiqninkunaman nirqa: “Espiritu hamuspanñam yachachisunkichik tukuy imapas cheqap kaqkunataqa”, nispa (Juan 16:13). Hinaptinqa, ¿imataq chuya espirituqa hinaspa ima allinkunatam tarisun pusawananchikpaq saqekuptinchikqa?

¿Imataq chuya espirituqa?

4, 5. a) ¿Imatam achka runakuna pantaspanku piensanku chuya espiritumanta? b) ¿Imaynatam yachachichwan chuya espiritu ima kasqanmanta?

⁴ Predicaspanchikmi, hukllapi kimsa dioskuna kasqanmanta creeq runakunata tarinchik. Pantaspankum piensanku chuya espirituqa Dios hina chaynataq Jesus hina kasqanta (1 Cor. 8:6). Chayraykum achka Bibliakunapipas mayusculawan kaynata qellqanku: Chuya Espiritu, nispa. Ichaqa, griego rimayniyoq ancha reqsisqa Joan F. Mira profesormi 2006 watapi, España nacionpi tikrarqa Mateo, Marcos, Lucas, Juan, Hechos hinaspa Apocalipsis librokunata. Chaypim minusculawan kaynata qellqarqa: chuya espiritu, nispa. ¿Imanasqa? Paypa nisqanman hinaqa, Bibliaqa manam qawachinchu chuya espiritu runa kasqantaqa. *

⁵ Hinaptinqa, ¿imataq chuya espirituqa? Traducción del Nuevo Mundo de las Santas Escrituras (con referencias), nisqa Bibliam Genesis 1:2 nisqan textomanta uray patanpi kaynata nin: “[Hebreo rimaypi] rú·aj nisqa ‘espiritu’ nispa tikrakuptinpas, tikrakunmantaqmi  ‘wayra’ nispa chaynataq mana rikuy atina kallpa kasqanta qawachiq huk rimaykunawanpas”, nispa (tupachiy Genesis 3:8; 8:1 nisqan textokunapa uray patanpi nisqanwanpas). Wayrata mana rikuspanchikpas, sutillatam musyanchik kallpayoq kasqantaqa. Chaynam chuya espiritupas, mana rikuyta atiptinchikpas sutillatam musyanchik yanapawasqanchikta. Arí, chayqa Diosmanta lloqsiq kallpanmi. Chaytaqa pimanpas otaq imamanpas qoyta atinmanmi, chaynapi munaynin rurasqa kananpaq. Chaynaqa, ¿iskayrayachwanchu chay kallpa tukuy atiyniyoq Diosmanta kasqanta? Manamá (leey Isaias 40:12, 13).

6. ¿Imatam Davidqa mañakurqa Jehová Diosta?

⁶ Chaynaqa, Jehová Diosqa chuya espirituntam servichikunman vidanchikpi pusawananchikpaq. Chaytam Davidmanpas prometerqa, nirqam: “Ñoqam entiendechisqayki qamtaqariki. Ñoqam yachachillasqayki kawsakuytaqa”, nispa (Sal. 32:8). ¿Davidqa munarqachu chayna yanapananta? Arí, chaymi nirqa: “Munasqaykiman hina ruranaytayá yachachillaway. Qamqa Diosniy kasqaykiraykuyá yachachillaway. Pampantayá allin espirituykiwan pusachiway”, nispa (Sal. 143:10). Ñoqanchikpas qawachinanchikmi Diospa chuya espiritunwan yanapachikuy munasqanchikta. ¿Imanasqa? Qatiqninpi chaykunamanta qawasun.

Kikillanchikmantaqa manam ima ruraytapas atichwanchu

7, 8. a) ¿Imanasqataq Diospa yanapakuyninta necesitanchik? b) ¿Ima rikchanachiymi qawachiwanchik kay sasallaña tiempokunapi piensasqallanchikman hina kawsay mana allin kasqanta?

⁷ Kikillanchikmanta imatapas mana rurayta atisqanchikraykum, necesitanchik Jehová Diospa chuya espiritun pusawananchikta. Runakunaqa manamá kikillanchikmanta imatapas ruranapaqchu unanchasqa karqanchik, astawanraqmi huchallikurusqanchikmanta. Chaymi Jeremias nirqa: “Dios Taytalláy, yachanim runaqa mana kikillanmanta kawsasqanta. Yachanim runaqa mana kikillanmanta purisqanta”, nispa (Jer. 10:23). Chaymantapas Diosqa Jeremiastam nirqa imanasqa runakuna yanapakuy necesitasqanmanta, nirqam: “Tukuy imamantapas engañakuqllañam runapa sonqonqa. Mana hampiy atinañam runapa sonqonqa. ¿Pitaqsi reqsinman runapa sonqontaqa?”, nispa (Jer. 17:9; Mat. 15:19).

⁸ Pipas yanqachakurunmanmi mana reqsisqan llaqtaman mana yanapachikuspan rispanqa. May rinanta mana yachaspanmi wañuy patapipas tarikunman. Yaqa chaynallam pasan Diospa yanapakuyninta mana mañakuspan piensasqanman hinalla kawsaq runawanpas. Kay mana allinllaña tiempokunapi mana yanqachakuspalla kawsanapaqqa, David hinam Jehová Diosta kaynata mañakunanchik: “Dios Taytalláy, reqsiykachillawayá munasqallaykiman hina kawsakuytapas.  Yachaykachillawayá munasqallaykiman hina kawsakuytapas”, nispa (Sal. 25:4; 23:3).

9. Kay 17 paginapi qawasqanchikman hina, ¿imaynatam Diospa chuya espiritunqa kawsayninchikpi yanapawanchik?

⁹ Humilde kaspa Jehová Diospi hapipakuptinchikqa, chuya espirituntam qowasun allinta kawsanapaq. Ichaqa, ¿imaynatam kay kallpaqa yanapawachwan? Jesusmi qatiqninkunaman nirqa: ‘Taytam chuya espirituta ñoqapa sutiypi kachamunqa qamkunata kallpanchasunaykichikpaq, paymi tukuy imata yachachisuspaykichik yuyarichisunkichik qamkunaman tukuy ima nisqayta”, nispa (Juan 14:26). Sapa kutim Diosta mañakunanchik Bibliata allinta entiendenapaq, chaypim Jesucristopa achka yachachikuyninkuna kachkan. Hinaptinmi chuya espiritunqa yanapawasun Jehová Diospa sasa yachachikuyninkunata entiendenapaq, chaynapim kamachikuyninkunata allinta kasukusun (1 Cor. 2:10). Qonqaymanta imaña pasawaptinchikpas, chuya espirituqa yanapawasunmi ima ruranapaq. Yanapawasunmi Bibliamanta yachasqanchikkunata yuyarinapaq hinaspa imaynata rurayman churanapaqpas.

Jesusqa chuya espiritupa pusasqanmi karqa

10, 11. ¿Imatam Jesucristoqa anchata munarqa, hinaspa imaynatam chuya espirituqa yanaparqa?

¹⁰ Chaymantapas Diospa chuya espiritun pusawananchiktam necesitanchik, kikin Jehová Dios churin Jesucristota espiritunwan pusasqanrayku. Manaraq kay Pachaman hamuspanpas, Jesusqa yacharqañam kay willakuyta: ‘Diospa espiritunwanmi huntasqa kanqa ancha yuyaysapa kananpaq, ancha entiendeq kananpaq, ancha yuyaywan consejananpaq, ancha atiyniyoq kananpaq, ancha yachaysapa kananpaq hinaspa Tayta Diosta respetananpaq’, nispa (Isa. 11:2). ¡Maynatachá Jesusqa munarqa chuya espirituwan yanapasqa kaytaqa, chaywanmi atinan karqa kay Pachapi ima sasachakuytapas atipayta!

¹¹ Jehová Diospa chayna nisqantam Jesusqa kikinpuni qawarqa. Bautizakusqan qepallanta ima pasasqanmantam Biblia kaynata nin: ‘Chuya espiritupa huntasqan Jordan Mayumanta Jesus kutichkaptinmi payta chuya espiritu pusarurqa purunman’, nispa (Luc. 4:1). Chaypim ayunarqa, Diosta mañakurqa hinaspa yuyarmanarqapas. Yaqapaschá kay Pachapi tukuy ima rurananmanta kamachikuykunatapas chaskirqa. Jesucristoqa Diospa espiritunwanmi huntasqa karqa, chaynapi imatapas allinta tanteaspa rurananpaq. Chayraykum ima sasachakuypiña tarikuspanpas Taytanpa munasqanman hina rurarqa.

12. ¿Imanasqataq ancha allin Diospa espiritunwan pusachikuyqa?

¹² Chuya espiritupa yanapakuynin ancha allin kasqanmanta Jesus yachaspanmi, qatiqninkunatapas nirqa mañakunankupaq hinaspa chay espirituwan pusachikunankupaqpas (leey Lucas 11:9-13). ¿Imanasqam ancha allin chayna rurayninchikqa? Chaynata ruraptinchikqa, Diospa chuya espiritunmi piensayninchikta tikranqa, chaynapi  Cristopa piensayninman hina piensanapaq (Rom. 12:2; 1 Cor. 2:16). Chaymantapas kallpanchakusunmi Jesuspa kawsasqanman hina kawsanapaq (1 Ped. 2:21).

Kay pachapi mana allin munaykunaqa mana allinkunamanmi aparuwachwan

13. ¿Imataq kay Pachapi mana allin munaykunaqa, hinaspa imapim tukun?

¹³ Necesitanchiktaqmi Diospa chuya espiritun pusawananchikta, runakunapa mana allin munayninkunamanta harkawasqanchikrayku. Diosmanta karunchasqa runakunaqa Diospa espirutunpa contranpi kaq mana allin munaykunawanmi llumpay intusqa kachkanku. Chaymi Jesuspa piensasqanman hina piensanankumantaqa, kay Pachapi kamachikuq Satanaspa munasqanman hina ruranku (leey Efesios 2:1-3; Tito 3:3). Pipas chaynata ruraspanqa hinaspa aychapa munasqallanpi kawsaqkunaqa mana allinpim tukunqaku, manataqmi yaykunqakuchu Diospa Munaychakusqanmanpas (Gal. 5:19-21).

14, 15. ¿Imaynatam kay Pachapi mana allin munaykunata qepanchayta atisun?

¹⁴ Jehová Diosqa yanapakuykunatam qowanchik kay Pachapi mana allin munaykunata atipanapaq. Chaymi Pablo nirqa: “Señorninchikman hapipakuspayá atiyninwan allinta kallpanchakuychik [. . .], chaynapim urmachiy munasusqaykichik punchawpi mana allinta venceruspaykichik qaqa hina sayankichik”, nispa (Efe. 6:10, 13). Chuya espirituntakamam Jehová Diosqa kallpanchawanchik, Satanaspa toqllankunapi mana wichinapaq (Apo. 12:9). Arí, sasamá kay Pachapi munaykunata atipayqa, ichaqa manamá chayraykuqa intuchikunachu. Yuyarisun, Diospa espiritunqa aswan atiyniyoqmi hinaspapas yanapawasunmi.

¹⁵ Punta cristianokunapa tiemponpi iñisqankuta qepanchaq runakunamanta rimaspanmi, Pedro nirqa: “Allin kawsakuyta dejaruspankum pantaypiña purichkanku”, nispa (2 Ped. 2:15). ¡Mayna kusisqam kananchik kay Pachapi mana allin munaykunawan intuchikunamantaqa, Diospa chuya espiritunta chaskisqanchikmanta! (1 Cor. 2:12.) Diospa chuya espiritun pusawananchikpaq saqekuptinchikqa, allin ñannintam risun hinaspam kay Pachapi mana allin munaykunatapas qepanchayta atisun (Gal. 5:16).

Diospa chuya espiritunqa sumaq kayniyoq kanapaqmi yanapawanchik

16. ¿Imaynam kasunchik chuya espiritu yanapawaptinchik?

¹⁶ Diospa chuya espiritun pusawananchiktam necesitanchiktaq, sumaq kayniyoq kanapaq yanapawasqanchikrayku (leey Galatas 5:22, 23). ¿Pi cristianotaq mana munanmanchu aswan kuyakuyniyoq, kusikuyniyoq hinaspa llampu sonqolla kayta? ¿Pitaq mana munanmanchu aswan pacienciakuq, kuyapayakuyniyoq hinaspa sumaq sonqoyoqlla kayta? ¿Pitaq mana munanmanchu aswan iñiyniyoq hinaspa imapipas controlakuq kayta? Chaynaqa, chuya espirituqa yanapawanchikmanmi sumaq kayniyoqkuna kanapaq, chayqa ñoqanchikpaqpas, ayllunchikpaqpas chaynataq iñiqmasinchikkunapaqpas allinninkupaqmi. Ichaqa kallpanchakunanchikmi hinalla ñoqanchikpi aswan kananpaq.

17. ¿Imaynatam aswan sumaq kayniyoqkuna kachwan?

¹⁷ Allinmi kayna tapukuyninchik: “¿Qawachinchu rimasqaykuna hinaspa rurasqaykuna chuya espirituman hina kawsasqayta?”, nispa (2 Cor. 13:5a; Gal. 5:25). Ichapas musyakunchik chuya espirituman hina mana kawsasqanchikta. Hinaptinqa, ¿imatam rurachwan? Saqekunanchikmi chuya espiritu yanapawananchikpaq. ¿Imaynata? Chaypaqqa Bibliatawan qellqanchikkunatam estudiananchik, chaynapi sapa punchaw imayna rurayman churanapaq hinaspa ñoqanchikpi aswan kananpaq. * Chayna sumaq kayniyoq kaspam, musyakusun Diospa chuya espiritunwan pusachikuy imanasqa ancha allin kasqanmanta.

 Diospa chuya espiritunwan pusachikusun

18. ¿Imaynam Jesus karqaqa Diospa chuya espiritun yanapaptin?

¹⁸ Bibliam willawanchik kay Pachapi Jesus kachkaptin Diospa chuya espiritun allintapuni yanapasqanmanta. Payqa saqekurqam yanapananta hinaspam yanapakuyninman hina pusachikurqa (Mar. 1:12, 13; Luc. 4:14). ¿Chaynachu ñoqanchikpas kanchik?

19. ¿Imatam rurananchik Diospa chuya espiritun vidanchikpi hinalla pusawananchikpaq?

¹⁹ Diospa chuya espiritunqa hinallam yanapachkan lliw saqekuqkunataqa. ¿Imatam ñoqanchikpas rurananchik vidanchikpi yanapawananchikpaq hinaspa allin ñanninta pusawananchikpaqpas? Sapa kutim chay kallpata qowananchikpaq Jehová Diosta mañakunanchik hinaspa chayman hina kawsananchikpaqpas (leey Efesios 3:14-16). Chaymantapas mañakusqanchikman hinam rurananchik, chaypaqqa chuya espirituwan yuyaychasqan Diospa Palabrantam estudiana (2 Tim. 3:16, 17). Kasukunanchiktaqmi tukuy niwasqanchikkunatapas. Chaynaqa, tukuy sonqonchikwanyá Jehová Diospi hapipakusqanchikta qawachisun, payqa hinallamá pusawasun kay mana allin tiempokunapipas.

[Willakuykuna]

¿Yaqachu allinta entienderunchik?

• ¿Imaynatam chuya espirituqa vidanchikpi yanapawanchik?

• ¿Imakunaraykum Diospa chuya espiritun pusawananchikta necesitanchik?

• ¿Imatam rurananchik Diospa chuya espiritun vidanchikpi hinalla pusawananchikpaq?

[Kay yachachikuypa tapukuyninkuna]

[15 kaq paginapi dibujo]

Diospa chuya espiritunman hinam Jesusqa imatapas rurarqa

[17 kaq paginapi dibujo]

Diospa chuya espiritun ñoqanchikpi kaptinqa, yuyayninchikpiwan sonqonchikpim yanapawanchik