Sumaq kayninchikkunawan kallpanchanakusun

“Señorninchik Jesucristoyá favorecesunkichik [imayna kaynikichikpi]” (FILI. 4:23).

¿IMAYNATAM CONGREGACIONNINCHIK ASWAN ALLIN KANANPAQ YANAPAKUCHWAN . . .

. . . iñiqmasinchikkunawan kaspa?

. . . Diosmanta willakuq lloqsispa?

. . . iñiqmasinchikpa hatun hucha rurarusqanmanta yacharuspa?

1. ¿Imaynam karqaku Filipos llaqtapiwan Tiatira llaqtapi cristianokunaqa?

FILIPOS llaqtapi ñawpaq cristianokuna mana ancha kapuqniyoq kaspankupas, imapas qokuykuq hinaspa kuyakuqmi iñiqmasinkunawan karqaku (Fili. 1:3-5, 9; 4:15, 16). Chaymi apostol Pablo paykunaman cartasqanpi nirqa: “Señorninchik Jesucristoyá favorecesunkichik [imayna kaynikichikpi]”, nispa (Fili. 4:23). Chaynallataqmi karqaku Tiatira llaqtapi iñiqkunapas. Chaymi Jesucristopas nirqa: “Ñoqaqa reqsinim rurasqaykikunatawan kuyakuynikita, iñiynikitawan servikuynikita. Reqsinitaqmi pacienciawan qepa kaq rurasqaykikunaqa punta kaq rurasqaykikunamantapas aswan achkaraq kasqanta”, nispa (Apo. 2:19, 20).

2. Congregacionpa imayna kasqanqa, ¿imamantam kanqa?

² Diospa llaqtanpi sapa congregacionkunaqa sutillam reqsichikunku imayna kasqankuwan. Wakinmi reqsichikunku kuyakuq, chaskikuq hinaspa Diosmanta willakuypi aswan yanapakuq kasqankuwan. ¿Imaynatam sapakama yanapachwan congregacion huk sonqolla ñawparinanpaq? Sapakamam kallpanchakunanchik sumaq kayniyoqkuna kananchikpaq (1 Cor. 1:10). Sonqonchikpi mana allinkunata wiñachiptinchikqa, congregacionmi chiriyarunman hinaspa hatun huchakuna kanantapas saqenman (1 Cor. 5:1; Apo. 3:15, 16). Chaynaqa, ¿imayna kasqanwanmi congregacionninchikqa reqsichikun hinaspa imatam sapakama rurachwan aswan allin kananpaq?

CONGREGACIONTA SAPAKAMA YANAPASUN

3, 4. ¿Imaynatam Jehová Diosta huñunakuykunapi alabachwan?

³ Davidmi Jehová Diosman takispan nirqa: “Qamllatamá  gracias nisaq hatun huñunakuypipas. Qamllatamá alabasaq achka runa kasqanpipas”, nispa (Sal. 35:18). Qawasqanchikman hinaqa, huñunakuykunapi David kaspanqa manam upallallachu karqa. Ñoqanchikpas Llaqta Cuidaq qellqata estudianapaq huñunakuykunapi hinaspa wakin huñunakuykunapipas atichwanmi rimariyta, chaynapi wakinkunapas rimarinankupaq. ¿Kallpanchakunchikchu allinta preparakuspa yachaywan rimarinapaq? Taytakuna kaspanchikqa, ¿yanapanchikchu churinchikkunata allinta preparakuspa sonqonkumanta rimarinankupaq?

⁴ Huk kutipipas Davidqa nirqam: “Diosnilláy, sonqollayqa listom kachkan takinaypaq. Diosnilláy, sonqollayqa listom kachkan qanman takinaypaq”, nispa (Sal. 57:7). Kaypi nisqanman hinaqa, huñunakuykunapi imayna takisqanchikqa qawachinmi allin ruray munasqanchiktawan Dios serviy munasqanchiktapas. ¿Yachanchikchu lliw takinchikkunata? ¿Kallpanchakuchwanchu Familiawan Diosta Yupaychanapaq Tutapi chaykunata takinapaq? David hina kasunchik, paymi nirqa: “Kawsanaykamam Tayta Diosman takisaq. Kawsanaykamam takita paypaq takisaq”, nispa (Sal. 104:33).

5, 6. ¿Imaynatam samaykachikuq hinaspa qokuykuq kasqanchikta qawachichwan, hinaspa imapim tukunqa?

⁵ Congregacionninchik kuyakuqllaña kananpaqqa, ancha allintaqmi samachikuq hinaspa qokuykuq kaypas. Hebreo cristianokunaman cartasqanpa tukuyninpim apostol Pablo nirqa: “Iñiqkunapa kuyanakuyninqa amayá tukuruchunchu. Wasikichikpi samaykachiytapas amayá qonqaruychikchu”, nispa (Heb. 13:1, 2). Kay nisqantaqa kasukuchwantaqmi congregacionkunata watukuq ancianotawan señoranta wasinchikman mikunanpaq pusaspa, chaynataq tukuy tiemponkuwan Diosta serviq iñiqmasinchikkunatapas. Amataq qonqasunchu ayllun wañukuptin sapallan qepaqkunatawan warmankuta sapallan uywaq tayta-mamakunatapas chaynataq huk iñiqmasinchikkunatapas, paykunataqa nichwantaqmi familiawan Dios yupaychayninchikpi kanankupaq.

 ⁶ Apostol Pablom Timoteota nirqa iñiqkunaman kaynata ninanpaq: “Allinkuna ruraypiyá apuqa kachunku, mana imayoqkunamanyá kusikuywan qochunku”, nispa. Chaynata ruraptinkum ‘llapa imankunapas hamuq tiempokunapi kapunan’ karqa, hinaspapas ‘cheqap wiñay kawsaytam haypananku’ karqa (1 Tim. 6:17-19). Chayna nisqanwanmi Pabloqa munachkarqa qokuykuq kanankuta. ¿Imaynatam ñoqanchikpas qokuykuq kasqanchikta qawachichwan qollqenchik mana ancha kaptinpas? Kallpanchakuchwanmi huñunakuyman hinaspa predicayman mana riy atiq iñiqmasinchikkunata pusanapaq. Yanapachikuq kaspaqa, ¿imaynatam agradecekusqanchiktawan sumaq kayniyoq kasqanchikta qawachichwan? Ichapas qollqechanchik kapuwasqanchikman hina yanapakuspa. Chaymantapas iñiqmasinchikkuna kuyasqa kasqankuta sientekunankupaqqa, paykunawan kuska kanapaqmi tiempochakuna. ¿Imapim tukunqa iñiqmasinchikkunarayku chaykunata ruraptinchikqa? Puntataqa astawanmi paykunata kuyasun, hinaspapas congregacionmi chayna kuyakuqllaña kanqa (Gal. 6:10).

7. ¿Imaynam congregacionqa kanqa iñiqmasinchikkuna imapas willawasqanchikta mana willakachakuptinchikqa?

⁷ Iñiqmasinchikwan amistad hinaspa confianapaq kasqanchikpas, yanapawanchikmi astawan kuyanakunapaq (leey Proverbios 18:24). Arí, cheqap amistadkunaqa manam imapas willasqanchiktaqa willakachakunchu. Chayna kaptinqa, chay iñiqmasinchikwanmi aswan amistad kasun. Chaynaqa confianapaq amistadyá kasun, chaynapim congregacionqa huk sonqolla hinaspa kuyakuqllaña kanqa (Pro. 20:19).

DIOSMANTA SAPA KUTI WILLAKUSUN

8. ¿Imatam Jesusqa nirqa Laodicea llaqtapi cristianokunaman, hinaspa imanasqam allin karqa?

⁸ Jesusmi Laodicea llaqtapi cristianokunata nirqa: “Ñoqaqa yachanim tukuy rurasqaykita, manam chirichu nitaq rupaqchu kanki. ¡Ima allinchá kanman rupaq kaptikiqa otaq chiri kaptikiqa! Mana chiri nitaq rupaq kaspa qonilla kasqaykimantam vomitarusqayki”, nispa (Apo. 3:15, 16). Chay cristianokunaqa manamá anchatachu Diosmanta willakuchkarqaku, chayna kasqankuwanmi kikinkupura hukmanyanachinakuchkarqaku. Chaymi Jesus nirqa: “Ñoqaqa llapallan kuyasqaykunataqa qaqchaspaymi castigani. Chaynaqa tukuy sonqoykiwanyá Diospa munayninta ruray hinaspa wanakuy”, nispa (Apo. 3:19, NM).

9. ¿Imaynam congregacionqa kanqa Diosmanta sapa kuti willakuptinchikqa?

 ⁹ Congregacionninchik allin kananta munaspaqa, sapa kutim Diosmanta willakunanchik. Llapanchikmi mayqan congregacionpipas kachkanchik, allin sonqoyoq runakunata maskaspa yachachinapaq. Chaymi ancha allinpuni Jesusta qatipakuyninchikqa hinaspa runakunata yachachinapaq kallpanchakuyninchikpas (Mat. 28:19, 20; Luc. 4:43). “Diospa llamkaqmasinmi” kanchik, chayta ruranapaq kallpanchakuspaqa astawanmi huk sonqolla kasun (1 Cor. 3:9). Iñiqmasinchikkunata kuyasqanchikqa astawanmi wiñan, sasachakuykunapipas Diosmanta hinalla paykuna willakuptinku. Diosmanta huk sonqolla willakuyqa yanapakunmi iñiqmasinchikkunawan hukllaña kananchikpaq (leey Sofonias 3:9).

10. ¿Imaynatam iñiqmasinchikkunata yanapanman aswan allin predicay munasqanchikqa?

¹⁰ Iñiqmasinchikkunataqa yanapachwantaqmi, predicayninchik aswan allin kananpaq kallpanchakuspa. Diospa yachachikuyninwan runakunapa sonqonman chayayta munaspaqa, astawanmi munasun Diosmanta willakuyta (Mat. 9:36, 37). Chayna kasqanchikqa predicaqmasinchiktapas kallpanchanmanmi. ¿Imanasqam Jesusqa qatiqninkunata iska-iskayta kamachirqa? (Mar. 6:7.) Manam kallpanchanakuspa imayna predicasqankumanta yachanallankupaqchu, aswanqa Diosmanta yachachiyta munanankupaqwanmi. ¿Pitaq mana munanmanchu kusisqallaña sapa kuti predicaq iñiqmasinchikwan lloqsiytaqa? Chayna kasqanqa kallpanchawanchikmi Diosmanta hinalla willakunapaq (Rom. 1:12).

PIPAPAS CONTRANPI AMA RIMASUNCHU NITAQ SAQESUNCHU MANA ALLINKUNA KANANTAQA

11. ¿Imaynam israelitakuna karqaku Moisespa tiemponpi, hinaspa imapim tukurqa?

¹¹ Egipto nacionmanta lloqsiramusqanku qepallanmanmi, israelitakunaqa rimapakuyta qallaykurqaku. Imawanpas mana kusisqa kaspankum, Jehová Diospa chaynataq pusaqninkupa contranpi churakurqaku (Exo. 16:1, 2). Chaymi paykunamantaqa aschalla Prometesqa Allpaman yaykurqaku. Moisespas manamá yaykurqachu. ¿Imanasqa? Contranpi israelitakuna rimaspanku hikutaptinkum, Moisesqa mana allinta rurarurqa (Deu. 32:48-52). ¿Imanasqataq pipapas contranpiqa mana rimanachu?

12. ¿Imatam rurachwan pipapas contranpi mana rimakuq kanapaq?

¹² Kallpanchakunanchikmi pipapas contranpi mana rimanapaq. Chaypaqqa humilde kaspam punta apaqkunata respetananchik, allintataqmi amistadninchikkunata akllananchik. Mana allin kusirikuykunata akllaspaqa chaynataq estudiaqmasinchikkunawan otaq llamkaqmasinchikkunawan llumpayta hukllawakuspaqa, mana allinpim tukurusun. Chaymi allinpuni kanman pipapas contranpi rimaqkunamantawan munasqallanpi puriqkunamanta karunchakuyninchikqa (Pro. 13:20).

13. ¿Imataq pasanman iñiqmasinchikkunapa contranpi rimaptinchikqa?

¹³ Iñiqmasinchikkunapa contranpi rimayqa, congregacionpi hawkalla hinaspa huk sonqolla kawsakuytapas chinkarachinmanmi. Chayna mana allinkunata rimaspaqa, manam iñiqmasillanchiktachu hukmanyachisunchik aswanqa cuento qepipas rikuriruchwanmi (Lev. 19:16; 1 Cor. 5:11). Punta  cristianokunapa tiemponpipas, wakin cristianokunam congregacionpi punta apaqkunapa contranpi mana allinkunata rimachkarqaku (Jud. 8, 16, NM). Chay ruraytaqa Jehová Diosqa cheqnirqam.

14, 15. a) Hatun hucha ruraqkunata ancianokuna mana yanapaqtinkuqa, ¿imam pasanman congregacionta? b) ¿Imatam rurananchik pipapas hatun hucha rurarusqanmanta yacharuspaqa?

¹⁴ Ichaqa, ¿imatam rurananchik pi iñiqmasinchikpas sinkakuruspan, millakuypaq kaqkunata qawaruspan otaq hatun huchata ruraruspan pakaptinqa? (Efe. 5:11, 12.) Mana imatapas ruraptinchikqa, Diospa chuya espiritunmi mana yanapawachwanchu hinaspam congregacionpi hawkalla kasqanchikpas hukmanyarunman (Gal. 5:19-23). Chay mana pasananpaqmi, Corintopi iñiqkuna hina mana saqenachu mana allin ruraqkuna hinalla kanankutaqa. ¿Imaynatam chayta rurachwan?

¹⁵ Yaqa qallariyllapim rimamurqanchik iñiqmasinchikkuna imapas willawasqanchikta mana willakachakunamanta. Willakachakuyqa manamá allinchu kanman. Ichaqa kaytam yuyarinanchik: congregacionpi ancianokunaqa hatun hucha ruraqkunata yanapanankupaqmi churasqa kachkanku. Chaymi paykunaqa yachananku (leey Levitico 5:1). Chaynaqa, pipapas hatun hucha rurarusqanmanta yacharuspanchikqa, ninanchikmi ancianokunawan yanapachikunanpaq (Sant. 5:13-15). Sichu tanteanakusqanchik punchawpaq mana willaptinqa, ñoqanchikmi willananchik.

16. ¿Imanasqam ancianokunaqa yachananku pipas hatun huchata ruraruptinqa?

¹⁶ Congregacionqa iñiyninchikpi amparakunapaq wasi hinam, chaymi ancianokunaqa hatun huchakunamanta yachananku. Huchallikuq sonqomanta wanakuptinqa, congregacionqa hinallam ñawparinqa. Mana wanakuptinmi ichaqa congregacionmanta qarqosqa kanqa. Chayna runakunawan ‘mana hukllawakuptinchikqa’ congregacionqa hawkallamá kanqa (leey 1 Corintios 5:11). Chaynaqa, hatun huchata pipas rurarusqanmanta yacharuptinchikqa ancianokunapas yachanankum, chaynapim lliw iñiqmasinchikkuna allin kanankuta maskachkanchik.

“CHULLA SONQOLLA” KANAPAQ KALLPANCHAKUSUN

17, 18. ¿Imamantam kanqa “chulla sonqolla” kanapaq?

¹⁷ Punta cristianokunam “apostolkunapa yachachikuyninta chaskispanku huk sonqolla kaqku” (Hech. 2:42). Arí, anchatam chaninchaqku Bibliapa nisqanman hina ancianokunapa kamachisqantawan nisqankunatapas. Kunan tiempopipas ancianokunaqa confianza sirvientewanmi huk sonqolla llamkanku, chaymi congregacionkunaqa yanapasqa chaynataq kallpanchasqa kanku huk sonqolla kanankupaq (1 Cor. 1:10). Lliw cristianokunapas Diospa llaqtanpa chaynataq Bibliapa nisqanman hina ancianokunapa kamachisqankunatam kasukunku, chaynapim qawachinku “chulla sonqolla” hinaspa ‘hawkalla kawsanankupaq’ kallpanchakusqankuta (Efe. 4:3).

¹⁸ Hinaptinqa, tukuytayá rurasun congregacionninchik hawkalla ñawparinanpaq. Chaynapim, “Señorninchik Jesucristoyá favorecesunkichik [imayna kaynikichikpi]” nispa Bibliapa nisqan ñoqanchikpi cumplikunqa (Fili. 4:23).

[Kay yachachikuypa tapukuyninkuna]

[19 kaq paginapi foto]

Congregaciontam kallpanchanchik huñunakuykunapi rimarinapaq allinta preparakuspa

[20 kaq paginapi foto]

Congregaciontam kallpanchachwan familianchikwan huñunakuykunapaq takikunata takispa