Leeqkunapa tapukuyninkuna

¿Congregacionmanta qarqochikunmanchu millakuypaq qalalla kaqkunata qawaq cristiano?

▪ Arí qarqochikunmanmi. Chaymi llapallanchik millakuypaq qalalla kaqkunataqa mana qawananchikchu televisionpipas, qellqasqa kaqkunapipas, revistakunapipas nitaq Internetpipas.

Chay qawaykunaqa tukuy hinastinpim kachkan. Kay Internet nisqantakamam kunanqa pipapas chay millakuypaq kaqkunata qawayta atinman. Wakinkuqa qonqayllamantam chaykunata qawarunku. Wakinñataqmi ichaqa yachastinña pakallapi qawanku wasinkupi otaq may llamkasqankupipas. Chaynaqa, ¿imanasqataq cristianokunaqa kaykunamanta allinta cuidakunanchik?

Jesusmi nirqa: “Pipas warmita munapayaspan qawaqqa sonqonpim hukwan pierdekuy huchata rurarunña”, nispa (Mat. 5:28). Casado vidapi warmi-qari kuyanakuspanku puñusqankuqa manamá huchachu (Pro. 5:15-19; 1 Cor. 7:2-5). Ichaqa millakuypaq qalalla qawaykunaqa huchapakuyllañam, chayqa Jesuspa nisqanpa contranpi mana allin piensaykunatam rikurichin. Chaykunata qawaqqa manam kasukunchu Bibliapa kayna nisqanta: “Wañuchichkaq hinayá vidaykichikmanta chinkachiychik kay pachapi mana allin ruraykunata: amayá huchapakuychikchu, amayá millakuypaq kaqkunataqa  ruraychikchu, amayá mana allin munaywanqa aysachikuychikchu nitaq intuchikuychikchu” (Col. 3:5).

Sichu huk cristiano huk otaq iskay kutikama millakuypaq qalalla kaqkunata qawaruspanqa, ¿imaynam tarikunman? Yaqachá tarikuchkanman Asaf hina, paymi nirqa: “Wikapakuq hinaraqmi yaqalla wichiykullarqani. Kuchpakuchkaq hinaraqmi yaqalla urmaykullarqani”, nispa. Sichu millakuypaq qalalla qawaykunata otaq qalalla warmi-qari puñusqankuta rikuruspanqa, manachá hawkachu kanqa conciencianwan nitaq Dioswanpas. Yaqachá Asaf hina tarikunqa, paymi nirqa: “Ñoqaqa tukuy punchawmi azotesqa karqani. Ñoqaqa sapa madrugawmi castigasqa karqani”, nispa (Sal. 73:2, 14).

Chaykunata qawaspa huchallikuruq cristianopaqqa, allinpunim kanman yanapakuyta maskayninqa. Chay yanapakuytaqa congregacionpim tarinqa, Bibliam nin: ‘Pipas huchallikuruptinqa chuya espirituta kasukuqkunam yanapanaykichik Diosman kutirikunanpaq. Chaytaqa ruraychik llampu sonqollayá, yanqañataq qampas tentasqa kawaq’, nispa (Gal. 6:1). Arí, huk-iskay ancianokunam yanapanman, chaypaqmi paykunaqa iñiywan Diosta mañakunqaku chaymi iñiyninpi onqoqqa ‘sanoyachisqa’ kanqa, pampachasqataqmi kanqa huchanpas (Sant. 5:13-15). Chay qawaykunata saqenankupaq yanapakuyta maskaruq cristianokunaqa, Asaf hinam kaynata ninku: “¡Mayna sumaqmi Diospa ñawpaqninpi kayqa!”, nispa (Sal. 73:28).

Wakinkum ichaqa apostol Pablopa nisqanman hina, mana wanakurqakuchu ‘qanra vidankupi purisqankumanta, huchapakusqankumanta hinaspa viciokunapi purisqankumantapas’ (2 Cor. 12:21). * Chay millakuypaq qalalla qawaykunamantaqa, kanraqmi aswan millakuypaq mana allin qawaykunapas. Chayqa kanmanmi qaripuralla, achkanpi runakunawan hinaspa animalkunawan millakuypaq huchapakusqanku chaynataq chayman rikchakuq huk millakuypaq ruraykunapas. Pablopa nisqanman hinam “yuyayninku tutayasqa” kaptin wakinkuqa ‘manaña penqakuq rikuriruspanku tukuy imaymana qanra vidallapi purirqaku, mana allinkunata gustollawanña ruraspankum aswan aswanraq chayna kawsayta munarqaku’ (Efe. 4:18, 19).

Pabloqa ‘qanra vidamanta’ otaq ‘millakuypaq kaqkunamantaqa’ rimarqataqmi Galatas 5:19 nisqanpipas. Kaykunamanta yachaq huk runapa nisqanman hinaqa, ‘chay rimayqa tupanmantaqmi runakunapa mana ruranan kaqkunawan’. Manamá pi cristianopas iskayrayanmanchu chay millakuypaq qalalla qawaykunaqa, llumpay qanra kasqanmanta hinaspa runakunapa mana ruranan kasqanwan tupasqantapas. Galatas 5:19-21 nisqanman hinaqa, “chayna mana allin ruraqkunaqa” “manam yaykunqakuchu Diospa munaychakusqanman”. Hinaptinqa, ¿imam pasanman sichu pi cristianopas unayniqña chay millakuypaq qalalla kaqkunata qawaptinqa? Chayta mana saqeptinqa, congregacion chuya kananpaqmi qarqosqa kanqa hinaspa Diospa chuya espiritun hinalla kananpaqpas (1 Cor. 5:5, 11).

Wakin cristianokunam ancianokunapa yanapakuyninta mañakuspanku chay qawaykuna saqeyta atirqaku. Jesusmi ñawpaq tiempopi Sardis congregacionta nirqa: “Wakin kapusuqnikikunata takyachiy [. . .]. Yuyariy uyarispa chaskisqaykita hinaspayá kasukuspa huchaykikunamanta wanakuy. Mana rikchariptikiqa suwa hinam mana yachasqayki horallata hamurusqayki”, nispa (Apo. 3:2, 3). Hinaptinqa atichwanmi wanakuytaqa hinaspa millakuypaq qalalla qawaykunata qepanchaytapas (Jud. 22, 23).

Ichaqa manam allinchu kanman pukllaspallapas kaykunata qawayninchikqa. Chaynaqa, ¡karunchakusunyá chay millakuypaq qawaykunamantaqa!

[Willakuy]

[30 kaq paginapi suti rikuylla kaq willakuy]

Huchallikuruq cristianopaqqa, allinpunim kanman yanapakuyta maskayninqa