Kaytam willakun Lois Didur

Llapanchikmi wakinpiqa imapas tanteasqanchikmanta pesakurqanchik. Ñoqam ichaqa 50 wata tukuy tiempoywan Diosta servispay Diospa alleq lawninpi kanaypaq tanteasqaymantaqa mana haykapipas pesakunichu. Willasqaykichik imanasqa.

NACERQANIM 1939 kaq watapi, hinaspam chakrapi wiñarqani turiywan chaynataq tawa ñañaykunawan, chayqa kachkan Saskatchewan (Canadá) lawpim. Kusisqam kawsarqaniku animalniykupa kasqan lawpi. Huk punchawmi Jehová Diospa testigonkuna taytayta watukamurqaku, hinaptinmi tapurqani sichu Diospa sutin kasqanmanta. Salmo 83:18 nisqanpi Diospa sutinta qawaykachiwaptinkum, Diosmanta hinaspa Palabranmanta astawan yachayta munarqani.

Chay watakunapiqa, yachasqayku lawpi lliw warmakunam huk salonllapi 13 watankukama estudiarqaku. Chaypaqqa caballowanmi otaq chakiwanmi karutaraq rinanku karqa. Profesorkunataqa yachasqayku lawpi runakunam atiendeqku. Huk kutipim John Didur sutiyoq profesor chayaramurqa, hinaptinmi tayta-mamayman tuparurqa chay wata atiendenankupaq.

Chay mozollaraq profesorqa anchatam Diospa Palabranmanta yachayta munarqa. Huk kutipim taytay hina, runakunapa kamachikuyninta alabachkaptiy, profesorqa sumaqllata niwarqa: “Manam pi runapas runamasintaqa kamachiyta atinmanchu. Aswanqa Diosllam”, nispa. Chaymi astawan rimayta qallaykurqaniku.

Payqa 1931 kaq watapim nacerqa, chaymi guerrakunapi llumpay ñakariy kasqanmanta uyarirqa. 1950 kaq watapim Corea nacionpi guerra qallaykurqa, hinaptinmi achka sacerdotekunata tapurqa imanasqa chaypi chaqrukusqankumanta. Llapallankum nirqaku cristianokunapa chaypi chaqrukusqankuqa allin kasqanmanta. Chaymantañataqmi Jehová Diospa testigokunata tapurqa, paykunañataqmi Bibliawan qawachirqaku punta cristianokuna guerrakunapi mana chaqrukusqankumanta. Johnqa 1955 kaq watapim  bautizakurqa, ñoqañataqmi qatiqnin watapi. Iskayniykum tukuy sonqoykuwan Dios serviyta munarqaniku (Sal. 37:3, 4). Casarakurqanikutaqmi 1957 kaq watapa julio killanpi.

Achka kutipim, casarakusqayku punchawqa kimsa punchaw asambleaykuwan tuparqa. Anchatam kusikuq kaniku ñoqayku hina casado vidata respetaq waranqantin cristianokunawan kuska kaspayku. Huk law nacionniyoqkunapaqwan punta kaq asambleaykuqa 1958 kaq watapim karqa, Nueva York llaqtapi. Chay lawmanmi Saskatchewan lawmanta pichqa iñiqmasiykuwan kuska carrowan rirqaniku. Huk semanapunim illarqaniku tutanñataq karpakunapi puñuspa. Kusikunapaqmi Bethlehem (Pensilvania) lawpi, reqsisqayku iñiqmasinchik chay tuta wasinpi samaykachiwasqanku. Chayraykum Nueva York lawman sumaq allichasqa chayarqaniku. Chay asambleapi kasqaykum yuyaymanachiwarqaku Diosta serviyqa ancha kusikunapaq kasqanmanta. Salmo qellqaqpa nisqanman hinaqa, “alleq lawnikipi kallaspayqa siemprem tarillani kusikuyta” (Sal. 16:11).

TUKUY TIEMPOYKUWAN DIOS SERVIYTA QALLARISQAYKU

1959 kaq watapiqa precursorñam karqaniku hinaspa Saskatchewan lawpa orqonpi wasiman rikchakuq carropi yacharqaniku. Chaymantam hatun chakrakuna qawakurqa, hina chay lawkunapitaqmi predicanayku karqa.

Huk kutipim Betel wasimanta carta chayaramuptin, chaylla lloqsirqani qosaypa llamkasqanman, payqa tractortam allichachkarqa. Chay cartapim niwarqaku Red Lake (Ontario) lawpi precursor especial kanaykupaq. Maylawpi kasqanta mana yachaspaykum chaylla mapakunapi maskarqaniku.

Chay lawqa manam yachasqayku llaqta hinachu karqa. Chay lawpiqa taksa llaqtachakunam hatun sachayoqkuna karqa hinaspa qori horqonanku lawpa hichpanpi. Chayasqayku punchawmi maypi samanaykupaq wasita maskachkaptiyku, huk warmacha uyarirqa vecinanwan parlasqaykuta. Payqa chayllam mamanman willaq rirqa, mamanñataqmi chay tuta wasinpi samanaykupaq niwarqaku. Chay samasqayku lawpa perqanwan pampanqa manam allichasqaraqchu kasqa. Qatiqnin punchawtañataqmi kullukunamanta iskay cuartoyoq wasita tarirurqaniku, chay wasiqa mana imayoqmi karqa, aswanqa tullpallam qonikunaykupaq karqa. Huk tiendapim rantipakurqaniku servichikusqaña kaqkunata, chaykunallawanmi hawka tarikurqaniku.

Huñunakunayku Salonqa karu-karupiraqmi karqa (200 kilometropi). Qori horqoypi achka llamkaqkunaqa Europa lawmantam karqaku, hinaspam niwaqku rimayninkupi Bibliata maskapunaykupaq. Pisi tiempollapim allin ñawpariq 30 runakunata Bibliamanta yachachirqaniku hinaspam huñunakuykuna ruraytapas soqta killamanta qallaykurqaniku.

Huk kutipim Biblia estudiachisqaykupa qosan, telefonowan sacerdoteta qayarurqa hinaspam nirqa hamuspan señoranta allinta entiendechinanpaq. Sacerdote hamuruspanñataqmi niwarqa hukllapi kimsa Dioskuna kasqanmantawan huk yachachikuykunamantapas yachachinaykupaq. Hinaptinmi señoraqa catolica Biblianta horqoykuspan sacerdoteta nirqa chay nisqanta Bibliawan qawachinanpaq. Sacerdoteñataqmi Bibliata mesapa huklawnin patanman wischuspan nirqa mana qawachinanmanta. Pasakuspanmi ucraniano nisqa rimaypi nirqa, haytawan qarqowanankupaq hinaspa manaña haykapipas wasinman yaykunaykupaq. ¡Sacerdoteqa manamá yacharqachu chay rimayta John entiendesqanmantaqa!

Pisi tiempollamantam Red Lake lawmanta pasakurqaniku, Johntam congregacionkuna watukuq kananpaq yachachinanku karqa. Ichaqa huk wata pasaytam kimsa punchaw asambleapi bautizakuqkunapaq discursota John rurachkaptin, ¡chay Biblia  estudiachisqaykupa qosanqa bautizakunanpaq kachkasqa! Yaqachusmi chay sacerdotepa rurasqanrayku Bibliata estudiayta kikinmanta qallaykurqa.

CONGREGACIONKUNATA WATUKUSPAYKU

Congregacionkunata watukuspaykuqa achka iñiqmasinchikkunapa wasinpim samapakurqaniku. Paykunawanqa allin amistadtam armarqaniku. Huk kutipim yuyaq iñiqmasinchikpa wasinpa altosninpi kachkarqaniku, chaypiqa llumpaytam chirikuq. Sapa madrugawmi chay iñiqmasinchikqa puñusqayku lawpi ninata ratachinanpaq allillamanta yaykumuq. Chaymantañataqmi qoni yakuta apamuwaqku bañakunaykupaq. Paypa kuyakuyninmi anchata yachachiwarqa.

Congregacionkuna watukuq kasqaykum astawan yanapawarqa Diosman asuykunaypaq. Alberta lawpi watukusqaykupim karqataq qori horqonanku llaqtachapas, chaypim huk iñiqmasillanchik yacharqa. ¿Imaynatam Diospa llaqtanqa payta qawarqa? Sapa soqta killam huk semanata watukuq kaniku paywan predicanaykupaq hinaspa huñunakuykunata ruranaykupaq, hatun llaqtapi congregacionkunata watukusqaykuman hina. Kaymi qawachirqa ancha kuyakuywan Jehová Dios sapakama serviqninta waqaychasqanta.

Samachiwaqniyku iñiqmasiykunawanqa manam qonqanakurqanikuchu. Kaymi yuyarichiwan tukuy rikchaq colorniyoq cajachata John qowasqanta. Chay iñiqmasiykuman cartata apachiyqa anchatam gustawaqku, chay cajachataqa kunankamam qorita hina waqaychani.

Toronto lawpi congregacionkunata watukuchkaptiykum, Canadá Betel wasimanta huk iñiqmasinchik qayamuwaspanku tapuwarqaku sichu Betel wasipi serviy munasqaykumanta. Atikuptinqa, qatiqnin punchawllapaqmi ninayku karqa. Chay punchawmá nirqaniku.

BETEL WASIPI SERVISQAYKU

Imapipas Diosta servispaykuqa, qawarqanikum Jehová Diospa alleqninpi kayqa sumaqllaña kasqanmanta. Chaynamá karqa 1977 watapi Betel wasiman chayaptiykupas. Hanaq pachaman rinankupaq suyakuyniyoq wakin cristianokunawan kuska llamkasqaykuqa, manam imayna kayninkuta reqsinallaykupaqchu karqa, aswanqa qawarqanikum Diospa Palabranta chaninchasqankutapas.

Betel wasipi llamkasqaykuqa sumaqmi karqa. Pachaykutaqa cajonkunapiñam waqaychaq karqaniku, manañam maletapiñachu hinaspapas huk congregacionllapiñam huñunakurqaniku. Betelpi llamkasqaypiqa, gustawaqtaqmi watukamuqkunata reqsichiypas. Imakunata Betelpi rurasqaykumantam willaq kani chaynataq tapukuyninkunatam kutichiq kani.

Watakunaqa chayllam pasarurqa, 1997 kaq watapim Johnta nirqaku Betel Wasimanta Encargakuqkunapaq Escuelaman rinanpaq, chayqa karqa Patterson (Nueva York) lawpim. Chaymanta qepallatam tapuwarqaku Ucrania nacionman sichu astakuy atisqaykumanta hinaspam kallpanchawarqaku Diosta mañakuspayku allinta tanteanaykupaq. Hina chay tutallam yacharqaniku riy munasqaykumanta.

UCRANIAMAN ASTAKUSQAYKU

Huk law nacionniyoqkunapaqwan asambleamanmi San Petersburgo (Rusia) lawman rirqaniku 1992 kaq watapi, chaymantañataq Kiev (Ucrania) lawman 1993 kaq watapi. Chaylawpi yachaq iñiqmasinchikkunatam anchata kuyarqaniku. Astakusqayku wasiqa Lviv (Ucrania) lawpim karqa, chaypiqa ñawpa wasipa altosninpim yacharqaniku. Ventananmantam rikukuq taksa huertacha, hatun puka gallo hinaspa achka wallpakuna. Saskatchewan law chakraykupi hinam tarikurqani. Sapa madrugawmi chunka iskayniyoq runakuna llaqtapa chawpinta pasaq kaniku Betel wasipi llamkanaykupaq.

¿Imaynam tarikurqaniku Ucrania nacionpi? Ancha admirakuypaqmi karqa iñiyninkupi suni takyaq,  carcelkunapi ñakariq hinaspa qatikachasqa kaq iñiqmasinchikunawan kuska Diosta serviyqa. Suni takyasqankumanta alabaptiykum, niqku: “Jehová Diospa yanapakuyllanwanmi aguantaytaqa atirqaniku”, nispa. Manam haykapipas sapallankuqa tarikurqakuchu. Kunanpas yaqachá ima qowasqanchikmanta agradecekuptinchik, ninqaku: “Jehová Diosta agradecekuy”, nispa. Chayna nisqankuwanmi qawachinku tukuy allin kaqkuna Diosmanta hamusqanta.

Ucrania nacionpi iñiqmasinchikkunaqa chakiwanmi huk horata otaq masninta huñunakuyninkuman riqku, chaymi risqankupi kallpanchanakuqku. Lviv llaqtapiqa 50 masnin congregacionkunam kachkan, 21 congregacionkunam huñunakuyninkuta ruranku achka salonkuna kasqan lawpi. Ancha kusikunapaqmi domingo punchawta chay lawman achka iñiqmasinchikkuna chayamusqankuta qawayqa.

Chayllam wasiykupi hina tarikurqaniku chay kuyakuq hinaspa yanapakuq iñiqmasinchikkunawan. Chaymantapas ucraniano nisqa rimayta mana anchata entiendeptiymi pacienciakunku. Yaqa llapanpim uyankupi qawachinku kuyakuq kasqankuta.

2003 watapim Kiev estadiopi huk law nacionniyoqkunapaqwan asamblea apakurqa, chaypim qawarqani Diospa serviqninkuna haykapipas confianapaq kasqanmanta. Tukuruptinmi allpa ukunta riq trenman richkarqaniku, hinaptinmi huk warmacha asuykamuwaspanku niwarqaku: “Chinkarunim, manam tarinichu abuelayta”, nispa. Qasqoykupi tarqetata rikuruspanmi yacharurqa Testigokuna kasqaykuta, chaymi mana manchakurqachu nitaq waqarqachu. Congregacionkunata watukuq ancianopa señoranmi asambleapi Objetos Perdidos nisqanman pusarqa, chaypim abuelanwan tuparqa. Anchatam admirachiwarqa waranqantin runakunapa chawpinpi chay warmachapa Jehová Diosman hapipakusqanqa.

2001 watapa mayo killanpim, Ucrania nacionman huklaw nacionkunamanta iñiqmasinchikkuna hamurqaku Betel wasi rurakuyta tukuruptin huñunakuyman. Domingo madrugawta estadiopi chay huñunakuy tukuruptinmi, achka Testigokuna carreteranta hamurqaku Betel wasita qawanankupaq. ¡Chayqa mana qonqanapaqmi karqa! Anchatam kusikurqani chay iñiqmasinchikkunapa imayna chayamusqanta qawaspay. Chaymi aswan seguro karqani Dios serviy kusikunapaq kasqanmanta.

LLUMPAY LLAKIPI TARIKUSQAY

2004 watapim Johnta tarirurqaku cáncer onqoyniyoq kasqanta, chaymi Canadá nacionman kutirqaniku hampichikunanpaq. Quimioterapia nisqata ruraptinkum llumpayta ñakarirqa, chaymi achka semanakuna tuta punchaw qawarqaku. Allinyaruspanqa yaqallam mana rimaq qeparurqa, ichaqa anchatam agradecekusqanta qawachiq imayna qawasqanwan.

Ichaqa manaña allinyaspanmi chay 2004 watapa 27 noviembre killanpi wañukurqa. Wañukusqanwanmi ancha llakisqa tarikurqani, paywanmi kusisqallaña Jehová Diosta servirqaniku. ¿Imatam sapallay rurayman karqa? Ucraniamanmi kutirqani hinaspam ancha agradecesqa tarikuni Betelpi llamkaq iñiqmasinchikkunatawan congregacionpi kaqkunatapas, tukuy tiempo kuyakuyninkuta qawachiwasqankumanta.

Manam haykapipas Dios serviyniykupi Johnwan imapas tanteasqaykumantaqa pesakurqanikuchu. Vidaykuqa ancha kusikunapaqmi karqa, sumaq amistadniyku kasqanraykupas. Jehová Diospa kuyakuyninmantaqa anchataraqmi yachanay hinaspam wiñaypaq serviyta munani. Arí, Diospa alleqninpi kallasqayqa mayna allinmi haykapipas karqa.

[6 kaq paginapi suti rikuylla kaq willakuy]

“Manam haykapipas Dios serviyniykupi Johnwan imapas tanteasqaykumantaqa pesakurqanikuchu”

[3 kaq paginapi foto]

Johnwan casarakusqay punchaw

[4 kaq paginapi foto]

Red Lake (Ontario) lawpi precursora especial kaptiy

[5 kaq paginapi foto]

Johnwan Ucrania nacionpi, 2002 watapi