Tiempokunamanta yachaq Jehová Diospi confiasun
Tiempokunamanta yachaq Jehová Diospi confiasun
“Payllam tikran tiempokunatapas. Payllam pasachin imam pasanantapas. Payllam reykunatapas gobiernonmanta horqoykun. [Hinaspa] churaykun” (DAN. 2:21).
¿IMATAM NIWAQ?
¿Imaynatam unanchasqa kaqkuna hinaspa Bibliapa willakuyninkuna qawachiwanchik tiempokunamanta Dios yachasqanta?
¿Imaynam kananchik tiempokunamanta Jehová Dios yachasqanmanta mana iskayrayaspaqa?
¿Imanasqam ninchik Diospa tanteasqan tiempoqa mana kay Pachapi imapas pasasqanmantachu nitaq runakunapa tanteasqanmantachu kanqa nispa?
1, 2. ¿Imaynatam yachanchik Jehová Dios tiempokunamanta allintapuni yachasqanta?
MANARAQ runakunata unanchachkaspanmi Jehová Diosqa tiempokuna imayna yupasqa kananmanta rimarqa. Tawa kaq punchawpi unanchaspanmi nirqa: “Cielokuna rakinaqpi achkiqkuna kachun punchawtawan tutata rakinanpaq chaynapi tiempokuna, punchawkuna hinaspa watakuna kananpaq”, nispa (Gen. 1:14, 19, 26). Chayna kanantam Jehová Diosqa munarqa, hinaptinmi kunankama chaynapuni kachkan.
2 Chayna kaptinpas, yachaysapa runakunaqa hinallam kunankama atipanakunku imataq tiempo kasqanmanta. Huk qellqam tiempomanta rimaspan nirqa: “Manam pipas allintapuniqa yachanchu ima kasqantaqa”, nispa. ‘Cielokunatawan [. . .] kay pachata Unanchaq’ Jehová Diosmi ichaqa allintapuni yachan. Paymi ‘hamuq tiempokunapi sucedenanmanta willakun. Manaraq sucedeqkunatam ñawpaqmantapuni willakun’ (Isa. 45:18; 46:10). Qatiqninpim qawasun Diospa wakin unanchasqankunamanta hinaspa wakin willakusqankuna imayna cumplikusqanmanta. Kaykunamanta yachayqa yanapawasunmi Jehová Diospi hinaspa Palabranpi astawan iñinapaq.
DIOSPA UNANCHASQANPI YUYAYMANAYQA IÑIYNINCHIKTAM KALLPANCHAN
3. ¿Imatam qawachin kay Pachapi tukuy qawasqanchikkunaqa?
3 Kay Pachapi tukuy qawasqanchikkunaqa admirakunapaqmi. Kaypi piensariy: Kay allpa Pachaqa hinaspa lucerokunaqa maymi kasqallantam muyunku hinaspa tiempollanpi. Chayna kasqanraykum barcokunapas hawkalla lamar qochanta rinku, chayraykutaqmi para tiempowan rupay tiempopas kan. Arí, chaykunata Unanchaq Jehová Diosqa ancha atiyniyoqmi, chayraykum yupaychananchik (leey Isaias 40:26).
4. ¿Imataq qawachin Jehová Dios yachaywan unanchasqanta?
4 Runakunapas animalkunapas hinaspa plantakunapas admirakuypaqmi unanchasqa kachkanku. Achka animalkunapawan plantakunapa ukunpim reloj hina kamachiqnin kan. Wakin alton pawaq animalkunam yachanku ima tiempopi huklawman pasakunankumanta (Jer. 8:7). Runakunapapas ukunchikpim kapuwanchik reloj hina, chaymi musyachiwanchik tutapi hinaspa punchawpi kasqanchikta. Nacionninchikmanta avionwan karu nacionman riptinchikqa manam chaynallachu imay horapi kasqankuqa, chaymi cuerponchik chay lawpi amañananpaqqa achka punchawkuna pasanan. Arí, Jehová Diospa unanchasqankunam qawachin tiempomanta hinaspa imam pasananmanta yachaq kasqanta chaynataq yachayniyoq hinaspa atiyniyoq kasqanmantapas (leey Salmo 104:24). Chayraykum nichwan haykapipas Diospa munaynin rurakunanmanta.
DIOSPA WILLAKUSQANKUNA TIEMPOLLANPI CUMPLIKUSQANMI IÑIYNINCHIKTA KALLPANCHAN
5. a) ¿Imaynatam yachachwan hamuq tiempopi ima pasananmanta? b) ¿Imanasqam Diosqa niwanchikman imapas haykapi pasananmanta?
5 Unanchasqa kaqkunaqa allintam yachachiwanchik Jehová Dios imayna kasqanmanta. Ichaqa manam yachachiwanchikchu hamuq tiempopi imakuna pasakunanmantaqa (Rom. 1:20). Kaymanta yachanapaqqa qawananchikmi Bibliapi Dios ima niwasqanchikta. Chaypim qawachiwanchik achka willakuykuna tiempollanpi cumplikusqanta. Jehová Diosqa hamuq tiempokunamanta yachasqanraykum niwanchikman ima pasakunanmanta. Bibliapi willakuykunapas tiempollanpim cumplikun Jehová Diospa makillanpi tukuy imapas kasqanrayku.
6. ¿Imaynatam yachanchik Jehová Dios Bibliapi willakuyninkunata entiendenanchikta munasqanta?
6 Jehová Diosqa munanmi Bibliapi willakuyninkunata serviqninkuna allinta entiendenankuta hinaspa chaywan yanapachikunankutapas. Chaymi imapas haykapi pasakunanmanta willakuspanqa entiedenanchikpaq hina willawanchik (leey Salmo 90:4). Qawasun: Apocalipsis librom riman tawa angelkunamanta. “Paykunam chay horapaq, chay punchawpaq, chay killapaq hinaspa chay watapaq alistasqa karqaku”, kaykunataqa allintam entiendenchik (Apo. 9:14, 15). Qawasun Diospa wakin willakuyninkuna nisqanman hina cumplikusqanmanta. Kaykunamanta yachaymi Diospi hinaspa Palabranpi astawan iñinapaq yanapawasun.
7. ¿Imaynatam Jerusalenmantawan Judamanta Jeremiaspa willakusqan qawachin tiempokunamanta allinta Dios yachasqanta?
7 Kutirisun 700 kaq watapi cristianokunapa tiemponmanta ñawpaqman. “Josiaspa churin Rey Joacim Juda nacionpi tawa watamanña gobiernachkaptinmi”, Jehová Diosqa Jeremiasman rimapayarqa “Juda nacionpi llapallan runakunapa contranpi” (Jer. 25:1). Diosqa willakurqam Jerusalen puchukachisqa kananmanta hinaspa judiokuna Babiloniaman apasqa kanankumantapas, chaypim paykunaqa ‘Babilonia nacionpa reyninta qanchis chunka wata servinanku’ karqa. Cristianokunapa tiemponmanta ñawpaqtaraqmi, 607 kaq watapi Babilonia tropakuna Jerusalenta puchukachirqaku, hinaptinmi judiokunaqa presochasqa kaspanku Babiloniaman apasqa karqaku. ¿Imataq pasarqa qanchis chunka wata tukuruptinqa? Jeremiasmi willakurqa: “Diosmi kaynata nin: Babilonia nacionpaq qanchis chunka wata cumplikuruptinmi favorecesqaykichik hinaspa kay sitioman kutimunaykichikpaq rimasqayta cumplisaq”, nispa (Jer. 25:11, 12; 29:10). Kay willakuyqa cumplikurqam 537 kaq watapi, cristianokunapa tiemponmanta ñawpaqtaraq. Chaypim Media hinaspa Persia tropakuna Babiloniamanta judiokunata librarqa.
8, 9. ¿Imaynatam Danielpa willakusqankuna qawachin tiempokunamanta Jehová Dios yachasqanta?
8 Qawasuntaq ñawpaq tiempopi Diospa llaqtanmanta huk willakuytapas. Yaqa iskay wata Babiloniamanta judiokuna lloqsinanpaq kachkaptinmi, Diosqa Danielwan willachirqa 483 watakuna pasayta Mesias chayamunanmanta hinaspa Jerusalenta kaqmanta hatarichinankupaq kamachikuy lloqsimuptin. Media hinaspa Persia nacionkunapa reyninmi 455 kaq watapi kamachirqa Jerusalen kaqman hatarichisqa kananpaq. Hinaptinmi 483 watakuna pasaruptin, 29 kaq watapi Nazaretmanta Jesusqa chuya espirituwan akllasqa kaspan Mesiaspi rikurirurqa (Neh. 2:1, 5-8; Dan. 9:24, 25; Luc. 3:1, 2, 21, 22). *
9 Kunanñataq rimasun Diospa munaychakuyninmanta Bibliapa willakusqanta. Bibliaqa willakurqañam 1914 kaq watapi Jesucristo hanaq pachapi kamachiyta qallarinanmanta. Haykapi Jesus kutimunanmanta Biblia rimaspanmi willakurqa hanaq pachamanta Satanas qarqosqa kaptin kay Pachapi llumpay sasachakuykuna kananmanta (Mat. 24:3-14; Apo. 12:9, 12). Bibliaqa willakurqataqmi 1914 kaq watapipuni ‘mana judio runakunapa munaychakusqan tiempo tukunanmanta’ hinaspa hanaq pachapi Diospa gobiernon qallaykunanmantapas (Luc. 21:24; Dan. 4:10-17). *
10. ¿Imakunam hamuq tiempopi pasakunqapuni?
10 ¿Imataq hamuq tiempopi pasakunqa? Puntataqa, Jesuspa willakusqanman hinam “llumpa-llumpay ñakariy” punchawkuna kanqa. Chaymantañataqmi, Jesusqa Waranqa wata kamachiyta qallaykunqa. Chaykuna kananmantaqa manam iskayrayachwanchu. Kay Pachapi Jesus kachkaptinqa Jehová Diosqa ñam tantearurqaña ‘ima punchawpi otaq imay horapi’ chaykuna kananmanta (Mat. 24:21, 36; Apo. 20:6).
‘TIEMPONCHIKTAQA AMAYÁ USUCHISUNCHU’
11. ¿Imaynam kananchik tukupay tiempopi kawsasqanchikmanta mana iskayrayaspaqa?
11 ¿Imaynam kananchik Jesucristo hanaq pachapi kamachiyta qallaykusqanmantawan ‘tukupay tiempopi’ kawsasqanchikmanta mana iskayrayaspaqa? (Dan. 12:4.) Achka runakunam qawanku imapas aswan mana allinllaña kasqanmanta, ichaqa manam musyakunkuchu chayna kananmanta Biblia willakusqantaqa. Wakinkum ninkum mana allinpi imapas tukunanmanta, wakinñataqmi piensanku runakuna hawkayaytawan seguro kawsakuyta apamunankumanta (1 Tes. 5:3). Ichaqa, ¿ima nichwantaq ñoqanchikmanta? Tukupay tiempopi kawsasqanchikmanta mana iskayrayaspaqa, ¿manachu kallpanchakunanchik tukuy tiemponchikwan Diosta servinapaq hinaspa runakunaman Diosmanta yachachinapaqpas? (2 Tim. 3:1.) Chaymi sapakama kallpanchakunanchik tiemponchikta mana usuchinapaq (leey Efesios 5:15-17).
12. ¿Imatam yachachiwanchik Noeypa tiemponmanta Jesuspa willakusqan?
12 Kunan tiempopi imaymana kusirikuykuna kasqanraykum tiemponchiktaqa chaylla usuchichwan. Jesusmi nirqaña: “Imaynam Noeypa tiemponpi sucedekurqa chaynam sucedekunqa Diosmanta Hamuq Runa kutimuptiypas”, nispa. ¿Imaynam Noeypa tiemponpiqa karqa? Diosqa willakurqañam chay tiempopi mana allin runakuna sinchi parawan chinkachisqa kanankumanta. Noeyqa ‘salvacionmanta willakuqmi’ karqa, chaymi chay tiempopi runakunaman willakurqa (Mat. 24:37; 2 Ped. 2:5). Chay runakunam ichaqa “mikurqaku, upyarqaku, casarakurqaku hinaspa casarachinakurqaku [. . .]. Manam musyakurqakuchu sinchi para chayamuspan llapallanta chinkarachinankama”. Chaymi Jesus nirqa: “Qamkunapas listollayá kaychik, Diosmanta Hamuq Runaqa kutiramusaq mana piensasqaykichik horam”, nispa (Mat. 24:38, 39, 44). Ñoqanchikqa Noeytam qatipakunanchik, manam chay tiempopi runakunatachu. ¿Imataq yanapawasun listolla kanapaq?
13, 14. Jesucristopa kutimunan punchawta suyaspaqa, ¿imatam Jehová Diosmanta yuyarinanchik?
13 Jesucristo qonqayllamanta chayamunanmanta yachaspanchikpas, yuyarinanchikmi tiempokunamanta Jehová Dios allintapuni yachasqanta. Tanteasqan tiempoqa manam kay Pachapi imapas pasasqanmantachu nitaq runakunapa tanteasqanmantachu kanqa. Munaynin rurakunanpaqqa, paypa makillanpim imapas kachkan (leey Daniel 2:21). Proverbios 21:1 nin: “Reypa piensasqanqa Tayta Diospa atiyninpim kachkan parqona yaku hina. Tayta Diosmi munasqanman hina reyta piensachin parqona yaku pusachkaq hina”, nispa.
14 Arí, Jehová Diosqa pitapas servichikunmanmi otaq imatapas ruranmanmi tanteasqan punchawpi munaynin rurakunanpaq. Kay Pachapi tukuy imapas sutilla pasakusqanmi qawachin Bibliapa willakusqankuna cumplikusqanta, astawanraqmi Diospa Munaychakuyninmanta willakuy enteron Pachapi apakusqanqa. Piensasun huk law nacionkunapi runankunata controlaq kamachikuqkunapi. Chay nacionkunapiqa qonqayllamantam chay kamachikuqkunaqa manaña karqañachu. Chaykuna pasakusqanraykum, achka nacionkunapi manaña pipapas harkasqan Diosmanta hawkalla willakuchkanchik. Chaymi llapallanchik kallpanchakunanchik tiemponchikta mana usuchinapaq.
AMA ISKAYRAYASUNCHU DIOS CUMPLINANMANTAQA
15. ¿Imaynatam Diospi confiasqanchikta qawachisun imayna predicanapaq Diospa llaqtan niwaptinchik?
15 Kay tukupay tiempokunapi Diosmanta hinalla willakunapaqqa, manam iskayrayananchikchu tanteasqan punchawpi Dios munayninta rurananmantaqa. Kunan tiempopi imapas utqayllamanña rurana kasqanraykum, ichapas imayna predicasqanchikta cambiana kanqa. Yaqapaschá wakinpiqa allintapuni predicanapaq Diospa llaqtanqa niwasunchik imayna ruranapaq. ¿Imaynatam qawachisun Diospi confiasqanchikta? Qawachisunmi imayna predicanapaq niwasqanchikta kasukuspa chaynataq “llapallan iñiqkunapa uman” Jesucristopi hapipakuspa (Efe. 5:23).
16. ¿Imanasqam mana iskayrayananchikchu “necesitasqanchik tiempokunapi” Jehová Dios yanapawananchikmanta?
16 Jehová Diosqa munanmi “necesitasqanchik tiempokunapi” yanapawayninchikta, chaymi haykapipas mana iskayrayaspa mañakunanchik (Heb. 4:16). ¿Manachu chayqa qawachiwanchik ancha kuyawasqanchikta hinaspa sapakamapi reparasqantapas? (Mat. 6:8; 10:29-31.) Diospi iñisqanchikta qawachisun yanapakuyninta sapa kuti mañakuspa chaynataq mañakusqanchikman hina ruraspapas. Amataq qonqasunchu iñiqmasinchikkunapaq mañakuytapas.
17, 18. a) ¿Imatam pisi tiempollamanta Diosqa ruranqa contranpi hoqarikuqkunata? b) ¿Imatam mana qonqanachu?
17 Kunanqa manapunim tiempoñachu iñiyninchikpi iskayrayanapaqqa, aswanmi iñiyninchikta kallpanchanapaq (Rom. 4:20). Satanaswan munaychakusqan runakunaqa, Diosmanta willakunapaq Jesuspa kamachiwasqanchiktam harkayta munanku (Mat. 28:19, 20). Contranchikpi hoqarikuptinkupas yachanchikmi Jehová Diosqa ‘llapallanpa salvaqnin’ kasqanta, aswanraqmi paypi iñiqkunapaq. Diosqa yachantaqmi “sasachakuykunamanta serviqninkuna libraytaqa” (1 Tim. 4:10; 2 Ped. 2:9).
18 Ñam Jehová Diosqa kay Pachapi mana allinkunataqa chinkachinqaña. Diospa contranpi kaqkunatam Jesucristo tukuchinqa, hinaptinmi Diospa llapallan kamachiq kasqanqa hatunchasqa kanqa. Chaykuna haykapi hinaspa imayna kananmanta mana yachaspapas, manam iskayrayananchikchu tanteasqan punchawpi chaykuna pasakunanmantaqa. Chaynaqa amayá qonqasunchu ima tiempokunapi kawsasqanchikmantaqa. Amataqyá piensasunchu kay Pachata unanchasqa kasqanmantapacha ‘tukuy imapas hina kaqlla kasqantaqa’ (1 Tes. 5:1; 2 Ped. 3:3, 4).
‘CONFIANZAWAN SUYASUN’
19, 20. ¿Imanasqataq ‘Diospi confianzawan suyananchik’?
19 Runakunata Jehová Dios unanchaspanqa, munarqataqmi wiñaypaq kawsanankuta chaynapi paymantawan unanchasqankunamanta yachanankupaq. Jehová Diosmantam Eclesiastes 3:11 nin: “Diosqa tukuy imatam tiempollanpi sumaqllataña rurarqa hinaspam runakunaman qorqa wiña-wiñaypaq kaqkunamanta piensanankupaq. Chaywanpas runaqa manam entiendeyta atinmanchu qallariyninmanta tukuyninkama Diospa rurasqantaqa”, nispa.
20 ¡Anchatamá kusikunchik runakunapaq Jehová Diospa munaynin kunankama hina kaqlla kasqanmanta! (Mal. 3:6.) Arí, ‘Diosqa manam cambianchu llantuy hinaqa’ (Sant. 1:17). Diosqa ‘wiña-wiñaypaq munaychakuqmi’, payqa manamá runakuna hinachu kay Pachapa muyusqanman hinaqa tiempotaqa tantean (1 Tim. 1:17). Hinaptinqa ‘salvaqninchik Diosllapiyá confianzawan suyasunchik’ (Miq. 7:7). Hinaspapas Salmo 31:24 nisqantayá kasukusun: “Diospi confianzawan suyaqkunaqa allinneqtaraqyá kallpanchakuychik, sonqoykichiktayá takyachillaychik”.
[Willakuykuna]
[Kay yachachikuypa tapukuyninkuna]
[19 kaq paginapi dibujo]
Danielqa manam iskayrayarqachu Diospa willakusqan rurakunanmantaqa
[21 kaq paginapi dibujo]
¿Allintachu tiempoykita servichikunki Diospa munayninta ruranaykipaq?
