¡Jehová Diospa sumaq kayninta qawachisun!

‘[Jehová Diospa] sumaqllaña kayninwanmi achkirinchik huk espejo hina’ (2 COR. 3:18).

¿IMATAM NIWAQ?

¿Imanasqataq pantaq kaspapas Diospa sumaq kayninta qawachiyta atichwan?

¿Imaynatam Dios mañakuyninchik hinaspa huñunakuykunapas yanapawanchik Diospa sumaq kayninta qawachinapaq?

¿Imataq yanapawanchikman Diospa sumaq kayninta hinalla qawachinapaq?

1, 2. ¿Imanasqataq Diospa sumaq kayninta qawachiyta atichwan?

LLAPANCHIKMI imallapipas tayta-mamanchikman rikchakunchik. Chaymi wakinpiqa warmakunata ninku: “¡Taytayki kaqllañam kanki!”, nispa. Warmi warmachakunatañataqmi ninku: “Mamayki hinallañam kanki”, nispa. Warmachakunaqa tayta-mamankupa rurasqankutam qatipakunku. ¿Atichwanchu ñoqanchikpas Taytanchik Jehová Dios qatipakuyta? Mana rikuyta atispanchikpas unanchasqankunata qawaspanchikmi sumaq kayninkunamanta yachachwan. Yachachwantaqmi Palabranpa nisqanpi yuyaymanaspa, astawanraqmi Jesuspa yachachisqanpi hinaspa imayna kasqanpi yuyaymanaspaqa (Juan 1:18; Rom. 1:20). Chaynaqa atichwanmi Jehová Diospa sumaq kayninta vidanchikpi qawachiytaqa.

² Manaraq Adantawan Evata unanchachkaspanmi, Diosqa yacharqaña runakuna paypa munayninta ruray atinankumanta, sumaq kayninta qawachiytapas hinaspa hatunchaytapas (leey Genesis 1:26, 27). Unanchaqninchikpa imayna kasqanta qatipakuspaqa, qawachinchiktaqmi Diospa sumaq kayninkunatapas. Kaytaqa llapallanchikmi rurayta atichwan maymantaña kaspanchikpas. ¿Imanasqa? “Diosqa manam pimanpas sayapakunchu, payqa chaskinmi lliw nacionkunapi payta kuyaspa manchakuywan allin ruraq runakunataqa” (Hech. 10:34, 35).

3. ¿Imaynam tarikunchik Diosta servispa?

³ Hanaq pachaman rinankupaq suyakuyniyoq cristianokunaqa Diospa sumaq kaynintam qawachinku. Chaymi Pablo kaynata qellqarqa: “Ñoqanchikpas uyanchik manaña tapasqa kaptinmi Señorpa sumaqllaña kayninwan achkirinchik huk espejo hina”, nispa (2 Cor. 3:18). Diosmanta willakuq Moises Sinai orqomanta  Chunka Kamachikuykunawan uraykamuptinmi, paypa uyanqa llipipipichkarqa Dioswan rimasqanrayku (Exo. 34:29, 30). Ñoqanchiktaqa manamá Moisesta hinaqa pasawarqanchikchu. Chaywanpas kusikuyninchikmi qawakun runakunawan Diosmanta, sumaq kayninkunamanta hinaspa munayninmanta rimaptinchik. Espejo hinam lliw cristianokunaqa Diospa sumaq kayninta qawachinchik imayna kawsasqanchikpi hinaspa Diosmanta willakusqanchikpipas (2 Cor. 4:1). Chaymi llapallanchik tapukunanchik: “¿Qawachichkanichu Diospa sumaq kayninta imayna kawsasqaywan hinaspa Diosmanta sapa kuti willakusqaywan?”, nispa.

MUNANCHIKMI DIOSPA SUMAQ KAYNINTA QAWACHIYTA

4, 5. a) ¿Imawanmi Pablo hina llapallanchik sasachakunchik? b) ¿Imaynatam huchaqa sasachawanchik?

⁴ Diosta serviqkunaqa munanchikmi imapas rurasqanchikwan Jehová Dios hatunchayta. Wakinpim ichaqa chay rurayta mana atinchikchu. Apostol Pablopas sasachakurqam (leey Romanos 7:21-25). Lliw runakuna imanasqa sasachakusqanchikmantam payqa nirqa: “Llapallanchik huchallikuruspam Diospa suma-sumaq qayllanmanta karunchakurunchik”, nispa (Rom. 3:23). Arí, lliw runakunam huchapa munaychakusqan kanchik Adanmanta chaskisqanchikrayku (Rom. 5:12; 6:12).

⁵ ¿Imataq huchaqa? Huchaqa Jehová Diospa sumaq kayninpa, kamachikuyninpa chaynataq munayninpa contranpi kaqkunam. Huchaqa Dioswan amistadninchiktam yanqachan. Imaynam flechaqkunapas may munasqankupi mana hapichinkuchu, chaynam huchapas Diospa sumaq kayninta qawachiy munasqanchikpi mana yanapawanchikchu. Wakinpim yachachkaspa huchallikunchik, wakinpiñataqmi pantasqanchikrayku (Num. 15:27-31). Mana allinkunata ruray munayqa llapanchikpim sapichasqa kachkan, chaymi Diosmanta rakichiwanchik (Sal. 51:5; Isa. 59:2; Col. 1:21). Yaqa lliw runakuna Diosmanta karunchasqa kasqankuraykum, Diospa sumaq kaynintaqa qawachiyta atinkuchu. Arí, huchaqa runakunatam llumpayta imamantapas sasachan.

6. ¿Imanasqam huchasapa kaspanchikpas atichwan Diospa sumaq kayninta qawachiyta?

⁶ Huchasapa kaptinchikpas, Jehová Diosqa suyakuytam qowanchik (Rom. 15:13). Chaypaqmi Churinta kay Pachaman kachamurqa ñoqanchikrayku wañuptin, huchanchikmanta librasqa kananchikpaq. Chay wañusqanpi iñiptinchikqa, manañam ‘huchaqa patronninchik hinañachu’, chaymi atinchik Diospa sumaq kayninta qawachiytaqa (Rom. 5:19; 6:6; Juan 3:16). Dioswan amistadninchik allin kaptinqa, payqa kunanpas yanapawasunmi hinaspapas hamuq tiempopim wiñay kawsayta qowasunchik. Hinaptinqa, huchasapa kaspanchikpas atichwanmi Diospa sumaq kayninta qawachiytaqa. ¡Mayna kusikunapaqmi chayqa!

IMAYNATAM DIOSPA SUMAQ KAYNINTA QAWACHICHWAN

7. ¿Imatam musyakunanchik Diospa sumaq kayninta qawachiyta munaspaqa?

⁷ Diospa sumaq kayninta qawachinapaqqa, sapakamam qawakunanchik imakunapi sapa kuti pantasqanchikta (2 Cro. 6:36). Chaymanta musyakuruspaqa, kallpanchakunanchikmi chayta mana ruranapaq. Chayta ruraspallam Jehová Dios hatunchaytaqa atichwan. ¿Imatam rurananchik millakuypaq qalalla kaqkuna qawayman wichiykuspaqa? Chayna kaptinqa, reqsikunanchikmi yanapakuy necesitasqanchikta hinaspam ancianokunaman asuykunanchik (Sant. 5:14, 15). Chaytam puntata rurananchik Diospa munasqanman hina yupaychanapaqqa. Chaymi cristianokunaqa sapa kuti qawakunanchik, sichus Diospa munasqanman hina kawsasqanchikmanta (Pro. 28:18; 1 Cor. 10:12). Diospa sumaq kayninta qawachiyta  munaspaqa, kallpanchakunanchikmi imapipas sapa kuti pantasqanchikta atipanapaq.

8. Pantaq runa kaspanchikpas, ¿imatam rurananchik?

⁸ Jesusllam pimantapas allintaqa Diospa munasqanman hina kawsarqa hinaspa Diospa sumaq kaynintapas allintapuni qawachirqa. Pantaq runa kaspanchikpas, llapanchikmi kallpanchakunanchik Jesusta qatipakunapaq (1 Ped. 2:21). Jehová Diosqa chaninchanmi hinaspa yanapawanchikmi hatunchanapaq kallpanchakusqanchiktaqa.

9. ¿Imaynatam Bibliaqa yanapawanchik Diospa sumaq kayninta allinta qawachinapaq?

⁹ Bibliaqa yanapawanchikmi Diospa sumaq kayninta allinta qawachinapaq. Chaymi ancha allin sapa kuti leeyninchik hinaspa yachasqanchikkunapi yuyaymanayninchikqa (Sal. 1:1-3). Sapa punchaw Bibliata leeptinchikqa, yanapawasunmi allinkunata astawan rurananchikpaq (leey Santiago 1:22-25). Bibliamanta astawan yachaptinchikqa, iñiyninchikmi aswan kallpanchasqa kanqa, hinaspapas atisunmi mana allinkuna qepanchaytawan Jehová Dios kusichiytapas (Sal. 119:11, 47, 48).

10. ¿Imaynatam Dios mañakuyninchik yanapawanchik tukuy sonqowan Diosta servinapaq?

¹⁰ Diospa sumaq kayninta qawachinapaqqa kasukunanchiktaqmi: “Tukuy tiempoyá Diosta mañakuychik” nispa Bibliapa nisqanta (Rom. 12:12). Arí, Jehová Diostam mañakunanchik munasqanman hina yupaychanapaq. Allinpunim kanman chuya espiritunta, iñiyta hinaspa mana allin munaykunata atipanapaq kallpata qowananchikpaq mañakuyninchikqa hinaspa Palabranta allinta yachachinapaqpas (2 Tim. 2:15; Mat. 6:13; Luc. 11:13; 17:5). Warmachakuna taytankupi hapipakusqankuman hinam, ñoqanchikpas Jehová Diospi hapipakunanchik. Tukuy sonqowan servinapaq Diosta mañakuspanchikqa, manam iskayrayananchikchu uyariwananchikmantaqa. Manataqmi piensanachu mañakuptinchik piñakunanmantaqa. Hawkam mañakuchwan yupaychanapaq, agradecekunapaq hinaspa ima sasachakuytapas atipanapaq. Diostaqa mañakuchwantaqmi servisqanchikwan sutin hatunchasqa kananpaqpas (Sal. 86:12; Sant. 1:5-7).

11. ¿Imaynatam huñunakuykuna yanapawanchik Diospa sumaq kayninta qawachinapaq?

¹¹ Diosqa ovejachankunatam ‘allin yuyayniyoq confianza sirvienteman’ saqeykurqa (Mat. 24:45-47; Sal. 100:3). Chay ‘sirvienteqa’ munanmi Jehová Diospa sumaq kayninta qawachinanchikta. Pachakuna siraqkunaqa sumaqtam pachanchikta allichan allin qawakunanchikpaq, chaynallataqmi huñunakuykunapas allichawachkanchikmanpas hina allinta yanapawanchik imayna kasqanchikpi allin kananchikpaq (Heb. 10:24, 25). Chaymi allinpuni kanman tiempowan chayayninchikqa. Qallaykuptinña sapa kuti chayaspaqa, manamá allintachu yanapachikusun allin cristianokuna kanapaqqa.

DIOSTA QATIPAKUSUN

12. ¿Imaynatam Diosta qatipakunchik?

¹² Diospa sumaq kayninta qawachinapaqqa paytam qatipakunanchik (Efe. 5:1). Chaypaqqa imayna piensasqanman hinataqmi piensananchik. Piensasqallanchikman hina kawsaspaqa, Diostam qepanchachkachwan hinaspapas yanqachakuruchwanmi. Kay Pachapi kaqkunaqa Satanaspa munaychakusqanmi kachkanchik, chaymi Diospa cheqnisqantaqa ñoqanchikpas anchata cheqninanchik, kuyasqantapas sonqomantam kuyananchik (Sal. 97:10; 1 Juan 5:19). Ama qonqasunchu kayta: Diosta allinta servinapaqqa, tukuy imatam pay hatunchasqa kananpaq rurananchik (leey 1 Corintios 10:31).

13. ¿Imanasqam cheqninanchik huchallikuyta, hinaspa imatam rurananchik?

¹³ Jehová Diosqa cheqninmi huchallikuytaqa, ñoqanchikpas cheqninanchiktaqmi.  Chaymi huchallikuyta munapayanamantaqa, kallpanchakunanchik karunchakunapaq. Rimasun Diospa llaqtanmanta lloqsispa contranpi churakuy huchamanta. Chaypaqqa tukuytam rurananchik chay huchaman mana wichiykunapaq, mana chayqa manam atisunchu Diospa sumaq kayninta qawachiytaqa (Deu. 13:6-9). Chaynaqa, qepanchasunyá chay runakunataqa hinaspa familianchikña kaptinpas cristiano tukuspa Diospa contranpi huchallikuqkunatapas (1 Cor. 5:11). Jehová Diospa llaqtanmanta lloqsiruspa contranpi churakuqkunawan atipanakuyqa yanqañam. Manataqmi allinchu kanman qellqankunapi otaq Internetpi imapas nisqankunata yanqallapas qaway munayninchikqa, chayta ruraspaqa iñiyninchikpim yanqachakuruchwan (leey Isaias 5:20; Mateo 7:6).

14. ¿Jehová Diospa ima sumaq kaynintataq qawachinanchik, hinaspa imanasqa?

¹⁴ Jehová Diostaqa qatipakuchwantaqmi kuyakuyninchikta qawachispa (1 Juan 4:16-19). Iñiqmasinchikkunawan kuyanakusqanchikmi qawachin Jehová Diospa serviqnin kasqanchikta hinaspa Jesuspa cheqap qatiqninkuna kasqanchiktapas (Juan 13:34, 35). Wakinpiqa iñiqmasinchikkunawanmi sientinarachikunchik, chayna kaptinpas kallpanchakunanchikmi kuyakuyninchikta qawachinapaq. Chayna kuyakuyniyoq hinaspa sumaq kayniyoqkuna kaspaqa, manam pitapas hukmanyachisunchu nitaq hatun huchakunamanpas wichiykusunchu (2 Ped. 1:5-7).

15. ¿Imanasqam ancha allin kuyakuyniyoq kayqa?

¹⁵ Kuyakuyqa tanqawanchikmi runamasinchikpaq allinkunata rurananchikpaq (Rom. 13:8-10). Qosanchikta otaq señoranchikta kuyaspaqa, manamá haykapipas hukwanqa pierdekusunchu. Congregacionpi ancianokunata kuyaspa hinaspa rurasqankuta chaninchaspaqa, kasukusunmi. Mozo-sipaskunapas tayta-mamankuta kuyaspankuqa, respetaspam kasukunqaku, manataqmi paykunamantaqa mana allinkunataqa rimanqakuchu. Runamasinchikta kuyaspaqa respetasunmi, manam hatunchakuspachu qawasun (Sant. 3:9). Ancianokunapas Diospa ovejachankunata kuyaspankuqa, sumaqtam atiendenqaku (Hech. 20:28, 29).

16. ¿Imanasqam ancha allin kuyakuyniyoq kayqa Diosmanta willakunapaq?

¹⁶ Kuyakuyniyoq kayqa ancha allintaqmi Diosmanta willakunapaqpas. Jehová Diosta anchata kuyasqanchikraykum, paymanta hinalla willakuchkanchik runakuna imataña niwaptinchikpas otaq mana allintaña chaskiwaptinchikpas. Allintataqmi preparakunchik hinaspa kallpanchakunchik aswan allinta predicanapaq. Diosta hinaspa runamasinchikta sonqomanta kuyaspaqa, predicayninchiktaqa manam sasa rurayta hinachu qawasunchik nitaq qellapakusunchikchu ruranapaqqa, aswanmi kusikuywan rurasunchik (Mat. 10:7).

DIOSPA SUMAQ KAYNINTA HINALLA QAWACHISUN

17. Diospa sumaq kayninta qawachinapaq huchallikuy harkawasqanchikrayku, ¿imatam rurananchik?

¹⁷ Yaqa llapallan runakunamantaqa, ñoqanchikqa yachanchikmi huchallikuy mana allinpuni kasqanta. Chaymi Diospa sumaq kayninta qawachinapaqqa, kallpanchakunanchik mana allin munaykunata atipanapaq. Sapa kuti imakunapi pantasqanchikmanta yachayqa, yanapawanchikmi conciencianchik allin kananpaq, chaynapim mana allin munaykunamanta musyakuspa atipasun (Rom. 7:22, 23). Pantaq runakuna kaptinchikpas, Diosqa kallpantam qowasun suni takyananchikpaq (2 Cor. 12:10).

18, 19. a) ¿Imaynatam mana allin espiritukunapa contranpi churakuyta atichwan? b) ¿Imatam rurananchik imaña kaptinpas?

¹⁸ Diospa sumaq kayninta qawachinapaqqa mana allin espiritukunapa contranpim  churakunanchik, chaypaqmi kapuwanchik ‘Diospa qowasqanchik [. . .] armankuna’ (Efe. 6:11-13). Satanasqa hinallam munachkan Jehová Diospa rantinpi yupaychasqa kayta. Hinaspapas tukuytam rurachkan Dioswan amistadninchikta yanqacharunanpaq. Ichaqa millonnintin qarikunawan warmikuna hinaspa warmachakunapas Diosman sonqo kasqanchikraykum chaynataq pantaq kaspanchikpas Diosta hatunchasqanchikraykum, Diabloqa qalaypaq penqaypi qepan. Chaynaqa, Jehová Diostayá hatunchasun hanaq pachapi angelkuna kayna nisqankuman hina: “Diosllayku, qamllam kanki tukuy atipayniyoq adorana hinaspa yupaychana Diosqa. Qanmi unancharqanki tukuy ima kaqkunataqa. Munaynikiman hina unanchaptikim kachkan tukuy imakunaqa”, nispa (Apo. 4:11).

¹⁹ Imaña kaptinpas hinallayá Jehová Diosta hatunchasun. Diostaqa anchatam kusichin payta qatipakunankupaq hinaspa sumaq kayninta qawachinankupaq achkallaña runakuna kallpanchakusqankumanta (Pro. 27:11). David hinam kaynata ninchik: “Diosnilláy, tukuy sonqoywanmi alabasqayki. Wiñaypaqmi qamta yupaychasqayki”, nispa (Sal. 86:12). Hamuq tiempopim, Diospa serviqninkunaqa allintapuni Jehová Diospa sumaq kayninta qawachinqaku hinaspapas wiña-wiñaypaqmi yupaychayta atinqaku. ¡Mayna kusikunapaqchá kanqa! ¿Munankichu Diospa sumaq kayninta wiñaypaq qawachiyta? Chaynaqa, hinallayá tukuy kawsayninchikpi qawachisun.

[Kay yachachikuypa tapukuyninkuna]

[27 kaq paginapi dibujokuna]

¿Yaqachu kaykunata ruraspa Diospa sumaq kayninta qawachichkanki?