Suyakuyninchikpi kusikusun
Suyakuyninchikpi kusikusun
“Wiñay kawsay confianzawanña suyanankupaq. Chaytaqa mana llullakuq Diosmi prometekurqaña una-unay ñawpaqmantaraq” (TITO 1:2).
YUYARISUN
¿Imanasqam ninchik Jesuspa wawqenkunamanta huk kaqnin Diosman sonqo wañukuptin hanaq pachapi kaqkuna kusikusqankumanta?
Hanaq pachapaq akllasqa cristianokuna suyakuyninkuta chaskiptinku, ¿ima allinkunatam apamunqa kay Pachapi kawsanankupaq suyakuyniyoqkunapaq?
¿Imaynatam ‘chuya sonqo’ kasqanchikta hinaspa ‘Diosta servispa kawsanaykichikta’ qawachichwan suyakuyninchikta chaskinapaq?
1. ¿Imaynatam Diospa qowasqanchik suyakuyqa yanapawachwan ima sasachakuykunatapas aguantanapaq?
APOSTOL Pablom iñiqmasinkunaman nirqa: “Confianzawan [otaq suyakuywan] kawsachiqninchik Diosninchikyá qamkunata kusikuyllawanña huntaykususpaykichik hawkayachisunkichik payman iñiptikichik, chaynapi Chuya Espiritupa yanapakuyninwan aswan-aswan confiakuspa suyanaykichikpaq”, nispa (Rom. 15:13). Jehová Diospa qowasqanchik suyakuywan kawsaspaqa, kusisqallaña hinaspa hawkam tarikusunchik chaynataq ima sasachakuytapas aguantasunmi. Kay Pachapi otaq hanaq pachapi kawsanapaq suyakuyniyoq kaptinchikpas, suyakuyninchikqa “lamar qochapa patanpi bote watasqa hinam” takyachiwasun (Heb. 6:18, 19). Arí, iñiyninchikpi iskayrayaptinchikqa, suyakuyninchikqa yanapawasunmi imaña kaptinpas allinta takyananchikpaq (leey Hebreos 2:1; 6:11).
2. ¿Ima suyakuyniyoqkunam kanku cristianokunaqa hinaspa imanasqam reparananchik hanaq pachaman riq cristianokunapa suyakuyninkupi?
2 Kay tukupay tiempopi kawsaq cristianokunaqa, ¿ima suyakuyniyoqkunam kanku? Kay Pachapiraq kawsaq ‘aslla kaq’ ovejakunamanta cristianokunaqa, hanaq pachaman rinankupaq suyakuyniyoqmi kanku, chaypim Cristowan kuska reykuna hinaspa sacerdotekuna hina kamachinqaku (Luc. 12:32; Apo. 5:9, 10). ‘Sapaq ovejakunamanta’ achkallaña cristianokunañataqmi, kay Pachapi wiñaypaq kawsanankupaq suyakuyniyoq kanku, chaypim Jesuspa kamachisqan sumaq huertapi kawsakunqaku (Juan 10:16; Apo. 7:9, 10). Paykunaqa manam qonqanankuchu Cristopa ‘wawqenkunata’ yanapaspallanku salvakunankuta (Mat. 25:34-40). Hanaq pachaman riq cristianokunaqa Diospa prometesqanta chaskinankumantaqa manam iskayrayankuchu, chaynallataqmi tarikunmanku kay Pachapi kawsanankupaq suyakuyniyoq cristianokunapas (leey Hebreos 11:39, 40). Qatiqninpi qawasun hanaq pachaman riq cristianokunapa suyakuyninmanta.
HANAQ PACHAMAN RIQKUNAPA SUYAKUYNIN
3, 4. ¿Imaynatam ‘mosoqmanta nacenku’ hanaq pachaman rinankupaq suyakuyniyoq cristianokunaqa, hinaspa imatam suyanku?
3 Apostol Pedrom hanaq pachaman riq cristianokunaman iskaykama cartakunata apachirqa, paykunatam nirqa ‘akllasqakuna’ nispa (1 Ped. 1:1). Chay cartakunapim paykunapa suyakuyninkumanta achkata willakurqa. Qawasun, punta cartasqanpim nirqa: “Jesucristopa Taytan Diosmi hatun kuyapayakuyninman hina mosoqmanta nacechiwarqanchik, Jesucristopa kawsarimusqanwanmi confianzawan [otaq suyakuywan] kawsachiwanchik. Chaynapim qamkunapas chaskinkichik Diospa hanaq pachapi waqaychasqan herenciata, chayqa manam tukunqachu nitaqmi qachachakunqachu, manataqmi waytakuna hinaqa chakinqachu. Qamkunaqa Diospi iñiyniyoqmi kankichik chaymi atiyninwan waqaychasunkichik salvasunaykichikpaq. Chaytaqariki Diosmi alistarqaña puchukay tiempokunapi reqsichinanpaq. Chayraykum qamkunaqa llumpay kusisqa kachkankichik”, nispa (1 Ped. 1:3-6).
4 Qawasqanchikman hinam, Cristowan kamachinankupaq Diospa akllasqan cristianokunaqa, ‘mosoqmantam nacenku’ Jehová Dios chuya espiritunwan churinkuna kanankupaq akllaptin. Hinaptinmi Cristowan kuska reykuna hinaspa sacerdotekuna hina kanqaku (Apo. 20:6). Pedropa nisqanman hinaqa, ‘mosoqmanta nacesqankuraykum’ ‘confianzawan [otaq suyakuywan] kawsanmanku’, chayqa ‘hanaq pachapi waqaychasqa herenciam, [. . .] manam tukunqachu nitaqmi qachachakunqachu’. ¡Chaychá ‘llumpay kusisqa kachkanku’! Ichaqa suyakuyninkuta chaskinankupaqqa hinallam Diosman sonqo kananku.
5, 6. ¿Imanasqam hanaq pachaman riq cristianokunaqa ‘qaqa hina sayanankupaq kallpanchakunanku’?
5 Iskay kaq cartasqanpiñataqmi Pedroqa nin: “Qaqa hina sayanaykichikpaqyá kallpanchakuychik”, nispa (2 Ped. 1:10). Arí, hanaq pachaman riqkunaqa kallpanchakunankum iñiyniyoq, kuyakuq, Diosman sonqo hinaspa iñiqmasinkunata kuyanankupaq. Pablom nirqa: “Sichu aswan-aswan kaykunata ruraptikichikqa vidaykichikqa manam yanqapaqchu kanqa”, nispa (leey 2 Pedro 1:5-8).
6 Jesucristom Filadelfia (Asia Menor) lawpi hanaq pachaman riq cristianokunaman nirqa: “Pacienciakunaykipaq kamachisqaytam kasuwarqanki, chayraykum ñoqapas waqaychasqayki hamuq sasachakuykunamanta. Chay sasachakuykunaqa hamunqa kay pachapi llapallan runakuna pruebasqa kanankupaqmi. Ñoqaqa utqaymanmi hamusaq. Kapusuqnikitayá takyachiy premioykita mana pipas qechusunaykipaq”, nispa (Apo. 3:10, 11). ¿Imataq pasanman Diosta huk kaqnin qepancharuptinqa? Manam chaskinmanchu “suma-sumaq mana tukuq premiota”, chaskinankupaqqa wañunankukamam Diosman sonqo kananku (1 Ped. 5:4; Apo. 2:10).
DIOSPA MUNAYCHAKUYNINMAN YAYKUNANKUPAQ
7. ¿Ima suyakuymantam Judasqa cartanpi qellqarqa?
7 Jesuspa wawqen Judasmi, 65 kaq watapi ‘qayasqakunaman’ otaq hanaq pachaman riq cristianokunaman huk cartata qellqarqa (Jud. 1; tupachiy Hebreos 3:1). Payqa anchatam munarqa qayasqa kaqkunapa salvasqa otaq hanaq pachaman rinankumanta qellqayta (Jud. 3). Chaymanta qellqananmantaqa, iñiyninkupi kallpanchakunankupaqmi qellqarqa, chay cartanpa tukuyninpim ichaqa chay sumaq suyakuyninkumanta qellqarqa. Nirqam: “Salvaqninchik Diosmi atiyninwan cuidasunkichik huchaman mana wichiykunaykichikpaq, payllam mana huchayoqta qayllanman kusisqata chayachisunkichik. Señorninchik Jesucristontakamayá Diosta nisunchik: ‘Alabaykikum, qamqa ancha-ancha atipayniyoqmi hinaspa kallpayoqmi kanki wiña-wiñaymanta hinaspa kunanmanta wiñaykama’”, nispa (Jud. 24, 25).
8. Judas 24 nisqanman hina, ¿imanasqam ninchik Jesuspa wawqenkunamanta huk kaqnin Diosman sonqo wañukuptin hanaq pachapi kaqkuna kusikusqankumanta?
8 Hanaq pachapaq akllasqa kaqkunaqa, sapakamam kallpanchakunku Diosman sonqo kanankupaq. Paykunaqa Bibliapa nisqanman hinam Jesucristowan kawsarichisqa kanqaku, chaynapi espiritu hina Diospa qayllanpi kusisqa kanankupaq. Diosman sonqo kaspanku wañuspankuqa, ‘manaña wañunankupaqmi’ kawsarinku hinaspa “espirituman hina cuerpoyoqña” (1 Cor. 15:42-44). Chay pasakuptinqa, ¿imaynam hanaq pachapi kaqkunaqa tarikunku? Piensariy: ‘huchanmanta wanakuq’ runamanta anchata kusikuspankuqa, ¡maynatachá kusikunku Cristopa wawqenkunamanta huk kaqnin Diosman sonqo kaspan wañukuptinqa! (Luc. 15:7.) Paykunaqa hanaq pachapi suyakuyninkuta chaskispankum anchata ‘kusikunku’ Jehová Dioswan hinaspa angelkunawanpas (leey 1 Juan 3:2).
9. ¿Ima ninantaq “sumaqllataña yaykunkichik” nispa hanaq pacha riqkunaman Pedropa nisqanqa, hinaspa imaynatam chay suyakuyqa kay Pachapiraq kaqkunata yanapan?
9 Pedropas paykunamanta rimaspanmi nirqa: “Salvakuq Señorninchik Jesucristopa wiña-wiñaypaq munaychakusqanman sumaqllataña yaykunkichik”, nispa (2 Ped. 1:10, 11, NM). ¿Ima ninantaq “sumaqllataña yaykunkichik” nispa Pedropa rimasqanqa? Chaynata nispanqa yaqapaschá rimachkarqa Jesucristopa imayna kasqanta sumaqllataña qawachisqankurayku. Chaymantapas rimachkarqachá, hanaq pachapi achka bendicionkunata chaskinankupaq kasqankurayku. Anchatamá kusikunqaku Diosman sonqo kasqankumanta. Kay suyakuyninkuqa allintam kallpanchan kay Pachapi hinalla ‘imam ruranankuta ruranankupaq’ (1 Ped. 1:13).
SAPAQ OVEJAKUNAPAQ SUYAKUYNINKU
10, 11. a) ¿Ima suyakuyniyoqmi kanku sapaq ovejakunamanta kaqkunaqa? b) ‘Churinkunata Dios reqsichiptin’, ¿ima allinkunatam apamunqa kay Pachapi kawsanankupaq suyakuyniyoq runakunapaq?
10 Pabloqa hanaq pachaman rinankupaq suyakuyniyoq cristianokunamanta qellqaspanpas, qellqarqataqmi achkallaña runakunapa Jehová Diospa qosqan sumaq suyakuymantapas. Nirqam: “Diospa tukuy ima unanchasqankunapas [otaq runakuna] sinchillataña munaspankum suyachkanku churinkunata Dios reqsichinanta. Lliw unanchasqakunapas mana valeqñam rikurirurqa, chaynaqa karqa manam kikillanmantachu, Diosmi chaynapaq munarqa confianzawan suyanankupaq. Lliw imapas unanchasqakunaqa tukuruqllam, ichaqa suyachkanmi Dios librananta. Churinkunata Dios hatunchaspan libraptinmi tukuy imapas paykunawan kuska librakunqa”, nispa (Rom. 8:14-21).
11 Jehová Diosmi sumaq ‘suyakuyta’ runakunaman qorqa, warmipa ‘mirayninwan’ Satanaspa makinmanta librananpaq prometespan (Gen. 3:15; Apo. 12:9). Chay ‘miraymanta’ punta kaqmi Jesucristo karqa (Gal. 3:16, NM). Paypa wañukusqanwanmi lliw runakuna huchamantawan wañuymanta librasqa kanapaq suyakuyniyoq kanchik. Chay cumplikunanpaqqa ‘churinkunatam Dios reqsichinan’, paykunapas warmipa mirayninpa partenmi kanku. ¿Haykapitaq Diosqa reqsichinqa? Lliw hanaq pachapaq akllasqa cristianokuna, Jesucristowan kuska kay pachapi mana allinkunata puchukachiptin (Apo. 2:26, 27). Hinaptinmi hatu-hatun ñakariymanta librasqa kaqkuna otaq sapaq ovejakunamanta kaq runakuna salvasqa kanqaku (Apo. 7:9, 10, 14).
12. ¿Ima bendicionkunatam runakunapaq apamunqa ‘churinkunata Dios reqsichiptin’?
12 Jesucristo waranqa wata kamachiptinqa, lliw runakunam hawkayaypi kawsanqaku. Chaypipas ‘churinkunatam Diosqa reqsichinqa’. ¿Imaynata? Jesuswan kuska sacerdotekuna kaspankum Jesuspa wañukusqanpa valorninta servichikunqaku lliw runakunapa allinninpaq. Chay tiempopiqa lliw kasukuq runakunam pisi-pisimanta mana pantaqña otaq librasqaña kanqaku. Sichu Jesucristopa kamachisqan waranqa watapi Diosman sonqo hinalla kaptinkuqa, ‘wiñay kawsay libropim’ sutinku qellqasqa kanqa, hinaspam ‘churinkunata Dios hatunchaspan libraptin tukuy imapas paykunawan kuska librakunqa’ (Apo. 20:7, 8, 11, 12). ¡Mayna sumaq suyakuymi chayqa!
SUYAKUYNINCHIKPI HAPIPAKUSUN
13. ¿Imamantam kanqa suyakuyninchikta chaskinapaq, hinaspa haykapim ‘Jesucristo rikurimunqa’?
13 Pedropa qellqasqan iskaynin cartakunaqa, allintam yanapawanchik mayqan suyakuyninchikpipas allinta hapipakunapaq. Pedropa nisqanman hinaqa chayqa manam ñoqanchikmantachu, aswanqa Diospa kuyakuyninmantam. Nirqam: “Sumaqtataqyá yuyaymanaychikpas Jesucristo rikurimuptin Dios kuyakuyninman hina imam qosunaykichikpiyá confiakuychik tukuy sonqoykichikwan”, nispa (1 Ped. 1:13). ¿Haykapim ‘Jesucristo rikurimunqa’? Chayqa pasakunqa qatiqninkunata favorecenanpaq hinaspa mana allinkunata puchukachinanpaq hamuptinmi (leey 2 Tesalonicenses 1:6-10).
14, 15. a) ¿Imatam rurananchik suyakuyninchikpi hapipakunapaq? b) ¿Imatam Pedroqa consejarqa?
14 Suyakuyninchikpi hapipakunapaqqa, rikchan-rikchanllam kananchik Jehová ‘Diospa punchawnin’ chayamunanta suyaspa. Chay ‘punchawpim’ ‘cielokuna’ otaq kunan gobiernokuna hinaspa ‘kay pachapas’ otaq mana allin runakunapas ‘tukuy imantin’ puchukachisqa kanqa. Chaychá Pedroqa nirqa: “Diospa punchawnin chayamunantayá suyaychik [. . .]. Chay punchawmi cielokuna ninawan kañasqa kanqa, tukuy imapas rupaywanmi chullunqa”, nispa (2 Ped. 3:10-12).
15 Pedroqa nirqataqmi kunan ‘cielokunapa’ rantinpi ‘mosoq cielokuna’ otaq Cristopa gobiernon kanamanta, hinaspa ‘kay pachapa’ rantinpi ‘mosoq allpa’ otaq Diosta kasukuq runakuna kananmanta (2 Ped. 3:13). Chaymi Pedroqa mosoq allpapi kawsanapaq suyakuymanta rimaspan consejarqa: “Kuyasqay wawqe-panillaykuna, kaykunata suyachkaspaqa mana huchayoqñayá hinaspa mana culpayoqñayá kawsaychik hawkayaypi Dios tarimusunaykichikpaq”, nispa (2 Ped. 3:14).
SUYAKUYNINCHIKMAN HINA KAWSASUN
16, 17. a) ¿Imaynatam ‘chuya sonqo’ kasqanchiktawan ‘Diosta servispa kawsanaykichikta’ qawachichwan? b) ¿Imatam rurananchik wiñay kawsay suyakuyninchikta qawanapaq?
16 Suyakuyninchikpi hapipakuspaqa, chayman hinataqmi kawsananchik. Pedropa nisqanman hinam qawakunanchik imayna runa kasqanchikta. Arí, ‘chuya sonqo’ kawsasqanchiktam qawachinanchik, huk rimaypiqa Diospa munasqanman hinam ‘mana adoraqkunapa qayllanpim allinta kawsananchik’ (2 Ped. 3:11; 1 Ped. 2:12). Ancha allintaqmi kuyanakuyninchikpas, chaypaqqa tukuytam rurananchik lliw iñiqmasinchikkunawan huk sonqolla kananchikpaq (Juan 13:35). Chaymantapas ‘Diosta servispam kawsananchik’, huk rimaypiqa Jehová Diosman asuykachiwaqninchik kaqkunatam rurananchik, chaykunam kanman: sonqomanta mañakuyninchik, sapa punchaw Biblia leeyninchik, sapa kuti estudiayninchik, familianchikwan Dios yupaychayninchik hinaspa “Diospa munaychakusqanmanta” willakuyninchikpas (Mat. 24:14).
17 Llapanchikmi munanchik Dios chaskisqan hinaspa piñakuynin punchawpi librasqa kaq runakuna kayta. Chayna kaspaqa qawasunmi wiñay kawsay suyakuyninchikta. “Chaytaqa mana llullakuq Diosmi prometekurqaña una-unay ñawpaqmantaraq” (Tito 1:2).
[Kay yachachikuypa tapukuyninkuna]
[22 kaq paginapi dibujo]
Hanaq pachaman rinankupaq suyakuyniyoq cristianokunaqa ‘mosoqmantam nacenku’
[24 kaq paginapi dibujo]
Familianchikwan kuska suyakuyninchikpi hapipakusun
