Tukuy sonqowan hinalla Jehová Diosta servisun
Tukuy sonqowan hinalla Jehová Diosta servisun
“Churilláy [. . .], kay taytaykipa Diosniyta reqsikuspaykiyá serviy tukuy sonqoykiwan” (1 CRO. 28:9).
KAY TAPUKUYKUNAPA KUTICHIYNINTA MASKAY:
¿Imamantam rimachkan sonqomanta Biblia rimaspanqa?
¿Imataq qawachiwasun sonqonchikpi imakuna munasqanchikta yachanapaq?
¿Imaynatam tukuy sonqonchikwan Diosta hinalla servichwan?
1, 2. a) ¿Imamantam Bibliaqa astawanraq riman rikchanachispan? b) ¿Imanasqam ancha allinpuni sonqomanta Bibliapa rikchanachisqanmanta yachayqa?
ACHKA kutipim Bibliaqa rikchanachiywan riman cuerponchikpa wakin partenkunamanta. Jobmi kaynata nirqa: “Ñawsapa ñawinkuna hinam ñoqaqa karqani. Suchupa chakinkuna hinam ñoqaqa karqani”, nispa. Jesuspas nirqam: “Sichu alleq makiki huchallichisuptikiqa qoruruspayá wischuruy”, nispa (Job 29:15; Mat. 5:30).
2 Ichaqa astawanraqmi Bibliaqa rikchanachispan riman sonqomanta. Diospa serviqnin Anam kaynata mañakurqa: “Dios Taytalláy, qamraykum sonqoypi kusikuchkani”, nispa (1 Sam. 2:1). Arí, Bibliapiqa yaqa waranqa kutikamam rikchanachispan sonqomanta riman. Chaymanta yachayqa ancha allinpunim, Bibliapa nisqanman hinaqa sonqoqa engañakuqllañam, chaymi waqaychananchik (leey Jeremias 17:9).
¿IMAMANTAM RIMACHKAN?
3. ¿Imatam rurananchik sonqo rimaymanta allinta entiendenapaq, hinaspa imawanmi tupachichwan?
3 Bibliaqa manamá diccionario hinaqa niwanchikchu sonqo imapuni kasqanmantaqa, ichaqa musyachiwanchikmi ima niy munasqanmanta. ¿Imaynatam chayta ruran? Chaypaq kaypi piensasun: rapisapa sachaman asuykuspaqa, wakin rapillantam qawasun, ichaqa manam qawayta atisunchu enteron sacha imayna kasqantaqa. Ichaqa sachamanta karunchakuspaqa, qawasunmi enteron sacha imayna kasqanta. Chaynataqmi sonqo rimaymanta allinta entiendenapaqqa, Bibliapi chaymanta rimaq lliw textokunatam qawananchik. Hinaptinqa, sonqomanta Biblia rimaspanqa ¿imamantam rimachkan?
4. a) Sonqomanta Biblia rimaspanqa, ¿imamantam rimachkan? b) ¿Imamantam Jesusqa Mateo 22:37 nisqanpi rimachkarqa?
4 Sonqomanta Biblia rimaspanqa, rimachkanmi imayna runa kasqanchikmanta otaq imayna piensasqanchikmanta, ima ruray atisqanchikmanta, imayna rurasqanchikmanta, imakuna munasqanchikmanta hinaspa imakuna haypay munasqanchikmantapas (leey Deuteronomio 15:7; Proverbios 13:12; Hechos 2:26). Ichaqa wakinpiqa manam lliw chaykunamantachu riman. Piensasun Jesuspa nisqanpi, nirqam: “Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan” nispa (Mat. 22:37). Jesucristo kaypi ‘sonqomanta’ rimaspanqa, rimachkarqam runapa sientesqanmantawan munasqankunamanta. Ichaqa, ¿imanasqam Jesusqa sonqomanta, vidamanta hinaspa yuyaymantapas sapakamamanta rimarqa? Jesusqa astawanmi entiendechiyta munarqa Dios kuyayninchikta kawsayninchikpi hinaspa yuyayninchikpipas qawachinamanta (Juan 17:3; Efe. 6:6). Ichaqa Bibliapi sonqo rimay sapallan tarikuspanqa rimachkanmi imayna runa kasqanchikmanta.
IMANASQAM SONQONCHIKTA WAQAYCHANA
5. ¿Imanasqam kallpanchakunanchik tukuy sonqonchikwan Jehová Diosta servinapaq?
5 Rey Davidmi churin Salomonta nirqa: “Churilláy Salomon, kay taytaykipa Diosniyta reqsikuspaykiyá serviy tukuy sonqoykiwan hinaspa ganasllawanña. Tayta Diosqariki qawachkanmi llapa runakunapa concienciantaqa [“sonqontaqa”, NM], reqsintaqmi runapa imam munasqantapas chaynataq tanteasqantapas”, nispa (1 Cro. 28:9). Arí, Diosqa llapallan runakunapa sonqontam qawachkan, ñoqanchikpatapas (Pro. 17:3; 21:2). Dioswan amistadninchik hinaspa sumaq suyakuyninchikqa imayna kasqanchikmantam kanqa. Chaymi rey Davidpa nisqanta kasukunanchik, kallpanchakunanchiktaqmi Jehová Diosta tukuy sonqonchikwan servinapaq.
6. ¿Imataq chinkarachinman tukuy sonqonchikwan Dios serviy munasqanchikta?
6 Dios serviypi tukuy rurasqanchikkunam, allinta qawachin tukuy sonqonchikwan Jehová Dios serviy munasqanchikta. Ichaqa chay munayninchiktam chinkarachinman Satanaspa munaychakusqan mana allin ruraykuna hinaspa mana allin munayninchikkunapas (Jer. 17:9; Efe. 2:2). Chaymi tukuy sonqonchikwan Dios serviy munasqanchik mana chinkarunanpaq, sapa kuti sonqonchik imayna kasqanta qawakunanchik. ¿Imaynatam chayta rurachwan?
7. ¿Imaynatam yachachwan imayna sonqoyoq kasqanchikta?
7 Sachakunapa kullunpa ukunqa manamá qawakunchu, chaynallataqmi ukunchikpi imayna kasqanchikpas mana qawakunchu. Ichaqa Jesuspa nisqanman hinaqa, rurunpim musyachwan allin otaq mana allin sacha kasqantaqa. Chaynallataqmi imayna sonqoyoq kasqanchikqa qawakunqa rurasqanchikkunapi (Mat. 7:17-20). Qawasun huk kaqninmanta.
SONQONCHIKTA QAWAKUSUN
8. Mateo 6:33 nisqanman hina, ¿imaynatam qawachinchik sonqonchikpi ima kasqanta?
8 Ancha Reqsisqa Yachachikuyninpim, Jesusqa uyariqninkunata nirqa imata ruraspanku tukuy sonqonkuwan Dios serviy munasqankuta qawachinankumanta. Nirqam: “Puntataqa maskaychik Diospa munaychakusqantawan paypa munasqan allin ruraytayá hinaptinqa qosunkichikmi tukuy ima pisipusuqnikichikta”, nispa (Mat. 6:33). Arí, vidanchikpi puntapi ima churasqanchikkunam qawachin sonqonchikpi imakuna munasqanchikta. Chaynaqa, qawakusunyá puntapi imakuna churasqanchikta, chaymi yanapawasun tukuy sonqonchikwan Dios serviy munasqanchikta yachanapaq.
9. ¿Imatam Jesusqa iskay runakunata nirqa, hinaspa imatam qawachirqa nisqankuqa?
9 Kunanñataq qawasun Diospa munaychakuyninta puntapi maskanankupaq qatiqninkunata Jesus niptin, pasaq punchawkunapi ima pasakusqanmanta. Chaywanmi kayta musyakusun: puntapi churasqanchikkunam qawachin sonqonchikpi ima kasqanta. Lucaspa willakusqanman hinam, Jesusqa ‘valorchakuykuspan Jerusalenman pasarqa’. Payqa sasachakuykunapi tarikunanta yachachkaspanpas mana iskayrayaspanmi rirqapuni. Hinaptinmi apostolninkunawan ‘ñanninta richkaptinku’, Jesusqa huk runata nirqa: “Qatiway”, nispa. Chay runa qatiyta munachkaspanpas kaynatam nirqa: “Dejaykuwayraq taytay wañukuptin pamparamunaykama”, nispa. Huk runatapas qatinanpaq niptinmi nirqa: “Señor, ñoqapas qatisqaykim ichaqa wasiypi kaqkunamantaraqyá despedikaykamusaq”, nispa (Luc. 9:51, 57-61). Qawasqanchikman hinaqa, Jesusqa manamá iskayrayarqachu. Chay runakunam ichaqa iskayrayaspanku nisqankuwan harkachikurqaku. Diospa munayninta puntapi churanankumantaqa, kikinkupa munasqankutam puntapi churarqaku. Chaywanmi qawachirqaku mana tukuy sonqonkuwan Diosta serviy munasqankuta.
10. a) ¿Imatam rurarqanchik qatinanchikpaq Jesus niwaptinchik? b) ¿Imatam Jesusqa nirqa Lucas 9:62 nisqanpi?
10 Chay runakunamantaqa, ñoqanchikqa munarqanchikmi Jesucristopa qatiqnin kayta. Chaymi kunankama sapa punchaw Jehová Diosta servichkanchik. Chaynatam qawachinchik Dios kuyasqanchikta. Ichaqa, congregacionpi rurayninchikkunata ruraspapas, cuidakunanchikmi huk toqllamanta. ¿Imataq chayqa? Hina Lucas qellqapim Jesusqa kaynata nirqa: “Takllawan yapuchkaspan qepan qawariq runaqa manam Diospa munaychakusqanpaq hinachu”, nispa (Luc. 9:62). ¿Imatam kaymanta yachachwan?
‘ALLIN KAQKUNATA RURASUN’
11. Jesuspa rimasqan runapa llamkaynin, ¿imapim tukurqa hinaspa imanasqa?
11 Lucas 9:62 nisqanta allintapuni entiendenapaq kaypi reparasunchik: Piensasun huk runa chakrapi yapusqanta. Payqa yapuchkaspanmi yuyarin wasinpi familiankuna hinaspa amistadninkuna takikunata uyarispanku kusikuywan mikusqankuta. ¡Anchatamá chaypi kayta munan! Allintañam yapurun, ichaqa saqesqanta llumpayta munapayaruspanmi, qepanta qawarin. Yapuyta manaraq tukuchkaspanmi, chay runaqa qepata qawasqanrayku llamkayninta yanqacharun. Patronnintapas hukmanyarachinmi mana kallpanchakusqanrayku.
12. Lucas 9:62 nisqanpi yapuq runaqa, ¿imapitaq tupanman kay tiempopi mayqan cristianowanpas?
12 Kunanñataq chay yapuq runapa rurasqanta tupanachisun. Chay yapuq runaqa rikchakunmanmi Diosta allinta servispanpas sonqonpi iskayrayaq cristianowan. Huñunakuykunaman sapa kuti rispanpas chaynataq Diosmanta willakuspanpas, kay Pachapi imapas kaqkunapim llumpayta piensan. Sonqonpiqa anchatamá munan. Hinaptinmi unay wataña Diosta servispanpas, munapayasqankunawan atiparachikuspan qepapi saqesqankunata qawarin. Diosmanta willakunapaq achka llamkay kachkaptinpas manañam Diospa Palabranta ‘hatalliyta’ atinñachu, chaymi Diospaq llamkayninta yanqachan. (Fili. 2:16). ¡Mayna llakikunapaqmi kanman patronninchik Jehová Diosta mana kallpanchakuspa hukmanyachiyninchikqa! (Luc. 10:2.)
13. ¿Imatam rurasun tukuy sonqonchikwan Diosta servispaqa?
13 ¿Imatam kayqa yachachiwanchik? Huñunakuykunaman sapa kuti rispapas otaq sapa kuti Diosmanta willakuspapas, ancha allinmi tukuy sonqonchikwan chayta rurayqa (2 Cro. 25:1, 2, 27). Sichu pi cristianopas qepapi saqesqankunata otaq kay pachapi imayna kawsasqankuta hinalla kuyaspanqa, Jehová Dioswan amistadnintam chinkarachinman (Luc. 17:32). Diospa munaychakuyninman yaykunapaqqa, ancha allinmi kay kamachikuyta kasukuyqa: “Mana allin kaqkunata cheqnipakuspayá imapas allin kaqkunata ruraychik”, nisqanta (Luc. 9:62; Rom. 12:9). Chaynaqa amayá saqekusunchu kay pachapi Satanaspa munaychakusqan kaqkuna, tukuy sonqonchikwan Jehová Dios servisqanchikta harkawananchiktaqa (2 Cor. 11:14; leey Filipenses 3:13, 14).
RIKCHAN-RIKCHANLLA KASUN
14, 15. a) ¿Imatam Satanasqa servichikun kusikuywan Dios serviyninchikta hukmanyarachinanpaq? b) ¿Imatam yachachiwanchik qawamusqanchik rikchanachiyqa?
14 Jehová Diosta kuyasqanchikraykum payman qokurqanchik. Yaqa llapanchikmi unay wataña qawachichkanchik tukuy sonqonchikwan Jehová Dios serviy munasqanchikta. Ichaqa Satanasqa hinallam munachkan pantarunanchikta (Efe. 6:12). Ichapas yachanña qonqayllamanta Jehová Diosta mana saqerunanchikta. Ichaqa ‘kay pachapi kaqkunata’ servichikuspanmi pisi-pisimanta Dios serviyninchikta hukmanyarachiyta atinman (leey Marcos 4:18, 19). ¿Imanasqam chay toqllata anchata servichikun?
15 Chay tapukuyta kutichinapaq kaypi piensasun: qampam kanman manka hunta moteki. Chakrapi llamkanaykikamam, warmaykiqa mankaykimanta huk putqoyta horqoruspan mikukurunman. Kutiramuspaykiqa, ¿musyakuwaqchu pipas mankaykimanta huk putqoyta horqorusqanta? Manamá ¿aw? Chaymantañataqmi iskay putqoytaña horqokurunman, ¿chaypipas musyakuwaqchu? Manamá. ¿Imanasqataq mana musyakunkichu? Pisi-pisimanta mana musyaylla motekita horqosqankuraykum. Kay pachapi kaqkunapas chaynam pisi-pisimanta hukmanyarachinman kusikuywan Jehová Dios serviyninchikta. Pi cristianopas mana rikchan-rikchanlla kaspanqa, manachá musyakunqachu iñiyninta pisi-pisimanta Satanas chiriyachisqantaqa (Mat. 24:42; 1 Ped. 5:8).
DIOSTA MAÑAKUYQA ALLINPUNIM
16. ¿Imataq yanapawasun Satanaspa toqllankunapi mana wichiykunapaq?
16 Hinaptinqa, ¿imataq yanapawasun Satanaspa toqllankunapi mana wichiykuspa tukuy sonqonwan hinalla Diosta servinapaq? (2 Cor. 2:11.) Allintam yanapawasun Diosta mañakusqanchik. Pablom iñiqmasinkunata nirqa qaqa hina iñiyninkupi takyanankupaq, chaynapi ‘Diablo mana urmachinanpaq’ (Efe. 6:11, 18; 1 Ped. 4:7).
17. Jesuspa imayna mañakusqanqa, ¿imatam yachachiwanchik?
17 Diablopa contranpi qaqa hina kanapaqqa, Jesustam qatipakunanchik. Payqa Taytantam sapa kuti mañakurqa, chaywanmi qawachirqa tukuy sonqonwan serviy munasqanta. Qawasun wañukunanpaq tutapi imayna mañakusqanmanta. Lucasmi kaynata qellqarqa: “Llumpay llakisqallaña kaspanmi tukuy kallpanwan Diosta mañakurqa”, nispa (Luc. 22:44). Jesusqa sonqonmanta Taytanta mañakuspanpas, kaypiqa ñakariypi tarikunanta yachaspanmi aswan “tukuy kallpanwan” mañakurqa, chaymi Taytanqa uyariykurqa. Jesuspa imayna mañakusqanqa kaytam yachachiwanchik: llumpay sasachakuypi tarikuspaqa otaq llumpay mana allinkunawan Satanas intuwaptinchikqa, astawanmi “tukuy kallpanchikwan” Diosta mañakunanchik.
18. a) ¿Ima tapukuytam rurakunanchik, hinaspa imanasqa? b) ¿Imatam rurachwan sonqonchikta waqaychanapaq? (Qawariy 16 paginapi recuadrota.)
18 Hinaptinqa, ¿imaynam tarikusun Diosta mañakuspaqa? Pablom nirqa: “Orakuspaykichikyá lliwta Diosman willaychik hinaspayá payman graciasta qoychik. Hinaptinqa Diosninchikmi hawkayachisunkichik runakunapa mana entiendey atinan hawkayaywan”, nispa (Fili. 4:6, 7). Tukuy kallpanchikwan hinaspa sapa kuti Diosta mañakuyqa, yanapawasunmi tukuy sonqonchikwan Diosta hinalla servinapaq (Luc. 6:12). Chaymi sapakama tapukunanchik: “¿Tukuy kallpanwanchu hinaspa sapa kutichu Diosta mañakuni?”, nispa (Mat. 7:7; Rom. 12:12). Kaymi qawachiwasun sichu tukuy sonqonchikwan Dios serviy munasqanchikta.
19. ¿Imatam qamqa ruranki tukuy sonqoykiwan Diosta hinalla servinaykipaq?
19 Qawamusqanchikman hinaqa, puntapi imakuna churasqanchikmi qawachiwasun sonqonchikpi imakuna munasqanchikta. Rikchan-rikchanlla kaypas ancha allinmi, chaynapim imapas saqesqanchikkuna otaq Satanaspa toqllankuna mana harkawasunchu tukuy sonqonchikwan Diosta servinapaq (leey Lucas 21:19, 34-36). Chaymantapas, David hinamá Jehová Diosta mañakunanchik ‘sonqonchikta hukllawaykunanpaq’ (Sal. 86:11).
[Kay yachachikuypa tapukuyninkuna]
[16 kaq paginapi recuadro]
SONQONCHIKTA WAQAYCHANAPAQ KIMSA YANAPAKUYKUNA
Aycha sonqonchik allin kananpaqqa yanapakuykunam kan, chaynallataqmi tupanachisqa sonqonchik allin kananpaqpas yanapakuykunaqa kan. Qawasun kimsamanta:
1 Mikuyninchikmanta. Aycha sonqonchik allin kananpaqqa, allintam mikunanchik. Chaynallataqmi ñoqanchikpas mikuchkaq hina Bibliata estudiananchik, yuyaymanananchik hinaspa huñunakuykunamanpas rinanchik (Sal. 1:1, 2; Pro. 15:28; Heb. 10:24, 25).
2 Ejercicio rurayninchikmanta. Aycha sonqonchik allin kananpaqqa, sapa kutim ejerciciota rurananchik. Chaynallataqmi Diosmanta sapa kuti willakunapaq kallpanchakusqanchikpas, yanapawasun tupanachisqa sonqonchik allin kananpaq (Luc. 13:24; Fili. 3:12).
3 Ama llumpaytaqa hukmanyasunchu. Mana allin runakunapa kasqanpi kawsasqanchikraykum llumpayta hukmanyanchik, chaykunam mana allinninchikpaq kanman. Chayna mana hukmanyanapaqmi astawan hukllawakunanchik iñiqmasinchikkunawan, paykunaqa ñoqanchikpim interesakunku hinaspapas tukuy sonqonkuwanmi Diosta servinku (Sal. 119:63; Pro. 13:20).
