Punta cristianokuna hinam Diospa espiritunwan yanapasqa kanchik

‘Tukuy kaykunataqa ruran kikin chuya espiritullam’ (1 COR. 12:11).

1. ¿Imakunamantam yachasun kay yachachikuypi?

PENTECOSTES punchawqa, ¡mayna admirakunapaqmi karqa! (Hech. 2:1-4.) Chay punchawpim Diosqa chuya espiritunta servichikuyta qallaykurqa mana haykapipas servichikusqanman hina. Pasaq yachachikuypim qawarqanchik Diospa serviqninkuna sasa ruraykunata ruranankupaq Jehová Diospa espiritun yanapasqanmanta. Punta cristianokunapa tiemponpim ichaqa Diospa chuya espiritunqa manaña ñawpaqpi hinañachu yanapakurqa. ¿Imaynanpi? ¿Imaynatam kunanpas yanapachikuchwan? Qawasun.

Diospa “sirvientallanmi ñoqaqa kani”

2. ¿Imaynatam Diospa chuya espiritun yanapasqanta Mariaqa qawarqa?

² Chuya espiritunta Jehová Dios qosqan punchawpiqa Mariapas hatun cuartopim lliw iñiqkunawan kuska huñunasqa kachkarqa (Hech. 1:13, 14). Mariaqa manam chay kutillapichu  qawarqa Diospa chuya espiritun tukuy ima rurasqantaqa. Kimsa chunka wata masnin ñawpaqtam, doncella kasqan tiempopi payqa chuya espiritupa atiyninwan hanaq pachapi kaq Diospa churinta wiksayakururqa (Mat. 1:20).

3, 4. ¿Imayna kasqantam Mariaqa qawachirqa, hinaspa imaynatam qatipakuchwan?

³ ¿Imanasqam Mariaqa chayna ancha favorecesqa karqa? Chaypaqqa qawasun Diospa angelninta ima nisqanpi, nirqam: “Nisqaykipi hinayá ñoqawan rurasqa kachun. Señorpa sirvientallanmi ñoqaqa kani”, nispa (Luc. 1:38). Chayna nisqanwanmi qawachirqa Diosman sonqo kasqanta hinaspa tukuy sonqonwan kasukuq kasqantapas. Manam nirqachu: ima ninqakuraq vecinoykuna wiksayoqta qawawaspankuqa nispaqa, nitaqmi hukmanyarqachu prometekusqan qariwan imayna kananmantapas. Mariaqa Diospa serviqnillan kasqantam nirqa, chayna nisqanwanmi qawachirqa tukuy sonqonwan Jehová Diospi hapipakusqanta.

⁴ Wakinpiqa ñoqanchikpas hatun ruraykunawanmi sasachakunchik chaynataq Dios serviyninchikpi ruraykunapas sasallaña rikchakuwanchikman. Chayna kaptinqa, kaykunatam tapukuchwan: “¿Jehová Diospi confianichu imapas rurasqay yanapakuyninwan allin lloqsinanta? ¿Yaqachu kamachiwasqankunata ruranaypaq hina kachkani?”, nispa. Arí, tukuy sonqonchikwan Diospi confiaspa Llapallan Kamachiq kasqanta reqsikuptinchikqa hinaspa kasukuptinchikqa, chuya espiritunwanmi yanapawasun (Hech. 5:32).

Chuya espiritupa yanapakuynintam Pedro chaskirqa

5. ¿Imaynatam Pedroqa chuya espiritupa yanapakuyninta chaskirqa manaraq Pentecostes 33 wata kachkaptin?

⁵ Maria hinam apostol Pedropas, Pentecostes 33 watamanta ñawpaqtaraq chuya espiritupa yanapakuyninta chaskirqa. Arí, Jesusmi paymanwan wakin qatiqninkunamanpas atiyta qorqa demoniokunata qarqonankupaq (Mar. 3:14-16). Chayna rurasqanmanta Biblia mana lliwta willawaptinchikpas, sutillatam qawanchik chuya espiritu yanapasqanta. Pedrota Diospa espiritun yanapasqanqa qawakurqataqmi, Jesusta kasukuspan yaku hawanta purisqanpipas (leey Mateo 14:25-29). Kaykunam qawachin Pedrota chuya espiritu yanapasqanta. Ichaqa Jehová Diospa espiritunqa manañam chayna ruraykunallapichu yanapanan karqa.

6. ¿Imakunatam chuya espiritupa yanapakuyninwan Pedroqa rurarqa Pentecostes punchawpi hinaspa qatiqnin punchawkunapipas?

⁶ Pentecostes fiestapim, chuya espirituqa Pedromanwan wakin qatiqninkunamanpas atiyta qorqa Jerusalenman watukamuq huklaw nacionniyoq runakunapa rimayninkuta rimanankupaq. Hinaptinmi Pedroqa huñunasqa achkallaña runakunapa qayllanpi rimarirqa (Hech. 2:14-36). Chaymantapas chuya espiritupa yanapakuyninta chaskispanmi, qatikachasqa kachkaspanpas qarinchakuspan hinalla Diosmanta willakurqa (Hech. 4:18-20, 31). Diospa chuya espiritunqa yanaparqataqmi mana yachasqankunata entiendechinanpaq (Hech. 5:8, 9). Atirqataqmi wañuqkuna kawsarichiytapas (Hech. 9:40).

7. ¿Imakunatam Pedroqa allinta entienderqa chuya espirituwan akllasqa kaptin?

⁷ Pentecostes punchawmanta ñawpaqtaqa, Pedroqa allintañam entienderqa Jesuspa achka yachachisqankunataqa (Mat. 16:16, 17; Juan 6:68). Ichaqa karqaraqmi mana allin entiendesqankunapas. Qawasun, manamá allintaraqchu entienderqa kimsa punchawmanta Jesus espiritu cuerpoyoq kawsariramusqanmanta hinaspa hanaq pachapi Jesus munaychakunanmantapas (Juan 20:6-10; Hech. 1:6). Manataqmi entienderqachu wakin runakuna espiritu cuerpoyoqña hanaq pachaman rispanku Jesuswan kuska kamachimunankumantapas. ¿Haykapitaq chaykunataqa allinta entienderqa? Chuya espirituwan bautizasqa hinaspa hanaq pachaman rinanpaq suyakuyniyoq kaspanñam.

8. ¿Ima yanapakuymi kachkan hanaq pachaman rinankupaq suyakuyniyoq kaqkunapaqwan ‘sapaq ovejakunapaqpas’?

 ⁸ Jesuspa qatiqninkunaqa Diospa yachachikuyninkunatam aswan allintaña entienderqaku chuya espirituta chaskiruspanku. Dios yuyaychaptinmi paykunaqa Griego Rimaypi Diospa Palabranta qellqayta qallaykurqaku, chaypim willakurqaku Jehová Diospa munayninkunamanta (Efe. 3:8-11, 18). ¡Anchatamá chay qellqasqankuqa yanapawanchik! Chaymi hanaq pachaman rinankupaq suyakuyniyoq kaqkunawan ‘sapaq ovejakunapas’ chay yachachikuywan yanapachikunchik (Juan 10:16). ¿Chaninchanchikchu chuya espiritupa yanapakuyninwan Biblia entiendesqanchikta?

Pablom chuya espirituwan huntasqa karqa

9. ¿Imatam Pablo rurarqa chuya espiritupa yanapakuyninwan?

⁹ Pentecostes fiestamanta huk wata pasaytam, Saulopas chuya espiritupa yanapakuyninta chaskirqa, paymi apostol Pablowan reqsisqa karqa. Paytam chuya espirituqa imaymanata yanaparqa, wakinqa kunan tiempopipas allintam yanapawanchik. Ejemplopaq, yuyaycharqam Bibliapi 14 librokunata qellqananpaq. Pedrota hinam yanaparqa wakin runakuna hanaq pachaman rinankupaq suyakuyniyoq kasqankumanta entiendenanpaq hinaspa chaymanta allinta qellqananpaqpas. Yanaparqataqmi onqoqkunata sanoyachinanpaq, demoniokunata qarqonanpaq hinaspa wañuqkunata kawsarichinanpaqpas. Chuya espirituqa yanaparqataqmi ancha allin llamkayta rurananpaqpas, chayta ruranapaqmi kunanpas kallpanchawachkanchik manaña milagrowan hina yanapawaspanchikpas.

10. ¿Imaynatam chuya espiritu Pablota yanaparqa rimananpaq?

¹⁰ Chipre lawpi Pablo kachkaspanmi chuya espiritupa yanapakuyninwan, mana manchakuspan layqa ruraq runata mana allin rurasqanmanta qaqcharqa. Islapi kamachikuq prefecto Pablopa yachachisqanta admirakuywan uyarispanmi Diospi iñikurqa (Hech. 13:8-12). Pabloqa yacharqam chuya espiritupa yanapakuynin predicanapaq ancha allin kasqanta (Mat. 10:20). Chaymi huk kutipi Pabloqa Efesopi kaq cristianokunata nirqa paypaq Diosta mañapunankupaq chaynapi imam ninanta yachachinanpaq (Efe. 6:18-20).

11. ¿Imaynatam Diospa chuya espiritun Pablota yanaparqa?

¹¹ Diospa chuya espiritun wakin llaqtakunapi rimananpaq yanapaspanpas, wakinpiqa harkarqam. Chaymantapas maytaña predicaq riptinpas mayninta rinanpaqmi yanaparqa (Hech. 13:2; leey Hechos 16:6-10). Kunanpas Jehová Diosqa hinallam chuya espiritunwan yanapawanchik predicasqanchikpi. Pablo hinam ñoqanchikpas kallpanchakunchik mana manchakuspa Diosmanta willakunapaq. Manamá Pablopa tiemponpi hinachu sutillata chuya espirituqa yanapawanchik, ichaqa segurom kachkanchik allin sonqoyoq runakunata tarinapaq yanapawasqanchikmanta (Juan 6:44).

“Achka rikchaq kaqkunatam rurachwan”

12-14. ¿Diospa espiritunqa imam kaqllatachu llapan serviqninkunata yanapan?

¹² Kunan tiempopi Diosta serviqkunataqa  anchatam kallpanchawanchik, hanaq pachaman rinankupaq punta cristianokunata Jehová Dios yanapasqanmanta yuyarisqanchikqa. Chuya espiritu imakuna rurasqanmanta Corintopi kaq cristianokunaman Pablo qellqaspanmi kaynata nirqa: ‘Achka rikchaq atiykunam kan ichaqa chaykunaqa kikin espiritullamantam. Achka rikchaq ruraykunapim servikuchwan ichaqa huk Señorllatam servinchik. Achka rikchaq kaqkunatam rurachwan ichaqa kikin Diosllam llapallanta runakunapi ruran’, nispa (1 Cor. 12:4-6, 11). Qawasqanchikman hinaqa, Diospa espiritunqa tukuy imaymanatam sapa serviqninkunata yanapan, hanaq pachapaq otaq kay Pachapaq suyakuyninku kaptinpas (Luc. 12:32; Juan 10:16). Chayna kaptinpas manam imam kaqllatachu llapan iñiqmasinchikkunataqa yanapan.

¹³ Piensasun, ancianokunaqa chuya espiritupa yanapakuyninwanmi akllasqa kanku (Hech. 20:28). Chayna kaptinpas manam lliw hanaq pachaman riqkunachu ancianoqa kanku. Kaymi qawachiwanchik congregacionpi iñiqmasinchikkunata Diospa chuya espiritun mana chaynallata yanapasqanta.

¹⁴ Hanaq pachaman riqkunataqa ‘Diosmi churinña kanankupaq’ sonqonkupi willan. Chaypaqmi chuya espiritunta servichikun, hina chaywantaqmi churintapas kawsarichirqa hanaq pachapi wiñaypaq kawsananpaq (leey Romanos 8:11, 15). Hina chay espirituwantaqmi kay Pachatapas unancharqa (Gen. 1:1-3). Hina chayllawantaqmi Bezaleeltapas yanaparqa karpanta rurapunanpaq, Sansontapas runakunapa mana ruray atisqanta rurananpaq hinaspa Pedrotapas yaku hawanta purinanpaq. Ichaqa kaytam allinta entiendenanchik: Diospa espiritun pi cristianota yanapaptinpas manam nichwanchu hanaq pachaman rinanpaq akllasqa kasqantaqa. Hanaq pachaman rinankupaq cristianokuna akllasqa kasqankuqa, chuya espiritupa sapaq rurayninmi. Chayna akllasqa kanankupaq tanteaqqa kikin Jehová Diosmi.

15. ¿Wiña-wiñaykamachu chuya espirituwan Diosqa hinalla runakunata bautizanqa? ¿Imanasqam chaynata ninchik?

¹⁵ Qawasqanchikman hinaqa, waranqa watakuna ñawpaqmantaraqmi Jehová Diospaqqa kay Pachapi serviqninkuna kapurqa, paykunatam chuya espiritunwan tukuy imapi yanaparqa. Achka qarikunawan warmikunam hanaq pachaman rinankupaq chuya espirituwan bautizasqa kayta qallaykurqaku Pentecostes 33 watapi, chayqa ñamá tukunqaña. Chaywanpas Jehová Diosqa hinallam serviqninkunaman chuya espiritunta qonqa munayninta hinalla ruranankupaq.

16. ¿Imatam Diospa serviqninkunaqa chuya espiritupa yanapakuyninwan rurayta atichkanku?

¹⁶ ¿Imatam Diospa serviqninkunaqa chuya espiritupa yanapakuyninwan rurayta atichkanku? Apocalipsis 22:17 nin: ‘Chuya espirituwan Carneropa novianmi nin: “Hamuy” nispa. Uyariqpas nichun: “Hamuy” nispa. Pipas yakunayachikuqqa hamuspayá kawsachikuq yakuta tomachun mana imallapaq’, nispa. Cristianokunapas chuya espiritupa yanapakuyninwanmi Diosmanta yachay munaqkunata yanapanku. Hanaq pachaman riqkunam astawanqa chay ruraypi kallpanchakunku, kay Pachapaq suyakuyniyoqkunañataqmi paykunata yanapanchik. Llapankum chuya espiritupa yanapakuyninwan huklla llamkanku. Maypaqña suyakuyninku kaptinpas, bautizakurqakum ‘Taytapa, Churipa hinaspa chuya espiritupa sutinpi’ (Mat. 28:19). Llapallankum saqekunku chuya espiritupa yanapakuyninman hina kawsanankupaq (Gal. 5:22, 23). Saqekunkutaqmi chuya kanankupaq kallpanchakusqankupi yanapananpaqpas (2 Cor. 7:1; Apo. 7:9, 14).

Hinalla chuya espirituta mañakusun

17. ¿Imaynatam qawachinchik ñoqanchikpi chuya espiritu kasqanta?

¹⁷ Chaymi, hanaq pachapaq otaq kay pachapaq suyakuyninchik kaptinpas Jehová Diosqa hinallam kallpata qowanchik paypi hapipakuspa wiñay kawsayta haypanapaq  (2 Cor. 4:7). Wakinpiqa runakunam burlakuwanchik allin noticiamanta hinalla predicaptinchik. Yuyarinanchikmi ‘Cristorayku insultawasqanchikta’. Ichaqa hinalla predicaspanchikqa kusisqam kasun hinaspapas qawachisunmi Diospa espiritun ñoqanchikpi kasqanta (1 Ped. 4:14).

18, 19. ¿Ima yanapakuytam Jehová Diosqa qowasun chuya espirituntakama, hinaspa imata ruranapaqmi tanteakunanchik?

¹⁸ Diospa chuya espiritunta mañakuspaqa chaskisunmi, chaymi tukuy sonqowan Dios serviy munasqanchikta kallpanchanqa. Bibliam nin: “Diosmi munasqanman hina allin munayta qosuspaykichik allinkuna ruranaykichikpaq yanapasunkichik”, nispa. Chaymi kallpanchakunanchik salvasqa kananchikpaq. ¿Imaynatam chayta atichwan? Diospa chuya espiritunwanmi yanapachikunanchik hinaspapas ‘wiñay kawsay qokuq palabratam hatallinanchik’ (Fili. 2:12, 13, 16).

¹⁹ Diospa chuya espiritunwan yanapachikuspaqa tukuy sonqonchikwanmi Dios serviypi rurayninchikkunata rurasun, kallpanchakusuntaqmi sapa kuti aswan allinta ruranapaq hinaspapas Diostam yanapawananchikpaq mañakusun (Sant. 1:5). Paymi Palabranta entiendenapaq, sasachakuykunata atipanapaq hinaspa predicanapaqpas yanapakuykunata qowasun. Diospa chuya espiritunta mañakuspaqa, kaytam yuyarinanchik: “Mañakuptikichikqa Diosqa qosunkichikmi. Maskaychik, tarinkichikmi, qayaychik, kichasunkichikmi” (Luc. 11:9, 13). Hinaptinqa, amayá saqesunchu Jehová Diospa chuya espiritunta mañakuytaqa, chaynapi ñawpaq serviqninkunata hina ñoqanchiktapas hinalla yanapawananchikpaq.

¿Imatam niwaq?

• ¿Mariapa imayna kasqantam qatipakunanchik Diospa bendicionninkunata chaskinapaq?

• ¿Imaynakunatam Diospa chuya espiritunqa Pablota yanaparqa?

• ¿Imaynatam kunanpas chuya espirituqa yanapawanchik?

[Kay yachachikuypa tapukuyninkuna]

[24 kaq paginapi dibujo]

Diospa chuya espiritunwanmi Pabloqa demoniokunata qarqoyta atirqa

[26 kaq paginapi dibujo]

Hanaq pachapaq otaq kay Pachapaq suyakuyninchik kaptinpas, lliwmanmi Diosqa chuya espiritunta qowanchik