“Cuidakuychik fariseokunapa qonchunmanta”

Jesusmi qatiqninkunata nirqa: “Cuidakuychik fariseokunapa qonchunmanta otaq iskay uya kayninkumanta”, nispa (Luc. 12:1). ¿Ima niytam kaywanqa munachkarqa? Kaywanqa nichkarqam “fariseokunapa [. . .] yachachikuyninmanta” (Mat. 16:12).

Biblia qonchumanta rimaspanqa wakinpim tupachin huchawan. Arí, fariseokunapa yachachisqanqa runakuna pantaypi kanankupaqmi kallpancharqa. Ichaqa, ¿imanasqataq aswan mana allinraq fariseokunapa yachachisqanqa karqa?

1 Fariseokunaqa hatun tukuqmi karqaku hinaspapas runakunatam cheqniqku.

Huk kaqnin rikchanachisqanpim Jesusqa hatun tukuq fariseokunamanta nirqa: “Fariseom sayaykuspan kikillanpaq kaynata mañakurqa: ‘Graciastam qoyki Diosnilláy. Ñoqaqa manam kani pimantapas qollqen qechuqchu nitaq mana allin ruraqchu nitaq hukwan pierdekuqchu nitaq wak impuesto cobraq runa hinachu. Ñoqaqa semanapim iskay kutita ayunani, ganasqaykunamantapas chunkamantam hukninta qomuyki’ nispa. Impuesto cobraqñataqmi karuneqpiraq sayaykuspa altotapas mana qawarispan qasqonta takakuspan nirqa: ‘Dioslláy, huchasapam kallani, kuyapayariykullawayá’”, nispa (Luc. 18:11-13).

Jesusmi ichaqa impuesto cobraq runata alabarqa humilde kasqanmanta, nirqam: “Chaynaqa fariseomantapas huchanmanta pampachasqaqa wasintaqa kutikurqa impuesto cobraqmi. Pipas hatunchakuqqa humillasqam kanqa, pipas humillakuqñataqmi hatunchasqa kanqa”, nispa (Luc. 18:14). Wakin runakuna hina impuesto cobraqkunata mana allinpaq qawananmantaqa, Jesusqa paykunata yanapaypim kallpanchakurqa. Chaymi Mateowan Zaqueoqa Jesuspa qatiqninkuna rikurirurqaku.

Imapas ruray yachasqanchik, congregacionpi achka rurayniyoq kasqanchik hinaspa iñiqmasinchikkunapa pantasqanta qawasqanchikmi, hatun tukuqta rikurirachiwanchikman. Chay pasawaptinchikqa chayllam cambiananchik, Bibliaqa ninmi: “Pipas kuyakuyniyoqqa pacienciakuqmi, imapas qokuykuqmi, manam envidiosochu, manam alto tukuqchu, manam alabakuqchu, manam penqaypaq ruraqchu, manam kikillanpaq munaqchu, manam piñakuqchu, nitaqmi cheqnikuqchu. Manataqmi kusikunchu hukpa huchankunamantapas aswanqa cheqap kaqmantam kusikun”, nispa (1 Cor. 13:4-6).

Imayna kasqanchikqa apostol Pablopa hinam kanan, paymi nirqa: “Jesucristom kay pachaman hamurqa huchasapakunata salvananpaq”, nispa. Nirqataqmi: “Paykunamantaqa aswan huchallikuqraqmi kani”, nispa (1 Tim. 1:15).

Yuyaymananapaq:

¿Reqsikunichu pantaq kasqayta hinaspa salvacionniypas Diosllamanta kasqanta? Icha, ¿unay wataña Diosta servisqaywan congregacionpi achka rurayniyoq kasqayraykuchu otaq imapas ruray yachasqayraykuchu hatun tukuni?

  2 Fariseokunaqa Diostam yupaychaqku runakuna qawanallanpaq. Munaqkum ancha reqsisqa kayta hinaspa allin sutikunawan qayachikuytapas.

Jesusmi nirqa: “Llapa imatam ruranku runakuna qawanallanpaq. Filacterio sutiyoq cajachakunatam hatunllataña churakunku. Santo tukuspam capankupa cantonkunapipas hatun watukunatapas warkukurunku. Convidokunapipas hinaspa huñunakunanku wasipipas ñawpaqllapi tiyaytam munanku. Munankutaqmi plazakunapi hatun respetowan runakuna rimaykunantapas chaynataq ‘yachachikuq nispa ninankutapas’” (Mat. 23:5-7). ¡Jesusmi ichaqa mana chaynachu karqa! Diospa Churin kaspapas hinaspa mana pantaq kaspanpas humildem karqa. “Allin Yachachikuq” nispa huk mozo qayaptinmi, payqa nirqa: “¿Imanasqataq allin yachachikuq niwanki? Diosllam allinqa”, nispa (Mar. 10:18). Huk kutipiñataqmi humilde kayta qatiqninkunaman yachachirqa paykunapa chakinta mayllaspan (Juan 13:1-15).

Cheqap cristianokunaqa iñiqmasinkutam sonqomanta yanapanku (Gal. 5:13). Chaytam astawanraq rurananku congregacionpi anciano kayta munaqkuna. Chayta haypanankupaq kallpanchakuyninkuqa allinmi, ichaqa sonqomantam munananku runamasin yanapayta. Chayta haypasqankuqa manam hatunchakunankupaqchu. Aswanqa ancianokunaqa Jesus hina “llampu sonqo humillakuqmi” kananku (1 Tim. 3:1, 6; Mat. 11:29).

Yuyaymananapaq:

¿Congregacionpi punta apaqkunatachu aswan allinta qawani huk iñiqmasiykunamantaqa, ichapas ancha reqsisqa kanaypaq otaq congregacionpi imapas rurayta chaskinayrayku? ¿Astawanchu kallpanchakuni imapas ruraypi hukkuna qawawananpaq hinaspa alabawananpaq? ¿Hukkunamanta aswan altopi qawasqa kaytachu munani?

  3 Achka kamachikuykunatam rikurirachirqaku hinaspam chaykunawan runakunata ñakarichirqaku.

Moisespa chaskisqan kamachikuykunaqa Jehová Diosta imayna allintapuni yupaychanamantam qawachirqa, ichaqa manam llasaq qepi hinachu karqa. Qawasun, israel nacionkunapaqqa sabado punchawpi llamkayqa hucham karqa, ichaqa manam nirqachu imakunata ruranamanta hinaspa mana ruranamantapas (Exo. 20:10). Fariseo runakunam ichaqa, huk leykunatawan huk costumbrekunata rikurirachimurqaku. Jesusqa haykapipas kasukurqam Diospa Leyninkunataqa, ichaqa manam haykapipas fariseokunapa leynintaqa kasukurqachu (Mat. 5:17, 18; 23:23). Payqa repararqa imanasqa chay Leyta Dios qellqachisqanmanta, hinaspam yacharqa llakipayakuq kayqa ancha allin kasqantapas. Jesusqa haykapipas entiendeqmi karqa qatiqninkuna pantaruptinkupas. Wañukunanpaqña tutapim kimsa apostolninkunata nirqa rikchan-rikchanlla kanankupaq, ichaqa achka kutikamam puñukururqaku. Chaywanpas paykunata entiendespanmi nirqa: “Allin rurayta munaptikichikpas cuerpoqa mana kallpayoqmi kachkan”, nispa (Mar. 14:34-42).

Yuyaymananapaq:

¿Kamachikuyta hinachu imatapas churani hinaspa hukkunata hikutani chayta ruranankupaq? ¿Nisqaytapuni ruranankutachu munani? ¿Ruray atisqaymanta aswan mastachu hukkunamanta suyani?

Allinmi kanman Jesuspa yachachisqanwan fariseokunapa yachachisqan imapi mana chaynalla kasqanmanta sapakama yuyaymanayninchikqa hinaspa imapas sasachawaqninchik allichana kaptinqa, allintaqmi kanman chaykunata allichaypi kallpanchakuypas.

[28 kaq paginapi dibujo]

Fariseokunaqa cajachapim Bibliapa huk kaqnin textota qellqaqku (Mat. 23:2, 5)

[29 kaq paginapi dibujokuna]

Ancianokunaqa manam fariseo runakuna hinachu kanku, aswanmi hukkunata humildadwan yanapanku

[30 kaq paginapi dibujo]

¿Qatipakunchikchu Jesuspa entiendeq kasqanta?