“Tukuy ima rurasqaykichiktaqa ruraychik Señorninchikpaq rurachkaq hinayá” (COL. 3:23).

1-3. a) Jesuspa wañupuwasqanchikraykuchu, ¿manaña ima kañasqa ofrendatapas Jehová Diosman qonanchik? b) Kañasqa ofrendakunata hina Diospaq qospaqa, ¿imamantam segurakunanchik?

PUNTA pachak watapi serviqninkunatam Jehová Diosqa nirqa Leyman hina kawsasqankuqa, Jesuspa wañukusqanwan tukurusqanta (Col. 2:13, 14). Chayraykum imaymana kañasqanku ofrendakunaqa mana chaninniyoqña karqa. Warmakunata pusachkaq hinallam Kamachikuykunaqa judio runakunata Jesucristoman pusarqa (Gal. 3:24).

² Ichaqa, manamá kaywanqa nichkanchikchu kañasqa ofrendakunamanta manaña yachay munasqanchiktaqa. Apostol Pedrom nirqa ‘mana rikuy atina ofrendata Diosman presentanapaq. Kay ofrendatam Diosqa chaskin Jesucristontakamalla’ (1 Ped. 2:5). Chaymantapas apostol Pablom qawachirqa tukuy kawsayninchikta Diospaq “ofrendata hina” qonamanta (Rom. 12:1).

³ Kunan cristianokunapas Jehová Diosmanmi kañasqa ofrendakunata hina qonchik imanchiktapas qospa otaq payrayku munasqanchikkunatapas qepanchaspa. Israelitakuna imayna ofrenda qonankumanta yuyarispam, ñoqanchikpas segurakunanchik qosqanchik ofrendakuna Diospa munasqanman hina kananpaq.

SAPA PUNCHAW KAÑASQA OFRENDAKUNA HINA RURASQANCHIK

4. ¿Imatam yuyarinanchik sapa punchaw imatapas ruraspanchik?

⁴ Wakinpiqa sasaniraqmi kanman, sapa punchaw rurayninchikkunawan Jehová Diospaq rurasqanchikkunawan tupasqanmanta yachayqa. Yaqapaschá  imapas rurasqanchik, estudiasqanchik, llamkasqanchik, rantipakusqanchik hinaspa huk rikchaq rurasqanchikpas mana rikchakuwachwanchu Dios serviyninchikwan tupasqanta. Ichaqa, Jehová Diosman qokuruspaqa otaq chayraq ruranapaq tantearuspaqa, allinpunim kanman allin sonqowan chaykunata rurayqa. Tuta-punchawmi cristiano kanchik, chaymi Bibliapa yachachisqanman hina kawsananchik. Pablopas ninmi: “Tukuy ima rurasqaykichiktaqa ruraychik Señorninchikpaq rurachkaq hinayá”, nispa (leey Colosenses 3:18-24).

5, 6. ¿Imataq yanapawasun imayna kawsayninchikpi hinaspa pachakuyninchikpipas?

⁵ Sapa punchaw rurayninchikkunaqa, sapaq ruraymi Dios yupaychayninchikmantaqa. Chayna kaptinpas, Pablom niwanchik Diospaq hina llamkanamanta, chaymi yuyaymanananchik imayna kawsasqanchikpi. Allinmi kanman kaykunamanta tapukuyninchik: “¿Imayna kawsasqaywan pachakusqay qawachinchu Diospa serviqnin kasqayta? ¿Icha imayna kawsasqayraykuchu wakinpiqa penqakuni Jehová Diospa testigon kasqaywan reqsichikuyta?”, nispa. ¡Mayna llakikunapaqchá kanman chayna kaptinqa! Jehová Diospa testigonkunaqa manamá haykapipas munachwanchu Diospa sutin penqaypi kanantaqa (Isa. 43:10; 2 Cor. 6:3, 4, 9).

⁶ Piensasun imaynatam Diospaq tukuy sonqowan llamkasqanchik yanapawachwan tukuy kawsasqanchikpi. Chaykunapi piensaspaqa, yuyarinanchiktaqmi ofrendakunata israelitakuna imayna qonankupaq Dios munasqanta (Exo. 23:19).

IMAYNA YANAPAWASQANCHIKMANTA

7. ¿Imataq Diosman qokuyqa?

⁷ Jehová Diosman qokuspanchikqa, prometekurqanchikmi imaña kaptinpas payta puntapi churanapaq (leey Hebreos 10:7). Arí, chayna tanteasqanchikqa allinpunim karqa. Hinaspapas qawarqanchikchá Diospa munasqanman hina imatapas ruraptinchik haykapipas allinpi tukusqanta (Isa. 48:17, 18). Kusisqa hinaspa chuya runankunam kanchik yachachiwaqninchik Dios hina (Lev. 11:44; 1 Tim. 1:11).

8. ¿Imaynam kanan karqa Israel runakunapa kañasqa ofrendankuta Jehová Dios chaskinanpaq hinaspa imatam yachachiwanchik?

⁸ Israel runakuna Jehová Diospaq kañasqa ofrenda qosqankuqa payllapaqña sapaqchasqa hinam karqa (Lev. 6:25; 7:1). Kaypi qawasqanchikman hinaqa, imapas rurasqanchikta Dios chaskinanta munaspaqa, manam runakunapa rurasqankuman hinachu kanan. Manataqmi Diospa cheqnisqantaqa kuyananchikchu (leey 1 Juan 2:15-17). Manachá munachwanchu  mana iñiqkunawan amistad ruraytaqa, chaynapi Diospa qawasqanman hina mana huchallikunapaq (Isa. 2:4; Apo. 18:4). Manataqmi mana allin kaqkunataqa munapayananchikchu nitaq millay piensaykunawanpas intuchikunanchikchu (Col. 3:5, 6).

9. ¿Imanasqataq ancha allin runamasinchikta allin qawayqa?

⁹ Pablom iñiqmasinkunaman nirqa: “Allin ruraytawan kapuqnikichikwan yanapanakuytaqa amayá qonqaychikchu, chay rurasqaykichikwanmi kañasqa ofrendawan hina Diosta agradankichik”, nispa (Heb. 13:16). Arí, Jehová Diosqa chaskinmi kañasqa ofrendata hina munasqanman hina imatapas ruraptinchikqa otaq hukkunata yanapaptinchikqa. Chayta ruraspam qawachinchik cheqap cristianokuna kasqanchikta (Juan 13:34, 35; Col. 1:10).

YUPAYCHAYNINCHIKPI OFRENDATA HINA QOSQANCHIK

10, 11. ¿Imaynatam Jehová Dios qawan predicasqanchiktawan yupaychasqanchikta, hinaspa imaynatam chayqa yanapawachwan?

¹⁰ Runamasinchik yanapaytaqa atichwanmi Diospa sutinmanta willakuspa. ¿Kallpanchakunchikchu iñiyninchikmanta haykapipas willakunapaq? Pablom nirqa kay rurasqanchikwan ‘kañasqa ofrendata qochkaq hina sutinmanta willakuspa Jesucristontakama sapa kuti Diosta alabasqanchikta’ (Heb. 10:23; 13:15; Ose. 14:2). Diospa munaychakusqanmanta hayka tiempota hinaspa imaynatapuni rurasqanchikmantaqa achkatam nichwan, chaypaqmi yanapakuykunata chaskinchik Diosta Servinapaq Huñunakuypi. Ichaqa nichwanmi wasin-wasin hinaspa maypipas predicasqanchikqa kañasqa ofrenda hina Jehová Diospaq kasqanta, chaymi kallpanchakunanchik allinpuni kananpaq. Imayna tarikusqanchikrayku wakinkuna hina mana rurayta atispanchikpas, chayta runapaq ancha kallpanchakusqanchikqa qawachinmi Dios serviyninchikta ancha chaninchasqanchikta.

¹¹ Cristianokunaqa sapa semanam tiempochakunchik sapallanchikpi otaq achka huñunakuspapas Jehová Diosta yupaychanapaq. Chaytaqa kikinpunim kamachiwarqanchik. Arí, manañam sabado punchawta samanapaq nitaq Jerusalen llaqtaman rispa sapa wata fiestakunatapas rurananchikñachu. Ichaqa, chay rurasqankum kunan tiempopi cristianokunapa  rurasqankuwan tupan. Diosqa kunanpas hinallam munachkan imapas rurayninchikkunamanta tiempochakuspa Bibliata estudiananchikta, mañakunanchikta hinaspa huñunakunanchiktapas. Chaymantapas taytakuna familiawan Diosta yupaychanankutam munan (1 Tes. 5:17; Heb. 10:24, 25). Llapanchikmi kaynata tapukunanchik: “¿Kallpanchakuymanchu Dios serviyniypi rurayniykuna aswan allin kananpaq?”, nispa.

12. a) ¿Imatam inciensoman rikchakuqta hina Jehová Diosman qochwan? b) Mañakuyta inciensowan Biblia tupachiptinqa, ¿imaynataq mañakuyninchik kanan?

¹² Rey Davidmi Diospaq kaynata takirqa: “Kañasqa incienso hinayá mañakuyniypas qayllaykipi kachun”, nispa (Sal. 141:2). Yuyaymanasunchik kaykunapi: ¿Imaynataq Diosta mañakusqay? ¿Sapa kutichu mañakuni? ¿Allinpunichu mañakusqay? Apocalipsis librom nin miski asnaq inciensota hina ‘iñiqkunapa mañakuyninta’ Dios chaskisqanmanta (Apo. 5:8). Yuyarisun, Israel runakunatam kamachirqa sapa punchaw inciensota kañaspankuqa, kamachisqanman hina allinta ruranankupaq. Chaynata mana ruraptinkuqa manam chaskirqachu (Exo. 30:34-37; Lev. 10:1, 2). ¿Imatam kayqa yachachiwanchik? Mañakusqanchikta Dios uyariwananchikpaqqa, munasqanman hinam rurananchik.

QOSPAM CHASKINCHIK

13, 14. a) ¿Ima yanapakuytam Pabloman qorqaku Epafroditowan Filipos cristianokuna, hinaspa imaynatam payqa chayta qawarqa? b) ¿Imaynatam Epafroditotawan Filipos cristianokunata qatipakuchwan?

¹³ Diosmanta allpantinpi willakunapaq achkanpi otaq pisillatapas qollqenchikta qoptinchikqa, tupanmi kañasqa ofrendakunawan (Mar. 12:41-44). Punta pachak watapim Filipos cristianokuna Epafroditota Romaman kacharqaku Pablota imapas pisipuqninkunapi yanapaykunanpaq. Manamá chay kutillapichu chaynataqa yanapaykurqaku. Chayna rurasqankuwanmi munarqaku manaña qollqemanta sasachakuspan astawan predicananpaq. ¿Imaynatam payqa chayna rurasqankuta qawarqa? ‘Diospaq miski asnaq ofrendata hinam chaynataq paypa agradonpaq kañasqa animalta hinam’ (leey Filipenses 4:15-19). Anchatamá chanincharqa chayna rurasqankutaqa chaynataq Jehová Diospas.

¹⁴ Kunanpas Jehová Diosqa anchatam chaninchan Allpantinpi munayninmanta willakunapaq imapas qosqanchiktaqa. Hinaspapas prometewanchikmi munayninta puntapi churaptinchikqa tukuy imapas pisipuwasqanchikta qowananchikmanta (Mat. 6:33; Luc. 6:38).

AGRADECEKUSQANCHIKTA QAWACHISUN

15. ¿Imakunaraykutaq Jehová Dios yupaychayta munanchik?

¹⁵ Tukuy ima qowasqanchikmantam Jehová Diostaqa debekunchik. ¿Manachu chayrayku sapa punchaw agradecekuchwan kawsay qowasqanchikmanta? Paymi qowanchik mikuytapas pachatapas chaynataq wayratapas. Qowanchiktaqmi yachaytapas iñiyninchikpi allin kanapaq chaynataq suyakuyniyoq kanapaqpas. Arí, Jehová Dios imayna kasqanpi hinaspa ñoqanchikrayku tukuy imata rurasqanpi yuyaymanaspaqa, anchatachá munasun yupaychayta hinaspa paypaq tukuy ima qoytapas (leey Apocalipsis 4:11).

16. ¿Imata ruranapaqmi Jesucristopa wañukusqanqa yanapawananchik?

¹⁶ Ñawpaq yachachikuypi qawasqanchikman hinam, Diosqa ancha kuyawasqanchikta qawachiwarqanchik churinta ñoqanchikrayku qowaspanchik. ¡Chayqa  mayna sumaqmi! (1 Juan 4:10.) ¿Imata ruraspam ancha kuyasqanchikta qawachichwan? Pablom nin: “Cristo kuyawasqanchikraykum kaykunata rurananchik [. . .]. Cristoqa wañurqa llapallanchikpaqmi chaynapi kawsaqkunapas manaña kikillanchikpaq kawsaspa Cristopaqña kawsananchikpaq, payqa wañukuspanmi kawsariramurqa”, nispa (2 Cor. 5:14, 15). Kaywanmi Pabloqa nichkarqa, tukuy qowasqanchikmanta Diosta agradecekuspaqa vidanchiktam servichikusun Diostawan Churinta servinapaq. Agradecekusqanchiktaqa qawachisuntaqmi, kasukuspanchik chaynataq runakunaman ganaswan yachachispanchikpas (1 Tim. 2:3, 4; 1 Juan 5:3).

17, 18. ¿Imaynatam achka iñiqmasinchikkuna astawan Jehová Diospaq llamkanku? Huk iñiqmasinchikmanta willamuy.

¹⁷ ¿Atichwanchu Jehová Diospaq astawanraq llamkayta? Achka iñiqmasinchikkunam yuyaymananku paykunapaq Jehová Dios tukuy ima rurasqanpi hinaspam tiemponkuta allinta servichikunankupaq tanteanku. Chaynapim Dios serviyninkupi astawan rurayta atinku. Wakinkum watapi iskay-kimsa killallapas precursor auxiliar kayta atinku. Wakinñataqmi atinku precursor regular kayta. Hukkunañataqmi huñunakunapaq wasikuna hatarichiypi yanapakunku. ¡Chayna rurasqankuwanmi ancha agradecekusqankuta qawachinku! Diosqa allinpaqmi hapin agradecekuspanku kayna llamkasqankumantaqa.

¹⁸ Achka cristianokunam tukuy imata Dios paykunapaq rurasqanrayku servinankupaq kallpanchakunku. Huk kaqninmi Morena sutiyoq iñiqmasinchik. Payqa Catolica religionpim wiñarqa, ichaqa manam chay religionpiqa tapukuyninkunapa kutichiynintaqa tarirqachu. Jehová Diospa testigonkunawan Bibliata estudiaspallanmi chaytaqa tarirqa. Tapukuyninta Biblia kutichisqanmanta anchata agradecekuspanmi payqa tukuy kallpanwan Diosta servinanpaq tantearurqa. Bautizakusqan qepallatam precursor auxiliar karqa, chaymantañataq precursor regular kaytapas. Payqa 30 watañam tukuy tiemponwan Diosta servichkan.

19. ¿Imaynatam kañasqa ofrendata qochkaq hina astawan Diospaq llamkachwan?

¹⁹ Yachasqanchikman hinaqa, manam llapallan cristianokunachu chaynallaqa tarikunku precursor kanankupaqqa. Chayna kaptinpas atichwanmi Diosta servispanchik kañasqa ofrendata hina payman qoytaqa. Chaytam qawachisun imayna kawsasqanchikwan, chaypaqqa Bibliapa nisqantam kasukuna, manataqmi haykapipas Diospa serviqnin kasqanchiktaqa qonqanachu. Qawachisuntaqmi iñisqanchikwan, chaypaqqa Diospa munaynin rurakunanmantam seguropuni kananchik. Qawachisunchiktaqmi allin rurayninchikkunawan, chaypaqqa astawanmi kallpanchakuna Diosmanta willakunapaq. Yachasqanchikman hinam sonqonchikpi kaqmanta rimanchik. Tukuy chaskisqanchikmanta ancha agradecekusqanchik sonqonchikpi kasqanraykum, tukuy sonqonchikwan ofrenda qochkaq hina Jehová Diosmanta hinalla willakusunchik.

[Kay yachachikuypa tapukuyninkuna]

[25 kaq paginapi suti rikuylla kaq willakuy]

Ñoqanchikrayku tukuy imata Jehová Dios rurasqanrayku, ¿munanchikchu paypaq tukuy ima qoyta?

[23 kaq paginapi dibujo]

¿Kallpanchakunchikchu haykapipas iñiyninchikmanta willakunapaq?