Tukuy tiemponwan Diosta serviq Charlotte White cristiana, Louisville (Kentucky, Estados Unidos) lawman ruedayoq maletawan chayaramuptinmi, achka runakuna qawaspanku admirakurqaku.

WHITE cristianam 1908 kaq watapi mana reqsisqanku “auroramóvil” nisqankuwan puriptin, achka runakuna qawaspanku admirakurqaku. Paymi nin: “Chay apasqaymantam achka runakuna rimaqku hinaspapas lliwchankum qawawaq”, nispa.

Biblia Estudiaqkunaqa otaq Jehová Diospa testigonkunaqa, yacharqakum huk runakunamanpas Bibliawan Diosmanta willakunankumanta. Achka runakunam Bibliamanta allinta yacharqaku La Aurora del Milenio nisqa qellqapa yanapakuyninwan, (tiempo pasasqanman hinam chay qellqata suticharqaku Estudios de las Escrituras nispa). Lliw atiq iñiqmasinchikkunam tukuy hinastinman illarqaku Bibliamanta yachay munaqkunaman La Aurora del Milenio nisqa qellqata qonankupaq.

1908 kaq watapim White cristianaqa huk iñiqmasinchikkunawanpas, soqtaman rakinasqa La Aurora del Milenio nisqa qellqata runakunaman qorqaku 1,65 dolar qollqellapaq. Runakunaman librokunata chaylla qonankumantaqa, pikuna mañakusqankuta qellqaspankum huk punchawña kaqmanta kutiqku, astawanraqmi qollqe chaskisqanku punchawkunapi. Huk harkakuq runam piñakurqaraq chay librokunapaq pisi qollqellata qosqankumanta.

Malinda Keefer iñiqmasinchikmi yuyarirqa, huk semanapi 200 hinaspa 300 librokunata runakuna mañakusqankumanta. Ichaqa chay leey munaq runakunaman apayqa sasam karqa. Piensarisun, chay libropa soqta kaq partenmi 740 paginayoq karqa.  The Watch Tower qellqapas nirqam 50 librokuna 18 kilo llasasqanta chaymi cristianakunapaq aswan sasa karqa apanankupaq.

Chaymi James Cole iñiqmasinchik rurarurqa iskay ruedayoq maletata, chayqa tornillowan hinanallam karqa. Cajakunapi achka librokunata manaña qepinamantam, kikin ruraq iñiqmasinchik nirqa: “¡Manañam wasaytaqa pakikusaqñachu!”, nispa. Chay rurasqantam 1908 kaq watapi Cincinnati (Ohio, Estados Unidos) law asambleapi lliw iñiqmasinchikkunaman qawachirqa servichikunankupaq, paykunañataqmi anchata kusikurqaku. Chay maletapa waqtanpim tornillokunapa kasqanpi ingles rimaypi nirqa auroramóvil (Dawn-Mobile) nispa, chaypiqa apaqkum La Aurora del Milenio nisqa librokunata. Tiempopa risqanman hinam achkallaña libroyoq chay maletata apayqa manaña sasañachu karqa, hinaspam huk makillawanpas apaqku. Sayayninpas iñiqmasinchikkunapa munasqanman hina kuyuchinallapaqmi karqa, ruedanpas ranra ñankunapi puriqmi karqa. Predicayta tukuruspaqa maletapa waqtanmanmi ruedanta doblayta atikurqa, chaynapi chakiwan otaq carrowan wasiman kutinapaq.

Tukuy tiemponkuwan Diosta serviq cristianakunaqa debaldellam auroramóvil nisqankuta chaskiqku. Wakin iñiqmasinchikkunaqa 2,50 dolar qollqewanmi rantinanku karqa. Fotopi rikuriq Keefer iñiqmasinchikqa auroramóvil nisqankutam hunta libroyoqta huknin makillanwan apaq, huknin makinwanñataq achka libroyoq bolsanta. Pensilvania lawpa minayoq llaqtanpim chay librota munaq achka runakunata tarirurqa, chaymi kimsa otaq tawa kutikama kutinan karqa chakata chimpaspanraq.

1980 wata tukuytam avion manejaq runa ruedayoq maletata rurarurqa, chayqa kunanpas qawakunmi avionkunapa tiyanan lawkunapi hinaspa hatun llaqtakunapipas. Ichaqa pachak wata ñawpaqtaraqmi Biblia Estudiaqkunaqa ña servichikurqakuña auroramóvil nisqa ruedayoq maletata, chaynapi Bibliapa yachachikuyninkunata tukuy hinastinman apanankupaq.

[32 kaq paginapi suti rikuylla kaq willakuy]

Leey munaq runakunaman apananpaqmi, Keefer iñiqmasinchikqa kimsa otaq tawa kutikama chakata chimpaspanraq kutinan karqa

[32 kaq paginapi suti rikuylla kaq willakuy]

Librokuna sasa apay kasqantam allicharurqa