¿Imanasqataq Jehová Dios serviyninchikta puntapi churananchik?

“Tukuy punchawmi rimallasaq allinlla ruraq kasqaykimanta. Tukuy punchawmi rimallasaq ñoqallay salvaykuwasqaykimanta” (SAL. 71:15).

¿IMA NIWAQTAQ?

¿Imanasqam Noeypas Moisespas Jeremiaspas hinaspa Pablopas Dios serviyta puntapi churarqaku?

¿Ima tapukuykunam yanapasunki tiempoykita allinta servichikunaykipaq?

¿Imanasqataq qamqa munanki Jehová Dios serviyta puntapi churayta?

1, 2. a) ¿Imataq Diosman qokuyqa? b) ¿Imaynatam yanapawasun Noeypa, Moisespa, Jeremiaspa hinaspa apostol Pablopa imayna kawsanankupaq tanteasqankuqa?

DIOSMAN qokuspa bautizakusqanchikqa manam pukllay hinallachu. Tukuy vidanchikwan Diosta servinapaq tanteasqanchikqa imamantapas ancha allinmi. Kaynatapas nichkachwan hinam: “Jehová Diosllay, kunanmantaqa qamllapaqñam kawsasaq. Tiempoyta, kapuqniyta hinaspa imapas ruray yachasqaytaqa qamllapaqñam servichikusaq”, nispa.

² Bautizasqaña kaspaykiqa chaynatamá prometekurqanki. Chay rurasqaykiqa ancha allinpunim, chayraykum alabaykiku. Chaynaqa, ¿imaynatam tiempoykita servichikunayki Jehová Diosllapaqña kawsaspaykiqa? Kay tapukuyta kutichinapaqqa yanapawasunmi Noeypa, Moisespa, Jeremiaspa hinaspa apostol Pablopa ima rurasqankumanta yachayninchik, paykunaqa tukuy sonqonkuwanmi Jehová Diosta servirqaku. Kunan tiemponchikqa tupanmi paykunapa tiemponkuwan, chaymi imayna kawsanankupaq tanteasqankuqa kallpanchawasun tiemponchikta imayna servichikunapaq (Mat. 28:19, 20; 2 Tim. 3:1).

MANARAQ SINCHI PARA CHAYAMUPTIN

3. ¿Imapim tupan Noeypa tiemponqa ñoqanchikpawan?

³ Jesusmi Noeypa tiemponta ñoqanchikpa tiemponchikwan tupachirqa. Nirqam: “Imaynam Noeypa tiemponpi sucedekurqa chaynam sucedekunqa Diosmanta Hamuq Runa kutimuptiypas”, nispa. Chay tiempopim runakunaqa “mikurqaku, upyarqaku, casarakurqaku hinaspa casarachinakurqaku Noey buqueman yaykunankama. Manam musyakurqakuchu sinchi para chayamuspan llapallanta chinkarachinankama” (Mat. 24: 37-39). Kunan tiempopi yaqa llapallan runakunam, ima tiempopi kawsasqanchikta mana musyakuspanku mana kasukunkuchu Diospa serviqninkupa willakusqankuta. Wakin runakunaqa Noeypa tiemponpi runakuna hinam asikunku Diospa piñakuynin chayamunanmanta (2 Ped. 3:3-7). Ichaqa, ¿imapim Noeyqa tiemponta servichikurqa chay sasa tiempokunapiqa?

4. ¿Imapim Noeyqa tiemponta servichikurqa Dios ima rurananmanta niptin, hinaspa imanasqa?

⁴ Diosmi Noeyman nirqa mana allin runakunata chinkachinanmanta hinaspa ima rurananmantapas, chaymi hatun buqueta rurarqa runakunatawan animalkunata salvananpaq (Gen. 6:13, 14, 22). Willakurqataqmi Diospa piñakuynin chayamunanmantapas. Chaymi apostol Pablo payta suticharqa “salvacionmanta willakuq”, nispa. Kaymi sutillata qawachin runakunata yanapananpaq Noey kallpanchakusqanta (leey 2 Pedro 2:5). Ichaqa, ¿allinchu kanman karqa familianwan negociota rurananpaq afanakuyninqa otaq tukuy imayoq kayta maskayninpas? Manamá. Ima pasananmanta yachaspanmi tiemponta allinta servichikurqa.

EGIPTO NACIONPI KAMACHIKUQPA TANTEARUSQANMANTA

5, 6. a) ¿Imapaqmi Moisesqa ‘Egiptopi tukuy yachaykunawan yachachisqa’ karqa? b) ¿Imanasqam Moisesqa Egiptopi tukuy imata qepancharqa?

⁵ Kunanñataq Moisesmanta rimasun, paytaqa faraonpa warmi churinmi aprakurqa hinaspam palaciopi uywarqa. Chayraykum payqa ‘Egiptopi tukuy yachaykunawan yachachisqa’ karqa (Hech. 7:22; Exo. 2:9, 10). Yaqapaschá chaynata yachachiqku palaciopi allinta llamkananpaq. Chay tiempopiqa yaqapaschá ancha reqsisqa kamachikuq karqa hinaspa tukuy imayoqpas. Ichaqa, ¿chaytachu payqa hinalla maskarqa?

⁶ Warmachallaraq kaptinmi Moisestaqa cheqap tayta-mamankuna Diosmanta yachachirqaku, yaqapaschá chayrayku Abrahanman, Isaacman hinaspa Jacobman Diospa prometesqanmanta yacharqa, hinaspam chaykunapi iñirqa. Arí, anchatam hamuq tiempopi ima rurananmanta yuyaymanarqa hinaspa Diosman sonqo kananmantapas. Egipto nacionpi kamachikuq kananmantaqa, ‘payqa Diospa runankunawan kuska ñakariytam akllakuykurqa, hucha vidapi kawsaspan ratollapaq kusikuykunapi kananmantaqa’ (leey Hebreos 11:24-26). Chaymantañataqmi imakuna rurananpaq Jehová Diospa kamachisqanta kasukurqa (Exo. 3:2, 6-10). ¿Imanasqam kasukurqa? Diospa promesankunapi iñisqanraykum hinaspa Egipto runakuna mana allinpi tukunankumanta yachasqanraykum. Chayqa chaynamá karqa, chaymanta qepallamanmi Diosqa chay nacionta chunka castigokunawan tukurachirqa. ¿Imatam kayqa yachachiwanchik kunan tiempopi Dios serviqkunata? Jehová Dios serviyninchiktam puntapi churananchik, kay Pachapi kaqkunata maskanamantaqa.

 JEREMIASQA YACHARQAM IMAM PASAKUNANTA

7. ¿Imapim tupan Jeremiaspa tiempon ñoqanchikpa tiemponchikwan?

⁷ Jeremiaspas Jehová Dios serviynintam puntapi churarqa. Diosmi paymanta willakunanpaq akllarqa hinaspam kamachirqa contranpi churakuq Jerusalen runakunaman chaynataq Juda runakunaman piñakuynin punchawmanta willakunanpaq. Jeremiaspas ñoqanchik hinam tukupay punchawkunapi kawsarqa (Jer. 23:19, 20). Yacharqam tukuy mana allin qawasqankuna puchukachisqa kananmanta.

8, 9. a) ¿Imanasqam Barucqa imayna piensasqanta cambianan karqa? b) ¿Imatam mana qonqananchikchu necesitasqanchikta maskaspaqa?

⁸ Lliw imapas puchukachisqa kananmanta yachaspanmi, Jeremiasqa kapuqniyoq kaytaqa mana maskarqachu. Baruc secretarionmi ichaqa qallariypiqa mana chaynatachu piensarqa. Chaymi Jehová Diosqa Jeremiasnintakama nirqa: “Hatarichisqayta tuñirachispaymi plantasqaytapas qorata pilachkaq hina horqorusaq. Chaynatamá tukurusaq kay enteron naciontapas. ¿Kikikipaqchum maskachkanki admirakuypaq kaqkunata? Chaykunataqa amañayá maskaychu. Llapallan runakunamanmi desgraciakunata kachamusaq. Qanmi ichaqa maymanña rispaykipas kawsayllapas-kawsankiraq”, nispa (Jer. 45:4, 5).

⁹ Imaya karqa Barucpa maskasqan chay ‘admirakuypaq kaqkunaqa’. * Ichaqa yachanchikmi chaykuna imapipas mana yanapananmanta, aswanmi chinkachisqa kanan karqa 607 kaq watapi Babilonia tropakuna Jerusalenta puchukachiptin. ¿Imatam kaymanta yachachwan? Llapanchikmá kallpanchakunanchik necesitasqanchikta tarinapaqqa (Pro. 6:6-11). Ichaqa, ¿allinchu kanman tukuy tiemponchikta hinaspa tukuy kallpanchikta mana ancha yanapawaqninchik kaqkunapi servichikuyqa? Jehová Diospa llaqtanqa hinallamá kallpanchakuchkan Salonkunata, Betel wasikunata hinaspa hukkunatapas rurananpaq. Chayna kaptinpas, kay rurasqankunaqa hamuq tiempopipas servikunqam, chaynapi Diospa munaynin rurakunanpaq. Chaymi lliw cristianokunaqa kallpanchakunanchik Diospa munayninta puntapi churanapaq. ¿Niwaqchu qam sonqomantapuni ‘Diospa munaychakusqantawan paypa munasqan allin rurayta puntata maskasqaykita’? (Mat. 6:33.)

‘QOPATA HINAÑAM HAPINI’

10, 11. a) ¿Imataq Pablopa makillanpi kachkarqa manaraq cristiano kachkaptin? b) ¿Imanasqam Pabloqa saqerurqa judiokunapa religionninpi ñawpariyta?

¹⁰ Kunanñataq Pablomanta rimasun. Manaraq cristiano kachkaspanqa, paypa makillanpim kachkarqa kapuqniyoq hinaspa reqsisqa runa kananpaq. Payqa judiokunapa leyninkunatam estudiarqa ancha reqsisqa Gamaliel sutiyoq yachachiqwan, kamachisqataqmi karqa sacerdotekunapa jefenkunawanpas hinaspam judiokunapa yachachikuyninkunata aswanraq kasukuspan wiñaymasinkunatapas llalliqraq (Hech. 9:1, 2; 22:3; 26:10; Gal. 1:13, 14). Ichaqa judiokunata Jehová Dios qepancharusqanmanta yacharuptinmi manaña chaynañachu karqa.

¹¹ Pabloqa reqsikurqam judiokunapa religionninpi ñawpariyqa, Diospa qayllanpi mana valorniyoq kasqanta hinaspa mana servinantapas (Mat. 24:2). Pabloqa entienderqam Diospa munaynin ima kasqanta, yacharqapunim Diosmanta willakuyqa ancha kusikunapaq kasqanta. Nirqaraqmi ñawpaqpi punta maskasqankuna ‘qopa  hina’ kasqanta. Chayraykum judiokunapa religionninta saqespan kallpanchakurqa kay Pachapiraq kachkaspan Diosmanta willakunanpaq (leey Filipenses 3:4-8, 15; Hech. 9:15).

¿IMAKUNATAM PUNTAPI CHURACHKANCHIK?

12. ¿Imatam Jesusqa bautizakusqan qepata rurarqa?

¹² Noey, Moises, Jeremias, Pablo hinaspa hukkunapas paykuna hinam tiemponkutawan kallpankuta servichikurqaku Diosta servinankupaq, chaymi ancha allinpuni qatipakunapaq. Ichaqa, Diospa llapallan serviqninkunamanta aswan qatipakunapaqmi señorninchik Jesucristo (1 Ped. 2:21). Payqa bautizakusqan qepatam kay Pachapi kachkaspan tukuy tiemponwan Diosmanta willakurqa hinaspa hatuncharqa. Chaynaqa, Jesusta lliw qatipakuq cristianokunapaqqa Dios serviymi puntapi kanan hinaspapas Jehová Diostam kamachiqninta hina reqsikunan. ¿Chaynachu qampaqpas? ¿Imaynatam Diosta astawan servichwan imapas rurayninchikkunata mana saqespalla? (Leey Salmo 71:15; 145:2.)

13, 14. a) ¿Imapaqmi bautizasqa cristianokunaqa kallpanchasqa kachkanku? b) ¿Ima kaytam Diospa lliw serviqninkunata atinmanku?

¹³ Sapa kutim Diospa llaqtanqa kallpanchawanchik Diosta mañakuspa atispanchikqa precursor kanapaq. Wakin cristianokunaqa manamá atinkuchu killapi qanchis chunka hora predicaytaqa, chay mana atisqankumantaqa manam hukmanyanankuchu (1 Tim. 5:8). Ichaqa, ¿ima ninkitaq qamqa? ¿Cheqaptachu precursor kayta mana atinki?

¹⁴ Yuyariy kay watapi Jesuspa wañukusqan punchawta manaraq yuyarichkaspa wakiqninchik Marzo killapi kusikuypaq rurasqanchikpi. Chaypim precursor auxiliar kaqkunaqa akllakuyta atirqaku 30 otaq 50 horata predicanankupaq (Sal. 110:3). Millonnintin iñiqmasinchikkunam chaynata servirqaku, chaymi congregacion kunapiqa ancha kusikuy karqa. ¿Qampas chay rurayta atiwaqchu sapa kuti chayna kusisqa kanaykipaq? Punchaw tukuruptinqa, kusisqallañam cristianoqa Jehová Diosta kaynata nin: “Kunanqa tukuy atisqaytam ruraruni qamta servispay”, nispa.

15. ¿Imaynatam mozo-sipaskuna qawananku estudionkuta?

¹⁵ Mozo-sipas kaspaykiqa hinaspa chayllaraq colegiopi estudiayta tukuspaykiqa, yaqapaschá sano kachkanki hinaspa mana ancha rurayniyoqpas. Chaynaqa, ¿haykapipas tantearqankichu precursor regular kanaykipaq? Profesorkunaqa allinnikipaq piensaspankum universidadpi estudianaykita munanku hinaspa ancha reqsisqa kanaykitapas. Paykunaqa kay Pachapi imapas tukuq kaqkunallapim hapipakunku. Ichaqa Diosta astawan servinaykipaq kallpanchakuspaykiqa allin hinaspa wiñay kaqkunapim hapipakuchkanki. Qatipakuchkankitaqmi Jesuspa rurasqantapas. Chayta ruranaykipaq tanteasqaykiqa kusichisunkim hinaspapas achka sasachakuykunamantam harkasunki, atinkitaqmi Diosman prometekusqaykita cumpliytapas (Mat. 6:19-21; 1 Tim. 6:9-12).

16, 17. ¿Imakunatam tapukunanchik llamkaymanta hinaspa huk ruraykunamantapas?

¹⁶ Achka iñiqmasinchikkunam tukuy punchaw llamkanku familiankuta mantienenankupaq. Wakinñataqmi mana necesitachkaspankupas astawanraq llamkachkanku (1 Tim. 6:8). Kay Pachapi negocio ruraqkunaqa tukuy imatam ruranku imapas rurasqankuta imaynatapas rantinanchikpaq. Ichaqa cheqap cristianokunaqa manam munanchikchu Satanaswan kay  Pachapi runankuna munaychakuwananchiktaqa (1 Juan 2:15-17). ¿Ima nichwantaq jubilasqa cristianokunamanta? Ancha allinmi kanman precursor kaspanku tiemponkuta servichikuyninkuqa, chaynapim Dios serviyninkuta puntapi churachkanku.

¹⁷ Lliw bautizasqa cristianokunaqa kaynatam tapukuchwan: “¿Puntapichu Dios serviyniyta churani? ¿Jesus hinachu kallpaytawan tiempoyta servichikuni Diosta servinaypaq? ¿Kasukunichu Jesuspa qatiway nisqanta? ¿Tiempochakunichu imapas rurayninmanta astawan Diosmanta willakunaypaq hinaspa Dios serviypi ruraykunapaqpas? Tukuy tiempowan Dios serviyta kunan mana atispaypas, ¿hinallachu kallpanchakuni imaynatapas Diosmanta willakunaypaq?”, nispa.

‘DIOSMI [. . .] ALLIN MUNAYTA QOWANCHIK ALLINKUNA RURANAPAQ’

18, 19. ¿Imakunamantawanmi Diosta mañakuwaq, hinaspa imanasqam chayqa Diosta kusichinman?

¹⁸ Anchatam kusikunchik iñiqmasinchikkunapa tukuy sonqonkuwan Dios servisqankuta qawaspa. Ichaqa, wakin iñiqmasinchikkunam atispankupas mana precursor kayta tanteakunkuchu ichapas mana atisqankuta piensaspanku (Exo. 4:10; Jer. 1:6). Chayna kaptinqa, ¿imatam ruranmanku? Allinmi kanman Diosta mañakuyninkuqa. Pablom Filipos cristianokunaman qellqaspan nirqa: “Diosmi munasqanman hina allin munayta qosuspaykichik allinkuna ruranaykichikpaq yanapasunkichik”, nispa (Fili. 2:13). Arí, Diosta astawan servinaykipaq mana munayniki kaptinqa, Diosta mañakuy chay munayta qosunaykipaq hinaspa imayna ruranaykipaqpas (2 Ped. 3:9, 11).

¹⁹ Noeypas Moisespas Jeremiaspas Pablopas hinaspa Jesuspas iñiyniyoq runakunam karqaku. Paykunaqa imawanpas mana harkachikuspankum, tiemponkutawan kallpankuta servichikurqaku Diospa piñakuynin punchawmanta willakunankupaq. Kay Pachapi mana allinkunapa puchukayninqa hichpallapiñam kachkan, chaymi lliw bautizasqa cristianokunaqa kallpanchakunanchik paykunata qatipakunapaq (Mat. 24:42; 2 Tim. 2:15). Chayta ruraspam Diosta kusichisun hinaspa achka bendicionkunatapas chaskisunchik (leey Malaquias 3:10).

[Willakuy]

[Kay yachachikuypa tapukuyninkuna]

[21 kaq paginapi dibujo]

Runakunaqa manam kasukurqakuchu Noeypa willakusqantaqa

[24 kaq paginapi dibujo]

¿Yaqachu tanteakurunkiña precursor kanaykipaq?