JEHOVÁ DIOSPA testigonkunapaqqa kapuwanchikmi ñawpaqmantaraq ancha chaninniyoq kaqkuna, manam qellqanchikkunallachu aswanqa fotokunapas, cartakunapas, iñiqmasinchikkunapa vidanmanta willakuykunapas hinaspa Diosmanta willakunapaq tukuy rikchaq kaqkunapas. Ichaqa, ¿imakunapim yanapawanchikman tukuy kaykunaqa? Israel nacionpim tayta-mamakunaqa churi-wawankuman yachachinanku karqa leykunata hinaspa Jehová Diospa tukuy ima rurasqankutapas, chaynapi ‘Diospi confianankupaq’ (Sal. 78:1-7).

Waqaychasqa kaqkunamanta yachayqa ñawpaqmantaraqmi anchata yanapakurqa Diospa munaynin hinalla rurakunanpaq. Qawarisun, Jerusalenpi templota Diospa llaqtan hatarichichkaptinkum enemigonkuna harkakuyta munarqaku, chaymi Media law Ecbatana llaqtapi waqaychasqa kaqkunata qawarqaku hinaspam tarirurqaku huk qellqata chaypim rey Ciro templota hatarichinankupaq kamachirqa (Esd. 6:1-4, 12). Chaymi hinalla llamkarqaku Diospa kamachisqanman hina. Biblia qellqaq Lucaspas ñawpaq qellqakunatam qawarqa ‘imakuna pasakusqanmanta’ yachananpaq (Luc. 1:1-4).

Kunanpas Diospa Llaqtanpi Punta Apaqkunaqa munankum Dios serviyninchikpi tukuy rurasqanchikkunamanta yachayta. Kaykunamanta  rimaspanmi huk kaqnin nirqa: “Mayman risqanchikta yachanapaqqa, yachananchikmi maymanta hamusqanchikta”, nispa. Chaypaqmi Brooklyn (Nueva York) Betel wasipi tantearunku Waqaychasqa Kaqkuna niq oficina kananpaq, chaymantam nanachikunku Yachachikuykuna Qellqaymanta Encargakuqkuna.

DIOSPA LLAQTANPI WAQAYCHASQA KAQKUNAMANTA

Tiempopa pasasqanman hina, ¿pitaq mana munanmanchu familianchikpa fotonkunata otaq imapas qowasqanchikkuna waqaychayta? Chaypaqmi Waqaychasqa Kaqkunamanta nanachikuqkuna, kallpanchakuchkanku ñawpaqmantaraq Diosmanta willakunapaq tukuy servichikusqanchikkunata huñuspa waqaychanankupaq. Chay Waqaychasqa Kaqkunapiqa kachkantaqmi fotokunapas, ñawpaq qellqanchikkunapas, iñiqmasinchikkunapa vidanmanta willakuykunapas chaynataq kuyayllapaq imakuna kaqkunapas. Tukuy kaykunam yanapawanchik pasaq watakunapi Dios serviyninchikmanta yachanapaq hinaspa hamuq tiempota confianzawan qawanapaqpas.

Chaymi kallpanchaykiku kay Llaqta Cuidaq qellqapi “Waqaychasqa Kaqkunamanta” niq yachachikuy sapa kuti lloqsimuptin leenaykichikpaq. Qatiqnin qellqapim huk yachachikuy lloqsimunqa kay tapukuykunata kutichinanpaq: ¿Imataq karqa auroramóvil nisqanku? ¿Pikunataq servichikurqaku? ¿Haykapimantam hinaspa imaraykum chayta servichikurqaku?

Familianchikpa fotonkunata allinta waqaychasqanchikman hinam, kay Waqaychasqa Kaqkunapi tarikuq kaqkunaqa yanapawasunmi pikuna kasqanchikmantawan ñawpaqpi iñiqmasinchikkunamanta yachanapaq. Qawachiwasuntaqmi iñiyninkumanta, mana manchakuspa willakusqankumanta, Diosta servispa kusikuyninkumantawan sasachakusqankumantapas chaynataq llaqtanta Dios imayna pusasqanmantawan sapa kuti yanapasqanmantapas (Deu. 33:27). Segurom kachkanchik kay rurakusqanta Jehová Dios bendecinanmanta, kaykunaqa kallpanchawanchikmi huk sonqolla Diospa munayninta rurananchikpaq.

[31 kaq paginapi foto hinaspa recuadro]

Kaykunapas

Diospa llaqtanpi kaq dibujaqkuna, qellqaqkuna, estudiaqkuna hinaspa chayna ruraqkunaqa, tukuy imakunata qawaspankum qellqanchikkunata, DVD nisqata hinaspa hukkunatapas ruranku. Chaymi Waqaychasqa Kaqkunamanta nanachikuqkunaqa ñawpa watapi tukuy rikchaq kaqkunata Betel wasikunamanta, congregacionkunamanta chaynataq huk lawkunamantapas huñunqaku hinaspa sumaqllata waqaychanqaku. Qawasun wakin llamkayninkunata:

Imayna huñusqankumanta. Sapa kutim astawan yapanku huñusqankumanqa. Wakintam qonku otaq prestanku unay wataña Diosta serviqkunapa ayllunkuna. Chaykunata qawaspam yachanchik pasaq watakunapi Dios serviyninchik imayna kasqanmantawan pikuna chayna pasasqankumanta.

Ordenninpi churasqanku. Huñusqankuqa waranqanpim kachkan, wakinqa pachak wata masniyoqña. Chaykuna tukuy rikchaq kasqanraykum, ordenninpi churananku tiempopa risqanman hina servichikunapaq.

Allinyachispa waqaychasqanku. Librokunatawan pakikuq kaqkunatam sumaqyachinku allin yachaywan ruraspa. Documentokunata, fotokunata, periodicopi willakuykunata, peliculakunata hinaspa uyarinapaq kaqkunatapas computadorapiñam churanku. Chaynapi manaña hapispa servichikunapaq.

Imayna allichasqanku. Tukuy ima huñukusqanqa ordenninpi hinaspa sumaq waqaychasqam kanqa, chaynapi mana chinkananpaq hinaspa mana imawanpas dañasqa kananpaq. Tukuy imakunaqa allin sutichasqam kachkan chaynapi mana sasachakuspalla tarinapaq.

[32 kaq paginapi fotokuna]

1) “Foto-Drama de la Creación” nisqamanta willakuy. 2) Bibliamanta qellqakunata imayna chaskinapaq. 3) Parlanteyoq carro. 4) 1912 watapa 15 de abril killanpi lloqsimuq The Watch Tower revistapa qaran. 5) J. F. Rutherford iñiqmasinchikta presochanankupaq kamachikuy. 6) WBBR radiopi rimasqanku microfono. 7) Fonógrafo. 8) Qellqakunata apanankupaq kaq. 9) Imapas yachasqankumanta qellqasqanku. 10) J. F. Rutherford iñiqmasinchikpaq Telegrama nisqa