“¿Imaynatamá predicaytaqa atiyman?”

Enteron Pachapi achka iñiqmasinchikkunam llumpayta onqospankupas tukuy sonqonkuwan predicanku. Qawasunchik Dalia sutiyoq iñiqmasinchikmanta, paymi Lituania nacionpi yachan.

Payqa yaqa 35 watanpim kachkan. Nacesqanmantapacham cuerpon wañuruptin yanqa-yanqallataña rimaytapas atin. Chaymi rimasqantaqa familiallan entienden, astawanraqmi Galina sutiyoq mamanqa. Tukuy chaykunawan anchata sasachakuspanpas, allin kaqkunapim hinalla piensan. ¿Imaynatam chayta ruran?

Mamanmi nin: “1999 watapim Apolonija sutiyoq primay watukamuwarqaku, payqa Testigom. Chaypim musyakurqaniku Bibliamanta allinta yachasqanta. Wawaymi achkata tapukurqa hinaspam Bibliata estudiachinanta munarqa. Wakinpim paykunawan tiyaq kani wawaypa rimasqanta entiendechinaypaq. Yachasqankuna allin yanapasqanta qawaspaymi, ñoqapas Bibliamanta yachachiwananpaq nirqani”, nispa.

Bibliamanta astawan yachaptinmi Daliataqa huk tapukuy iskayrayachirqa, chaymi Bibliamanta yachachiqninta tapurqa: “Kayna tarikusqaywanqa, ¿imaynatamá predicaytaqa atiyman?”, nispa (Mat. 28:19, 20). Payñataqmi nirqa: “Ama manchakuychu, Jehová Diosmi yanapasunki”, nispa. Chaynamá karqa.

¿Imaynatam payqa Diosmanta willakun? Wakinpiqa cartata apachispanmi. Chaypaqmi valekun iñiqmasinkunata, paykunam qellqapunku willakuy munasqanta. Willakuntaqmi telefonontakama qellqaspanpas. Allin punchaw kaptinñataqmi congregacionmanta wakin iñiqmasinkunaqa parquekunapi predicanankupaq pusanku.

Daliawan mamanqa allintam iñiyninkupi ñawparirqaku, hinaptinmi 2004 watapa noviembre killanpi bautizakururqaku. Chaymantañataqmi 2008 watapa septiembre killanpi Vilna llaqtapi polaco rimayniyoq iñiqmasinchikkunata yanapayta qallaykurqaku necesitakusqanrayku. Daliam nin: “Anchatam llakikuni wakin killakunapi predicayman mana lloqsiy atisqaywan. Ichaqa Jehová Diostam mañakuni, chaymi pipas predicayman pusawananpaq hamun”, nispa. Nintaqmi: “Cuerpoy wañuruptinpas, piensayniyqa manamá chaynachu. Kusisqam tarikuni Jehová Diosmanta runakunaman willay atisqaywan”, nispa.