¡Diospa Palabranmantam qarinchakuspa willakurqaku!

Cheqap cristianokunaqa qarinchakuq kasqankutam qawachinku sasachakuypi tarikuspankupas, chayna kasqantam qawachin “Testimonio cabal” del Reino de Dios hinaspa Los testigos de Jehová, proclamadores del Reino de Dios, nisqa qellqakunapas. Punta cristianokuna hinam Diosta mañakunchik chuya espiritunta qowananchikpaq chaynapi qarinchakuspa palabranmanta rimananchikpaq (Hech. 4:23-31).

Enteron Pachapi punta kaq guerrapi imayna predicasqankumantam huk iñiqmasinchik nin: “Diospa serviqninkunaqa qarinchakuspankum kusikuywan The Finished Mystery (El misterio terminado) nisqa qellqata aypurqaku, chay qellqaqa Estudios de las Escrituras nisqapa qanchis kaq partenñam karqa, hinaspapas wakin qellqakunamantaqa astawanmi cheqechisqa karqa. Punta kaq Kingdom News (Noticias del Reino) nisqa qellqaqa 1918 watapim lloqsimurqa. Iskay kaq Kingdom News nisqa qellqañataqmi, willakurqa autoridadkuna imanasqa The Finished Mystery nisqa qellqata aypukunanmanta harkakusqankuta. Chaymantañataqmi kimsa kaq Kingdom News nisqa qellqa lloqsimurqa. Hanaq pachaman rinankupaq suyakuyniyoq cristianokunam chay qellqakunataqa aypurqaku, chayta ruranankupaqmi ichaqa qarinchakuq hinaspa iñiyniyoq kananku karqa”, nispa.

Kunan tiempopi chayllaraq predicaqkunaqa yanapakuytam chaskinku Diosmanta willakunankupaq, ichaqa manam chaynachu karqa ñawpaqpiqa. 1922 watapim, Estados Unidospi yachaq Polonia nacionniyoq iñiqmasinchik chayllaraq predicasqanmanta yuyarispan nirqa: “Manam yacharqanichu qellqanchikkuna imayna saqeyta hinaspapas ingles rimaytaqa manam llumpaytachu yacharqani, ichaqa doctorpa oficinanpa punkupi kaspaymi punkunta takaykurqani. Hinaptinmi huk enfermera lloqsiykamurqa. Manam haykapipas qonqasaqchu chaypi pasawasqantaqa, kusisqa kaspaypas manchakuywanmi kachkarqani. Maletinniyta kichaykuptiymi lliw qellqakuna enfermerapa ñawpaqninman wichiykurqa. Manam yuyanichu ima nisqaymantaqa, ichaqa chaskiwarqam huk qellqata. Chaymanta pasakuspayqa kallpanchasqañam tarikurqani hinaspapas Diospa yanapakuynintam chaskirqani. Chay punchawqa achka qellqakunatam chay lawpi saqerqani”, nispa.

Huk cristianam willakun: “1933 kaq watakunapim cristianokunaqa carropi parlanteta churaykuspanku Diosmanta willakuqku”, nispa. Huk kutipim paywan huk casarasqa Testigokuna California (Estados Unidos) lawpa orqonpi predicachkarqaku. Yuyarispanmi nin: “Predicaqmasiypa qosanmi carronwan orqoman qespirurqa, ñoqaykuñataqmi llaqtapi qeparqaniku. Chay grabasqa willakuypa uyarikusqanqa hanaq pachamantapas hamuchkanman hinam karqa. Llaqtapi runakunaqa tukuy hinastinpim chay iñiqmasinchikta maskarqaku, ichaqa manam tarirqakuchu. Chay willakuyta uyariruptinkuñataqmi wasinkuman watukurqaniku Diosmanta willakunaykupaq. Predicarqanitaqmi  iskay parlanteyoq carrokunawanpas, yaqa llapallan runakunaqa manam uyariyta munawarqakuchu. Ichaqa mana munaymi uyariqku wasinkukama chay willakuy uyarikusqanrayku. Chayta ruranapaqqa qarinchakuqmi kana karqa, ichaqa chay rurasqaykuwanmi Diospa sutin hatunchasqa karqa. Imayna predicasqaykupi Jehová Dios yanapawasqankutam haykapipas qawarqaniku”, nispa.

1930 watamanta 1940 watapa qallariyninkamam grabasqa discursokunawan predicakurqa. Huk cristianam willakun: “Huk sipas iñiqmasinchikmi wasin-wasin predicachkarqa grabasqa discursota uyarichispan. Huk wasipi uyarichichkaptinmi, huk runa llumpayta piñakuspan wasinpa punkunmanta chay uyarichisqanta haytarurqa, ichaqa manam pakikurqachu. Chay pasakusqantam kimsa runakuna carropi mikuchkaspanku qawarqaku, hinaspam nirqaku paykunata uyarichinanpaq chaynataq qellqakunatapas mañakurqaku. Paykunapa uyarisqankum sonqonta tiyaykachirqa”, nispa. Chaykunata aguantanapaqqa qarinchakuqmi kana.

Hina chay cristianam nin: “Yuyarinim 1940 watapi revistakunawan callekunapi predicay qallarisqaykumanta. Ñawpaqpiqa callekunapim iñiqmasinchikkuna puriqku pancartakunata apaspanku, chaypim niq: ‘Religionqa toqlla hina pantaymi’ nispa, chaynataq ‘Serviy Diosta hinaspa Cristo Reytapas’, nispa. Chaymantapas tratadokunatam debaldella runakunaman aypuqku. Chaykunata ruranapaqqa anchatam qarinchakuna karqa, ichaqa chay rurasqaykuwanmi runakunaqa yacharqaku Jehová Diospa sutintawan llaqtanpatapas”, nispa.

Huk cristianapas ninmi: “Callekunapi revistawan predicayqa sasam karqa. Chay tiempopiqa Jehová Diospa Testigonkunataqa llumpaytam cheqnirqaku [. . .]. Anchatam qarinchakuna karqa esquinakunapi revistakunata hapikuykuspa predicanapaqqa hinaspa yachachiwasqankuman hina rimanapaqpas. Chaywanpas yaqa lliw sabado punchawkunapim chayta ruraq kaniku. Wakinpiqa hawkallam chaskiwaqku wakinpiñataqmi achka piñasqallaña runakuna muyuriruwaqku, chaymi wakin kutipiqa lluptikuq kaniku”, nispa.

Enteron Pachapi iskay kaq hatun guerrapi Testigokuna qatikachasqa kaspankupas, qarinchakuspankum predicaqku. Chayna predicaspa purisqankupim, 43 punchawkunapi (1940 watapa diciembre killapi 1 kaq punchawmanta, 1941 watapa enero killapi 12 kaq punchawninkama) Estados Unidospi 50.000 iñiqmasinchikkuna 8.000.000 folletokunata aypurqaku, chay predicasqankuqa sutichakurqam “Qarinchakuy” nispa.

Achka yuyaq iñiqmasinchikkunam yuyarinkuraq imakuna kaptin qarinchakuq kasqankumanta. Wakinkum chay qarinchakuq kasqankuta qawachiqku, kay rimaywan: “Tukunakama qarinchakuspa predicasunchik”, nispa. Manaraq puchukay punchaw chayamuchkaptin imaynakunataraq Diosmanta willakunanchikmantaqa manam yachanchikchu. Chayna kaptinpas, Diospa yanapakuyninwanmi qarinchakuspa iñiywan hinalla willakusun.

[9 kaq paginapi suti rikuylla kaq willakuy]

Haykapipas predicanapaqqa qarinchakuqmi kananchik