Veneno hinam envidiakuyqa

Napoleón Bonaparte, Julio Cesar hinaspa Alejandro Magno runakunam yaqa chaynalla karqaku. Kimsankum ancha reqsisqa hinaspa kapuqniyoq kayta hayparqaku, ichaqa envidiakuq runakunam karqaku.

Bertrand Russell yachaysapa runam nirqa: “Napoleonmi envidiakurqa Cesarmanta, Cesarñataqmi envidiakurqa Alejandromanta, Alejandromantañataqmi niyman, Herculesmanta envidiakusqanta, payqa manam haykapipas karqachu”, nispa. Arí, pipas envidiakuytaqa qallaykunmanmi, hayka qollqen kaptinpas, imayna kaptinpas hinaspa ancha reqsisqa kaptinpas.

Envidiakuyqa hukkunapa kapuqninmanta hinaspa imapas chaskisqanmanta piñakuywan llakikuymi. Bibliamanta rimaq huk libropa nisqanman hinaqa, envidiakuyqa manam hukkunapa kapuqninta munapayayllachu, aswanmi qechuytapas munan.

Chaynaqa allinmi kanman envidiakuy imayna rikurimusqanmantawan imapi tukunanmanta yachayqa. Qawasuntaqmi kay veneno hina envidiakuy mana yanqachawananchikpaq imakuna ruranamanta.

¿IMAYNA KAYMI ENVIDIAKUYTA ASTAWAN WIÑACHIN?

Pantaq kasqanchikraykum llapanchik envidiakunchik, ichaqa imakunam chayta astawan wiñachinman (Sant. 4:5, NM). Apostol Pablom nirqa ‘hukpa vidanwan mana tupachikunapaq’ (Gal. 5:26; 6:4). Qawasqanchikman hinaqa, hukkunawan tupachinakuyqa otaq hukkunamanta aswan allin kayqa, astawanmi tanqawanchik envidianakunapaq. Chayna kasqanmantam ninku Cristinawan José iñiqmasinchikkuna. *

Cristinaqa precursoram, paymi nin: “Yaqa sapa kutim hukkunamanta envidiakuni. Kikiypi reparanaymantaqa hukkunapa imapas kapusqanpim reparani”, nispa. Huk punchawmi congregacionkuna watukuq anciano señoranpiwan mikuchkaptinku, payqa piensarqa ñawpaqpi paykuna hina Diosta servisqankumanta hinaspapas paykuna hina watayoq kasqankumanta. Chaymi nirqa: “¡Qosaypas ancianom! ¿Imanasqataq qamkunaqa congregacionkuna watukuq kankichik, ñoqaykuñataq mana imapas kanikuchu?”, nispa. Hukkunawan tupachikusqanrayku hinaspa envidiakusqanraykum, manaña chanincharqachu qosanwan Dios servisqankutaqa, chaymi manaña kusisqachu karqa.

Kunanñataq rimasun Joseymanta, payqa anchatam munarqa siervo ministerial kayta. Ichaqa hukkuna siervo ministerial kayta llalliruptinkum, envidiakuyta qallaykurqa. Chaymantapas congregacionpi ancianomasinkunawan ruranankupaq yanapaqtam hukmanta qawarqani. Ninmi: “Envidiakuq kasqayraykum cheqniyta qallaykurqani hinaspa imapas tanteasqantam mana allinpaq hapirqani. envidiakuy atiparusuptikiqa, kikillaykipaq munaqmi rikurirunki, hinaspapas manam allintachu piensanki”, nispa.

 ¿IMATAM BIBLIAPI RUNAKUNAMANTA YACHACHWAN?

Mana qatipakunapaq ejemplokunamantam Bibliaqa willawanchik (1 Cor. 10:11). Willawanchikqa manam envidiakuy imayna qallarisqallanmantachu, willawanchiktaqmi saqekuptinchik veneno hina kasqanmantapas.

Rimasun Adanpa piwi churin Cainmanta. Paymi piñakururqa ofrendanta Jehová Dios mana chaskispan Abelpa ofrendanta chaskisqanmanta. Chayna kasqanmanta kutirikuyta atispanpas, envidiakuywanmi atiparachikurqa, hinaspam wawqenta wañurachirqa (Gen. 4:4-8). Chaychá Bibliaqa nin ‘Diablopa runanmi karqa’ nispa (1 Juan 3:12).

Kunanñataq rimasun Joseypa chunka wawqenkunamanta. Paykunaqa envidiakurqakum Joseyta taytanku astawan kuyasqanrayku. Astawanmi cheqnirurqaku mosqokusqanmanta Josey willaptin. Chaymi wañurachiytapas munarqaku. Chaymantapas sirvienteta hinam rantikururqaku hinaspam taytankumanpas willarqaku churin wañurusqanmanta (Gen. 37:4-11, 23-28, 31-33). Watakuna pasaytam ichaqa huchankuta reqsikuspanku, nirqaku: “Cheqaptapunim huchallikururqanchik wawqenchikpa contranpi. Ruegakuwachkaptinchikmi ñakariyninta qawachkaspa mana uyarirqanchikchu chayraykum ñoqanchikman kay ñakariy hamuruwanchik”, nispa (Gen. 42:21; 50:15-19).

Kunanñataq rimasun Coreymanta, Datanmanta hinaspa Abiranmantapas, paykunam envidiakuyta qallaykurqaku Moiseswan hinaspa Aaronwan tupachikuspanku. Yanqam tumparqaku Moises “Jefe” kay munasqanmanta hinaspa paykunata munaychakuy munasqanmantapas (Num. 16:13). Chayqa manamá cheqapchu karqa (Num. 11:14, 15). Moisestaqa Jehová Diosmi nombrarqa, ichaqa paykunam chayta envidiakurqaku. Envidiakuq kasqankuraykum Dios paykunata wañurachirqa (Sal. 106:16, 17).

Chaymantapas rey Salomonmi qawachirqa envidiakuy llumpay mana allin kasqanmanta. Huk warmipa chayllaraq naceq wawanmi wañururqa, hinaptinmi chay wañusqa wawa huknin warmipa kasqanta piensananta munarqa. Chay sasachakuyta allichaptinkum, chay mana allin warmiqa munarqa wawachata wañuchinankupaq. Salomonmi ichaqa, cheqap mamanman qoykurqa (1 Rey. 3:16-27).

Kaykunam qawachin envidiakuyqa cheqninakuyman, mana allin rurayman hinaspa wañuymanpas apasqanmanta. Chaymantapas, qawasqanchikman hinaqa mana huchayoq kaqkunam yanqamanta ñakarinku. ¿Imatam rurachwan envidiakuy mana munaychakuwananchikpaq? ¿Ima yanapakuypas kanchu?

ALLIN YANAPAKUYKUNA

Iñiqmasinchikkunatam kuyananchik. Apostol Pedrom cristianokunata nirqa: “Kunanqa cheqap willakuytaña kasukuspam almaykichiktapas limpiarunkichik huchamanta chaynapi cheqaptapuniña wawqe-paninchikkunawan kuyanakunaykichikpaq. Qamkunaqa limpio sonqollayá kuyanakuychik”,  nispa (1 Ped. 1:22). ¿Imaynam cheqap kuyakuyqa? Apostol Pablom nin: “Pipas kuyakuyniyoqqa pacienciakuqmi, imapas qokuykuqmi, manam envidiosochu, manam alto tukuqchu, manam alabakuqchu, manam penqaypaq ruraqchu, manam kikillanpaq munaqchu”, nispa (1 Cor. 13:4, 5). Arí, chayna kuyakuyqa ñoqanchikmantam envidiakuyta chinkachinqa (1 Ped. 2:1). Chayna kuyakuyniyoqmi Jonatan karqa, Davidta envidiakunanmantaqa ‘kikinta hinam kuyarqa’ (1 Sam. 18:1).

Tukuy sonqonkuwan Diosta serviqkunawanmi hukllawakunanchik. Salmo libropa 73 capitulonta qellqaqmi, mana allin runakunapa apuyasqanmanta envidiakurqa. ¿Imatam rurarqa chaykunawan mana atipachikunanpaq? ‘Diospa santuarionman yaykusqanmi’ (Sal. 73:3-5, 17). Diosta serviqkunawan hukllawakusqanmi yanaparqa kaqmanta Dioswan amistadninta chaninchananpaq (Sal. 73:28). Ñoqanchikpas chaynam kasunchik iñiqmasinchikkunawan huñunakuykunapi haykapipas kaspaqa.

Allin kaqkunatam rurananchik. ¿Imatam Diosqa nirqa Cainta cheqniytawan envidiakuyta qallaykuptin? Nirqam ‘allin rurananmanta’ (Gen. 4:7). Ñoqanchikpas chayna nisqantaqa kasukunanchikmi. Jesusmi nirqa: “Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan”, nispa. Nirqataqmi: “Kuyankim runamasikita kikikita hina”, nispa (Mat. 22:37-39). Dios serviyninchik hinaspa runamasinchik yanapasqanchikmi anchata kusichiwanchik, chayna kusikuyninchikmi yanapawanchik envidiakusqanchikta chinkachinapaq. Atisqanchikman hina runakunaman predicaspa chaynataq yachachispaqa achka bendicionkunatam chaskisun (Pro. 10:22).

‘Kusikuqkunawanmi kusikunanchik’ (Rom. 12:15). Jesusqa qatiqninkunapa tukuy ruray atisqankumantam kusikurqa hinaspam nirqa predicasqankupi paymantapas astawanraq ruranankumanta (Luc. 10:17, 21; Juan 14:12). Diospa serviqninkunaqa hukllam kanchik, chaymi huk kaqninchik ima bendiciontapas chaskiruptinqa lliw kusikunchik (1 Cor. 12:25, 26). Chaynaqa, huk kaqnin iñiqmasinchikta congregacionpi imapas rurananpaq niptinkuqa, kusikunanchikmi envidianamantaqa.

AMA SAQEKUSUNCHU

Envidiakuyta saqenapaqqa anchatam kallpanchakuna. Cristinam nin: “Hinallam kallpanchakunay envidiakuyta saqenaypaq. Cheqniptiypas hinallam ñoqapi kachkan, chaymi sapa kuti hinalla kallpanchakuni”, nispa. Joseypas envidiakuytaqa saqerurqam, ninmi: “Jehová Diosmi yanapawarqa congregacionpi ancianomasinkunawan ruranankupaq yanapaq iñiqmasinchikpa sumaq kayninkunata chaninchanaypaq. Dioswan amistadniy mana allin kaptinqa, manam haykapipas atipaymanchu karqa”, nispa.

Envidiakuyqa ‘aychapa munayninmi’, chaymi lliw cristianokuna qepanchananchik (Gal. 5:19-21). Atipanapaq kallpanchakuspanchikqa aswan kusisqam kasun, chaynataq taytanchik Jehová Diostapas kusichisunmi.

[Willakuy]

[17 kaq paginapi suti rikuylla kaq willakuy]

“Kusikuqkunawan kusikuychik”